Tika Ibilubu Lok Ma Jehovah Omiyo Me Ciko Dano?

“Yo ene, wulubi.”​—IC. 30:21.

1, 2. Catan omoko tamme me timo gin ango, ento Lok pa Lubanga konyowa nining?

 LACIM me yo ma kiloko cimo ka mukene pe rwenyo dano arwenya keken; ento romo kelo awano marac adada. Go kong ni laremi ocikki ni dano mo ma kite rac oloko akaka lacim me yo wek luwot ma pe gingeyo guwane. Mono pe ibilubu lok me cik meno?

² Labongo akalakala, Catan tye lamone ma kite rac ma mitine tye me rwenyowa. (Yabo. 12:9) Jami maraco ducu ma wanyamogi i pwony mukato-ni gia ki bote dok oketogi wek wangak woko ki i yo ma terowa i kwo ma pe tum. (Mat. 7:13, 14) Cwinywa yom ni Lubangawa ma paro piwa-ni, cikowa pe me lubo ‘lacim me yo’ ma Catan tiyo kwede me bwolowa. Kombeddi kong dong wanyamu jami adek mukene maraco pa Catan. Ka wanyamo kit ma Lok pa Lubanga konyowa me gwokke wek pe ki rwenywa, waromo goyo i wiwa ni Jehovah tye ka wot ingewa dok tye ka cimiwa yo matir, kun wacci: “Yo ene, wulubi.” (Ic. 30:21) Lwodo lok i kom cik pa Jehovah miyo wamoko tamwa me lubogi.

Pe Ilub Kor “Lupwony ma Lugoba”

3, 4. (a) Lupwony ma lugoba gitye calo wang it ma piine ocwiny nining? (b) Lupwony ma lugoba pol kare gia kikwene, dok ngo ma gin mito?

³ Go ni itye ka wot i aro. Ineno wang it mo ki ka mabor ci icako wot me cito iye, ki gen me nongo pii amata me keto orwo. Ento ma i o kunnu, inongo ni piine ocwiny woko. Pud dong cwinyi bicwer adada! Lupwony ma lugoba bene gitye calo wang it ma piine ocwiny woko. Ngat mo keken ma cito botgi ka yenyo pii me lok me ada cwinye bicwer matek. Jehovah otiyo ki lakwena Paulo gin ki Petero me cikowa me gwokke ki lupwony ma lugoba. (Kwan Tic pa Lukwena 20:29, 30; 2 Petero 2:1-3.) Lupwony ma lugoba-ni mono gubedo angagi? Lok pa lukwena aryo magi konyowa me ngeyo ka ma lupwony ma lugoba gia ki iye ki dong yo ma gitiyo kwede.

⁴ Bot luelda ma i kacokke me Epeco, Paulo owacci: “I kin wun kikomwu bene bia iye jo ma gibiloko lok ma ngako dano.” I lokke bot Lukricitayo luwote, Petero ocoyo ni: “Lupwony ma lugoba gibinen i kinwu.” Lupwony ma lugoba gia kikwene? Giromo a ki i kin lwak me kacokke. Jo ma kit meno gitye jo mungak. * Gimito gin ango? Pe gimito weko keken dul pa Jehovah ma yam onongo gimaro tutwal-li. Mitigi, kit ma Paulo otito kwede tye me ‘bwolo lupwonnye wek gulub korgi.’ Nen nyig lok ma kitiyo kwede ni​—“lupwonnye.” Ma ka cito ka loko dano me doko lupwonnyegi, jo mungak giyenyo yo me bwolo lupwonnye pa Kricito me lubo korgi. Calo “orudi muwor,” lupwony ma lugoba gitye ka yenyo me amwoda jo ma gibedo ata ma gitye i kacokke, balo niyegi ki dong kwanyogi woko ki i lok ada.​—Mat. 7:15; 2 Tem. 2:18.

