?Ndɛ nga Zoova kɛn i wauun kle e’n é fá su?

“Atin’n yɛ ɔ yo yɛ, amun fa su.”​—EZA. 30:21.

1, 2. ?Ngue yɛ Satan w’a gugu kpa kɛ ɔ́ yó ɔ? ?Yɛ wafa sɛ yɛ Ɲanmiɛn Ndɛ’n uka e ɔ?

 SƐ AMÚN kɔ́ lika naan nzɔliɛ like ng’ɔ o akpɔ nuan’n i ɲin kpɛ lika uflɛ’n, ɔ kwla mlin amun. I sɔ liɛ’n kwla yo tɛ kpa. Maan e se kɛ sran tɛ kpa kun m’ɔ kunndɛ kɛ ɔ́ yó naan sran’m be mlin’n, yɛ ɔ dili junman sɔ’n niɔn. ?Sɛ amun janvuɛ kun bo i sɔ’n su kle amun’n, amun su fɛmɛn i ndɛ’n su?

² Satan ti kɛ sran sɔ’n sa, yɛ ɔ kunndɛ kɛ ɔ́ láka e. (Ngl. 12:9) Ninnge tɛtɛ nga e kannin be ndɛ like suanlɛ ng’ɔ sinnin lɛ nun’n, i kwlaa i bo’n fin i. Ɔ kunndɛ kɛ ɔ́ yó naan e yo ɲin kekle Zoova su naan e yaci anannganman nguan atin’n su falɛ. (Mat. 7:13, 14) Sanngɛ Ɲanmiɛn Zoova m’ɔ klo e’n, ɔ man e afɔtuɛ naan y’a faman Satan i gblɛ’n su. Maan e kan ninnge tɛtɛ nsan ekun mɔ Satan fa laka sran mun’n be ndɛ. Kɛ é kán wafa nga Ɲanmiɛn Ndɛ’n uka e naan y’a mlinman’n i ndɛ’n, maan ɔ yo e kɛ Zoova nin e yɛ e nanti sa naan ɔ kle e atin’n. Ɔ se e kɛ: “Atin’n yɛ ɔ yo yɛ, amun fa su.” (Eza. 30:21) Sɛ e bu ndɛ nga Zoova kan kle e wauun i akunndan’n, i sɔ’n wlá e fanngan naan y’a fa su.

Nán amun su “be nga be tɔn be wun suɛn kɛ be ti like klefuɛ’n” be su

3, 4. (a) ?Ngue ti yɛ be nga be tɔn be wun suɛn kɛ be ti like klefuɛ’n, be ti kɛ gbo kee sa ɔ? (b) ?Ninfan yɛ be nga be tɔn be wun suɛn kɛ be ti like klefuɛ’m be nun sunman be fin ɔn? ?Yɛ ngue yɛ be kunndɛ ɔ?

³ Maan ɔ yo amun kɛ, kɛ amún kɔ́ lika sɔ’n, amun sin aawlɛ flɛnnɛn kun nun naan nzue we kun amun sa. Amun wun gbo kun amun ɲrun mmua lɔ. Ɔ maan amun wunnge lɔ ko kunndɛ nzue kan nɔnwa. Amún jú lɔ o, gbo’n ti kee. Nanwlɛ, ɔ́ yó amun ya kpa! E kwla se kɛ ndɛ nanwlɛ’n ti kɛ nzue sa, yɛ be nga be tɔn be wun suɛn kɛ be ti like klefuɛ’n be ti kɛ gbo kee’n sa. Sran kwlaa ng’ɔ ba be sin kɛ ɔ́ kúnndɛ nzue nɔ́n’n, ɔ su ɲɛnmɛn i. Zoova maan akoto Pɔlu nin akoto Piɛli be wlali e su nun sran sɔ’m be lika. (An kanngan Sa Nga Be Yoli’n 20:29, 30 ɔ nin 2 Piɛr 2:1-3 nun.) ?Wan mun yɛ be tɔn be wun suɛn kɛ be ti like klefuɛ ɔ? Ndɛ nga Pɔlu nin Piɛli be kannin’n be kle e kan sran sɔ’m be fin’n, ɔ nin wafa nga be laka sran mun’n.

