Aʻoaʻoga a le Tusi Paia

O le ā le Malo o le Atua?

O loo talanoaina i lenei mataupu ni fesili atonu sa e fia maua i ai ni tali, ma o loo faaalia ai mau o le Tusi Paia e maua ai. E fiafia Molimau a Ieova e tou te talanoa i nei tali.

1. O le ā le Malo o le Atua?

O le Malo o le Atua o se faigāmalo i le lagi. O le a faataunuuina e lenei Malo le finagalo o le Atua i le lagi ma le lalolagi ma suia malo uma o loo iai. E pau lea o le faigāmalo e mafai ona faamalieina manaʻoga uma o tagata.—Faitau le Tanielu 2:44; Mataio 6:9, 10.

Ua tofia e Ieova lona Alo o Iesu e avea ma tupu o lona Malo.—Faitau le Luka 1:30-33.

2. Aiseā ua agavaa ai Iesu e avea ma Tupu?

Ua agavaa le Alo o le Atua e avea ma Tupu ona o lona alofa, maumauaʻi e faia le mea tonu ma e lava ma totoe lona mana e fesoasoani ai i tagata uma. (Mataio 11:28-30) Ina ua toetū Iesu, na afio aʻe o ia i le lagi ma faatalitali i le itu taumatau o Ieova. (Eperu 10:12, 13) Mulimuli ane, na tuuina atu e le Atua iā te ia le mana e pule ai mai i le lagi.—Faitau le Tanielu 7:13, 14.

3. O ai o le a pule faatasi ma Iesu?

Ua tofia e le Atua se vaega ua taʻua “o le ʻaupaia” e pule mai i le lagi faatasi ma Iesu. (Tanielu 7:27) O i latou na muaʻi tofia i lea vaega, o le ʻauaposetolo faamaoni a Iesu. E oo mai i le asō, o loo faaauau pea ona tofia e Ieova tane ma fafine faamaoni i lea vaega. E toetutū mai foʻi i latou i tino agaga e pei o Iesu.—Faitau le Ioane 14:1-3; 1 Korinito 15:42-45.

E toʻafia le vaega e ō i le lagi? E 144,000 lo latou aofaʻi, ma ua taʻua i latou e Iesu o le “lafu mamoe itiiti.” (Luka 12:32) O le a latou pule faatasi ma Iesu mai i le lagi i le lalolagi.—Faitau le Faaaliga 5:9, 10; 14:1.

4. O anafea na amata ai le pulega a le Malo o le Atua?

Na amata le pulega a Iesu i le 1914. * Ona sosoo ai lea ma lona lafoina mai o Satani ma ana temoni i le lalolagi. (Faaaliga 12:7-10, 12) Talu mai lenā taimi, ua matuā faateteleina faafitauli o tagata. O mea e tutupu e pei o taua, mafuiʻe, oge, faamaʻi, ma solitulafono, o vaega na o le faailoga e iloa ai ua lata mai le iʻuga. (2 Timoteo 3:1-5) O i latou uma e mananaʻo e maua faamanuiaga o le Malo o le Atua, e ao ona avea ma soo o Iesu, le Tupu o le Malo.—Faitau le Luka 21:7, 10, 11, 31, 34, 35.

5. O ā mea ua faataunuuina e le Malo o le Atua?

Ua fesoasoani le Malo o le Atua i le faitau miliona ina ia iloa ala o Ieova, e ala i le galuega talaʻi i le lalolagi atoa. (Mataio 24:14) O le a puipuia ai foʻi le “motu o tagata e toʻatele” po o ē e lagolagoina Iesu, pe a oo mai le faaumatiaga o lenei lalolagi amioleaga.—Faitau le Faaaliga 7:9, 10, 13-17.

A o faagasolo le pulega a le Malo mo le afe tausaga i le lumanaʻi, o le a suia le lalolagi e avea ma parataiso. Pe a māeʻa lenā, ona toe faafoʻi lea o le Malo e Iesu i lona Tamā. (1 Korinito 15:24-26) Pe e te iloa nisi o fia faalogo i lenei tala lelei o le Malo o le Atua?—Faitau le Salamo 37:10, 11, 29.

Mo nisi manatu, tagaʻi i le mataupu e 8 ma le 9 o lenei tusi, ua lomia e Molimau a Ieova.

[Faaopoopoga i lalo]