5. Yo mene ma lupwony ma lugoba gitiyo kwede?

⁵ Lupwony ma lugoba gitiyo nining? Yo ma gitiyo kwede nyuto diro. Jo mungak ‘gikelo i mung’ tam mogo maraco. Calo jo ma gilwite ki jami ki i wang lobe mukene, gin gitiyo i mung, kun gikelo tamgi me ngak-ki i wi  diro. Dok bene calo dano maryek ma yubo waraga kwanne gobagoba, jo mungak gitiyo ki lok “goba ma gin guyubo ayuba,” nyo pyem ma tere pe, me temo poko tamgi ma giteto ateta-ni calo iwacci tye lok ada. Ginyayo ‘pwony goba,’ ‘gidwalo te . . . Ginacoya’ wek ocob mitigi. (2 Pet. 2:1, 3, 13; 3:16) Nen ka maleng ni jo mungak pe giparo piwa. Lubo korgi miyo wangak woko ki i yo ma terowa i kwo.

6. Tira ango ma nen ka maleng ma Baibul miyo madok i kom lupwony ma lugoba?

⁶ Wan waromo gwokke ki i kom lupwony ma lugoba nining? Tira ma Baibul miyo i kit ma myero watergi kwede nen ka maleng. (Kwan Jo Roma 16:17; 2 Jon 9-11.) Lok pa Lubanga wacci “pe wuribbe ki jo macalo meno.” I Baibul mukene kitiyo ki lok ni “pe wuyegi,” “wubed bor kwedgi,” ki “wugwokke kwedgi!” Tira meno ma kimiyo-ni niang iye pe tek. Ket kong ni dokto owacci ni igwokke pe igud ngat mo ma tye ki two marac adada dok twone kobo. In ibiniang maber lok pa dokto meno, dok ibilubu lok ma en ocikki kwede-ni maber adada. Jo mungak gitye ki cwiny me “pyem ki daa,” dok giyenyo yo wek jo mukene bene gulub pwony gobagobagi-ni. (1 Tem. 6:3, 4) Jehovah, Dokto Madit, wacciwa ni myero wagwokke pe waribbe kwedgi. Waniang maber gin ma en tye ka wacone, ento tika wamoko tamwa me lubo lokke me ciko dano-ni i yo ducu?

7, 8. (a) Gwokke ki i kom lupwony ma lugoba kwako gin ango? (b) Pingo imoko tammi me cung matek i kom lupwony ma lugoba?

⁷ Gwokke ki i kom lupwony ma lugoba kwako gin ango? Pe wajologi i pacowa nyo wamotogi. Wakwero bene kwano bukkegi, neno yubgi ma bedo i TV, yabo nyo cwalo lok i kabedogi me Intanet. Pingo wacung matek kit meno? Pi mar. Wan wamaro “Lubanga me ada,” pi meno pe watye ki miti i kom pwony ma kidwalo tere ma nyweno Lokke me ada. (Jab. 31:5; Jon 17:17) Wan bene wamaro dul pa Jehovah, ka ma kipwonyowa iye lok me ada ma yomo cwinywa​—man kwako nying Jehovah ki tyen lokke, yub pa Lubanga pi lobo, kit ma jo muto gitye kwede, kacel ki gen me nicer. Wi tika po kit ma iwinyo kwede i kare ma ipwonyo jami magi kacel ki lok me ada mukene ma pigi tego pi tyen mukwongo? Ci dong, pingo iweko ngat mo ma cayo dul man ma ipwonyo iye lok me ada magi-ni bwoli?​—Jon 6:66-69.

⁸ Kadi bed lupwony ma lugoba guwac lok ango, pe wabilubu korgi! Pingo wacito i wang it magi ma piine ocwiny woko-ni wek kibwolwa dok cwinywa cwer? Ma ka meno, wamoku tamwa me bedo lugen bot Jehovah kacel ki dulle ma tye ki rekod pi mwaki mapol i keto orwowa ki pii me lok me ada ma a ki i Lok pa Lubanga.​—Ic. 55:1-3; Mat. 24:45-47.

 Pe Ilub “Lok me Ododo”

9, 10. Lok me cik ango ma Paulo omiyo bot Temceo i kom “lok me ododo,” dok ngo ma onongo Paulo tye ka tamone? (Nen lok ma tye i tere piny.)

