Maa Baebolo Ne Ɛhilehile Wɔ

Duzu A Le Nyamenle Belemgbunlililɛ Ne?

Edwɛkɛ ɛhye ka kpuyia bie mɔ mɔɔ bie a wɔbiza ye ɛlɛ la anwo edwɛkɛ yɛɛ ɔkile ɛleka mɔɔ ɛbanyia nwolɛ mualɛ wɔ Baebolo ne anu la. Gyihova Alasevolɛ anye balie kɛ bɛ nee wɔ bazuzu kpuyia ɛhye mɔ anwo.

1. Duzu a le Nyamenle Belemgbunlililɛ ne?

Nyamenle Belemgbunlililɛ ne le anwuma arane. Ɔbaye arane mɔɔ ɛha la kɔsɔɔti yeavi ɛkɛ na yeamaa bɛayɛ Nyamenle ɛhulolɛdeɛ wɔ azɛlɛ ye azo kɛmɔ bɛyɛ ye wɔ anwuma la. Yemɔti Nyamenle Belemgbunlililɛ ne a le arane kpalɛ mɔɔ yɛhyia nwo la sɔbelɛ a.—Kenga Daneɛle 2:44; Mateyu 6:9, 10.

Belemgbunlililɛ biala lɛ ye belemgbunli. Gyihova ɛkpa ɔ Ra, Gyisɛse, kɛ Ye Belemgbunlililɛ ne azo Belemgbunli.—Kenga Luku 1:30-33.

2. Duzu ati a Gyisɛse le Tumivolɛ mɔɔ fɛta ɛ?

Nyamenle Ara ne le Belemgbunli mɔɔ fɛta ɔboalekɛ ɔ ti akunlu le kɛnlɛma, ɔkulo mɔɔ tenrɛ, yɛɛ ɔlɛ tumi mɔɔ ɔbahola yeaboa menli a. (Mateyu 11:28-30) Wɔ ye ewudwazo ne anzi, Gyisɛse hɔle anwuma hɔhendɛle wɔ Gyihova asa fema zo. (Hibuluma 10:12, 13) Awieleɛ kolaa ne, Nyamenle manle ye tumi kɛ ɔbɔ ɔ bo ɔli ebia wɔ anwuma.—Kenga Daneɛle 7:13, 14.

3. Nwane mɔ a nee Gyisɛse bali tumi a?

Menli ekpunli bie mɔɔ bɛfɛlɛ bɛ “Anwuma Anwumanli ne menli” mɔɔ Nyamenle ɛkpa bɛ la nee Gyisɛse bali tumi wɔ anwuma. (Daneɛle 7:27) Gyisɛse nɔhalɛ ɛzoanvolɛ ne mɔ a bɛlumuale bɛkpale bɛ a. Gyihova ɛhɔ zo ɛkpa nɔhavoma kɛ anwodelɛma dedee yeradwu ɛnɛ. Kɛmɔ bɛyɛle Gyisɛse la, bɛdwazo bɛ bɛmaa bɛ sunsum nu sonlabaka.—Kenga Dwɔn 14:1-3; 1 Kɔlentema 15:42-45.

Menli nyɛ a bahɔ anwuma a? Gyisɛse vɛlɛle bɛ “mboane ekpunli ekyi.” (Luku 12:32) Bɛ dodo bayɛ 144,000, yɛɛ bɛ nee Gyisɛse bɛali azɛlɛ ne azo belemgbunli.—Kenga Yekile 5:9, 10; 14:1.

  4. Mekɛ boni a Nyamenle Belemgbunlililɛ ne bɔle ɔ bo a?

Bɛkpale Gyisɛse kɛ Belemgbunli wɔ 1914 ne. * Mekɛ ekyi guale nu la, ɔvuandinle Seetan nee ye sunsum ɛtane ne mɔ ɔguale azɛlɛ ye azo. (Yekile 12:7-10, 12) Ɔvi zɔhane mekɛ ne, alesama ngyegyelɛ ɛhɔ ɔ nyunlu kpalɛ. Konle, azɛlɛkpusulɛ, ɛhɔne, ewulenzane nee mɛladonlɛ boka sɛkɛlɛneɛ mɔɔ maa yɛnwu kɛ ewiade ɛhye ɛbikye ye awieleɛ la anwo. (2 Temɔte 3:1-5) Bɛdabɛ mɔɔ bɛkpondɛ kɛ bɛnyia Nyamenle Belemgbunlililɛ ne azo nvasoɛ la ɔwɔ kɛ sukoa kɛzi bɛbayɛ Belemgbunli Gyisɛse ɛdoavolɛma la.—Kenga Luku 21:7, 10, 11, 31, 34, 35.

5. Duzu a Nyamenle Belemgbunlililɛ ne bayɛ a?

Ɔlua edwɛkɛ ne mɔɔ bɛlɛka ye ewiade amuala la azo, Nyamenle Belemgbunlililɛ ne ɛboa menli mgbe dɔɔnwo mɔɔ bɛvi maanle kɔsɔɔti anu la yemaa bɛnwu Nyamenle ndenle. (Mateyu 24:14) Saa ɔlɛsɛkye ninyɛndane mɔɔ wɔ azɛlɛ ye azo la a, ɔbabɔ “menli pemgbenleamgbe” ne anwo bane.—Kenga Yekile 7:9, 10, 13-17.

Ngyikyi ngyikyi, Belemgbunlililɛ ne bava ɛvolɛ 1,000 yeamaa azɛlɛ ne ahakyi paladaese. Awieleɛ bɔkɔɔ ne, Gyisɛse bazia ava Belemgbunlililɛ ne amaa ɔ Ze. (1 Kɔlentema 15:24-26) Asoo ɛlɛ awie mɔɔ ɛbahulo kɛ ɛbaha Nyamenle Belemgbunlililɛ ne anwo edwɛkɛ wɔahile ye ɔ?—Kenga Edwɛndolɛ 37:10, 11, 29.

Saa ɛkpondɛ nwolɛ edwɛkɛ dɔɔnwo a, nea buluku ɛhye, Duzu A Baebolo ne Kilehile Amgba A? mɔɔ Gyihova Alasevolɛ ɛyɛ la tile 8 nee 9.

[Ɔ bo ɛkɛ ne edwɛkɛ]