Paibangat ed Salita na Dios

Anto so Panarian na Dios?

Nabasa ed sayan artikulo iray maslak ya itetepet na totoo tan no iner ed Biblia so pakaromogay ebat. Maliket ya ipaliwawa ed sika na saray Tasi nen Jehova irayan ebat.

1. Anto so Panarian na Dios?

Say Panarian na Dios et sakey a gobiernon walad tawen. Onsalat iya ed amin a gobierno tan sumpalen na saya so linawa na Dios diad tawen ontan met ed dalin. Kanian say Panarian na Dios so ebat ed aanapen tayon maong a gobierno.​—Basaen so Daniel 2:44; Mateo 6:9, 10.

Kaukolan ya walay ari ed sakey a panarian. Tinuro nen Jehova so Anak to, si Jesus, pian magmaliw ya Ari ed Panarian To.​—Basaen so Lucas 1:30-33.

2. Akin a sankaabigan a Manuley si Jesus?

Sankaabigan ya Ari so Anak na Dios lapud sikatoy mapangasi, mapekder ed no antoy duga, tan makapanyarin tuloy pian ontulong ed totoo. (Mateo 11:28-30) Kayari na inkioli nen Jesus, sikatoy pinmawil ed tawen tan nanalagar ed nikawanan nen Jehova. (Hebreos 10:12, 13) Asabi panaon, sikatoy inikdan na Dios na pakayari pian onggapon manuley ed tawen.​—Basaen so Daniel 7:13, 14.

3. Siopa iray nakaiba nen Jesus a manuley?

Say grupon tatawagen a “saray sasanto” so pinili na Dios pian nakaiba nen Jesus a manuley ed tawen. (Daniel 7:27) Saray inmunan pinili a sasanto et saramay matoor ya apostol nen Jesus. Anggad natan et mamipili ni si Jehova na matoor a lalaki tan bibii bilang sasanto. Singa si Jesus, sikaray napaoli ed espiritual a laman.​—Basaen so Juan 14:1-3; 1 Corinto 15:42-45.

Pigara so onla ed tawen? Tinawag ira nen Jesus ya “melag a pulok.” (Lucas 12:32) Say bilang da et 144, 000, tan sikaray nakaiba nen Jesus a manuley ed dalin.​—Basaen so Apocalipsis 5:9, 10; 14:1.

  4. Kapigan ginmapon manuley so Panarian na Dios?

Nagmaliw ya Ari si Jesus nen 1914. * Tinmumbok ed satan et imbantak Toy Satanas tan saray demonyo to diad dalin. (Apocalipsis 12:7-10, 12) Manlapu lad saman, lalon linmoor so problema na katooan. Saray guerra, yegyeg, eras, epidemya, tan kaugsan so kabiangan na tanda a sayan sistema na mundo et wala lad kaunoran ya agew. (2 Timoteo 3:1-5) Nepeg ya aralen na amin a malabay a minabang ed Panarian na Dios no panon iran magmaliw a papatumbok na Ari, si Jesus.​—Basaen so Lucas 21:7, 10, 11, 31, 34, 35.

5. Antoy sumpalen na Panarian na Dios?

Panamegley na panagpulong ed interon mundo, natutulongan la na Panarian na Dios so minilyon a totoo ed amin a bansa pian makaaral nipaakar ed Dios. (Mateo 24:14) Protektaan na satan so matoor a “baleg ya ulop” ya uuleyan nen Jesus sano deralen la na satan iyan mauges a sistema na mundo.​—Basaen so Apocalipsis 7:9, 10, 13-17.

Legan na 1,000 taon, kalkalnan pagmaliwen na Panarian a paraiso iyan dalin. Diad kaunoran, iyawat la nen Jesus ed Ama to so Panarian. (1 Corinto 15:24-26) Wala tay kabat mo a labay mon pangitongtongan nipaakar ed Panarian na Dios?​—Basaen so Salmo 37:10, 11, 29.

Parad kaaruman nin impormasyon, nengnengen so kapitulo 8 tan 9 na sayan libro, Anto so Peteg ya Ibabangat na Biblia?, ya in-publish na saray Tasi nen Jehova.

[Paimano ed leksab]