⁴ Pɔlu seli asɔnun kpɛnngbɛn nga be o Efɛzi lɔ’n be kɛ: “Amun nun sran wie’m bé wá jáo bé kán ndɛ b’ɔ ti-mɛn i su’n.” Piɛli kusu klɛli fluwa ko mannin asɔnun kpanngban, yɛ ɔ seli be kɛ: “Be nga be tɔn be wun suɛn kɛ be ti like klefuɛ’n [...] bé wá trán amun nun.” ?Ninfan yɛ be nga be tɔn be wun suɛn kɛ be ti like klefuɛ’m be nun sunman be fin ɔn? Sran sɔ’m be kwla yo asɔnun nunfuɛ mun. I sɔfuɛ’m be nin Ɲanmiɛn b’a bu. ?Ngue yɛ be kunndɛ ɔ? Nán kɛ be klo kɛ bé tú Zoova i anuannzɛ mɔ be klo i laa’n i nun ngunmin ɔn. Pɔlu kannin like nga be kunndɛ’n i ndɛ seli kɛ: “Bé [...] láka Kristfuɛ mun naan be su be su.” Kɛ ɔ yo naan be nga be nin Ɲanmiɛn b’a bu’n be wɔ gua su lɔ be ko kunndɛ be sran liɛ’n, Klistfuɛ mun yɛ be kunndɛ kɛ be su be su ɔ. Zezi seli kɛ sran sɔ’m be ti kɛ “gboklo” mɔ be di bua mun’n sa. Be kunndɛ kɛ bé yó naan Klistfuɛ’m be yaci Ɲanmiɛn sulafilɛ naan be tu Zoova i anuannzɛ’n nun.—Mat. 7:15; 2 Tim. 2:18.

5. ?Wafa sɛ yɛ be nga be tɔn be wun suɛn kɛ be ti like klefuɛ’n, be laka sran mun ɔn?

⁵ ?Wafa sɛ yɛ be nga be tɔn be wun suɛn kɛ be ti like klefuɛ’n, be laka sran mun ɔn? Be yo i ‘gblɛ nun.’ Wafa kunngba nga gblɛ nun sran tɛfuɛ’m be fa ninnge tɛtɛ mun wlu i nvle kun nun’n, i sɔ yɛ be nga be tɔn be wun suɛn kɛ be ti like klefuɛ’m be saci asɔnun nunfuɛ mun ɔn. ‘Be kpɛ be ti nun kan ndɛ mun.’ Yɛle kɛ ato nga  be bua’n, be yo maan sran’m be bu be nanwlɛ, kɛ nga sran tɛfuɛ yo maan fluwa ng’ɔ timan kpa’n, be bu i kɛ ɔ ti kpa’n sa. Be kunndɛ kɛ bé yó naan “gblɛgblɛ sa nga be yo’n,” be yo sran kpanngban be fɛ. Piɛli seli ekun kɛ be ‘kaci Nyanmiɛn Ndɛ’n’. Yɛle kɛ be kpɛ Biblu’n nun ndɛ’n i wun naan sran’m be bu i kɛ be gblɛ nga be kpɛ’n, ɔ ti nanwlɛ. (2 Piɛ. 2:1, 3, 13; 3:16) Nanwlɛ, e ndɛ loman be nga be nin Ɲanmiɛn b’a bu’n. Sɛ e su be su’n, e su faman anannganman nguan atin’n su kun.

6. ?Afɔtuɛ wauun benin yɛ Biblu’n man e be nga be tɔn be wun suɛn kɛ be ti like klefuɛ’m be su ɔ?