⁹ I kine mogo, ngeyone yot ka lacim me yo kiloko dok tye cimo ka mukene. I cawa mukene, romo bedo tek me ngeyo bwola man. Man bene rom aroma ki kit maraco pa Catan, tye mukene ma ginen ka maleng loyo luwotgi. Lakwena Paulo ocikowa i kom diro acel ma pe nen pa Catan​—“lok me ododo.” (Kwan 1 Temceo 1:3, 4.) Me konyowa wek pe wangak woko ki i yo ma terowa i kwo, omyero kong waniang ni, Lok me ododo obedo gin ango dok waromo gwokke pe me keto cwinywa iye nining?

¹⁰ Lok me cik ma Paulo omiyo i kom lok me ododo-ni obedo but waragane ma en ocoyo bot Temceo, laneno ma kimiye tic me gwoko lengo me kacokke kacel ki konyo luye luwote me cung matek i niye. (1 Tem. 1:18, 19) Paulo otiyo ki nyig lok me leb Grik ma te lokke gonye ni lok atama, lok ma kore pe, lok ma kiyubo ayuba. Ma lubbe ki International Standard Bible Encyclopaedia, lok man tere gonye ni “ododo mo (me dini) ma pe kubbe ki lok me ada.” Oromo bedo ni Paulo onongo tye ka tamo pi goba mogo me lewic ma dini pwonyo nyo ododo ma pe yengo dano. * Ododo magi ‘gikelo lapeny ma myero kikwed korgi’​—lapeny me mingo ma kwedo lok iye pe nyako nyige. Lok me ododo obedo diro ma labwola madit, Catan, tiyo kwede ki goba me dini ki dong lok ma pe tye ada i kom Lubanga wek jo ma pe gingeyo gungak woko. Paulo omiyo tirane ka maleng ni: Pe iket cwinyi i lok me ododo!

11. Catan tye ka tic ki dini goba i yo me diro me bwolo dano nining, dok lubu lok me cik mene ma bikonyowa wek pe kibwolwa?

¹¹ Lok mene me ododo ma gitwero miyo jo ma pe gingeyo gingak woko? “Lok me ododo[-ni]” kiromo tic kwede i kom goba mo keken me dini nyo lok ma tere pe ma twero miyo waweko “lok ada” woko. (2 Tem. 4:3, 4) Catan, ma timme calo ‘lamalaika ma menyo piny-nyi,’ tye ka tic ki dini goba i yo me diro me bwolo dano. (2 Kor. 11:14) Kun giporo bedo Lukricitayo, Lukricitayo ata-ni gipwonyo pwony goba​—man kwako Triniti, mac me kapiny, ki ni dano tye ki tipo ma pe to​—magi ducu gitye lok ma tere pe kacel ki goba. Lukricitayo ata-ni bene gipwonyo lok i kom nino madongo, calo Karama ki Easter, ma ginen calo iwacci kwer mabeco, ento gutigi tye i tim pa lukamfiri kacel ki lok mogo ma tere pe. Ka walubu lok ma Lubanga omiyo me ciko dano-ni, ma waco ni myero waa woko dok pe ‘wagud gin mo ma kome ki keni-ni,’ ci pe kibibwolowa ki lok me ododo.​—2 Kor. 6:14-17.

12, 13. (a) Goba mene ma Catan oilo, dok lok ada ango ma tye ma lubbe ki goba acel acel? (b) Waromo gwokke nining wek pe kibwolwa ki lok me ododo pa Catan?

