Eski ou pou swiv lavertisman kler ki Zeova i donnen?

“La sa semen. Mars lo la.”​—IZA. 30:21.

1, 2. Ki Satan i vreman anvi fer e ki mannyer Parol Bondye i ed nou?

E N LANSENNY ki endik en move direksyon i pa zis anbet nou, me i osi kapab danzere. Fer konmsi en zanmi i averti ou ki en move dimoun in sanz direksyon sa lansenny par ekspre pour ki bann vwayazer i perdi semen. Eski ou ti pou ekout son lavertisman?

² San okenn dout, parey sa move dimoun Satan i anvi anbet nou. (Rev. 12:9) Tou sa bann danze ki nou ti diskite dan lartik avan i sorti kot li avek bi pour fer nou pa swiv sa semen ki anmenn ver lavi. (Mat. 7:13, 14) Gran mersi, nou Bondye lanmour i averti nou pour pa swiv bann “lansenny” Satan ki kapab tronp nou. Aprezan, annou diskit lo trwa lezot danze ki Satan i met devan nou. Anmezir nou egzaminen ki mannyer Parol Bondye i ed nou pour pa ganny anbete, se konmsi Zeova pe mars deryer nou e pe montre nou direksyon semen an dizan: “La sa semen. Mars lo la.” (Iza. 30:21) Si nou reflesir lo bann lavertisman Zeova, sa pou ed nou pour pli determinen pour swiv zot.

Pa swiv “bann fo ansennyan”

3, 4. (a) Dan ki sans, bann fo ansenyan i parey bann pwi sek? (b) Kote bann fo ansenyan i souvan sorti e ki zot oule fer?

³ Fer krwar ou ti pe vwayaze dan en dezer. Ou byen swaf e laba dan lwen ou vwar en pwi. Ler ou arive pour tir delo, ou remarke ki sa pwi i sek. Ou pou vreman dezapwente, pa i vre! Bann fo ansenyan i parey bann pwi sek. Sa ki al kot zot pour ganny delo laverite pou vreman dezapwente. Atraver zapot Pol ek Pyer, Zeova i averti nou konsernan bann fo ansenyan. (Lir Akt 20:29, 30; 2 Pyer 2:1-3.) Lekel sa bann fo ansenyan? Dan Labib, sa de zapot i ed nou konnen kote sa bann fo ansenyan i sorti e ki mannyer zot travay.

⁴ Pol ti dir bann ansyen kongregasyon Efez: “Parmi zot pou annan dimoun ki pou leve pour ansenny bann mansonz.” Ler i ti pe ekrir son bann konpanyon, Pyer ti dir: “Pou annan bann fo ansennyan parmi zot.” Alor, kote sa bann fo ansenyan i sorti? Zot kapab sorti dan kongregasyon menm. Zot ganny apele bann aposta. * Ki zot oule fer? Zot pa zis anvi kit sa lorganizasyon ki petet zot ti kontan avan. Pol ti eksplike ki zot bi se pour “fer bann krwayan swiv zot.” Bann aposta pa rod zot prop disip an deor kongregasyon, plito zot esey pran ‘bann krwayan,’ bann ki deza pe swiv Zezi pour swiv zot. Parey ‘lelou feros,’ sa bann fo ansenyan pe target bann manm fidel dan kongregasyon par detri zot lafwa e fer zot sorti lo semen laverite.​—Mat. 7:15; 2 Tim. 2:18.

5. Ki metod bann fo ansenyan i servi?

⁵ Ki mannyer bann fo ansenyan i travay? Zot bann metod i montre ki zot rize. Bann aposta i “sekretman” senm zot bann lide koronpi. Parey bann mafya, zot fer zot bann keksoz anba anba, zot esey entrodwir  zot bann pwennvi dan kongregasyon. Parey bann dimoun ki fer bann fo paspor, zot servi “bann fo zistwar” pour trik bann dimoun dan kongregasyon e promot zot bann rezonnman konmsi i ti laverite. Zot fann zot bann “tronpri” par “deform . . . Lekritir” pour adapte avek zot prop lide. (2 Pyer 2:1, 3, 13; 3:16) I evidan ki sa bann aposta napa nou lentere aker. Zot anvi anbet nou e fer nou kit sa semen ki anmenn ver lavi eternel.

