Bipangujo bya Batangi . . .

Lelo Leza ulēmekele musaka umo kupita mukwabo?

▪ Mhm, ke amopo. Bible unena patōkelela amba: “Leza kalemekangapo bantu’mba: Yeu ye yeu, mhm. Nanshi mu mizo yonso enka umutyina, ulonga bilumbuluke nabya ye waitabijibwa kudi aye.”—Bilongwa 10:34, 35.

Mumweno wa Leza pa uno mwanda udi peulu bininge kupita wa bantu bampikwa kubwaninina. Bantu bavule betabije amba musaka umo (divule wabo) udi peulu kupita wa bakwabo. Uno mushipiditu wa ami bidi ulombola mulangwe wa Charles Darwin, walembele amba: “Mwenda mafuku, . . . misaka ya bantu ba kizungu ikakubija, ne kupingakana yoya ya bantu ba kunja.” I kya bulanda, mwanda bantu bavule bamweshibwanga malwa na boba ba misaka mikwabo bemona bu badi peulu kupita bakwabo.

Le kumona amba kudi musaka mupite mikwabo i kwendele’mo? Kimfwa, le sianse i milombole amba nsange ya misaka imo i mitabuke ya misaka mikwabo? Mhm, mwanda Bryan Sykes, mwifundi wa nsange kadi mwadimu wa mu Oxford unena’mba: “I kutupu nsange ya kyalwilo ishiyañanya muzo mukomo nansha musaka kampanda. . . . Bañipangulanga nyeke shi kudi ADN ya Bangidiki nansha nsange ya Bene Itadi, ino na bubine, keidi’kopo. . . . Twiifwene mpata.”

Bino bintu bisokolwe i bikwatañane na byobya byotutanga mu Bisonekwa. Bible ufundija amba Leza wāpangile mwana-mulume umo ne mwana-mukaji umo, kobadi ko kutambile mizo yonso ya bantu. (Ngalwilo 3:20; Bilongwa 17:26) Nanshi Leza umwene amba kudi musaka umo onka—musaka wa muntu.

Yehova kalēmekelangapo muntu ku lukoba nansha ku mumwekelo wa mpala yandi. Ino, ukwete na bulēme kintu kampanda kidi na mvubu mpata—mutyima wetu wa kyelekejo, ko kunena’mba muntu wetu wa munda. Aye mwine unena’mba: “Muntu ubandila ponka paelele meso, ino Yehova ubandilanga pa mutyima.” (1 Samwele 16:7) Kuvuluka uno mwanda kukokeja kwitukankamika bininge. Muswelo’ka?

Nansha twikale ba musaka’ka, bavule motudi kebasangelangapo mumwekelo wa bipindi bimo bya ngitu yetu, nansha nankyo ketudipo na bukomo bonso bwa kushinta bino bintu. Inoko, tukokeja kulumbulula kintu kine kya mvubu mpata—milangwe ne mwiivwanino wa mutyima wetu. (Kolose 3:9-11) Shi twi bantu ba bubinebine, tukajingulula amba kitufikilanga kyaba kimo kwimona bu bapite nansha bapitwe na musaka mukwabo. Uno mumweno byokeukwatañenepo na mulangilo wa Leza, tufwaninwe kulonga bukomo bwa kutalula mulangilo wa uno muswelo mu mityima yetu.—Mitōto 139:23, 24.

Potulonga bukomo bwa kwimona ne kumona bakwetu mwibamwena Yehova, tukulupilei amba uketukwasha. Kinenwa kyandi kinena’mba: “Meso a Yehova akeñenya kusambakanya ntanda yonsololo, konsokonso pi na pi, kwilomboja mukomo wa boba ba mutyima mubwaninine kwadi.” (2 Bilongwa 16:9) Kino i kya bine nansha shi twikale ba lukoba’ka.