¹² Catan oilo malo goba mukene ma twero bwolowa ka pe wagwokke. Nen kong labol magi. Gin mo keken​—twero doko ber nyo rac. Lubu kit ma iwinyo kwede ki i cwinyi. Kodi tam man kitye ka dongone kun wok ki i lok angeya kacel ki jami me galowang. Kodi tam mugom kit meno i kom rwom me kwo ma Lubanga cwako-ni keto lyeto i komwa ma weko pe wajukke kenwa ki i timo bal. Lok ada tye ni wamito tira i yo me kwo ma Lubanga keken aye twero miyone. (Jer. 10:23) Lubanga pe bidonyo i lok me lobo-ni. Ka waye ni kodi cwiny man ni acam tona-ni aye odorwa, ci man romo weko ‘wagiko ticwa woko nyo pe wanyako nyig mabeco.’ (2 Pet. 1:8) Ento lok ada tye ni nino pa Jehovah tye ka bino oyotoyot adada, dok omyero wabed ma wayubbe pire. (Mat. 24:44) Macalo dano adana, Lubanga pe paro piri. Ye goba man pa Catan-ni twero miyo wailo cingwa woko, ma weko watamo ni pe wapore me nongo mar  pa Lubanga. Ento, Jehovah maro dok tero dano acel acel ma wore calo ngat ma pire tek.​—Mat. 10:29-31.

¹³ Omyero wabed ma wangwa twolo, pien tam ki cwiny me lobo pa Catan-ni nen calo gin mupore ka pe ineno matut. Wi myero opo ni Catan aye tye ladit me bwola. Ka wawinyo tira kacel ki lok me poyo wic ma a ki i Lok pa Lubanga, ci wabigwokke wek pe kibwolwa ki ‘lok me ododo ma kiyubo ayuba ki ryeko pa Catan [“lok ma tere pe ma kitamo atama,” New American Bible].”​—2 Pet. 1:16.

Pe “Ilub Kor Catan”

14. Paulo ociko mon to mogo ma pud gitino nining, dok pingo mitte ni wan ducu waket cwinywa i lokke?

¹⁴ Tam kong i kom lacim me yo ma wacci “Man Aye Yo me Lubu Kor Catan.” Anga ma bilubu lacim me yo man? Paulo ocikowa i kom yo mapol mapat pat ma Lukricitayo ma gudyere kiromo bwologi ‘gingak woko gilubo kor Catan.’ (Kwan 1 Temceo 5:11-15.) Lok pa Paulo-ni okemo ‘mon to mogo ma pud gitino,’ ento lokke-ni bene kwako wan ducu. Mon ma Lukricitayo ma i cencwari me acel nen calo onongo pe gutamo ni gitye ka lubo kor Catan, ento ticgi onyutu ni gitye ka lubo kore. Waromo gwokke nining wek pe walub kor Catan labongo ngeyone? Kong dong wanenu kit ma Paulo ocikowa kwede i kom kwoto nying i yo marac.

15. Miti pa Catan tye kwene, dok diro mene pa Catan ma Paulo otitogi?

¹⁵ Miti pa Catan tye ni niyewa myero oto woko​—mito ni ejukwa pe watit kwena maber-ri. (Yabo. 12:17) Pi meno, en temme wek watim jami ma balo cawawa nyo kelo apokapoka. Nen kong diro pa Catan ma Paulo otitogi. ‘Wackom, wot atata pi yenyo galowang.’ I kare man ma rwom me tet odongo malo-ni, yot tutwal me balo cawawa ki pa jo mukene, me labolle, i cwalo e-mail mogo ma konygi pe nyo me gobagoba. ‘Kwoto nying.’ Kwoto nying i yo marac romo tero ngat moni me coko lok goba, dok man pol kare kelo daa. (Car. 26:20) Kadi bed gingeyo nyo pe, jo ma gicoko lok goba gilubo lanen pa Catan Larac-ci. * ‘Ridde i lok pa jo mukene.’ Wape ki twero me waco ki jo mukene kit ma myero gukwo kwede. Jami magi ma gimiyo wabedo labongo tic dok gikelo peko-ni, gidwoyo tamwa woko ki i kom tic ma Lubanga omiyo me tito kwena me Ker-ri. Ka waweko tic pi Jehovah ki mit kom, ci wacako lubo kor Catan. Omyero wayer tung ka ma wamito.​—Mat. 12:30.