6. Ki konsey byen kler Labib i donnen konsernan bann fo ansenyan?

⁶ Ki mannyer nou kapab protez nou avek bann fo ansenyan? Konsey Labib i ase kler lo sa size. (Lir Romen 16:17; 2 Zan 9-11.) Parol Bondye i dir: “Evit bann tel dimoun.” Serten lezot tradiksyon Labib i tradwir sa fraz koumsa: “Vir ledo avek zot,” “pa koste o bor zot” e “reste lwen avek zot!” Sa konsey Bondye i pa difisil pour konpran. Meton dokter i dir ou evit tou kontak avek en dimoun ki annan en maladi kontazyez ki kapab fatal. Ou konpran ki sa dokter pe esey dir e sirman ou ti pou ekout son lavertisman. Be, bann aposta i annan en “maladi” e zot anvi enfekte lezot avek zot bann fo lansennyman. (1 Tim. 6:3, 4) Parey en dokter, Zeova, i dir nou evit tou kontak avek zot. Nou konpran ki i pe dir nou, me eski nou determinen pour swiv son lavertisman dan tou laspe nou lavi?

7, 8. (a) Ki mannyer nou kapab evit sa bann fo ansenyan? (b) Akoz nou determinen pour pran sa pozisyon ferm kont bann fo ansenyan?

⁷ Ki mannyer nou kapab evit sa bann fo ansenyan? Nou pa devret resevwar zot kot nou e akey zot. Nou pa oule lir zot bann liv, get zot bann progranm lo televizyon, al lo zot bann sit Internet ouswa azout nou komanter lo zot blog. Akoz nou pran sa pozisyon ferm? Akoz nou lanmour. Nou kontan “Bondye laverite,” alor nou pa enterese avek sa bann lansennyman ki’n ganny aranze pour kontredir Parol laverite. (Ps. 31:5; Zan 17:17) Nou osi kontan lorganizasyon Zeova ki’n fer nou konn bann laverite ekstraordiner parey non Zeova ek son sinifikasyon, plan Bondye pour later, ki arive ler nou mor ek lespwar rezireksyon. Eski ou ankor rapel ki mannyer ou ti santi premye fwa ou ti aprann sa bann laverite presye? Prezan, akoz ou pou les ou ganny afekte par okenn dimoun ki koz an mal lo sa lorganizasyon ki’n ansenny ou laverite?​—Zan 6:66-69.

⁸ Nenport kwa ki bann fo ansenyan i kapab dir, nou pa pou swiv zot! Akfer nou pou bezwen al kot sa bann pwi sek zis pour nou ganny tronpe e dezapwente? O kontrer, annou determinen pour reste fidel anver Zeova ek son lorganizasyon ki pandan tou sa lannen ki’n pase in satisfer nou laswaf avek sa delo pir e rekonfortan dan Parol Bondye.​—Iza. 55:1-3; Mat. 24:45-47.

 Pa swiv “bann fab”

9, 10. Ki lavertisman Pol ti donn Timote konsernan “bann fab” e petet kwa ki i ti pe mazinen? (Vwar osi not anba lo paz.)

⁹ Parler i kapab fasil pour konnen si en dimoun in zwe avek en lansenny e fer li vir dan en lot direksyon. Me, dan lezot moman i kapab difisil pour remark sa. Bann danse ki Satan i met devan nou i parey, serten i evidan, lezot non. Zapot Pol ti averti nou konsernan en metod rize ki Satan i servi e sa i “bann fab” oubyen fo zistwar. (Lir 1 Timote 1:3, 4.) Pour nou pa les nou ganny anbete pour sorti lo sa semen lavi, nou bezwen konnen ki si sa bann fab e ki mannyer nou kapab evit zot?

¹⁰ Lavertisman Pol konsernan bann fab i form parti son premye let ki i ti ekrir Timote, en sirveyan Kretyen ki ti annan sa responsabilite pour veye ki kongregasyon i reste pir e ed son bann konpanyon Kretyen pour reste fidel. (1 Tim. 1:18, 19) Dan sa verse, Pol ti servi en mo Grek ki refer avek zistwar envante, fo krwayans ek bann keksoz ki pa vre. Dapre The International Standard Bible Encyclopaedia, sa mo i refer avek “en zistwar (relizye) ki napa nanryen pour fer avek larealite.” Petet Pol ti pe mazin bann mansonz relizye ki ganny promote atraver bann fo zistwar ouswa lezann. * Sa bann zistwar i soulev bann kestyon bet ki ankouraz dimoun pour fer bann resers initil e “fer diskisyon.” Bann fab i en taktik Satan, sef bann anbeter, ki servi bann mansonz relizye ek fo krwayans pour anbet bann ki pa fer atansyon. Konsey Pol i kler: “Arete avek sa bann fab.”

