Be Hiẹ Na Setonuna Avase Họnwun Jehovah Tọn lẹ Ya?
Be Hiẹ Na Setonuna Avase Họnwun Jehovah Tọn lẹ Ya?
‘Ehe wẹ aliho lọ, mì zinzọnlin to e mẹ.’—ISA. 30:21.
1, 2. Etẹwẹ Satani magbe nado wà, podọ nawẹ Ohó Jiwheyẹwhe tọn nọ gọalọna mí gbọn?
OHIA alidohiamẹ tọn he pànta fie ma sọgbe ma nọ hẹnmẹ buali poun gba, e sọ sọgan hẹn owù wá. Mí ni dọ dọ họntọn towe de na we avase dọ mẹylankan de yọnẹn gan an bo lilẹ́ ohia alidohiamẹ tọn de pànta fidevo nado hẹn awugble wá mẹhe ma to aṣeji lẹ ji. Be hiẹ ma na setonuna avase etọn ya?
2 Na nugbo tọn, kẹntọ ylankan he magbe nado hẹn mí buali lọ wẹ Satani. (Osọ. 12:9) Ewọ wẹ asisa nuyiwadomẹji ylankan he ji mí dọhodo to hosọ he jẹnukọn mẹ lẹ tọn podọ yanwle etọn wẹ nado hẹn mí danbú sọn ali he nọ planmẹ yì ogbẹ̀ madopodo mẹ lọ ji. (Mat. 7:13, 14) Mí dopẹ́ dọ Jiwheyẹwhe nọ na mí avase ma nado hodo ‘ohia alidohiamẹ tọn’ Satani tọn he nọ hẹnmẹ buali lẹ. Todin, mì gbọ mí ni pọ́n nuyiwadomẹji ylankan atọ̀n Satani tọn devo lẹ. Eyin mí to dogbapọnna lehe Ohó Jiwheyẹwhe tọn nọ gọalọna mí ma nado buali do, mí sọgan nọ pọnhlan taidi dọ Jehovah to zọnlinzin to godo na mí bo to aliho he sọgbe lọ dohia mí dọmọ: ‘Ehe wẹ aliho lọ, mì zinzọnlin to e mẹ.’ (Isa. 30:21) Eyin mí nọ lẹnnupọndo avase họnwun Jehovah tọn lẹ ji, gbemima mítọn nado nọ setonuna yé na sinyẹn deji.
Ma Hodo “Mẹplọntọ Lalo lẹ” Blo
3, 4. (a) Nawẹ mẹplọntọ lalo lẹ taidi dotọ̀ húhú gbọn? (b) Fie wẹ mẹplọntọ lalo lẹ nọ saba wá sọn, podọ etẹwẹ yin yanwle yetọn?
3 Mí ni dọ dọ hiẹ to zọnlinzin gbọn danfafa de ji bọ nugbla hù we bọ a mọ dotọ̀ de hlan. Na hiẹ lẹndọ emi sọgan mọ osin to e mẹ wutu, a yì e kọ̀n. Ṣigba to whenue a jẹ dotọ̀ lọ kọ̀n, a mọdọ e ko hú. Lehe a na jẹflumẹ do sọ! Mẹplọntọ lalo lẹ tin taidi dotọ̀ húhú. Mẹdepope he to osin nugbo tọn dín bo yì yé dè na jẹflumẹ sinsinyẹn. Jehovah na mí avase gando mẹplọntọ lalo lẹ go gbọn apọsteli Paulu po Pita po gblamẹ. (Hia Owalọ lẹ 20:29, 30; 2 Pita 2:1-3.) Mẹnu wẹ mẹplọntọ enẹlẹ yin? Ohó gbọdo apọsteli awe ehelẹ tọn gọalọna mí nado yọ́n fie mẹplọntọ lalo lẹ nọ wá sọn po lehe yé nọ yinuwa do po.