⁶ ?Wafa sɛ yɛ e kwla sasa e wun be nga be tɔn be wun suɛn kɛ be ti like klefuɛ’m be lika ɔ? Biblu’n kle e like ng’ɔ fata kɛ e yo’n yɛiin. (An kanngan Rɔmfuɛ Mun 16:17 ɔ nin 2 Zan 9-11 nun.) Ɔ se e kɛ: “Nán an fa amun wun mantan be.” Afɔtuɛ nga Ɲanmiɛn Ndɛ’n man e’n, ɔ ti kɛ nga dɔɔtrɔ bian kun kwla man e’n sa. Ɔ kwla se e kɛ tukpacɛ ng’ɔ sa’n o sran kun i wun, naan i ti’n nán e mɛntɛn i. Dɔɔtrɔ’n si kɛ sɛ tukpacɛ sɔ’n sa e’n, é wú. I ndɛ’n ti weiin, ɔ maan é fá su. Biblu’n se kɛ sran ng’ɔ nin Ɲanmiɛn b’a bu’n, ɔ kaci kɛ sran mɔ “tukpacɛ yɛ ɔ wo i su sa.” Kpɛkun ɔ kle like naan sran uflɛ’m be bu akunndan nga ɔ bu’n wie. (1 Tim. 6:3, 4) Zoova ti kɛ dɔɔtrɔ bian kpa’n sa. Ɔ kan kle e wauun kɛ nán e mantan be nga be tɔn be wun suɛn kɛ be ti like klefuɛ mun. Ɔ fata kɛ e fɛ i afɔtuɛ’n su titi.

7, 8. (a) ?Ngue yɛ ɔ fata kɛ e yo naan y’a mantanman be nga be tɔn be wun suɛn kɛ be ti like klefuɛ mun ɔn? (b) ?Ngue ti yɛ e ta nda kɛ e su mantanman sran sɔ mun ɔn?

⁷ ?Ngue yɛ ɔ fata kɛ e yo naan y’a mantanman be nga be tɔn be wun suɛn kɛ be ti like klefuɛ mun ɔn? E nin be e ijɔman, yɛ e flɛman be kɛ be bla e awlo lɔ. Asa ekun’n, e kannganman be fluwa’m be nun, yɛ sɛ be kan be ndɛ televiziɔn nun’n e nianman. Sɛ be klɛ like be sie i ɛntɛnɛti su’n e nianman, annzɛ e klɛman wie e fa siemɛn i be ndɛ nga be kɛn i ɛntɛnɛti nun’n su. ?Ngue ti yɛ e kloman kɛ é mántan be kaan sa’n niɔn? Like klikli nga ti yɛ e yo sɔ’n yɛle kɛ e klo ‘Nyanmiɛn b’ɔ buaman ato’n.’ Ɔ maan e kunndɛman kɛ é tíe ato ndɛ mɔ be nin ndɛ nanwlɛ nga be o Ɲanmiɛn Ndɛ’n nun’n be sansan be wun’n. (Jue. 31:6; Zan 17:17) Asa ekun’n, e klo Zoova i anuannzɛ m’ɔ fa kle e ndɛ ng’ɔ ti nanwlɛ’n. Anuannzɛ sɔ’n yɛ ɔ kleli e Zoova i dunman’n kpɛkun ɔ tuli dunman sɔ’n i bo kleli e ɔ. Like nga Ɲanmiɛn waan ɔ́ yó i asiɛ’n su wa’n, ɔ nin like nga kɛ sran wu’n ɔ kaci’n, ɔ nin sran cɛnlɛ’n, i yɛ ɔ yiyili i kwlaa sɔ’n nun kleli e ɔ. ?Blɛ mɔ be kleli amun ninnge sɔ mun’n, ɔ nin ninnge uflɛ wie mun ekun’n, i fɛ m’ɔ yoli amun’n ɔ te o amun klun? Sɛ ɔ ti sɔ’n, nán amun kplin su maan be nga be tɔn be wun suɛn kɛ be ti like klefuɛ’m be laka amun naan amun kpɔci Zoova i anuannzɛ m’ɔ kleli amun ninnge sɔ mun’n.—Zan 6:66-69.

