Suma meki den wet fu hemel?

„YU FRUSTAN den wet fu hemel?” (Yob 38:33, The New Jerusalem Bible) Di Gado poti na aksi disi gi Yob, dan a ben yepi a futuboi fu en di ben de nanga broko-ede, fu frustan taki libisma sabi pikinso nomo te yu ben o teki en gersi nanga a kefalek bigi koni fu a Mekiman. Fa yu e feni a fasi fa Gado agersi den tu sani dati nanga makandra?

Libisma kon sabi furu fu den wet fu hemel, ma furu sabiman de klariklari fu agri taki moro sani de ete fu leri. Ibri leisi baka te sabiman e kon sabi nyun sani, dan dati e meki den go denki baka fu den sani di den ben taki kaba fu a fasi fa sani e buweigi na hemel. A de so taki den nyun sani di sabiman kon sabi meki taki den sani di Gado ben wani sori Yob, no tru moro? Noso a de so taki den nyun sani disi e gi moro buweisi taki Yehovah na a Sma di meki den wet fu hemel?

Bijbel e taki fu heri moi sani di e yepi wi fu gi piki tapu den sortu aksi dati. A no de fu taki dati Bijbel a no wan sabidensi buku. Ma te a e taki fu hemel nanga den stari, dan san a e taki fu den de soifri, èn nofo tron sma na a ten dati no ben sabi den sani dati ete.

San sma ben denki fosi fu hemel

Fu man kon sabi wan tu sani, wi o go na ini a di fu fo yarihondro bifo Krestes, sowan hondro yari baka di na Owru Testamenti, noso den Hebrew buku fu Bijbel kaba skrifi. Na a pisi ten dati, a Griki filosofiaman Aristoteles ben e leri den moro prenspari sabiman fu a ten dati fu den stari nanga planeiti na hemel. Te na a dei fu tide, sma e si en leki wan fu den moro prenspari sabiman di ben libi oiti. (Luku a  faki na tapu bladzijde 25.) Wan buku e taki dati „Aristoteles ben de a fosi sma na ini a historia di yu kan kari wan trutru sabiman. . . . Ibri sabiman musu de nanga tangi gi den sani di a du” (Encyclopædia Britannica).

Aristoteles ben kon nanga wan denki pe a ben sori finifini fa sani de na hemel. A ben taki dati wan sistema de na hemel pe 50 sani de di lontu leki wan bal èn di de na ini makandra. Den sani dati meki fu kristal. Na mindrisei fu a sistema yu abi grontapu, baka dati yu e kisi den planeiti èn te fu kaba den stari. Ala sani dorosei fu grontapu e tan fu têgo èn den no e kenki. Gi wi na ini a ten disi, den denki dati kan gersi anansitori, ma toku den ben abi krakti tapu sabiman sowan 2000 yari langa.

Ma san na a difrenti na mindri den leri fu Aristoteles nanga den sani di skrifi na ini Bijbel? Sortuwan fu den sani dati sori fu de tru? Meki wi poti prakseri na dri aksi di abi fu du nanga den wet fu hemel. Den piki o yepi wi fu abi wan moro tranga bribi na ini a Skrifiman fu Bijbel, a Sma di meki „den wet fu hemel”.​—Yob 38:33.

1. Den sani na hemel no e kenki?

Aristoteles ben taki dati den sani lontu den stari nanga planeiti no e kenki. A lontu sani di ben hori den stari na den presi èn sosrefi den tra lontu sani, no ben man krempi noso kon moro bigi.

Bijbel e taki a srefi sani?  Nôno. A no e taki finifini fu a sani disi. Ma luku a moi sani disi di a e taki: „Gado e tan na tapusei fu a lontu grontapu pe den libisma de leki sprenka. A e bradi hemel leki wan fini krosi èn leki wan tenti pe sma kan tan.”​—Yesaya 40:22. *

Sortuwan fu den denki disi e fiti gi a ten disi? A di fu Aristoteles noso a di fu Bijbel? Fa sabiman na ini a ten disi e denki fu den sani na hemel? Na ini a di fu 20 yarihondro, sabiman di e ondrosuku stari nanga planeiti ben fruwondru fu kon sabi taki den sani na hemel e kenki. Fu taki en leti, grupu fu stari nanga planeiti e drifi gowe fu makandra èn a sani dati e pasa esi-esi. Wan tu sabiman nomo, noso nowan srefi, ben denki taki sani ben kan kenki so na hemel. Tide na a dei, furu sabiman e bribi taki na a bigin, den sani na hemel ben de heri krosibei fu makandra èn sensi a ten dati den e drifi gowe fu makandra. Fu taki en leti, sabidensi e sori taki a denki fu Aristoteles no tru.

