Mahibaro Tikang ha Pulong han Dios

Ano an Ginhadian han Dios?

Ini nga artikulo naghihisgot hin mga pakiana nga bangin nahunahuna mo na, ngan iginpapakita hini kon diin ha Biblia mabibilngan an mga baton hito. Nalilipay an mga Saksi ni Jehova nga hisgotan ini nga mga baton ha imo.

1. Ano an Ginhadian han Dios?

An Ginhadian han Dios usa nga langitnon nga gobyerno. Ito an masaliwan ha ngatanan nga gobyerno ngan ipapahinabo hito an kaburut-on han Dios ha langit ngan ha tuna. Salit ito nga Ginhadian amo an solusyon ha aton panginahanglan hin maopay nga gobyerno.—Basaha an Daniel 2:44; Mateo 6:9, 10.

An ginhadian kinahanglan may-ada hadi. Ginpili ni Jehova an Iya Anak, hi Jesus, nga magin an Hadi han Iya Ginhadian.—Basaha an Lukas 1:30-33.

2. Kay ano nga hi Jesus an angayan nga magin Magmarando?

An Anak han Dios an angayan magin Hadi tungod kay hiya makonsiderasyon, marig-on ha kon ano an husto, ngan may gahum ha pagbulig ha mga tawo. (Mateo 11:28-30) Katapos banhawon, sinaka hi Jesus ha langit ngan naghulat ha too nga kamot han Dios. (Hebreo 10:12, 13) Ha urhi, gintagan hiya han Dios hin gahum nga magmando tikang ha langit.—Basaha an Daniel 7:13, 14.

3. Hin-o an makakaupod ni Jesus ha pagmando?

Usa nga grupo nga gintatawag nga “mga baraan” an ginpili han Dios basi makaupod ni Jesus ha pagmando ha langit. (Daniel 7:27) An siyahan nga ginpili nga magin mga baraan amo an matinumanon nga mga apostol ni Jesus. Tubtob yana, padayon nga nagpipili hi Jehova hin magtinumanon nga kalalakin-an ngan kababayin-an sugad nga mga baraan. Pariho kan Jesus, babanhawon hira sugad nga espiritu.—Basaha an Juan 14:1-3; 1 Korinto 15:42-45.

Pira nga tawo an makadto ha langit? ‘Gutiay nga panon,’ sugad han tawag ni Jesus ha ira. (Lukas 12:32) Ha urhi, maabot hira hin 144,000, ngan magmamando ha tuna kaupod ni Jesus.—Basaha an Pahayag 5:9, 10; 14:1.

  4. Kakan-o nagtikang magmando an Ginhadian han Dios?

Nagin Hadi hi Jesus han 1914. * Waray pag-iha, iya iginlabog hi Satanas ngan an mga demonyo hito nganhi ha tuna. (Pahayag 12:7-10, 12) Tikang hito nga panahon, nagtikaduro gud an problema han katawohan. An mga girra, linog, gutom, sakit, ngan kasamokan bahin han pangirilal-an nga nagpapakita nga matatapos na inin presente nga sistema. (2 Timoteo 3:1-5) Salit kon karuyag naton makapahimulos tikang ha Ginhadian han Dios, sadang kita mag-aram kon paonan-o magigin sumurunod han Hadi, hi Jesus.—Basaha an Lukas 21:7, 10, 11, 31, 34, 35.

5. Ano an ginhihimo han Ginhadian han Dios?

Pinaagi han pagsangyaw nga buruhaton ha bug-os nga kalibotan, nabubuligan na han Ginhadian han Dios an minilyon nga mga tawo nga mahibaro han mga paagi han Dios. (Mateo 24:14) Papanalipdan hito an “daku nga panon” han maunungon nga mga sakop ni Jesus kon bungkagon na hito inin maraot nga sistema ha tuna.—Basaha an Pahayag 7:9, 10, 13-17.

Ha sulod hin 1,000 ka tuig, hinay-hinay nga hihimoon han Ginhadian an tuna nga paraiso. Katapos, ibabalik ni Jesus an Ginhadian ha iya Amay. (1 Korinto 15:24-26) May kilala ka ba nga karuyag mo sumatan mahitungod han Ginhadian han Dios?—Basaha an Salmo 37:10, 11, 29.

Para hin dugang nga impormasyon, kitaa an kapitulo 8 ngan 9 hini nga libro Ano Gud ba an Igintututdo han Biblia? nga iginpublikar han mga Saksi ni Jehova.

[Footnote]