⁸ Maan be nga be tɔn be wun suɛn kɛ be ti like klefuɛ’m be yo sɛ be yo sɛ’n, e su suman be su le! ?Ngue ti yɛ é kɔ́ sran sɔ mɔ be ti kɛ gbo kee sa’n be sin naan nzue we kun e ɔ? É tá nda kɛ Zoova nin i anuannzɛ’m be su yɛ é sú ɔ. Zoova i anuannzɛ’n nin a sokpaman e le. Afin ɔ nian Ɲanmiɛn Ndɛ’n nun ɔ man e nzue flɔlɔ titi.—Eza. 55:1-3; Mat. 24:45-47.

 Nán amun fa “ndɛ nga be ti kɛ ngua sa’m” be su

9, 10. ?Ndɛ nga be ti kɛ “ngua” sa’n, be su afɔtuɛ benin yɛ Pɔlu mannin Timote ɔ? ?Gblɛ ndɛ benin yɛ Pɔlu su kɛn i ndɛ ɔ? (An nian ja ngua lɛ ndɛ’n wie.)

⁹ Akpɔ nuan nzɔliɛ like nga sran kpɛli i ɲin lika uflɛ’n, ɔ kwla mlin e. Blɛ wie nun’n, be kwla wun i wlɛ kɛ be kpɛli i ɲin blo, sanngɛ nán cɛn ngba yɛ be kwla si sɔ ɔ. I wie yɛle Satan i ato m’ɔ bua’n. Sɛ y’a nianman e wun kpa’n, nán cɛn ngba yɛ e kwla wun i wlɛ ɔ. Akoto Pɔlu wlali e su nun kɛ e nian e wun ato ndɛ sɔ’m be lika. Ɔ flɛli ato ndɛ sɔ’m be kɛ “ngua.” (An kanngan 1 Timote 1:3, 4 nun.) ?Ngue yɛle ndɛ sɔ mɔ be ti kɛ ngua sa’n? ?Yɛ é yó sɛ naan y’a faman e ɲin y’a sieman be su? Ɔ fata kɛ e si kosan sɔ’m be su tɛlɛ’n naan y’a kwla ka anannganman nguan’n i atin’n su.

¹⁰ Fluwa klikli nga Pɔlu klɛli ko mannin Timote m’ɔ ti asɔnun kpɛnngbɛn’n i nun’n, ɔ kannin ndɛ sɔ’m be ndɛ. Pɔlu seli Timote kɛ ɔ yo maan asɔnun’n ka yɛiin, yɛ ɔ uka aniaan mun naan be nin Zoova nanti titi. (1 Tim. 1:18, 19) Glɛki nun ndɛ mma nga Pɔlu flɛli i kɛ “ngua’n” i bo’n yɛle kɛ be “bua ato” annzɛ be “kpɛ be ti nun be kan ndɛ.” Fluwa kun seli kɛ ndɛ nga be ti kɛ ngua sa’n, be ti Ɲanmiɛn sulɛ wafa’n i nunfuɛ’m be ndɛ nga be kan m’ɔ timan nanwlɛ’n. (The International Standard Bible Encyclopaedia) Atrɛkpa’n, Ɲanmiɛn sulɛ wafa’m be ndɛ nga be kan m’ɔ taka lalafuɛ ndɛ’m be su mɔ sran’m be klo i tilɛ’n, i ndɛ yɛ Pɔlu kan ɔn. * Pɔlu seli kɛ i sɔ ndɛ’m be ti tɛ kpa, afin be ‘kpɛ saɛ.’ Yɛle kɛ be nga be fa be wla gua ndɛ sɔ’m be su’n, be akunndan’n kɔ ninnge nga be timan nanwlɛ’n be su. Kɛ ɔ ko yo sɔ’n, be kunndɛ kɛ bé sí ninnge sɔ’m be bo. Satan fɛ i sɔ ato ndɛ liɛ mɔ be fin Ɲanmiɛn sulɛ wafawafa mun’n, ɔ yo maan sran’m be wla fi ninnge cinnjin mun. Pɔlu i afɔtuɛ’n ti wauun. I waan nán e fa ndɛ nga be ti kɛ ngua sa’m be su!

