Mamati Ka ba sa Tin-awng mga Pasidaan ni Jehova?

“Mao kini ang dalan. Lakaw kamo niini.”—ISA. 30:21.

1, 2. Unsay determinadong buhaton ni Satanas, ug sa unsang paagi ang Bibliya nagatabang kanato?

ANG karatula sa dalan nga nagtudlo sa sayop nga direksiyon dili lamang makapahisalaag; kini peligroso. Ibutang ta nga ang imong higala nagpasidaan kanimo nga may daotang tawo nga nag-usab sa karatula aron mahisalaag ang mga tawo. Mamati ka ba sa maong pasidaan?

² Si Satanas usa gayod ka daotang kaaway nga determinadong magpahisalaag kanato. (Pin. 12:9) Ang tulo ka kapeligrohan nga gihisgotan sa miaging artikulo maoy gigamit niya aron kita mobiya sa dalan sa kinabuhing dayon. (Mat. 7:13, 14) Kita mapasalamaton nga ang atong maluluy-ong Diyos nagpasidaan kanato batok sa mga panglimbong ni Satanas. Atong hisgotan ang tulo pa ka kapeligrohan nga gimugna niya. Samtang atong tagdon kon sa unsang paagi ang Pulong sa Diyos nagatabang kanato nga dili malimbongan, samag si Jehova nagaingon sa atong luyo: “Mao kini ang dalan. Lakaw kamo niini.” (Isa. 30:21) Kon kita mamalandong sa tin-awng mga pasidaan ni Jehova, kita mas determinadong mosunod niana.

Ayawg Sunda ang ‘Mini nga mga Magtutudlo’

3, 4. (a) Nganong ang mini nga mga magtutudlo samag uga nga mga atabay? (b) Sagad diin gikan ang mini nga mga magtutudlo, ug unsay ilang gusto?

³ Handurawa nga ikaw nagapanaw sa desyerto ug giuhaw pag-ayo. Imong nakita sa layo ang usa ka atabay. Apan sa imong pag-abot didto, kini walay tubig. Mahigawad ka gayod! Ang mini nga mga magtutudlo samag uga nga mga atabay. Si bisan kinsa nga moduol kanila alang sa tubig sa kamatuoran mahigawad gayod. Pinaagi ni apostol Pablo ug Pedro, si Jehova nagpasidaan kanato batok sa mini nga mga magtutudlo. (Basaha ang Buhat 20:29, 30; 2 Pedro 2:1-3.) Kinsa ang mini nga mga magtutudlo? Ang mga pulong sa duha ka apostoles nagpaila kon diin sila gikan ug kon sa unsang paagi sila nagpahisalaag sa mga tawo.

⁴ Si Pablo miingon sa mga ansiyano sa kongregasyon sa Efeso: “Gikan sa inyong taliwala may mga tawo nga motungha ug magsultig tinuis nga mga butang.” Si Pedro misulat sa iyang mga isigka-Kristohanon: “Aduna unyay mini usab nga mga magtutudlo taliwala kaninyo.” Busa diin gikan ang mini nga mga magtutudlo? Sila mahimong maggikan sa sulod sa kongregasyon. Sila mga apostata. * Unsay ilang gusto? Dili lamang sila kontento nga mobiya sa organisasyon. Si Pablo miingon nga gusto sab nilang “ipahilayo ang mga tinun-an ngadto kanila.” Inay manglakaw ug maghimog kaugalingong mga tinun-an, buot sa mga apostata nga kabigon ang mga tinun-an ni Kristo. Samag “mga lobo nga manunukob,” sila gustong motukob sa mga membro sa kongregasyon, nga daoton ang ilang pagtuo ug ipahilayo sa kamatuoran.—Mat. 7:15; 2 Tim. 2:18.