Ma fa a de nanga den wortu fu Bijbel? A no muilek fu prakseri fa so wan man leki a profeiti Yesaya ben luku fa hemel lai nanga stari èn fa a ben denki taki a sani dati gersi wan tenti di de na tapusei. * A ben kan si srefi taki a starigrupu di nen a Melkwegstelsel, gersi „fini krosi”.

Boiti dati, te wi ben o leisi den wortu fu Yesaya, dan a ben o gersi leki wi kan si leti na wi fesi fu san a ben taki. Kande wi ben o prakseri wan tenti na ini Bijbel ten. Kande wi e si kaba fa wan sma e bradi a deki krosi di tai na ini wan bondru opo, so taki a man poti postu fu opo a tenti.  Na so a de tu taki yu kan prakseri wan bisnisman di e teki wan bondru fu fini krosi èn a e bradi en opo so taki wan klanti kan luku a krosi. Te yu luku den tori disi, dan wan sani di pikin e bradi opo èn na so a e kon moro bigi.

Ma wi no e taki dati a fasi fa den moi wortu fu Bijbel di e taki fu wan tenti èn fu fini krosi, e fruklari fa hemel e kon moro bigi. A no moi fu si fa Bijbel e taki na so wan fasi fu hemel dati a e fiti so bun na den sani di sabidensi tyari kon na krin na ini a ten disi? Yesaya ben libi moro leki dri hondro yari bifo Aristoteles, èn tu dusun yari bifo sabidensi ben kon nanga buweisi fu a tori disi. Ma toku den sani di a Hebrew profeiti disi di ben abi sakafasi ben skrifi, no abi fu kenki neleki den kefalek denki fu Aristoteles.

2. San e hori den stari nanga planeiti na den presi?

Aristoteles ben feni taki hemel ben lai nanga stari nanga planeiti. A ben feni taki grontapu nanga a loktu na en lontu meki fu den fo sani disi: doti fu a gron, watra, loktu nanga faya. Dorosei fu dati ben lai nanga kristal sani lontu den stari nanga planeiti. Den lontu sani dati meki fu wan sani di a kari ether èn di e tan fu têgo. Den stari nanga planeiti fasi na den lontu sani disi di yu no man si. Fu wan langa pisi ten furu sabiman ben agri nanga a denki fu Aristoteles fu di a ben fiti na a fasi fa sma ben denki na a ten dati. Sma ben abi a denki taki wan sani musu de na tapu wan tra sani, noso a musu fasi na wan tra sani fu no fadon.

Fa a de nanga Bijbel? A e taki fu den sani di a reti-ati man Yob, ben taki fu Yehovah: „A anga grontapu na noti” (Yob 26:7). Aristoteles ben o feni taki a sani disi no kan kwetikweti.

Na ini a di fu 17 yarihondro, sowan 3000 yari baka a ten fu Yob, sabidensi ben feni taki hemel no ben lai nanga den kristal sani lontu planeiti nanga stari. Na presi fu dati, den ben feni taki wan sortu watrawatra sani ben de na den lontu. Ma na a kaba fu a yarihondro dati, sabiman Sir Isaac Newton ben kon nanga wan heri tra denki. A ben taki dati wan krakti de di e hari den sani na hemel kon na makandra. Newton ben kon frustan pikinso taki grontapu nanga den tra sani na hemel, de na ini a loktu èn den no e anga na „noti”.

Furu sma ben de teige a denki dati fu Newton. A ben muilek ete gi furu sabiman fu frustan taki wan sani di yu no man si nanga yu ai, man hori den stari nanga planeiti na den presi. Fa a kefalek bigi grontapu fu wi, noso den planeiti nanga stari ben kan anga nomo na ini a loktu? Son sma ben feni taki dati no kan. Sensi a ten fu Aristoteles, furu sabiman ben bribi taki a loktu musu fu abi wan sani.

A no de fu taki dati Yob no ben sabi noti fu a sani di wi no man si nanga wi ai, èn di ben meki taki a grontapu man tan drai lontu a son. San ben meki Yob taki dati a planeiti fu wi e anga „na noti”?

Boiti dati, a denki taki noti e hori grontapu, e  meki wan tra aksi opo kon: San e meki grontapu nanga den tra sani na hemel tan drai na a srefi fasi? Luku den moi wortu di Gado taigi Yob wan leisi: „Yu kan tai den titei di e hori a starigrupu Kima? Yu kan lusu den titei fu a starigrupu Kesil?” (Yob 38:31) En heri libi langa, Yob ben si fa den starigrupu dati di sma sabi, ben de fu si ibri neti baka. * Ma fu san ede ibri yari baka den ben de a srefi? San na den titei di e hori den stari dati nanga ala den planeiti na den presi? A no de fu taki dati Yob ben fruwondru srefisrefi te a ben prakseri den sani dati.