4 Paulu dọna mẹho agun Efesu tọn lẹ dọmọ: “Sọn mìlọsu lẹ ṣẹnṣẹn wẹ sunnu lẹ na fọ́n sọn bo na slokọna nuplọnmẹ lẹ.” To whenue Pita to wekanhlan Klistiani hatọ lẹ, e dọmọ: “Mẹplọntọ lalo lẹ na wá tin to mì ṣẹnṣẹn . . . ga.” To whelọnu lo, fie wẹ mẹplọntọ lalo lẹ nọ wá sọn? Yé sọgan fọ́n sọn agun lọ mẹ. Atẹṣitọ wẹ omẹ enẹlẹ yin. Etẹwẹ yin yanwle yetọn? Paulu dọ dọ eyin yé jo titobasinanu Jehovah tọn do, yé sọ nọ tẹnpọn “nado dọ̀n devi lẹ do godo yede tọn.” Devi he go Paulu donù lẹ wẹ devi Klisti tọn lẹ. Mẹplọntọ lalo ehelẹ ma nọ yì gbonu agun lọ tọn nado yì dín devi lẹ gba. Kakatimọ, yé nọ yí kavi fìn devi lẹ sọn agun lọ mẹ. Taidi “ohla nuwledutọ lẹ,” mẹplọntọ lalo lẹ magbe nado tlẹ́n hagbẹ agun lọ tọn lẹ dù gbọn yise yetọn huhusudo podọ nado hẹn yé buali sọn nugbo lọ mẹ dali.—Mat. 7:15; 2 Tim. 2:18.
5. Ayiha gigẹdẹ tẹlẹ wẹ mẹplọntọ lalo lẹ nọ yizan?
5 Nawẹ mẹplọntọ lalo lẹ nọ klọmẹ gbọn? Yé nọ yí ayiha gigẹdẹ lẹ zan. Atẹṣitọ lẹ nọ gbọn “yẹwiwa” dali hẹn plọngiglọ yetọn lẹ biọ agun mẹ, kẹdẹdile sẹ́nhẹngbatọ lẹ nọ hẹn nulẹ gbọn nuglọ biọ otò de mẹ do. Yé nọ yí “ohó oklọ tọn lẹ” zan. Ehe dohia dọ yé nọ dọho to aliho de mẹ nado hẹn gbẹtọ lẹ lẹndọ nuhe dọ yé te yin nugbo, kẹdẹdile sẹ́nhẹngbatọ lẹ nọ wleawuna wema oklọ tọn lẹ nado hẹn wema lọ lẹ taidi nuhe sọgbe do. Yé nọ hẹn “nuplọnmẹ lalo” lẹ gbayipe bo nọ ‘slokọna Owe-wiwe lẹ’ nado hẹn ẹn sọgbe hẹ nuplọnmẹ yetọn titi lẹ. (2 Pita 2:1, 3, 13; 3:16) E họnwun dọ dagbemẹninọ mítọn ma nọ duahunmẹna atẹṣitọ lẹ. Eyin mí hodo yé, yé na hẹn mí buali sọn aliho he nọ planmẹ yì ogbẹ̀ madopodo mẹ lọ ji.
6. Ayinamẹ họnwun tẹwẹ Biblu na mí gando mẹplọntọ lalo lẹ go?
6 Nawẹ mí sọgan họ́ míde sọta mẹplọntọ lalo lẹ gbọn? Ayinamẹ Biblu tọn gando lehe mí na nọ yinuwa hẹ atẹṣitọ lẹ do go họnwun. (Hia Lomunu lẹ 16:17; 2 Johanu 9-11.) “Dapana yé,” wẹ Ohó Jiwheyẹwhe tọn dọ. Enẹ dohia dọ mí dona nọla na yé. Nudepope ma doglẹ to ayinamẹ Biblu tọn enẹ mẹ gba. Mí ni dọ dọ doto de dọna we nado nọla na mẹhe to azọ̀nylankan he sọgan bẹplamẹ de jẹ. E ma na vẹawuna we nado mọnukunnujẹ nuhe dọ doto lọ te mẹ, podọ hiẹ na setonuna avase etọn. Na nugbo tọn, “apọ̀nmẹzọ̀n jẹ” wẹ atẹṣitọ lẹ te, podọ yé nọ tẹnpọn nado yí nuplọnmẹ agọ̀ yetọn lẹ do bẹpla mẹdevo lẹ. (1 Tim. 6:3, 4) Jehovah, yèdọ Doto Daho lọ na mí avase nado dapana omẹ mọnkọtọn lẹ. Nuhe e dọ họnwun, ṣigba be mí magbe nado nọ setonuna avase etọn to ninọmẹ lẹpo mẹ ya?
7, 8. (a) Etẹwẹ mí dona wà nado dapana mẹplọntọ lalo lẹ? (b) Naegbọn hiẹ magbe nado dapana mẹplọntọ lalo lẹ?