11. ?Wafa sɛ yɛ Satan fa Ɲanmiɛn sulɛ ng’ɔ timan su’n fa laka sran mun ɔn? ?Yɛ afɔtuɛ benin yɛ ɔ fata kɛ e fa su ɔ?

¹¹ ?Ndɛ nga be ti kɛ ngua sa mɔ be kwla laka sran ng’ɔ niɛnmɛn i wun su’n i wie yɛle benin? Ndɛ sɔ mun yɛle Ɲanmiɛn sulɛ i nun ndɛ kwlaa ng’ɔ kwla yo naan sran’m b’a “sie-man be su nanwlɛ’n su” kun’n. (2 Tim. 4:3, 4) Satan m’ɔ yo i wun kɛ “anz b’ɔ kpaja’n” sa’n, ɔ fa Ɲanmiɛn sulɛ wafa mun fa mlinnin sran mun. (2 Kor. 11:14) I wie yɛle kɛ ato ndɛ kɛ atre nsan ɔ nin sin fɛtɛ’n sa’n, be fa Klist i dunman’n yɛ be fa kle su like ɔ. Be se ekun kɛ, kɛ sran wu’n ɔ le i sin like m’ɔ wuman ɔn. Sran sunman be bu i kɛ Nowɛli nin Paki be ti Ɲanmiɛn klun su, sanngɛ nn ninnge nga be yo be blɛ sɔ’n nun’n, i bo’n fin amuɛn mun. Kɛ Ɲanmiɛn se e kɛ nán e mantan ninnge sɔ mun naan ‘nán e kan fiɛn’n,’ sɛ e fa su’n, be su kwlá faman ato ndɛ mun lakaman e.—2 Kor. 6:14-17.

12, 13. (a) ?Ato benin yɛ Satan yoli mɔ w’a tru lika’n nun ɔn? ?Yɛ ndɛ ng’ɔ ti nanwlɛ’n yɛle benin? (b) ?Ngue yɛ e kwla yo naan Satan w’a lakaman e ɔ?

¹² Satan kannin ato ndɛ wie mun ekun, ɔ maan sɛ y’a nianman e wun su’n, e kwla fa su. Maan e kan be nun nsan be ndɛ. I klikli’n yɛle kɛ maan like’n yo tɛ o, ɔ yo kpa o, ɔ ti e bɔbɔ e ndɛ. Nga e klo’n yɛ e yo ɔ. E ti i sɔ liɛ’n televiziɔn nin flimu nin zronali nin ɛntɛnɛti’n be nun. Kɛ mɔ e ti i sɔ ndɛ’n cɔcɔcɔ’n, ɔ kwla yo maan e nian mɛn nunfuɛ’m be ajalɛ’n su. Sanngɛ, nanwlɛ’n yɛle kɛ e mian Ɲanmiɛn wun kɛ ɔ kle e like ng’ɔ ti kpa’n ɔ nin ng’ɔ ti tɛ’n. (Zer. 10:23) Ato ndɛ sɔ’n i nɲɔn su’n yɛle kɛ Ɲanmiɛn su kaciman like fi asiɛ’n su. Kɛ i sɔ akunndan’n ko ba mɛn nunfuɛ’m be ti nun’n, kpɛkun like nga bé yó i andɛ’n i akunndan yɛ be bu ɔ. Be buman ainman akunndan kun. Ɔ maan Ɲanmiɛn sulɛ nun’n, ‘be o lɛ ngbɛn yɛ like nga be yo’n ɔ yoman ye.’ (2 Piɛ. 1:8) Sanngɛ ng’ɔ ti su’n yɛle kɛ ɔ ka kaan sa Zoova wá síesíe ninnge’m be ye asiɛ’n su. I ti’n ɔ fata kɛ wafa nga e yo ninnge mun’n, ɔ kle kɛ e lafi i sɔ liɛ’n su. (Mat. 24:44) Ato ndɛ sɔ’n i nsan su’n yɛle kɛ e ndɛ loman Ɲanmiɛn. Sɛ e fa Satan i ato sɔ’n su’n, é kán e sa ase, afin é bú i kɛ e timan sran m’ɔ fata kɛ Ɲanmiɛn klo e ɔ.  Nanwlɛ’n yɛle kɛ Zoova klo i sufuɛ’m be kwlaa yɛ be ndɛ lo i.—Mat. 10:29-31.