Efu den stari ben fasi nomo na den lontu sani na hemel, dan den titei dati no ben o de fanowdu. Na tu dusun yari baka a ten fu Yob, sabiman kon sabi moro fu „den titei” di yu no man si èn di e hori den stari nanga planeiti na den presi te den e drai na ini a loktu. Isaac Newton èn baka dati Albert Einstein ben kon pôpi fu di den ben kon sabi nyun sani di abi fu du nanga a tori disi. A no de fu taki dati Yob no ben sabi noti fu den krakti di Gado e gebroiki fu hori den stari nanga planeiti na den presi. Ma toku den wortu di Gado meki sma skrifi na ini a buku Yob, sori fu de tru baka dusundusun yari. Iya, den wortu dati ben de moro bun leki a denki fu a koni man Aristoteles. Na a Sma di meki den wet fu hemel wawan kan abi so wan koni, a no so?

3. Grontapu nanga den sani na hemel e tan fu têgo noso den e pori gowe?

Aristoteles ben e bribi taki wan bigi difrenti de na mindri hemel nanga grontapu. A ben taki dati grontapu e kenki èn a e broko gowe safrisafri, aladi na ether di den stari na hemel meki fu dati, no e kenki noiti ma e tan fu têgo. Den lontu kristal sani nanga den stari èn planeiti di fasi na den, no ben o man kenki noiti, den no ben o man broko gowe, noso kon na wan kaba.

Bijbel e leri wi a sani dati? Psalm 102:25-27 e taki: „Langa ten pasa yu seti den fondamenti fu grontapu. Nanga yu eigi anu yu meki hemel. Den sani dati o kon na wan kaba, ma yu o tan. Neleki wan krosi den o kon owru. Leki fa sma e kenki owru krosi fu weri nyunwan, na so yu o kenki den te a ten doro. Ma yu no kenki. Yu o tan fu ala ten.”

Luku taki a psalm skrifiman disi di ben skrifi den wortu dati kande sowan tu hondro yari bifo a ten fu Aristoteles, no e taki dati wan difrenti de na mindri grontapu nanga den stari na hemel. A no e sori taki grontapu o broko gowe safrisafri, aladi den stari e tan fu têgo. Na presi fu dati, a e sori taki hemel nanga grontapu e difrenti fu Gado, a makti Yeye di meki den. * A psalm disi e sori taki den stari e broko gowe safrisafri neleki iniwan tra sani na grontapu. San sabidensi na ini a ten disi kon sabi?

Sabidensi e horibaka gi san Bijbel nanga Aristoteles taki, fu di den e sori taki grontapu e broko gowe safrisafri. Fu taki en leti, ston fu a grontapu fu wi e tan broko gowe èn nyunwan e kon baka nanga yepi fu bergi di e spiti faya èn nanga yepi fu tra krakti na ini a gron.

Ma fa a de nanga den stari? Den e broko gowe safrisafri soleki fa Bijbel e taki, noso den e tan fu têgo soleki fa Aristoteles ben e leri? Na ini a di fu 16 yarihondro, sma fu Europa di ben e ondrosuku den stari nanga planeiti, bigin tweifri na a leri fu Aristoteles taki den stari e tan fu têgo. Disi pasa fu di fu a fosi leisi den ben si wan supernova, noso den ben si fa wan stari ben sutu panya. Sensi a ten dati, sabiman kon si taki stari kan dede te den e sutu panya na so wan fasi, noso den kan bron gowe safrisafri èn den kan fadon broko tapu makandra srefi. Ma  sabiman si tu taki nyun stari e kon de. Te owru stari e sutu panya, dan a gas di de na ini a loktu e kon moro bun èn fu drape den nyun stari e kon de. Fu dati ede di a Bijbel skrifiman ben agersi hemel nanga grontapu nanga a fasi fa wan sma e kenki owru krosi fu weri nyunwan, dan dati fiti trutru. * A moi fu si taki a psalm skrifiman disi fu owruten ben man skrifi den wortu disi di e fiti so bun nanga den sani di disiten sabiman kon sabi!

Ma toku yu kan aksi yusrefi a sani disi: ’A de so taki Bijbel e leri taki grontapu noso ala stari na hemel no o de moro wan dei noso taki trawan musu kon na den presi?’ Nôno, Bijbel e pramisi taki den sani dati o tan fu têgo (Psalm 104:5; 119:90). Ma disi no de so fu di den sani dati e tan fu têgo fu densrefi. Na presi fu dati, na Gado di meki den e pramisi taki a o sorgu taki den tan (Psalm 148:4-6). A no e taki fa a e du dati, ma wi kan frustan taki a Sma di meki hemel nanga grontapu abi a krakti fu sorgu taki den sani dati e tan, a no so? Na a srefi fasi wan sma di sabi bow oso e sorgu na wan lobi-ati fasi taki na oso di a bow gi ensrefi nanga en osofamiri, e tan bun.

