Teki leri fu Gado Wortu

San na Gado Kownukondre?

Na artikel disi e poti prakseri na sani di yu ben kan aksi yusrefi èn a e sori pe yu kan feni den piki na ini yu Bijbel. Yehovah Kotoigi ben o breiti fu taki nanga yu fu den piki disi.

1. San na Gado Kownukondre?

A Kownukondre fu Gado na wan tirimakti na hemel. A o puru ala tra tirimakti èn a o meki a wani fu Gado pasa na hemel èn na grontapu. Wi abi wan bun tirimakti fanowdu, èn Gado Kownukondre o tyari dati kon gi wi.​—Leisi Danièl 2:44; Mateyus 6:9, 10.

Wan kownukondre musu abi wan kownu. Yehovah poti en Manpikin, Yesus, leki a Kownu fu En Kownukondre.​—Leisi Lukas 1:30-33.

2. Fu san ede Yesus na a moro bun Tiriman?

Gado Manpikin na a moro bun Kownu di Gado ben kan poti, fu di a abi switifasi, a e hori ensrefi na san reti, èn a abi a makti fu yepi sma (Mateyus 11:28-30). Baka di Yesus kisi wan opobaka, a opo go na hemel èn a bigin wakti na Yehovah en reti-anu sei (Hebrewsma 10:12, 13). Te fu kaba, Gado gi en a makti fu bigin tiri na hemel.​—Leisi Danièl 7:13, 14.

3. Suma moro o tiri makandra nanga Yesus?

Gado teki wan grupu „santawan” fu tiri makandra nanga Yesus na ini hemel (Danièl 7:27). Den fosiwan di Gado ben teki fu tron santawan, ben de den apostel fu Yesus di ben tai hori na en. Teleki now, Yehovah e tan teki mansma nanga umasma di e tan gi yesi, leki santawan. Neleki Yesus, den sma disi e kisi wan opobaka leki yeye.​—Leisi Yohanes 14:1-3; 1 Korentesma 15:42-45.

Omeni sma e go na hemel? Yesus ben kari den wan „pikin ipi” (Lukas 12:32). Ala nanga ala, a nomru fu den o de 144.000 sma, èn den o tiri grontapu makandra nanga Yesus.​—Leisi Openbaring 5:9, 10; 14:1.

  4. O ten Gado Kownukondre bigin tiri?

Yesus ben tron Kownu na ini 1914. * Syatu baka dati, a fringi Satan nanga den ogri yeye fu en kon na grontapu (Openbaring 12:7-10, 12). Sensi a ten dati, libisma kisi fu du nanga moro bigi problema. Na ini a ten disi sma e feti, gronseki e pasa, angriten de, siki de di e kiri ipi-ipi sma, èn moro nanga moro sma e du ogri. Den sani disi na wan pisi fu wan marki di e sori taki disi na den lasti dei fu a grontapu sistema disi (2 Timoteyus 3:1-5). Ala sma di wani kisi den wini di Gado Kownukondre e tyari, musu kon sabi san den musu du fu tron bakaman fu Kownu, Yesus.​—Leisi Lukas 21:7, 10, 11, 31, 34, 35.

5. San Gado Kownukondre e du now èn san a o du na ini a ten di e kon?

Nownow kaba Gado Kownukondre e yepi milyunmilyun sma fu ala kondre fu kon sabi den pasi fu Gado, fu di a preikiwroko e du na heri grontapu (Mateyus 24:14). Te Gado Kownukondre o pori a disiten ogri sistema na grontapu, dan a o kibri „wan bigi ipi” fu den bakaman fu Yesus di e tan gi yesi na en.​—Leisi Openbaring 7:9, 10, 13-17.

Na ini wan pisi ten fu 1000 yari, dan safrisafri a Kownukondre o meki grontapu tron wan paradijs. Te fu kaba, Yesus o gi a Kownukondre baka na en Tata (1 Korentesma 15:24-26). Yu ben sa wani fruteri wan sma di yu sabi, fu Gado Kownukondre?​—Leisi Psalm 37:10, 11, 29.

Efu yu wani sabi moro, dan luku kapitel 8 nanga 9 fu a buku disi, San Bijbel e leri wi trutru?, di Yehovah Kotoigi tyari kon na doro.

[Futuwortu]