Diospa Palabrampita yachatsikïkuna

¿Imataq Diospa Reinon?

Kë yachatsikïmi yanapashunki wakin tapukïkunapa respuestanta Bibliëkichö tarinëkipaq, y tsë tapukïkunataqa itsa qampis rurakushqanki. Munaptikiqa Jehoväpa testïgonkuna yanapariyäshunkimanmi kë tapukïkunapa respuestanta más yachakurinëkipaq.

1. ¿Imataq Diospa Reinon?

Ciëlochö këkaq Diospa Gobiernonmi, kë Gobiernoqa nunakunapa gobiernompa rantinmi kanqa, y Diospa munënintam ciëlochö y Patsachöpis ruramunqa. Kë Gobiernoqa llapantsik wananqantsik gobiernom. (Lei Daniel 2:44; Mateo 6:9, 10.)

Ima gobiernochöpis huk mandakoqmi kan, tsënö kaptinmi Jehoväqa Tsurin Jesucristuta Gobiernonchö mandakunampaq churashqa. (Lei Lucas 1:30-33.)

2. ¿Imanirtaq Jesusqa más alli kaq mandakoq?

Kuyakoq, imëpis allita ruraq y nunakunata yanapanampaq kallpayoq karmi Diospa Tsurinqa más alli kaq mandakoq (Mateo 11:28-30). Wanutsiyanqampita kawariramurmi Jesusqa ciëlota ëwakurqan, pero manam tsë höratsu mandakur qallëkurqan (Hebreus 10:12, 13). Gobernanampaq autoridadta chaskinqanyaqmi Diospa lädonchö shuyararqan. (Lei Daniel 7:13, 14.)

3. ¿Huk nunakunapis Jesuswan gobernayämunqatsuraq?

Bibliaqa willakun Jehoväpa wakin sirveqninkunawan Jesus gobernamunampaq kaqtam. Daniel 7:27 textochöqa santokuna nishpam qayan. Santo kayänampaq puntata Dios akranqankunaqa Jesuspa apostolninkunam kayarqan. Kanan witsankunayaqmi Jehoväqa santo kayänampaq akrëkan ollqukunata y warmikunatapis llapan shonqunkunawan markäkoqkunata o yärakogkunata. Kë nunakunaqa Jesusnömi wanuriyanqampita espïritunö kawariramurnin ciëlota ëwayan. (Lei Juan 14:1-3; 1 Corintios 15:42-45.)

¿Ëkaqraq ciëlota ëwayanqa? Jesusqa “wallcalla” üshakuna nirqanmi (Lucas 12:32). Huk pachak chusku chunka chusku waranqa (144.000) nunakunallam Jesuswan Patsata gobernayämunqa. (Lei Apocalipsis 5:9, 10; 14:1.)

  4. ¿Imëpitanataq Diospa Gobiernon mandakur qallashqa?

Jesusqa 1914 watachömi rey këman charqan. * Tsëpita ichikllatanam Satanasta y supayninkunata ciëlopita Patsaman weqaparkamurqan (Apocalipsis 12:7-10, 12). Tsëpita patsëmi Patsachöqa tukï nakakïkuna o hipakïkuna mirashqa. Kanan witsan guërrakuna, Patsa kuyïkuna, qeshyakuna, mallaqë y tukï mana alli rurëkunam rikätsikun, mana alli nunakuna ichikllachöna ushakäriyänampaq kaqta (2 Timoteu 3:1-5). Tsë Gobiernochö bendicionkunata chaskïta munarqa mandakoq Jesustam wiyakuyänan. (Lei Lucas 21:7, 10, 11, 31, 34, 35.)

5. ¿Imakunataraq Diospa Gobiernon ruramunqa?

Kë Gobiernoqa hinantin Patsamanmi Diospa yachatsikïninta chëkätsin, tsënöpam atska millón nunakunata yanapëkan Dios munanqannö kawayänampaq (Mateo 24:14). Pero manam tsëllatatsu ruramunqa. Mana alli nunakunatam ushakätsinqa y “mana yupetapis puedipaq” Jesuspa serviqninkunatam salvanqa. (Lei Apocalipsis 7:9, 10, 13-17.)

Waranqa watachömi kë Patsata huk shumaq Patsaman tikratsinqa. Tsëpitanam Jesusqa mandakïninta Teytanta entreguëkunqa (1 Corintios 15:24-26). Tsë Gobiernopita, ¿pillatapis willëta munankiku? (Lei Salmo 37:10, 11, 29.)

Maslla yachakïta munarqa, Rasumpëpaqa, ¿imatataq Biblia yachatsikun? libropa 8 y 9 kaq capïtulonkunata leirï, kë librotaqa Jehoväpa testïgonkunam rurayämushqa.

[Päginapa ura kuchunchö willakï]