¹³ Ɔ fata kɛ e nian e wun su kpa, naan nán maan e bu akunndan nga Satan i sran’m be bu’n wie. Ɔ ju wie’n, ɔ kwla yo e kɛ akunndan nga be bu’n, ɔ nin ndɛ nga be kan’n ti nanwlɛ sa. Sanngɛ nán e wla fi su kɛ ato buafuɛ’m be si’n yɛle Satan. San kɛ y’a fa afɔtuɛ nga Ɲanmiɛn Ndɛ’n man e’n su, yɛ Satan su kwlá fɛmɛn i gblɛ’n lakaman e ɔ.—2 Piɛ. 1:16.

Nán e “su Satan su”

14. ?Afɔtuɛ benin yɛ Pɔlu mannin angbeti bla nga be te yo talua’n be nun wie mun ɔn? ?Yɛ ngue ti yɛ ɔ fata kɛ e kwlaa e fa afɔtuɛ sɔ’n su ɔ?

¹⁴ Maan ɔ yo amun kɛ amun wun akpɔ nuan nzɔliɛ like kun naan be klɛ su kɛ: “Satan i atin’n yɛ.” ?Wan cɛ yɛ ɔ́ fá atin sɔ’n su ɔ? Sanngɛ Klistfuɛ wie mun bɔbɔ be kwla “su Satan su.” Pɔlu kleli e wafa nga i sɔ’n kwla ju’n. (An kanngan 1 Timote 5:11-15 nun.) Pɔlu blɛ su ‘angbeti bla nga be te yo talua’n,’ be ti yɛ ɔ klɛli ndɛ sɔ’n niɔn. Sanngɛ, e kwlaa e kwla fa afɔtuɛ sɔ’n e tu e wun fɔ. Bla sɔ’m b’a bumɛn i kɛ be su su Satan su, sanngɛ be aeliɛ’n kle kɛ i sɔ yɛ be yo ɔ. ?É yó sɛ naan kannzɛ nán e ɲinfu bɔbɔ’n, y’a suman Satan su? Maan e bu sran wun sacilɛ i su afɔtuɛ nga Pɔlu mannin’n i akunndan e nian.

15. ?Ngue yɛ Satan kunndɛ ɔ? ?Kɛ nga Pɔlu fa kannin’n sa’n, ninnge benin yɛ Satan fa sie e ɲrun naan y’a yo i klun sa ɔ?