7 Etẹwẹ mí dona wà nado dapana mẹplọntọ lalo lẹ? Mí ma dona nọ kẹalọyi yé do owhé mítọn gbè kavi dọnudo yé gba. Mọdopolọ, mí ma dona nọ hia owe yetọn lẹ, pọ́n yé to televiziọn kavi nọtẹn Internet tọn yetọn lẹ ji, kavi dọho nado nọgodona nuhe yé kàn do Internet ji lẹ gba. Naegbọn mí dona magbe nado dapana yé? Tintan, na mí yiwanna “Jiwheyẹwhe nugbo tọn” lọ wutu. Enẹwutu, mí ma dona nọ dotoaina nuplọnmẹ lalo he jẹagọdo nugbo he tin to Ohó Jiwheyẹwhe tọn mẹ lẹ. (Ps. 31:5; Joh. 17:17) Humọ, mí yiwanna titobasinanu he Jehovah nọ yizan nado plọn mí nugbo jiawu etọn lẹ. Titobasinanu lọ wẹ plọn oyín Jehovah tọn mí po nuhe e zẹẹmẹdo po, lẹndai Etọn na aigba, nuhe nọ jọ do mí go to whenue mí kú, gọna todido fọnsọnku tọn. Be hiẹ flin lehe homẹhun we do whla tintan he a sè onú ehelẹ po nugbo họakuẹ devo lẹ po ya? Enẹwutu, ma dike nuplọnmẹ agọ̀ mẹplọntọ lalo lẹ tọn ni hẹn we nado jo titobasinanu he plọn we nugbo ehelẹ do blo.—Joh. 6:66-69.
8 Mahopọnna nudepope he mẹplọntọ lalo lẹ sọgan dọ, mí ma dona hodo yé! Ale depope ma to e mẹ nado dotoaina mẹhe taidi dotọ̀ húhú enẹlẹ. Eyin mẹde dotoaina yé, e na jẹflumẹ. Enẹwutu, mì gbọ mí ni magbe nado gbọṣi nugbonọ-yinyin mẹ na Jehovah po titobasinanu etọn po. Titobasinanu ehe ma ko hẹn mí jẹflumẹ pọ́n gbede podọ e nọ to osin wiwe ṣeke he nọ wá sọn Biblu mẹ na mí tẹgbẹ.—Isa. 55:1-3; Mat. 24:45-47.
Ma Hodo “Otàn Lalo lẹ” Blo
9, 10. Avase tẹwẹ Paulu na Timoti gando “otàn lalo lẹ” go, podọ etẹwẹ Paulu na ko tindo to ayiha mẹ? (Sọ pọ́n nudọnamẹ odò tọn to weda 17 ji.)
9 To whedelẹnu, e nọ bọawu nado mọdọ mẹde ko lilẹ́ ohia alidohiamẹ tọn de pànta fidevo. Ṣigba to ninọmẹ devo lẹ mẹ, e ma nọ bọawu nado doayi e go. Mọdopolọ, nuyiwadomẹji ylankan Satani tọn delẹ nọ họnwun to whenuena devo lẹ nọ doglẹ. Apọsteli Paulu na mí avase gando dopo to ayiha wintinwintin Satani tọn lẹ mẹ go—enẹ wẹ “otàn lalo lẹ.” (Hia 1 Timoti 1:3, 4.) Eyin mí ma jlo na danbú sọn aliho he nọ planmẹ yì ogbẹ̀ madopodo mẹ lọ ji, mí dona yọ́n nuhe otàn lalo lẹ yin po lehe mí sọgan dapana yé do po.