11. Ki mannyer Satan in byen servi fo larelizyon pour tronp dimoun e ki lavertisman nou devret swiv pour nou pa ganny anbete?

¹¹ Ki serten sa bann fab ki kapab fer dimoun ki pa fer atansyon kit sa bon semen? Anfet, sa lekspresyon “bann fab” i kapab aplik avek nenport mansonz relizye ouswa fo krwayans ki kapab fer nou “nepli oule ekout laverite.” (2 Tim. 4:3, 4) Satan ki fer krwar i en “lanz lalimyer,” in byen servi fo larelizyon pour tronp bann dimoun. (2 Kor. 11:14) Bann ki pretann ki zot vre Kretyen i ansenny bann fo lansennyman parey Trinite, lanfer dife ek nanm imortel ki ranpli avek bann fo krwayans ek mansonz. Zot osi promot lafet parey Nwel ek Pak, ki paret napa nanryen mal avek, me ki sorti dan fo ladorasyon ek bann koutim payen. Si nou swiv lavertisman Bondye pour separ nou e “pa tous okenn keksoz enpir,” nou pa pou ganny anbete par bann fab.​—2 Kor. 6:14.

12, 13. (a) Ki mansonz Satan i promote e ki larealite par deryer sak sa bann mansonz? (b) Ki mannyer nou kapab anpes nou ganny tronpe avek bann fab Satan?

¹² Satan in osi promot lezot mansonz ki kapab tronp nou si nou pa fer atansyon. Annou vwar serten legzanp. I tou depan lo ou pour dir si en keksoz i byen ouswa mal. Sa pwennvi i ganny promote atraver medya ek divertisman. Sa move pwennvi lo standar Bondye i ankouraz dimoun pour rezet bann valer moral. Anfet, nou byen bezwen gidans moral ki selman Bondye i kapab donn nou. (Zer. 10:23) Bondye pa pou zanmen entervenir dan bann zafer imen. Sa leta lespri pour viv zis pour ozordi i kapab anpes nou “aktif e prodiktif.” (2 Pyer 1:8) Me larealite se ki zour Zeova i pros pour vini, e nou bezwen kontinyen esper li. (Mat. 24:44) Bondye pa fatig li avek ou. Sa mansonz Satan i kapab fer en dimoun abandonnen akoz i krwar ki Zeova  pa kontan li. Larealite se ki Zeova i kontan e apresye tou son bann adorater endividyelman.​—Mat. 10:29-31.

¹³ Nou devret reste vizilan, akoz fason panse ek latitid lemonn Satan i kapab paret fer sans ler ou gete. Me nou bezwen fer atansyon akoz Satan i sef bann anbeter. Fodre absoliman nou swiv konsey ek rapel Parol Bondye pour nou pa ganny tronpe par bann “fab byen aranze.”​—2 Pyer 1:16.

Pa ‘swiv Satan’

14. Ki lavertisman Pol ti donn bann zenn vev e akoz nou bezwen pran son parol aker?

¹⁴ Mazin en lansenny ki dir: “Pas sa kote pour swiv Satan.” Lekel parmi nou ki ti pou swiv sa lansenny? Pourtan, Pol i averti nou konsernan diferan fason ki bann Kretyen batize i kapab ‘abandonn laverite pour swiv Satan.’ (Lir 1 Timote 5:11-15.) Pol ti pe konsey serten “zenn vev,” me sa bann prensip i aplik pour nou tou. Tre probab, bann madanm Kretyen dan premye syek pa ti krwar ki zot ti pe swiv Satan, me zot aksyon ti pe montre sanmenm. Ki mannyer nou kapab evite swiv Satan san ki nou realize? Annou egzamin lavertisman Pol konsernan bann rimer.

15. Ki bi Satan e ki diferan taktik i servi ki Pol i koz lo la?

¹⁵ Satan pa anvi nou koz lo nou lafwa e i anvi nou aret pres sa bon nouvel. (Rev. 12:17) Sanmenm sa, i esey enfliyans nou pour gaspiy letan dan serten aktivite ouswa senm divizyon parmi nou. Remarke konman Pol i idantifye bann taktik Satan ler i ti dir ki ‘zot sorti dan en lakaz pour al dan en lot. Zot dezevre.’ Dan sa lemonn modern, i fasil pour gaspiy nou letan ek letan lezot par pas bann lenformasyon ki pa enportan ouswa ki pa vre dan bann imel ki nou anvoy lezot. ‘Zot fer bavardaz.’ Bavardaz i kapab danzere akoz i kapab fer nou kalonmni lezot e senm divizyon antre nou. (Prov. 26:20) Menm si zot pa realize, sa bann dimoun pe imit Dyab. * ‘Zot endiskre.’ Nou napa drwa dir lezot ki mannyer zot pou okip zot bann zafer personnel. Sa bann kalite latitid i kapab anpes nou reste konsantre lo sa travay predikasyon ki Bondye in donn nou. Si nou aret partisip plennman dan travay Zeova, anfet nou pe konmans swiv Satan. Nou pe swa swiv Zeova swa swiv Satan, napa lot swa.​—Mat. 12:30.

