Yãmb ra miime bɩ?

A Zezi wakatẽ wã, wãn to la zʋɩf rãmbã tũudmã taoor dãmb ra get neb a taabã?

▪ Pipi kiris-nebã wakate, Israɛll ra-kãag-rãmbã la tũudmã taoor dãmb ra kisa neb nins sẽn pa karem n zãag wall sẽn pa karem baa bilfã. Daar a yembre, Fariziẽ rãmbã yeela woto: “Kʋʋngã sẽn ka mi tõogã, b yaa neb kãab-wẽng sẽn be b zutu.”—Zã 7:49, Kãab-paalgã Koe-noogo.

Biiblã toog sẽn ka be, sɛb a taab me wilgame tɩ nin-kãensã ra wukda b mens n boond neb nins sẽn pa karem n zãagã tɩ amharɛt rãmba, rat n yeel tɩ “tẽngã neba.” Sɩngrẽ wã, ra yaa tẽng-n-ned buud fãa la b ra boond tɩ amharɛt tɩ yaa a soabã waoogre. Ra yaa naong rãmbã la nin-bɛdã fãa la ra boond woto.

La a Zezi wakatẽ wã, ra lebga neb nins sẽn pa mi a Moiiz tõogã sõma wã bɩ sẽn da pa tũud-b rabẽ rãmbã minimdã noy sẽn da yaa wʋsgã la b ra boond woto. Sebr ning b sẽn boond tɩ Misna wã sẽn yaa rabẽ rãmb goam b sẽn wa n tigim n yiis sebr a to b sẽn boond tɩ Talmuudã pʋgẽ, b gɩdgame tɩ ned ra tɩ gãand amharɛt yir ye. Sebr a yembr (The Encyclopedia of Talmudic Sages) pʋgẽ, b wilgame t’a Rabbi Meir sẽn yɩ rabẽ sẽn vɩɩmd yʋʋmd 200 soabã sẽnesã yeela woto: “Ned sã n dɩk a bi-pugl n kõ amharɛte, yaa wa a sẽn sẽb-a n lob gɩgemd sẽn wae n tabd rũng la a yaool n wãb-a wã taoore.” Talmuudã pʋgẽ, rabẽ a to yeelame tɩ “ned sẽn pa karem sã n ki, a pa na n wa paam vʋʋgr ye.”

Yʋʋr ning sẽn yaa Sezaarã võor yaa bõe Biiblã pʋgẽ?

▪ Yaa a Gaiyus Zill Sezaar sẽn lebg Rom naab yʋʋmd 46 soab ning sẽn deng a Zezi rogmã sondr la woto. Rom nanambs nins sẽn pʋgl a poorã wʋsg me kɩtame tɩ b bool-b t’a Sezaare. Nanamb-kãens a tãab yell la b gom Biiblã pʋgẽ. Yaa a Ogusti, a Tɩbɛɛr la a Koloode.—Luk 2:1; 3:1; Tʋʋma 11:28.

Yaa yʋʋmd 14 soabã a Zezi rogmã poor la a Tɩbɛɛr lebg Rom naaba. La a Zezi koe-moonegã fãa sasa tɩ yaa yẽ n da rɩt naam. Rẽnd b sẽn da wa n sok a Zezi b sã n segd n yaoa lampo wã t’a leok tɩ b ‘kõ a Sezaar bũmb nins sẽn yaa a Sezaar dẽnd la b kõ Wẽnnaam bũmb nins sẽn yaa Wẽnnaam dẽndã,’ tɩ yaa Sezaar kãng soabã n da rɩt naam. (Mark 12:17) La yaa vẽeneg t’a Zezi ra pa gomd a Tɩbɛɛr yell bal ye. “Sezaarã” makda pãn-soaad buudã fãa.

Yʋʋmd 58 soabã sẽnes b sẽn da wa n dat n bʋ tʋmd-tʋmd a Poll bʋʋd kɛgrã, a kosame t’a Sezaar meng a toor kao bʋʋdã. A sẽn da yaa Rom tẽng-n-biigã yĩnga, a ra tõe n kosa rẽ. (Tʋʋma 25:8-11) A Poll sẽn kos woto wã, pa sẽn na yɩl t’a Neerõ sẽn da yaa naab wakat kãngã kao a bʋʋdã bal ye. Yaa sẽn na yɩl tɩ Rom soolmã bʋʋd ro-kãsengã rãmb kao a bʋʋdã.

Kaoosg zugẽ, yʋʋr ning sẽn yaa Sezaarã wa n tolg n lebga naam yʋʋre, tɩ baa Rom Sezaar dãmbã naam sẽn wa n lʋɩ wã, nanambs kẽer da ket n pʋt b mens yʋ-kãnga.

[Foto, seb-neng 30]

Denie sẽn tar a Tɩbɛɛr naande