10 Mí sọgan mọ avase Paulu tọn gando otàn lalo lẹ go hia to wekanhlanmẹ etọn tintan hlan Timoti mẹ, yèdọ mẹho agun tọn de he yin azọ́ndena nado basi hihọ́na wiwejininọ agun lọ tọn bo gọalọna yisenọ hatọ lẹ nado gbọṣi nugbonọ-yinyin mẹ. (1 Tim. 1:18, 19) Hogbe Glẹki tọn he Paulu yizan na “otàn lalo lẹ” zẹẹmẹdo “otangblo” kavi “hopàdọ.” Owe de dọ dọ otàn lalo yin otàn sinsẹ̀n tọn de he ma tindo kanṣiṣa depope hẹ nuhe yin nugbo. (The International Standard Bible Encyclopaedia) Vlavo lalo sinsẹ̀n tọn he tindo kanṣiṣa hẹ otangblo he nọ fọ́n tlintlindo dindin gbẹtọ lẹ tọn dote lẹ wẹ Paulu na ko tindo to ayiha mẹ. a Otàn mọnkọtọn lẹ “nọ fọ́n kanbiọ dodinnanu tọn lẹ dote”—enẹ wẹ kanbiọ fúsa he nọ dekọtọn do dodinnanu ovọ́ mẹ lẹ. Otàn lalo lẹ yin dopo to ayiha wintinwintin he mẹklọtọ-gán lọ, yèdọ Satani nọ yizan lẹ mẹ. E nọ yí lalo sinsẹ̀n tọn po otangblo he nọ de yẹyi sọn Jiwheyẹwhe go lẹ po zan nado hẹn mẹhe ma to aṣeji lẹ buali. Ayinamẹ Paulu tọn wẹ yindọ mí ma dona nọ na ayidonugo otàn lalo lẹ!
11. Nawẹ Satani nọ yí sinsẹ̀n lalo zan nado hẹn gbẹtọvi lẹ buali gbọn, podọ avase tẹwẹ mí dona setonuna ma nado yin hinhẹn buali?
11 Etẹwẹ yin delẹ to otàn lalo he sọgan hẹn mẹhe ma to aṣeji lẹ buali lẹ mẹ? Na taun tọn, hogbe lọ “otàn lalo lẹ” sọgan yin yiyizan na lalo sinsẹ̀n tọn kavi otangblo depope he sọgan lẹ́ mí “sọn nugbo lọ” mẹ. (2 Tim. 4:3, 4) Satani bikan. E nọ do ede hia taidi “angẹli hinhọ́n tọn” gbọn sinsẹ̀n lalo yiyizan nado hẹn gbẹtọ lẹ buali dali. (2 Kọl. 11:14) Di apajlẹ, sinsẹ̀n Mẹylọhodotọklisti tọn nọ plọnmẹ lalo lẹ taidi Atọ̀n-to-Dopomẹ, olọnzomẹ po jọmaku alindọn tọn po. Mẹsusu nọ lẹndọ hùnwhẹ Noẹli po Paaki po tọn nọ hẹn homẹhun Jiwheyẹwhe, ṣigba aṣa kosi lẹ tọn mẹ wẹ yé wá sọn. Eyin mí nọ setonuna avase Jiwheyẹwhe tọn nado klan míde dovo na sinsẹ̀n lalo bo ma “doalọ onú mawé” de go, otàn lalo lẹ ma na hẹn mí buali.—2 Kọl. 6:14-17.
12, 13. (a) Lalo atọ̀n tẹlẹ wẹ Satani nọ nọgodona, podọ etẹwẹ yin nugbo lọ gando dopodopo lalo ehelẹ tọn go? (b) Eyin mí ma jlo dọ otàn lalo Satani tọn lẹ ni hẹn mí danbú, etẹwẹ mí dona wà?
12 Satani sọ nọ yí lalo devo lẹ zan nado hẹn mí danbú eyin mí ma to aṣeji. Mì gbọ mí ni pọ́n atọ̀n to lalo ehelẹ mẹ. Tintan: Hiẹ sọgan wà nudepope he jlo we. Hiẹ sọgan magbe nuhe yin dagbe kavi oylan tọn na dewe. Onú mọnkọtọn wẹ gbẹtọ lẹ nọ saba dọ to televiziọn po Internet po ji podọ to sinima, owe lẹ po linlinwe lẹ po mẹ. Na whelẹponu wẹ mí nọ to lalo ehe sè wutu, e bọawu dọ mílọsu ni wleawuna pọndohlan dopolọ bo hodo linlẹn mawé tọn he gbayipe to aihọn lọ mẹ lẹ. Ṣigba nugbo lọ wẹ yindọ mí tindo nuhudo anademẹ Jiwheyẹwhe tọn nado yọ́n vogbingbọn to dagbe po oylan po ṣẹnṣẹn. (Jel. 10:23) Awetọ: Jiwheyẹwhe ma na dádo whẹho gbẹtọvi lẹ tọn mẹ. Pọndohlan mọnkọtọn nọ sisẹ́ gbẹtọ lẹ nado dugbẹ zẹjlẹgo to azán dopodopo gbè po linlẹn lọ po dọ emi na kú to osọ. Yé ma nọ lẹnnupọndo nuhe na jọ to sọgodo kavi nuhe na hẹn homẹ Jiwheyẹwhe tọn hùn lẹ ji. Mílọsu sọgan jẹ awuwlena pọndohlan mọnkọtọn ji bo wá “gbọjọ kavi yin mẹhe ma tindo sinsẹ́n.” (2 Pita 1:8) Nugbo lọ wẹ yindọ azán Jehovah tọn to dindọnsẹpọ po awuyiya po podọ mí dona to nukundo e. (Mat. 24:44) Atọ̀ntọ: Jiwheyẹwhe ma to towe hòpọn. Eyin mí yí lalo Satani tọn enẹ sè, enẹ sọgan hẹn mí gbọjọ po linlẹn lọ po dọ mí ma na jẹna owanyi Jiwheyẹwhe tọn gbede. Nugbo lọ wẹ yindọ Jehovah yiwanna dopodopo omẹ etọn lẹ tọn bosọ yọ́n pinpẹn yetọn taun.—Mat. 10:29-31.