5. Unsa ang mga paagi nga gigamit sa mini nga mga magtutudlo?

⁵ Sa unsang paagi ang mini nga mga magtutudlo nagpahisalaag sa mga tawo? Malinglahon ang ilang mga paagi. Ang mga apostata samag mga esmagler. Sila magpayuhot o ‘hilom nga magpasulod’ ug sayop nga mga ideya. Ug samag mga palsipikador nga mogamit ug peke nga mga dokumento, sila mogamit ug “mini  nga mga pulong,” o bakak nga mga argumento nga daw tinuod. Sila magpakaylap ug “malimbongong mga pagtulon-an,” ‘nga nagatuis sa Kasulatan’ aron mosibo sa ilang mga ideya. (2 Ped. 2:1, 3, 13; 3:16) Dayag nga ang mga apostata wala maghunahuna sa atong kaayohan. Kon mosunod kita kanila, kita mahitipas gikan sa dalan paingon sa kinabuhing dayon.

6. Unsay tin-aw nga gitambag sa Bibliya bahin sa mini nga mga magtutudlo?

⁶ Sa unsang paagi atong mapanalipdan ang kaugalingon batok sa mini nga mga magtutudlo? Tin-aw ang tambag sa Bibliya kon unsay atong himoon. (Basaha ang Roma 16:17; 2 Juan 9-11.) ‘Likayi sila,’ nag-ingon ang Pulong sa Diyos. Kini gihubad sa ubang Bibliya nga “talikdi sila” ug “pahilayo kanila!” Klaro kaayo ang inspiradong tambag. Pananglit sultihan ka sa doktor nga likayan ang tawong may sakit nga makatakod ug makapatay. Kay nakasabot sa giingon sa doktor, imong sundon ang iyang pasidaan. Sa pagkatinuod, ang mga apostata masakiton sa panghunahuna, ug gusto nilang matakdan ang uban sa ilang bakak nga mga pagtulon-an. (1 Tim. 6:3, 4) Si Jehova, ang Dakong Mananambal, nagsulti kanato nga likayan sila. Nahibalo kita sa iyang gipasabot, apan mamati ba gayod kita sa iyang pasidaan?

7, 8. (a) Unsay nalangkit sa paglikay sa mini nga mga magtutudlo? (b) Nganong determinado kang mobarog batok sa mini nga mga magtutudlo?

⁷ Unsay nalangkit sa paglikay sa mini nga mga magtutudlo? Dili nato sila abiabihon o timbayaon. Dili usab nato basahon ang ilang mga literatura, tan-awon ang mga programa sa TV nga naglangkit kanila, buksan ang ilang mga Web site, o mokomento sa ilang mga blog. Nganong kana ang atong baroganan? Tungod sa gugma. Kita nahigugma sa “Diyos sa kamatuoran,” busa dili kita interesado sa tinuis nga mga pagtulon-an nga supak sa iyang Pulong sa kamatuoran. (Sal. 31:5; Juan 17:17) Gihigugma usab nato ang organisasyon ni Jehova nga nagtudlo kanato sa kahibulongang mga kamatuoran—lakip ang ngalan ni Jehova ug kahulogan niini, katuyoan sa Diyos alang sa yuta, kahimtang sa patay, ug paglaom sa pagkabanhaw. Dili ba nalipay ka sa dihang nasayran nimo kini ug ang ubang bililhong kamatuoran? Nan, nganong magpaimpluwensiya ka man niadtong nagadaot sa organisasyon nga maoy nagtudlo kanimo niini nga mga kamatuoran?—Juan 6:66-69.

⁸ Bisag unsay isulti sa mini nga mga magtutudlo, dili kita mosunod kanila! Nganong moadto man ta sa uga nga mga atabay aron lang malimbongan ug mahigawad? Hinunoa, magmadeterminado kita nga mounong kang Jehova ug sa organisasyon nga dugay nang nagtagbaw sa atong kauhaw pinaagi sa hinlo ug makapalagsik nga tubig sa kamatuoran sa Pulong sa Diyos.—Isa. 55:1-3; Mat. 24:45-47.

Likayi ang “Bakak nga mga Sugilanon”

9, 10. Unsay gipasidaan ni Pablo kang Timoteo bahin sa “bakak nga mga sugilanon”? Unsay lagmit diha sa hunahuna ni Pablo? (Tan-awa usab ang potnot.)

