Siña Konosé e Palabra di Dios
Kiko e Reino di Dios Ta?
E artíkulo akí ta trata algun pregunta ku kisas bo tin i e ta mustra bo unda pa haña e kontestanan den bo Beibel. Si bo ta deseá, Testigunan di Yehova gustosamente lo trata e preguntanan akí ku bo.
1. Kiko e Reino di Dios ta?
E Reino di Dios ta un gobièrnu selestial. Lo e remplasá tur otro gobièrnu i lo kumpli ku Dios su boluntat tantu den shelu komo riba tera. Pues e Reino di Dios ta e gobièrnu ku nos tur tin mester di dje.—Lesa Daniel 2:44; Mateo 6:9 i 10.
Tur gobièrnu mester tin un hende na kabes. P’esei, Yehova a nombra su Yu, Hesus, komo Rei di Su Reino.—Lesa Lukas 1:30-33.
2. Dikon Hesus ta e Gobernante ideal?
E Yu di Dios ta e Rei ideal pasobra e ta bondadoso, ta aktua ku hustisia i e tin poder pa yuda hende. (Mateo 11:28-30) Despues ku Dios a resusitá Hesus, el a subi bai shelu i a sinta warda na man drechi di Yehova. (Hebreonan 10:12, 13) Finalmente, Dios a dun’é poder pa kuminsá goberná for di shelu.—Lesa Daniel 7:13 i 14.
3. Ta Hesus so lo goberná?
Dios a skohe un grupo di hende pa goberná huntu ku Hesus den shelu. Beibel ta yama nan “e santunan.” (Daniel 7:27) E proménan ku Dios a skohe tabata Hesus su fiel apòstelnan. Te ku awe Yehova a sigui agregá na e grupo akí hòmbernan i muhénan fiel. Meskos ku Hesus, nan ta resusitá ku un kurpa spiritual.—Lesa Juan 14:1-3; 1 Korintionan 15:42-45.
Kuantu hende ta bai shelu? Hesus a papia di un “tou chikitu.” (Lukas 12:32) Na tur nan lo ta 144.000 i nan lo goberná tera huntu ku Hesus.—Lesa Revelashon 5:9 i 10; 14:1.
4. Na ki tempu e Reino di Dios a kuminsá goberná?
Hesus a bira Rei na aña 1914. * Djis despues, el a tira Satanas i su demoñonan abou riba tera. (Revelashon 12:7-10, 12) For di e tempu ei, humanidat su problemanan a oumentá drástikamente. Guera, temblor, hamber, epidemia i maldat ta parti di un señal ku ta indiká ku e sistema aktual ta den su último dianan. (2 Timoteo 3:1-5) Tur hende ku ke biba bou di e Reino di Dios mester siña kiko nan tin ku hasi pa bira siguidó di e Rei Hesus.—Lesa Lukas 21:7, 10, 11, 31, 34 i 35.
5. Kiko e Reino di Dios lo logra?
Pa medio di un predikashon mundial, e Reino di Dios ya kaba ta yuda miónes di hende for di tur nashon siña e kamindanan di Dios. (Mateo 24:14) Ora e Reino destruí e sistema malbado akí lo e protehá “un multitut grandi” di súpditonan leal di Hesus.—Lesa Revelashon 7:9, 10 i 13-17.
Durante un periodo di 1.000 aña, e Reino gradualmente lo hasi e tera un paradeis. Na fin di e mil aña, Hesus lo entregá e Reino bèk na su Tata. (1 Korintionan 15:24-26) Lo bo ke konta un hende loke bo a siña tokante e Reino?—Lesa Salmo 37:10, 11 i 29.
Pa mas informashon, wak kapítulo 8 i 9 di e buki akí, Kiko Beibel Ta Siña Realmente?, publiká pa Testigunan di Yehova.
[Nota]
^ par. 13 Pa mas detaye tokante kon profesia bíbliko ta señalá na aña 1914, wak página 215-218 di e buki Kiko Beibel Ta Siña Realmente? publiká pa Testigunan di Yehova.