Diospa Siminmanta yachachikuykuna

¿Imataq Diospa Reinonri?

Kaypin Bibliaykiwan tapukuyniykikunaman kutichiykunata tarinki. Munaqtiykiqa Jehová Diospa testigonkunan yanapasunkiman kay tapuykunata t’aqwinaykipaq.

1. ¿Imataq Diospa Reinonri?

Diospa reynonqa Diospa Gobiernonmi. Chay Gobiernon kay pacha gobiernokunaq rantinpi kanqa, chhaynapin Diospa munaynin hunt’akunqa hanaq pachapi kay pachapipas. Llapallanchismi Diospa Gobiernonta necesitanchis. (Leey Daniel 2:44; Mateo 6:9, 10.)

Llapa gobiernopipas huk kamachikuqtan necesitanku. Jehová Diospas Churin Jesucristotan akllarqan Gobiernonpi Rey kananpaq. (Leey Lucas 1:30-33.)

2. ¿Imaynapitaq Jesucristori allin kamachikuq?

Diospa Churinqa khuyapayakuq ancha sumaq reymi, chanin kaqllatapunin ruwan hinaspapas atiyniyoqmi runakunata yanapananpaq (Mateo 11:28-30). Kawsarimpusqan qhepamanmi Jesusqa hanaq pachaman ripurqan, ichaqa manan kaq pachachu kamachikuyta qallarirqan (Hebreos 10:12, 13). Aswanpas Diospa paña ladonpin suyakurqan kamachikuqta churanankama. (Leey Daniel 7:13, 14.)

3. ¿Sapallanchu Jesús kamachikamunqa?

Manan. Bibliaq nisqan hina, Jesusqa wakin akllasqa cristianokunawanmi kamachimunqa. Biblian paykunata sutichan ch’uya runakuna nispa (Daniel 7:27, NM). Jesuspa apostolninkunatan ñawpaqta akllakurqan ch’uya runa kanankupaq. Kunankamapas Jehová Diosqa akllashallanmi allin iñiyniyoq qharikunata warmikunatawan. Jesús hinan paykunaqa wañupusqanku qhepaman, hanaq pachaman ripunku espiritual cuerpopi. (Leey Juan 14:1-3; 1 Corintios 15:42-45.)

¿Hayk’a runakunan hanaq pachaman rinqaku? Jesusmi paykunata suticharqan “huch’uy t’aqa”, nispa (Lucas 12:32). 144.000 runakunan kanku, Jesuswan kuskataq kay pachata Gobiernamunqaku. (Leey Apocalipsis 5:9, 10; 14:1.)

 4. ¿Hayk’aqmi Diospa Gobiernon kamachikuyta qallarirqan?

1914 watapin Jesusqa rey hina churasqa karqan. * Chaymantataq Satanasta supayninkunatawan hanaq pachamanta kay pachaman wikch’uykamurqan (Apocalipsis 12:7-10, 12). Chaymantapachan guerrakuna, yarqaykuna, onqoykuna, mana allin ruwaykuna ima yapakushan, chaymi reparachiwanchis tukukuy tiempopaq profeciakuna hunt’akusqanta (2 Timoteo 3:1-5). Diospa Gobiernonmanta bendicionkunata chaskiy munaqkunaqa, Jesustan qatikunanku. (Leey Lucas 21:7, 10, 11, 31, 34, 35.)

5. ¿Imakunatan Diospa Gobiernon ruwanqa?

Pachantinpi predicación aparikusqanwanmi waranqanpi runakunata yanapakushan Diosmanta yachanankupaq (Mateo 24:14). Ichaqa manan chayllatachu ruwanqa. Kay pachamanta millay kawsayta chinkachispanmi Dios sonqo “ancha askha runakunata” pakaykunqa. (Leey Apocalipsis 7:9, 10, 13-17.)

Waranqa watapin kay Hallp’ata paraisoman tukuchinqa. Chaymantataq Jesusqa chay Gobiernota Taytanman qopunqa (1 Corintios 15:24-26). ¿Pillamanpas kay Gobiernomanta willayta munawaqchu? (Leey Salmo 37:10, 11, 29.)

Astawan yachayta munanki chayqa ¿Imatapunin Biblia yachachin? nisqa librota qhaway 8, 9 capitulokunata, chaytaqa Jehová Diospa testigonkunan ruwan.

[Uranpi willakuy]