⁹ Usahay, dali rang mamatikdan nga giusab  ang karatula sa dalan ug kini nagtudlo sa sayop nga agianan. Apan may panahon nga dili dayon kini mamatikdan. Susama usab niana ang mga kapeligrohan nga naggikan kang Satanas. Si apostol Pablo nagpasidaan kanato bahin sa usa ka malinglahong estratehiya ni Satanas—“bakak nga mga sugilanon.” (Basaha ang 1 Timoteo 1:3, 4.) Aron dili mahitipas gikan sa dalan sa kinabuhi, kinahanglan kitang mahibalo kon unsa ang bakak nga mga sugilanon ug kon sa unsang paagi makalikay niana.

¹⁰ Ang pasidaan ni Pablo bahin sa bakak nga mga sugilanon anaa sa iyang unang sulat kang Timoteo, usa ka ansiyano nga gipiyalan sa pagpreserbar sa kahinlo sa kongregasyon ug sa pagtabang sa isigkamagtutuo nga magmatinumanon. (1 Tim. 1:18, 19) Si Pablo migamit sa usa ka Gregong pulong nga mahimong magtumong sa sugilambong, tumotumo, o kabakakan. Sumala sa The International Standard Bible Encyclopaedia, kini nagtumong sa “usa ka (relihiyosong) estorya nga walay koneksiyon sa realidad.” Lagmit diha sa hunahuna ni Pablo ang relihiyosong kabakakan nga gipasiugda sa makapaukyab nga mga leyenda. * Kana magpatungha lamang ug “mga pangutana nga tukionon”—way-hinungdang mga pangutana nga moresulta sa way-kapuslanang panukiduki. Ang bakak nga mga sugilanon maoy taktika sa pangunang-limbongan, si Satanas, aron malingla ang dili mabinantayon. Tin-aw ang tambag ni Pablo: Ayawg tagda ang bakak nga mga sugilanon!

11. Sa unsang paagi malinglahong gigamit ni Satanas ang bakak nga relihiyon sa paglimbong sa mga tawo? Unsang pasidaan ang atong pamation aron dili kita malimbongan?

¹¹ Unsay pipila ka bakak nga sugilanon nga makalingla sa dili mabinantayon? Ang ekspresyong “bakak nga mga sugilanon” mahimong magtumong sa relihiyosong kabakakan o tumotumo nga makapahilayo kanato “gikan sa kamatuoran.” (2 Tim. 4:3, 4) Si Satanas, nga nagpakaaron-ingnong “manulonda sa kahayag,” malinglahong naggamit sa bakak nga relihiyon sa paglimbong sa mga tawo. (2 Cor. 11:14) Ang mga relihiyon sa Kakristiyanohan nagtudlog mga doktrina—lakip sa Trinidad, impiyernong kalayo, imortalidad sa kalag—nga punog tumotumo ug kabakakan. Ang Kakristiyanohan nagpasiugda usab ug mga selebrasyon, sama sa Christmas ug Easter, nga daw dili daotan apan sa pagkatinuod naggikan sa mitolohiya ug paganismo. Kon kita mamati sa pasidaan sa Diyos nga mobulag ug ‘mohunong na sa paghikap sa mahugaw nga butang,’ dili kita malimbongan sa bakak nga mga sugilanon.—2 Cor. 6:14-17.

12, 13. (a) Unsang kabakakan ang gipasiugda ni Satanas, ug unsay tinuod bahin sa matag usa niana? (b) Sa unsang paagi nato malikayan nga malimbongan sa bakak nga mga sugilanon ni Satanas?