13 Eyin mí ma na wleawuna pọndohlan aihọn Satani tọn he nọ taidi nuhe dọnmẹdogo, mí dona nọ họ́ míde to whepoponu. Humọ, mí dona nọ flindọ Satani wẹ mẹklọtọ-gán lọ. Eyin mí ma jlo dọ Satani ni yí otàn lalo lẹ do hẹn mí danbú, mí dona nọ setonuna avase Biblu tọn lẹ.—2 Pita 1:16.
Ma “Hodo Satani” Blo
14. Avase tẹwẹ Paulu na asuṣiọsi he gbẹ́ pò to jọja mẹ delẹ, podọ naegbọn mímẹpo dona hẹn nuhe e dọ lẹ do ayiha mẹ?
14 Mí ni dọ dọ mí mọ ohia alidohiamẹ tọn de he ji yè kannu do dọ: “Eyin Mì Gbọn File, Mì Na Hodo Satani.” Mẹnu to mí mẹ wẹ na jlo nado hodo nuhe ohia alidohiamẹ tọn enẹ dọ? Ṣigba, Paulu na mí avase gando aliho susu he mẹ Klistiani lẹ sọgan ‘lẹkọ hodo Satani’ te lẹ go. (Hia 1 Timoti 5:11-15.) “Asuṣiọsi he gbẹ́ pò to jọja mẹ” delẹ wẹ Paulu na ayinamẹ, etomọṣo mímẹpo go wẹ nunọwhinnusẹ́n lọ lẹ gando. Yọnnu Klistiani owhe kanweko tintan whenu tọn enẹlẹ sọgan nọma lẹndọ emi ko to Satani hodo, ṣigba nuhe nuyiwa yetọn lẹ dohia pẹpẹ niyẹn. Nawẹ mí sọgan họ́ míde ma nado hodo Satani to mayọnẹn mẹ gbọn? Mì gbọ mí ni gbadopọnna avase he Paulu na gando mẹnudidọ ylankan go.
15. Etẹwẹ yin yanwle Satani tọn, podọ nawẹ Paulu do ayiha wintinwintin Satani tọn lẹ hia gbọn?
15 Yanwle Satani tọn wẹ nado hù yise mítọn sudo—enẹ wẹ nado hẹn mí nado doalọtena wẹndagbe lọ lilá. (Osọ. 12:17) Nado jẹ yanwle etọn kọ̀n, e nọ hẹn mí nado doafọna nuwiwa he nọ hẹn whenu gú kavi he nọ hẹn kinklan wá lẹ. Doayi lehe Paulu do ayiha wintinwintin Satani tọn lẹ hia do go. E dọ dọ asuṣiọsi azán emitọn gbè tọn lẹ “nọ hẹn alọnu yetọn vò, bo nọ to dindanpe.” Asuṣiọsi enẹlẹ nọ hẹn whenu yetọn gú nado to họntọn yetọn lẹ dlapọn bo nọ to ohó fúsa dọ pé. Mọdopolọ to ojlẹ azọ́n nuyọnẹn wintinwintin tọn he mẹ mí tin te ehe, e bọawu nado hẹn whenu mítọn po mẹdevo lẹ po tọn gú gbọn wekanhlanmẹ agọ̀ kavi nudọnamẹ he ma yin nujọnu lẹ didohlan yé gbọn Internet ji dali. Paulu sọ dọ dọ asuṣiọsi lọ lẹ yin “mẹnudọtọ.” Mẹnudidọ ylankan sọgan dekọtọn do mẹhẹngble he nọ saba hẹn avùn wá mẹ. (Howh. 26:20) Vlavo mẹhẹngbletọ lẹ yọnẹn wẹo kavi lala, apajlẹ Satani Lẹgba tọn hodo wẹ yé te. b Humọ, Paulu dọ dọ asuṣiọsi lọ lẹ “nọ dádo whẹho mẹdevo lẹ tọn mẹ.” E ma yin mítọn nado nọ dọ lehe mẹdevo lẹ na zan gbẹzan yetọn do na yé gba. Nudemawlewà po walọ ylankan mọnkọtọn lẹ po sọgan fẹayihasẹna mí sọn azọ́n Ahọluduta lọ tọn he Jiwheyẹwhe de na mí nado lá lọ ji. Eyin zohunhun mítọn to azọ́n he Jehovah dena mí lọ mẹ depò, be Satani hodo wẹ mí te niyẹn. Mí dona de adà mẹhe tọn mẹ mí jlo na nọ.—Mat. 12:30.