¹⁵ Satan kloman kɛ e kan like nga e lafi su’n i ndɛ. Ɔ klo kɛ e yaci jasin fɛ’n i bolɛ. (Ngl. 12:17) I sɔ’n ti’n, ninnge nga be saci e blɛ’n ɔ nin nga be saci sran nin sran’m be afiɛn’n yɛ i waan e yo ɔ. Pɔlu boli ninnge nga Satan fa be sie e ɲrun naan y’a yo i klun sa’n, be nun wie’m be su. Pɔlu waan angbeti bla’m ‘be yo-man like fi, be wlan-wlan awlo’m be nun.’ Bla sɔ’m be junman nga be di’n yɛle be janvuɛ’m be wun kɔlɛ ɔ nin ndɛ finfin’m be kanlɛ. Ɔ fata kɛ e nian e wun su i sɔ ninnge’m be nun. I wie yɛle kɛ e kwla fa e blɛ’n e klɛ ndɛ nga wie liɛ bɔbɔ be timan nanwlɛ’n selilɛli nin ɔrdinatɛli’m be su e ko man sran mun, yɛ e nian be liɛ’n nun. Pɔlu seli ekun kɛ bla sɔ’m ‘be ijɔ fiaii.’ Be nga be ijɔ fiaii be kwla tɔn be wiengu suɛn, kpɛkun i sɔ’n kwla kpɛ utre ba. (Nya. 26:20) Kannzɛ be nga be tɔn sran suɛn’n be siman sɔ o, sanngɛ mmusu’m be si Satan yɛ be sɔnnzɔn i ɔ. * I sin’n, Pɔlu kannin ekun kɛ ‘ndɛ ng’ɔ ti-man be ndɛ’n’ yɛ bla sɔ’m be kan ɔn. Ɔ nin i fataman kɛ e bɔbɔ yɛ e kle e wiengu mun like ng’ɔ fata kɛ be yo’n niɔn. Kɛ e fa e nuan e fa wlɛwlɛ i sran’m be ndɛ nun sɔ’n, junman bɔbɔ ba ng’ɔ fata kɛ e di’n mɔ yɛle Ɲanmiɛn Sielɛ’n i jasin fɛ bolɛ’n, e dimɛn i kun. Sɛ e yaci jasin fɛ’n i bolɛ’n, nn Satan su yɛ e su su ɔ. Yɛ kusu sɛ e su Satan su’n, nn e nin Zoova y’a bu. Ɔ fata kɛ e fa ajalɛ kun.—Mat. 12:30.

16. ?Sɛ e kunndɛman kɛ é sú Satan su’n, ngue yɛ ɔ fata kɛ e yo ɔ?

¹⁶ Sɛ e fa ndɛ nga Biblu’n kan’n su’n, e su ‘suman Satan su.’ Pɔlu boli ninnge nga be kwla uka e i sɔ liɛ nun’n be wie’m be su. I waan e ‘di e Min’n i junman’n kpa wɔ e nyrun tititi.’ (1 Kor. 15:58) Kɛ e mian e ɲin e di Zoova i junman’n kpa’n, e ɲanman e ti e yoman ninnge nga be timan cinnjin mɔ be kwla yo e tɛ’n. (Mat. 6:33) Like kun ekun mɔ Pɔlu waan e yo’n yɛle kɛ e ‘kan ndɛ ng’ɔ ti kpa bɔ sran ti-ɔ ɔ yo sran’n.’ (Efɛ. 4:29) Nán man e saci sran wun, yɛ sɛ sran kun waan ɔ́ sáci sran kun i wun klé e’n, nán maan e sie e su. * Maan e lafi e niaan’m be su yɛ maan e ɲin yi be. Sɛ e yo sɔ’n, é kán be wun ndɛ kpa titi. Pɔlu kannin like kun ekun ng’ɔ fata kɛ e yo’n i ndɛ kleli e. I waan ‘e mian amun nyin e nian e bɔbɔ e ninnge’m be nun yo.’ (1 Tɛs. 4:11) Maan e kle kɛ e wiengu’m be ndɛ lo e, sanngɛ maan ɔ yo  aɲinyiɛ nun. Maan e si kɛ ninnge wie o lɛ’n, be kloman kɛ sran uflɛ si nun, annzɛ ɔ fɛ i nuan wla nun. Asa ekun’n, ɔ fata kɛ e si kɛ ajalɛ wie’m be o lɛ’n, ɔ ti sran kun bɔbɔ i kunngba i ndɛ, naan ɔ fataman kɛ sran uflɛ yɛ ɔ fɛ i sɔ ajalɛ’n mɛn i ɔ.—Gal. 6:5.

17. (a) ?Ngue ti yɛ Zoova man e afɔtuɛ ninnge ng’ɔ fataman kɛ e su be su’n be su ɔ? (b) ?Ngue yɛ y’a ta nda kɛ é yó ɔ?