¹² Si Satanas nagpasiugdag ubang kabakakan nga makapahisalaag kanato kon dili kita magbantay. Tagda ang pipila niini. Buhata bisag unsay imong gusto—maayo man o daotan. Kini nga ideya gidasig diha sa media ug sa industriya sa kalingawan. Ang maong tinuis nga panghunahuna sa mga sukdanan sa Diyos magpit-os kanato sa pagsalikway sa tanang moral nga balaod. Ang tinuod mao nga nagkinahanglan kitag giya bahin sa moralidad nga Diyos lamang ang makatagana. (Jer. 10:23) Ang Diyos dili manghilabot sa mga kalihokan dinhi sa yuta. Kon kita magpaimpluwensiya sa tinamdan nga ‘maglipay ta karon kay wala nay ugma,’ kita mahimong “dili aktibo o dili-mabungahon.” (2 Ped. 1:8) Ang tinuod mao nga haduol na kaayo ang adlaw ni Jehova, ug kita angayng magmaandam niana. (Mat. 24:44) Ang Diyos walay pagtagad kanimo. Kon motuo kita niining bakak nga ideya ni Satanas, kita mohunong sa pag-alagad kay gibati nato nga kita dili takos sa gugma sa Diyos. Ang tinuod mao nga si Jehova nahigugma ug nagpabili  sa matag usa sa iyang mga magsisimba.—Mat. 10:29-31.

¹³ Angay kitang magbantay kanunay kay ang panghunahuna ug tinamdan sa kalibotan ni Satanas daw katuohan. Apan hinumdomi nga si Satanas hawod manglimbong. Kinahanglang mamati kita sa mga pasidaan sa Bibliya aron dili kita malimbongan sa bakak nga mga sugilanon ni Satanas.—2 Ped. 1:16.

Ayaw “Pagsunod Kang Satanas”

14. Unsay gipasidaan ni Pablo sa pipila ka batan-ong balo, ug nganong kinahanglan natong seryosohon ang maong pasidaan?

¹⁴ Handurawa nga may karatula nga nag-ingon “Kini ang Dalan Paingon Kang Satanas.” Siyempre, walay Kristohanon nga gustong mosunod niana. Apan si Pablo nagpasidaan bahin sa daghang paagi nga ang dedikadong mga Kristohanon mahimong ‘mahitipas ngadto sa pagsunod kang Satanas.’ (Basaha ang 1 Timoteo 5:11-15.) Ang mga pulong ni Pablo gitumong sa pipila ka “batan-ong babayeng balo,” apan ang mga prinsipyo niana mapadapat natong tanan. Ang maong mga babaye sa unang siglo wala maghunahuna nga sila nagsunod kang Satanas, apan ang ilang binuhatan nagpakita nga sila nagsunod kaniya. Sa unsang paagi nato malikayan ang dili-tinuyo nga pagsunod kang Satanas? Atong susihon ang pasidaan ni Pablo bahin sa makadaot nga tabi.

15. Unsay tuyo ni Satanas, ug unsay iyang mga taktika nga gipaila ni Pablo?

¹⁵ Ang tuyo ni Satanas mao nga dili nato ipahayag ang atong pagtuo—nga dili na mosangyaw sa maayong balita. (Pin. 12:17) Gusto niyang gamiton nato ang atong panahon sa mga kalihokan nga walay pulos o makapabahinbahin. Matikdi ang mga taktika ni Satanas nga gipaila ni Pablo. ‘Walay ginabuhat, nagapanumbalay.’ Niining panahon sa teknolohiya, ang pag-forward ug dili-importante o bakak pa gani nga mga text o e-mail dali rang makausik sa panahon nato ug sa uban. “Mga tabian.” Ang makadaot nga tabi mahimong moresulta sa pagbutangbutang, nga makapahinabog panaglalis. (Prov. 26:20) Nahibalo man sila o wala, ang mga tigbutangbutang nagsundog kang Satanas nga Yawa. * ‘Hilabtanon sa kalihokan sa uban.’ Wala kitay katungod nga but-an ang kinabuhi sa uban. Kining way-pulos ug makapasamok nga mga batasan makabalda sa buluhatong pagsangyaw sa Gingharian nga gisugo sa Diyos kanato. Kon kita mohunong sa pagsangyaw, nan kita nagsunod kang Satanas. Kinahanglang mopili kita kon kinsay atong dapigan.—Mat. 12:30.