16. Ayinamẹ tẹ hihodo wẹ sọgan gọalọna mí ma nado ‘lẹkọ hodo Satani’?
16 Ayinamẹ Biblu tọn lẹ hihodo sọgan gọalọna mí ma nado ‘lẹkọ hodo Satani.’ Mì gbọ mí ni pọ́n ayinamẹ nuyọnẹn tọn Paulu tọn delẹ. E dọ dọ mí dona nọ tindo “onú susu nado wà to azọ́n Oklunọ tọn mẹ.” (1 Kọl. 15:58) Eyin mí nọ hẹn alọnu ján to nuwiwa gbigbọmẹ tọn lẹ mẹ, mí ma na lẹzun adidọnọ kavi doafọna nuhe nọ hẹn whenu gú lẹ. (Mat. 6:33) Nudevo he Paulu dọna mí nado wà wẹ nado nọ dọ nuhe “yọ́n na mẹjlọdote” lẹ. (Efe. 4:29) Magbe ma nado nọ dotó mẹnudidọ ylankan kavi fúnfún in pé. c Nọ dejido yisenọ hatọ lẹ go bo nọ na sisi yé. Gbọnmọ dali, mí na penugo nado nọ dọ nuhe nọ jlọmẹdote lẹ kakati nado nọ dọ nuhe nọ hẹnmẹ gbọjọ lẹ. Humọ, Paulu dọ dọ mí dona “hẹn ẹn zun yanwle . . . ma nado nọ dádo whẹho mẹdevo lẹ tọn mẹ.” (1 Tẹs. 4:11) Mí sọgan dohia mẹdevo lẹ dọ mí yiwanna yé, ṣigba mí dona payi ma nado nọ kàn aṣlihó sè yé podọ mí ma dona nọ dọho kavi yinuwa to aliho de mẹ nado de yẹyi sọn yé go. Humọ, mí dona flindọ mí ma dona nọ zín pọndohlan mítọn do mẹdevo lẹ ji na nuhe dù whẹho he mẹ yelọsu dona basi nudide te lẹ.—Gal. 6:5.
17. (a) Etẹwẹ nọ whàn Jehovah nado na mí avase gando nuhe mí ma dona hodo lẹ go? (b) Etẹwẹ yin gbemima towe gando aliho he Jehovah jlo dọ mí ni ze lọ go?
17 Lehe mí dopẹ́ do sọ dọ Jehovah nọ na mí anademẹ họnwun lẹ gando nuhe mí ma dona hodo lẹ go! Ṣigba, mí ni ma wọn gbede dọ owanyi sisosiso he Jehovah tindo na mí wẹ whàn ẹn nado nọ na mí avase he ji mí dọhodo to hosọ ehe po dehe jẹnukọn po mẹ lẹ blo. E ma jlo dọ mí ni hodo ‘ohia alidohiamẹ tọn’ oklọ tọn Satani tọn lẹ bo hẹn awugble po awufiẹsa po wá míde ji. Aliho he Jehovah jlo dọ mí ni ze lọ bó, ṣigba e nọ planmẹ yì fihe yọ́n hugan lọ—yèdọ ogbẹ̀ madopodo mẹ. (Mat. 7:14) Mì gbọ mí ni magbe nado nọ setonuna tudohomẹnamẹ Jehovah tọn lọ dọmọ: ‘Ehe wẹ aliho lọ, mì zinzọnlin to e mẹ.’—Isa. 30:21.
