Sambirani Kufuma mu Mazgu gha Ciuta

Kasi Ufumu wa Ciuta Ni Vici?

Mu nkhani iyi muli mafumbo agho panji muli kujifumbapo ndipo yikulongora uko mungasanga mazgoro mu Baibolo linu. Ŵakaboni ŵa Yehova ŵazamuŵa ŵakukondwa kudumbiskana namwe mazgoro agha.

1. Kasi Ufumu wa Ciuta ni vici?

Ufumu wa Ciuta ni boma lakucanya. Uzamuwuskapo maboma ghose gha pa caru capasi ndipo uzamupangiska kuti khumbo la Ciuta lifiskike kucanya na pa caru capasi. Ntheura Ufumu wa Ciuta ndilo ni boma liwemi ilo lizamutipa ivyo tikusoŵerwa.—Ŵazgani Daniel 2:44; Mateyu 6:9, 10.

Ufumu ukwenera kuŵa na Themba. Yehova wali kusankha Mwana wake, Yesu, kuŵa Themba la Ufumu wake.—Ŵazgani Luka 1:30-33.

2. Cifukwa wuli Yesu ngwakwenelera kuwusa?

Mwana wa Ciuta ngwakwenelera kuŵa Themba cifukwa ngwalusungu, wakuskepelera ku ico nchiwemi, ndipo wali na nkhongono zakovwilira ŵanthu. (Mateyu 11:28-30) Wati wawuskika ku ŵakufwa, Yesu wakaluta kucanya na kukakhala ku woko lamalyero la Ciuta na kulindilira kuti wapike Ufumu. (Ŵahebere 10:12, 13) Pamanyuma, Ciuta wakamupa nkhongono kuti wambe kuwusa kucanya.—Ŵazgani Daniel 7:13, 14.

3. Mbanjani ŵanyake awo ŵazamuwusa na Yesu?

Gulu lakucemeka “ŵatuŵa” likusankhika na Ciuta kuti lizakawuse pamoza na Yesu kucanya. (Daniel 7:27) Ŵapositole ŵa Yesu ndiwo ŵakaŵa ŵakwamba kusankhika kuŵa ŵatuŵa. Mpaka sono, Yehova wacali kusankha ŵanalume na ŵanakazi ŵakugomezgeka kuŵa ŵatuŵa. Nga ni Yesu, nawo ŵakuwuskika na thupi lauzimu.—Ŵazgani Yohane 14:1-3; 1 Ŵakorinte 15:42-45.

Kasi mbanthu ŵalinga ŵakuluta kucanya? Yesu wakaŵacema “kamskambo kacoko.” (Luka 12:32) Wose pamoza ŵazamuŵa 144,000, ndipo ŵazamuwusa caru capasi pamoza na Yesu.—Ŵazgani Uvumbuzi 5:9, 10; 14:1.

  4. Kasi Ufumu wa Ciuta ukamba pawuli kuwusa?

Yesu wakaŵa Themba kwamba mu 1914. * Pakati pajumpha nyengo yicoko waka, wakaponya Satana na viŵanda vyake pa caru capasi. (Uvumbuzi 12:7-10, 12) Kwambira mu nyengo iyo, masuzgo gha ŵanthu ghakasazgikira comene. Ntheura ivyo vikucitika sono nga ni, nkhondo, vindindindi, njara, zinthenda, na ucikanamalango ni vimoza mwa vimanyikwiro vya mazuŵa ghaumaliro. (2 Timote 3:1-5) Wose awo ŵakukhumba kusanga candulo na Ufumu wa Ciuta ŵakwenera kusambira umo ŵangaŵira ŵalondezgi ŵa Yesu, uyo ni Themba.—Ŵazgani Luka 21:7, 10, 11, 31, 34, 35.

5. Kasi Ufumu wa Ciuta ukufiska vici?

Kwizira mu mulimo wa kupharazga uwo ukucitika pa caru cose, Ufumu wa Ciuta wamba kale kovwira ŵanthu ŵa mitundu yose kusambira nthowa za Ciuta. (Mateyu 24:14) Uzamuvikilira “mzinda ukuru” wa ŵalondezgi ŵa Yesu ŵakugomezgeka pa nyengo iyo uzamuparanya vinthu viheni vyose pa caru capasi.—Ŵazgani Uvumbuzi 7:9, 10, 13-17.

Mu nyengo ya vilimika 1,000, Ufumu wa Ciuta uzamuzgora caru capasi kuŵa paradiso. Paumaliro, Yesu wazamuwezgera Ufumu kwa Adada ŵake. (1 Ŵakorinte 15:24-26) Kasi mukumanyapo munyake uyo mungatemwa kumuphalirako vyakukhwaskana na Ufumu wa Ciuta?—Ŵazgani Salmo 37:10, 11, 29.

Kuti mumanye vinandi, wonani vipaturo 8 na 9 mu buku la Kasi Baibolo Likusambizgaci Comenecomene? lakupharazgika na Ŵakaboni ŵa Yehova.

[Mazgu ghamusi]