16. Ki konsey nou devret swiv pour ki nou pa “abandonn laverite pour swiv Satan”?

¹⁶ Swiv konsey Labib pou ed nou evite “abandonn laverite pour swiv Satan.” Pol i konsey nou pour ‘montre touzour plis lentere dan travay Senyer.’ (1 Kor. 15:58) Ler nou byen okipe dan bann aktivite spirityel, sa pou protez nou avek sa danze pour gaspiy letan oubyen vin inaktif. (Mat. 6:33) Koz zis bann ‘parol itil ki kapab ed lezot pour progrese dan zot lafwa.’ (Efe. 4:29) Annou determinen pour pa ekout oubyen fann bann rimer. * Devlop konfyans ek respe pour bann frer ek ser dan kongregasyon. Dan sa fason, nou pou anvi ankouraz lezot olye dekouraz zot. ‘Fer tou pour okip zot avek zot prop zafer.’ (1 Tesa. 4:11) Montre en lentere dan lezot, me dan en fason ki respekte  zot lavi prive ek dinyite. Mazinen osi ki nou pa devret enpoz nou prop pwennvi lo bann desizyon personnel lezot.​—Gal. 6:5.

17. (a) Akoz Zeova i averti nou konsernan bann semen ki nou pa devret swiv? (b) Ki nou determinen pour fer konsernan sa semen ki Zeova i oule nou swiv?

¹⁷ Pa nou rekonesan ki Zeova i montre nou klerman ki nou pa devret swiv. Pa zanmen bliye selman ki Zeova in donn nou sa bann lavertisman dan sa de lartik akoz i vreman kontan nou. I pa anvi vwar nou soufer akoz nou’n les nou ganny anbete avek Dyab. O kontrer, i anvi nou reste lo sa semen etrwat ki anmenn ver pli bon destinasyon ki nou ti kapab swete, lavi eternel. (Mat. 7:14) Annou determinen pour kontinyen swiv parol Zeova ki dir: “La sa semen. Mars lo la.”​—Iza. 30:21.

[Not anba lo paz]

Ki ou pou reponn?

Ki mannyer ou kapab personnelman aplik bann lavertisman ki dan sa bann verse swivan?

• 2 Pyer 2:1-3

• 1 Timote 1:3, 4

• 1 Timote 5:11-15

[Kestyon]

[Bwat/​Portre lo paz 19]

Fann plim poul dan divan

Bann Zwif i kontan rakont en zistwar lo konsekans fann rimer. I annan diferan versyon, me an gro la sa ki sa zistwar i rakonte.

Alors en zour, en zonm ti kalonmni sa zonm pli saz dan en serten lavil. Pli tar, sa zonm ti realize ki sa ki i ti’n fer ti mal, e i ti al kot sa zonm saz pour demann li pardon e ofer li pour koriz son fot. Sa zonm saz ti demann li zis en keksoz. I ti demann li pour rod en zorye, ouver li e fann tou sa bann plim poul dan divan. Sa zonm ti vwar li en pe drol, me toudmenm i ti fer sanmenm e apre i ti retourn kot sa zonm saz.

I ti demann li: “Eski mon’n ganny pardonnen aprezan?”

Sa zonm saz ti reponn: “Avan mon pardonn ou, mon ti a kontan ou al rod tou sa bann plim poul.”

“Me, mannyer mon kapab fer sa? Enn fwa ki divan in soufle, kot mon pou al trouve?”

“Ou vwar, zis parey i difisil pour anmas sa bann plim, i difisil pour repar ditor ki ou’n fer avek ou parol.”

Leson i kler. Enn fwa ki nou koze, i tro tar pour repran nou parol e repar ditor ki nou’n kapab koze. Alor, avan konmans fann en rimer, i ti pou pli bon rapel ki an realite nou pe al fann plim poul dan divan.

[Portre lo paz 16]

Ki mannyer serten i kapab envit bann aposta kot zot?