[Nudọnamẹ odò tọn]
a Owe Tobie kavi Tobit tọn he mẹdelẹ nọ pọnhlan taidi apadewhe Biblu tọn, yin dopo to otàn lalo he tin-to-aimẹ to azán Paulu tọn gbè lẹ mẹ. E yin kinkan to nudi owhe kanweko atọ̀ntọ J.W.M. Nuyise lalo po otàn afinyọnnuwiwa tọn lẹ po kẹdẹ wẹ gọ́ owe enẹ mẹ. E bẹ otangblo lẹ hẹn, ṣigba dọ dọ nugbo wẹ otàn enẹlẹ yin.—Étude perspicace des Écritures, Bladopọ 1, weda 135.
b Hogbe Glẹki tọn he yiyizan na “lẹgba” wẹ di·aʹbo·los, he zẹẹmẹdo “mẹhẹngbletọ.” Hogbe enẹ yin yiyizan taidi tẹnmẹ-yinkọ Satani tọn devo, yèdọ mẹhẹngbletọ daho hugan lọ.—Joh. 8:44; Osọ. 12:9, 10.
c Pọ́n apotin lọ “Hẹ̀fún lẹ Vúnvúnvúnvún do Jẹhọn Mẹ.”
Etẹwẹ Yin Gblọndo Towe?
Nawẹ hiẹ sọgan yí avase he tin to wefọ he bọdego ehelẹ mẹ do yizan mẹ gbọn?
[Kanbiọ Oplọn tọn lẹ]
[Apotin/Yẹdide to weda 19]
Hẹ̀fún lẹ Vúnvúnvúnvún do Jẹhọn Mẹ
Ajlú Juvi lẹ tọn de do nuhe mẹ mẹnudidọ ylankan sọgan dekọtọn do hia. Aliho voovo mẹ wẹ ajlú lọ nọ yin dido te, ṣigba nuhe e bẹhẹn to kleun mẹ die.
Dawe de nọ to dindanpe gbọn tòmẹ bo nọ to dawe nuyọnẹntọ de hẹngble. Mẹnudọtọ lọ wá doayi e go dọ nuhe wà emi te ma yọ́n bo yì dawe nuyọnẹntọ lọ dè nado biọ jona. E wleawufo nado wà nuhe go e pé lẹpo nado vọ́ nuhe e ko dọ do dawe nuyọnẹntọ lọ go lẹ jlado. Dawe nuyọnẹntọ lọ biọ onú dopo to e si: E dọna mẹnudọtọ lọ nado yì vún kọ̀donu he mẹ hẹ̀fún te de bo vúnvún hẹ̀fún lọ lẹ do jẹhọn mẹ. Mahopọnna dọ nuhe dawe nuyọnẹntọ lọ biọ to mẹnudọtọ lọ si paṣa ẹ, e wà nuhe e dọ lọ. Enẹgodo, e lẹkọwa dawe nuyọnẹntọ lọ dè.
“Din lo, a jona mi ya?” wẹ mẹnudọtọ lọ kanse.
“Jẹnukọn whẹ́, lẹkọ bo yì ṣinyan hẹ̀fún lọ lẹpo,” wẹ dawe nuyọnẹntọ lọ gblọn.
“Nawẹ n’na wà enẹ gbọn? Jẹhọn ko vúnvún yé pé ma.”
“Lehe e vẹawu nado yì ṣinyan hẹ̀fún he vúnvún pé lọ lẹ do, mọ wẹ e vẹawu nado vọ́ nuhe a dọ do go e lẹ jlado do niyẹn.”
Nuhe ajlú ehe plọn mí họnwun. Eyin mí ko dọ nude, mí masọ sọgan gọ ẹ bẹ ba, podọ e na vẹawu nado vọ́ nuhe ohó mítọn ko hẹngble lẹ jlado. Enẹwutu, whẹpo mí nado kẹnù bo dọ nudepope do mẹde go, nuyọnẹnnu wẹ e na yin nado flindọ hẹ̀fún wẹ mí jlo na vúnvún do jẹhọn mẹ.
[Yẹdide to weda 16]
Nawẹ mẹdelẹ sọgan basi oylọna atẹṣitọ lẹ wá owhé yetọn gbè gbọn?