16. Lubu tam mene ma bikonyowa me gwokke wek pe ‘wangak wacak lubu kor Catan’?

¹⁶ Lubu tam ma a ki i Baibul twero konyowa me gwokke wek pe ‘wangak wacak lubu kor Catan.’ Nen kong tira mogo ma Paulo omiyogi. Bed ki ‘tic mapol me atima i tic pa Rwot.’ (1 Kor. 15:58) Mako tic me Ker-ri matek bigwokowa ki i peko ma bino macalo adwogi me bedo abeda nono kacel ki timo jami mogo ma balo cawa. (Mat. 6:33) Lok lok ‘mabeco ma dongo dano.’ (Ep. 4:29) Mok tammi pe me winyo lok me kwota maraco ki kubone. * Dong gen kacel ki woro i kom luye luwoti. Man miyo waloko lok ma dongo dano ento pe ma poko kin dano. ‘Ket cwinyi kun i paro pi ticci.’ (1 Tec. 4:11) Nyut miti i kom jo  mukene, ento tim man i yo ma nyutu ni iworo ber bedogi dok man weko giwinyo ni pigi tek. Wi myero opo ni omyero pe wadi jo mukene ki tam ma lubbe ki lok mogo ma myero gumok iye tamgi pigi kengi.​—Gal. 6:5.

17. (a) Pingo Jehovah cikowa i kom gin ma myero pe walubi? (b) Tam ango ma i moko ma lubbe ki yo ma Jehovah mito ni walubi?

¹⁷ Cwinywa yom adada ni Jehovah titiwa ka maleng gin ma myero pe walubi! Wi myero pe owil ni, pi mar madit ma Jehovah tye kwede piwa, omiyo en ocikowa i pwony man kacel ki ma gukato angec-ci. En mito gwokowa ki i can kacel ki arem ma bino pi lubo ‘lacim me yo’ ma Catan tiyo kwede me bwolowa. Yo ma Jehovah mito ni walubi romo bedo ni tye ding, ento terowa ka maber pud dong loyo​—kwo ma pe tum. (Mat. 7:14) Pi meno, omyero wamoku tamwa me cung matek labongo tagge me lubo lok me cuko cwiny ma Jehovah omiyo ma wacci: “Yo ene, wulubi.”​—Ic. 30:21.

[Lok ma tye piny]

Lagammi Tye Ningo?

I yo ango ma iromo keto kwede i tic cik ma gitye i ginacoya magi?

• 2 Petero 2:1-3

• 1 Temceo 1:3, 4

• 1 Temceo 5:11-15

[Peny me Kwan]

[Bok/Cal ma tye i pot karatac 19]

Keto Yec Gweno i Yamo

Ododo mo ma Lujudaya giboko wacon nyutu adwogi marac ma bino pi kwoto nying dano i yo marac. Kun kitito i yo mapat pat, man aye lok ma pire tek ma kikwanyo ki i ododo man.

Laco mo obedo ka wire i dye taun kun balo nying laco maryek loyo i taun meno. Lacen, lakwot nying man i yo marac-ci oniang balle ci ocito bot laco maryek-ki ka kwayo kica, kun ye ni ebitimo gin mo keken me yubo wat i kingi. Laco maryek-ki owacce ni otim gin acel: Owacci lakwot nying-ngi okwany laten wic ma kipiko iye yec gweno, obar iye, ci oket yec gweno i yamo. Kadi bed lokke ocungo wiye, lakwot nying-ngi otimo gin ma kiwacce-ni, ci odwogo bot laco maryek-ki.

En openyo ni “Tika dong i timma kica?”

Laco maryek-ki ogamo ni “Me acel, cit iyer yec gweno ma iketogi-ni ducu.”

“Atwero timo man nining? Yamo dong oketogi woko.”

“Tek tutwal me yubo bal ma obino pi lok dogi ma iwaco-ni, marom aroma bene ki yero yec gweno ma i keto-ni.”

Pwony man tye ka maleng. Ka dong iwaco lok moni pe iromo dwokone, dok bene twero bedo tek me yubo bal ma lok meno okelo. Ma peya wakubu goba mo kadi matidi, bedo me ryeko botwa ka wiwa po ni nongo wamito keto yec gweno i yamo.

[Cal ma tye i pot karatac 16]

Dano mogo giromo jolo jo mungak i pacogi nining?