¹⁷ Ninnge ng’ɔ fataman kɛ e su be su’n mɔ Zoova kleli e wauun’n ti’n é lɛ́ i ase. Ɔ fata kɛ e si kɛ klolɛ mɔ Zoova klo e dan’n, i ti yɛ ɔ mannin e afɔtuɛ kwlaa nga e wunnin be lɛ’n mun ɔn. Ɔ kloman kɛ Satan laka e naan e fɛ i su afɛ’n. Atin nga Zoova kle e’n i nun sinlɛ’n ti kekle, sanngɛ i kunngba cɛ yɛ ɔ ti anannganman nguan atin’n niɔn. (Mat. 7:14) Maan e ta nda kɛ, é fá Zoova i afɔtuɛ m’ɔ man e yɛ’n i su. I waan: “Atin’n yɛ ɔ yo yɛ, amun fa su.”—Eza. 30:21.

[Ja ngua lɛ ndɛ mun]

?Wafa sɛ yɛ amún tɛ́ su ɔ?

?Wafa sɛ yɛ amun kwla kle kɛ amun fa afɔtuɛ nga be o Biblu’n nun ndɛ mma nga’m be nun’n be su ɔ?

• 2 Piɛr 2:1-3

• 1 Timote 1:3, 4

• 1 Timote 5:11-15

[Kosan mun]

[Kuku/Foto mun, bue 19]

Aunmuan’n truli akɔ ndrɛ’n nun

  Zuifu’m be lalafuɛ ndɛ kun kan like nga ti yɛ ɔ fataman kɛ e tɔn e wiengu suɛn’n i ndɛ.

Bian kun buali i klɔ’n su ngwlɛlɛfuɛ’n i su ato kleli sran kpanngban kpa klɔ’n su. Kɛ ɔ cɛli kan’n, ato buafuɛ’n toli bian ngwlɛlɛfuɛ’n naan ɔ yaci i wun sa’n cɛ i. Suɛn tɔnfuɛ’n seli bian ngwlɛlɛfuɛ’n kɛ ɔ kan like kwlaa ng’ɔ kwla yo naan w’a yaci i wun sa’n w’a cɛ i’n kle i. Ngwlɛlɛfuɛ’n seli i kɛ ɔ wɔ ko ti sunmun kun mɔ akɔ ndrɛ o nun’n i nun naan ɔ sanndi akɔ ndrɛ’n lika kwlaa nun. Suɛn tɔnfuɛ’n siman sa ti mɔ bian’n kannin sɔ’n. Sanngɛ ɔ niannin bian’n i ndɛ’n su yoli.

I sin’n, suɛn tɔnfuɛ’n ko toli ngwlɛlɛfuɛ’n yɛ ɔ usɛli i kɛ: “?W’a yaci min wun sa’n w’a cɛ min siɛn’n?”

Bian’n seli i kɛ: “Kɔ naan ko isa akɔ ndrɛ mun ka.”

Yɛ suɛn tɔnfuɛ’n waan: “?Ń yó sɛ naan m’an kwla isa akɔ ndrɛ’n? Aunmuan’n w’a fa tru i lika wunmuan’n nun. N su kwlá wunman be kun.”

Yɛ ngwlɛlɛfuɛ’n tɛli i su kɛ: “Wafa kunngba nga aunmuan truli akɔ ndrɛ’n lika’n kwlaa’n mɔ a kwlá isaman be’n, i kunngba’n yɛle wɔ ato mɔ a buali’n. A kwlá yoman naan sran’m be wla w’a fi ɔ ndɛ’n.”

Ndɛ’n ti wauun. Ndɛ ng’ɔ fi e nuan fite’n, e kwlá kacimɛn i kun. Wie liɛ kusu’n, saɛ nga ndɛ sɔ’n kpɛ i ba’n, e kwlá yomɛn i sa fi. I ti’n, maan e si kɛ sɛ e kan sran wun ndɛ tɛ’n, ɔ ti kɛ akɔ ndrɛ yɛ e su fa tru i lika’n nun sa ɔ.

[Foto, bue 16]

?Wafa sɛ yɛ sran wie’m be flɛ be nga be nin Ɲanmiɛn b’a bu’n be sua’n nun lɔ ɔ?