16. Unsang tambag ang atong sundon aron dili kita ‘mahitipas ngadto sa pagsunod kang Satanas’?

¹⁶ Ang pagpamati sa tambag sa Bibliya makatabang kanato sa paglikay nga ‘mahitipas ngadto sa pagsunod kang Satanas.’ Tagda ang pipila ka maalamong tambag ni Pablo. ‘Magmapuliki diha sa buluhaton sa Ginoo.’ (1 Cor. 15:58) Ang pagkapuliki kanunay sa buluhaton sa Gingharian magpanalipod kanato gikan sa way-pulos ug usik-sa-panahon nga kalihokan. (Mat. 6:33) Isulti ang ‘maayo aron makapalig-on.’ (Efe. 4:29) Ayaw pagpanabi, ug ayawg paminaw sa makadaot nga tabi. * Ugmara ang pagsalig ug pagtahod alang sa isigkamagtutuo. Sa ingon, ang atong mga pulong mahimong makapadasig inay makapaluya. “Himoon ninyong tumong nga . . . magtagad sa inyong kaugalingong kalihokan.” (1 Tes. 4:11) Magpakitag interes sa uban, apan himoa  kana sa paagi nga dili sila mawad-ag pribasiya ug dignidad. Hinumdomi usab nga dili nato angayng ipugos ang atong opinyon sa mga butang nga sila ang kinahanglang modesisyon.—Gal. 6:5.

17. (a) Nganong si Jehova nagpasidaan kanato sa kon unsay dili sundon? (b) Unsay imong determinasyon bahin sa dalan nga buot ni Jehova nga atong subayon?

¹⁷ Mapasalamaton gayod kita nga si Jehova tin-awng nagsulti kon unsay dili sundon! Apan hinumdomi nga si Jehova naghatag niining tanang pasidaan tungod sa iyang dakong gugma kanato. Dili niya gusto nga atong masinati ang kaguol ug kasakit tungod sa pagsunod sa malimbongong mga taktika ni Satanas. Ang dalan nga buot ni Jehova nga atong subayon tingali sigpit, apan kini motultol sa kinabuhing walay kataposan. (Mat. 7:14) Hinaot kita padayong mosunod sa awhag ni Jehova: “Mao kini ang dalan. Lakaw kamo niini.”—Isa. 30:21.

[Mga footnote]

Unsay Imong Tubag?

Sa unsang paagi nimo mapadapat ang mga pasidaan niini nga mga teksto?

• 2 Pedro 2:1-3

• 1 Timoteo 1:3, 4

• 1 Timoteo 5:11-15

Mga Pangutana sa Pagtuon]

[Kahon/Mga hulagway sa panid 19]

 Pagsabwag ug Balhibo Diha sa Hangin

Adunay karaang estorya sa mga Hudiyo nga nagpakita sa resulta sa pagpakaylap ug makadaot nga tabi.

Usa ka tawo ang nagpakaylap ug kabakakan bahin sa maalamong tawo sa ilang lungsod. Sa ulahi, ang tabian nakaamgo sa iyang sayop ug nangayog pasaylo sa maalamong tawo, ug miingon nga buhaton niya ang bisan unsa aron siya mapasaylo. Usa ray gihangyo sa maalamong tawo: Pakuhaon siyag unlan nga giundag balhibo ug buksan kana, dayon isabwag ang balhibo sa hangin. Bisag nalibog sa gihangyo, gisunod kana sa tabian ug dayon mibalik siya sa maalamong tawo.

“Pasayloon na ba ko nimo?” siya nangutana.

“Tigoma una ang tanang balhibo,” mitubag ang maalamon.

“Unsaon nako to pagtigom? Gipadpad na to sa hangin.”

“Ingon usab niana kalisod ang pagbakwi sa kadaot nga gipahinabo sa imong gipanabi.”

Tin-aw ang leksiyon. Sa dihang mabungat na ang mga pulong, dili na kana mabakwi, ug mahimong imposible nang ayohon ang kadaot. Busa, sa dili pa motabi, hinumdomi nga kita sama unyag magsabwag ug balhibo sa hangin.

[Hulagway sa panid 16]

Sa unsang paagi ang pipila lagmit magpasulod ug mga apostata sa ilang balay?