Hen Kwagh Ken Mkaanem Ma Aôndo

Kanyi i Lu Tartor u Aôndo?

Ngeren ne time sha mbampin mba alaghga u vanden pinen yô, shi a tese ape ú fatyô u zuan a mbamlumun sha mbampin mba shon ken Bibilo you yô. A doo Mbashiada mba Yehova kpishi u lamen sha mbamlumun mban vea we.

1. Kanyi i lu Tartor u Aôndo?

Tartor u Aôndo ka gomoti u sha. Ua tim ugomoti mbagenev cii shi ua na a gema eren ishima i Aôndo sha man shin tar cii. Nahan ka Tartor u Aôndo ua va a gomoti u dedoo u kwagh a gbe se a mi la ye.—Ôr Daniel 2:44; Mateu 6:9, 10.

Gba u tartor ua lu a tor u hemen u. Yehova tsua wan na Yesu ér a lu Tor u Tartor Na.—Ôr Luka 1:30-33.

2. Yesu ngu Tor u injaa sha ci u nyi?

Yesu ka Tor u injaa sha ci u ngu ishima legh legh, shi til dông sha kwagh u vough, shi ngu a tahav kpishi mbu wasen ior kpaa. (Mateu 11:28-30) Yange mba nderen Yesu shin ku yô, a kôndo a yem sha, a za hii u keghen ken uwegh ku yanegh ku Yehova. (Mbaheberu 10:12, 13) Ken masejime yô, Aôndo na un tahav, nahan hii u hemen sha.—Ôr Daniel 7:13, 14.

3. Ka unô vea hemen vea Yesu?

Aôndo tsua nongo u i yer u ér “uicighanmbaiorov” la sha u u hemen sha vea Yesu. (Daniel 7:27) Lu mbaapostoli mba Yesu mba jighjigh mbara i hii tsuan ve ér ve lu uicighanmbaiorov ye. Yehova za hemen u tsuan nomso man kasev mba jighjigh ér ve lu uicighanmbaiorov zan zan hegen. Ka i nder ve a iyol i ken jijingi la, er Yesu nahan.—Ôr Yohane 14:1-3; 1 Mbakorinte 15:42-45.

Ka iorov ume vea yem sha? Yesu yange yila ve ér “anikumuile u kpeghee.” (Luka 12:32) Ken masejime yô, iyenge ve cii ia lu 144,000, shi vea hemen sha tar vea Yesu.—Ôr Mpase 5:9, 10; 14:1.

  4. Lu hanma shighe Tartor u Aôndo hii u hemene?

Yesu yange hingir Tor ken inyom i 1914. * Fese je maa a daa Satan man azôv a na a gbihi shin tar ne. (Mpase 12:7-10, 12) Hii shighe la je, mbamzeyol mba uumace mba seer a seer. Ityav man ijen man ityartenger man ubombauangev man mvende u vendan atindi la cii ka ikyav i tesen ér tar ne ngu ken ayange a masejime. (2 Timoteu 3:1-5) Mba ve soo ér vea zua a mtsera u Tartor u Aôndo la cii, gba u vea hen er vea er ve vea hingir mbadondon mba Tor Yesu yô.—Ôr Luka 21:7, 10, 11, 31, 34, 35.

5. Tartor u Aôndo ua er nyi?

Hegen je kpa, Tartor u Aôndo ngu wasen ior umiliôn imôngo ken akuraior cii u henen igbenda i Aôndo, sha tom u pasen kwagh u i lu eren tar sha won cii la. (Mateu 24:14) Ua kura “zegeikpelaior” i ungwan imo i Yesu la shighe u ua tim botar ne kera la.—Ôr Mpase 7:9, 10, 13-17.

Tartor la ua gema tar ne kure kure ken atô u anyom 1,000 ua hingir paradiso. Ken masejime yô, Yesu una hide a Tartor la una na Ter na. (1 Mbakorinte 15:24-26) U fa ma or u ú soo wer u ôr nan kwagh u Tartor la je he?—Ôr Pasalmi 37:10, 11, 29.

Wea soo u seer zuan a iwanger yô, ôr ityough 8 man ityough 9 ki takerada u Bibilo Tese Ér Nyi Jimi? ka Mbashiada mba Yehova ve gber u ye.

[Ngeren u shin kpe]