Revistanchikta leeqkunam tapukunku

¿Mayqen castallatataq Diosqa favorecen?

▪ Bibliam nin: “Diosqa manam pimanpas sayapakunchu, payqa chaskinmi lliw nacionkunapi payta kuyaspa manchakuywan allin ruraq runakunataqa”, nispa (Hechos 10:34, 35).

Kaymi qawachiwanchik, runakunapa piensasqanmantaqa Diospa piensasqan aswan allin kasqanta. Ichaqa, wakin runakunam piensanku hukkunapa castanmantaqa paykunapa castan aswan allin kasqanta. Chayna piensayqa tupan Charles Darwinpa qellqasqanwanmi, paymi nirqa: ‘Tiempopa risqanman hinam imapipas ñawpariq castakuna mana chayna kaqkunataqa chinkachinqa’, nispa. Llakikuypaqmi castanku aswan allin kasqanpaq hapikuqkuna mana chayna kaqkunata ñakarichisqankuqa.

¿Allinchu chayna rurasqanku? ¿Yachayniyoq runakunapa estudiasqan, qawachinchu mayqen castapas aswan allin kasqanta? Universidad de Oxford nisqanpi imapas imayna rikurimusqanmanta estudiaq Bryan Sykes sutiyoq profesormi nin: ‘Manam mayqen castapas wakin castamanta aswan allinqa kanchu [. . .]. Sapa kutim tapuwanku sichum ADN nisqan griegokunapawan italianokunapa huk rikchaq kasqanmanta, ichaqa manam chaynachu. [. . .] Llapanchikmi huk castalla kanchik’, nispa.

Chay nisqanmi tupan Bibliapa yachachisqanwan, Diosmi unancharqa chullalla qaritawan warmita, paykunamanta miraqmi llapallanchik kanchik (Genesis 3:20; Hechos 17:26). Diospaqqa huk castallam runakunaqa kanchik.

Jehová Diosqa manam imayna colorniyoq otaq rikchayniyoq kasqanchiktachu qawan, payqa qawan sonqonchiktam otaq imayna runa kasqanchiktam. Kikinmi nin: “Runapa qawasqanqa manam ñoqapa qawasqay hinachu. Runaqa qawan hawallantam, ñoqam ichaqa qawani sonqonta”, nispa (1 Samuel 16:7). Kaymanta yachasqanchikqa anchatam kusichiwanchik. ¿Imanasqa?

Mayqan castamanta kaspapas, wakiqninchikpaqqa manapaschá gustonchikpaqchu kanman rikchayninchik, sayayninchik otaq colorninchikpas, chaykunataqa manam llapantaqa cambiayta atichwanchu. Ichaqa cambiachwanmi, imayna piensayninchikpi hinaspa sonqonchikpipas (Colosenses 3:9-11). Imayna kasqanchikta qawarikuspaqa musyakuchwanpaschá wakinmantaqa aswan allin kasqanchikpaq hapikusqanchikta otaq mana valeqpaq hina hapikusqanchiktapas. Kallpanchakunanchikmi chayna piensaykunata chinkachinapaq, Diospa piensasqanwan mana tupasqanrayku (Salmo 139:23, 24).

Diospa piensasqanman hina ñoqanchikpas kallpanchakuptinchikqa paymi yanapawasun. Chaymi Biblia nin: “Tayta Diosqa qawamuchkanmi llapallan kay pachapi pasaqkunata chaynapi paypa qayllanpi allin sonqoyoqkunaman atiyninta qawachinanpaq”, nispa (2 Cronicas 16:9). ¡Mayna kusikunapaqmi mayqen castamanta kaptinchikpas Bibliapa nisqan cumplikusqanqa!