Suma musu kisi a glori nanga a grani?

Te wi e prakseri wan tu fu den wet fu hemel, dan dati e gi krin piki tapu na aksi disi. Te wi e prakseri suma meki taki milyardmilyard stari de na ala sei na hemel, suma e hori den na den presi, èn suma e sorgu taki den e tan drai na a srefi fasi, dan dati e meki wi fruwondru srefisrefi, a no so?

Kande den sani di e meki taki wi e fruwondru, tyari kon na krin moro bun nanga den wortu di skrifi na ini Yesaya 40:26. Drape skrifi: „Opo un ede èn luku go na loktu. Suma meki ala den sani dati? Na a sma di e tiri den leki wan legre. A sabi omeni de èn a e kari den na den nen srefi.” A moi taki a tekst disi e agersi den stari nanga wan legre, di kan abi bun furu srudati na ini. Efu a legre dati no ben o abi wan komandanti di ben o taigi den san fu du, dan den ben o de leki wan bruya grupu. Sondro den wet fu Yehovah, den planeiti, stari nanga den starigrupu no ben o drai na wan orga fasi, èn ala sani drape ben o bruya srefisrefi. Na presi fu dati, prakseri wan legre di abi milyardmilyard srudati na ini èn di a Komandanti e sori pe den musu waka. A no dati wawan a Komandanti e du, ma a sabi a nen fu ibri srudati tu, a sabi pe ibriwan fu den de èn a sabi fa a de nanga ibriwan fu den!

Den wet fu hemel e meki wi kon sabi pikinso nomo fu a Komandanti disi di koni pasa marki. Na en wawan ben kan meki den sortu wet dati èn na en wawan ben kan meki sma skrifi soifri fu den tori dati hondrohondro yari bifo sabiman ben frustan den, a no so? We, a no de fu taki dati wi alamala abi krin buweisi fu gi ’glori nanga grani’ na Yehovah.​—Openbaring 4:11.

[Futuwortu]

[Faki/​Prenki na tapu bladzijde 24, 25]

 A ben abi furu krakti tapu sma

Wan buku e taki: „Aristoteles ben de a moro prenspari filosofiaman èn sabidensiman fu owruten” (The 100—A Ranking of the Most Influential Persons in History). A no muilek fu frustan fu san ede sma e taki den sortu sani disi fu na aparti man disi. Aristoteles (384-322 bifo Krestes) ben de wan studenti fu a barinen filosofiaman Plato èn di Aleksander a Bigiwan ben yongu ete, dan Aristoteles ben gi en leri. Soleki fa owruten dokumenti e sori, dan Aristoteles ben skrifi bun furu sani èn fu den 170 buku di a skrifi, sowan 47 de ete. A skrifi furu fu stari nanga planeiti, fu libisani, fu scheikunde, fu meti, fu natuurkunde, fu a gron èn fu a fasi fa libisma e tyari densrefi. A ben skrifi den finifini sani di a kon sabi fu libisani èn a ben teki langa ten fosi tra sma ondrosuku sonwan fu den sani dati baka. A buku e taki tu: „Aristoteles ben abi furu krakti tapu sma fu den kondre na west-sei fu grontapu.” Ma a e taki tu: „Sma ben si Aristoteles leki wan kefalek man èn a sani disi ben kon de so furu taki pikinmoro den ben anbegi en.”

[Sma di abi a reti fu den prenki]

Royal Astronomical Society / Photo Researchers, Inc.

From the book A General History for Colleges and High Schools, 1900

[Prenki na tapu bladzijde 26, 27]

A krakti di e hari sani kon na makandra, e hori den sani na hemel na den presi

[Sma di abi a reti fu a prenki]

NASA and The Hubble Heritage Team (AURA/​STScl)

[Prenki na tapu bladzijde 26, 27]

Pleiaden starigrupu

[Prenki na tapu bladzijde 28]

Son stari e kon na wan kaba fu di den e sutu panya

[Sma di abi a reti fu a prenki]

ESA/​Hubble

[Prenki na tapu bladzijde 28]

Presi pe nyun stari e kon de

[Sma di abi a reti fu a prenki]

J. Hester and P. Scowen (AZ State Univ.), NASA

[Sma di abi a reti fu a prenki na tapu bladzijde 24]

© Peter Arnold, Inc./​Alamy