Pamatian Mo Bala ang Maathag nga mga Paandam ni Jehova?

“Ini amo ang dalan, lakat kamo sa sini.”—ISA. 30:21.

1, 2. Sa ano determinado si Satanas, kag paano kita mabuligan sang Pulong sang Dios?

ANG sala nga karatula sa dalan indi lang makapatalang kundi makatalagam pa. Ibutang ta nga ginpaandaman ka sang imo abyan nga hungod nga gin-islan sang malain nga tawo ang karatula para halitan ang indi alisto nga mga manuglakbay. Indi mo bala sia pagpamatian?

² Si Satanas amo ang kaaway nga determinado gid nga patalangon kita. (Bug. 12:9) Sia ang nagpadihot sang tanan nga katalagman nga ginbinagbinag naton sa nagligad nga artikulo para maglisa kita sa dalan nga nagapadulong sa kabuhi nga dayon. (Mat. 7:13, 14) Maayo lang kay ginapaandaman kita sang aton maluluy-on nga Dios nga indi pagsundon ang makapatalang nga ‘mga karatula’ ni Satanas. Binagbinagon naton subong ang tatlo pa ka katalagman. Sa aton pagbinagbinag kon paano kita ginabuligan sang Pulong sang Dios nga indi magtalang, mahanduraw naton nga si Jehova yara sa aton likod kag nagatudlo sang husto nga alagyan, nga nagasiling: “Ini amo ang dalan, lakat kamo sa sini.” (Isa. 30:21) Samtang ginatun-an naton ining maathag nga mga paandam, mangin determinado pa gid kita nga tumanon si Jehova.

Indi Magsunod sa “Di-matuod nga mga Manunudlo”

3, 4. (a) Paano nangin kaangay sang mamala nga bubon ang di-matuod nga mga manunudlo? (b) Sa diin sila naghalin kag ano ang gusto nila?

³ Handurawa nga nagalakbay ka sa desyerto. May nalantawan ka nga bubon sa unhan, amo nga nagdalidali ka agod mabulong ang imo kauhaw. Pero pag-abot mo, mamala gali ang bubon. Nalugaw-an ka gid! Ang di-matuod nga mga manunudlo pareho sang mamala nga bubon. Ang tanan nga nagakadto sa ila para sa tubig sang kamatuoran nagakalugaw-an lang. Gani, paagi kanday Pablo kag Pedro, ginapaandaman kita ni Jehova batok sa di-matuod nga mga manunudlo. (Basaha ang Binuhatan 20:29, 30; 2 Pedro 2:1-3.) Sin-o ini nga mga manunudlo? Ang sinulatan sining duha ka apostol makabulig sa aton nga mahibaluan kon diin naghalin kag kon paano nagapanghikot ining di-matuod nga mga manunudlo.

⁴ Ginsilingan ni Pablo ang mga gulang sa Efeso: “Gikan sa inyo mismo may mga tawo nga magalutaw kag magahambal sang tiko nga mga butang.” Sa iya mga masigka-Cristiano, si Pedro nagsulat: “May magaluntad man nga di-matuod nga mga manunudlo sa tunga ninyo.” Sa diin sila naghalin? Mahimo nga sa sulod mismo sang kongregasyon. Mga apostata sila. * Ano ang gusto nila? Indi sila kontento nga biyaan lamang ang organisasyon nga ginhigugma nila sang una. Suno kay Pablo, ang ila katuyuan amo nga “ipahilayo ang mga disipulo kag pasundon sa ila.” Ang mga disipulo nga ginapatuhuyan ni Pablo amo mismo ang mga disipulo ni Cristo. Sa baylo nga magpangita sang ila mga disipulo, ginatinguhaan sining mga apostata nga agawon ang mga disipulo ni Cristo. Kaangay sang ‘hakaban nga mga lobo,’ katuyuan sining di-matuod nga mga manunudlo nga gus-abon ang mga katapo sang kongregasyon paagi sa pagguba sang ila pagtuo kag pagpahilayo sa ila sa kamatuoran.—Mat. 7:15; 2 Tim. 2:18.

5. Ano nga pamaagi ang ginagamit sang di-matuod nga mga manunudlo?

 ⁵ Paano nagapanghikot ang di-matuod nga mga manunudlo? Tuso kaayo ang ila pamaagi. Ang mga apostata ‘nagapasulod sing tago’ sang malain nga mga ideya. Pareho sa mga ismagler, ang mga apostata nagapanghikot man sing tago. Kag pareho sa eksperto nga palsipikador nga nagagamit sang peke nga mga dokumento, ang mga apostata nagagamit man sing “patupato nga mga pulong,” ukon butig nga mga argumento, agod paguaon nga matuod ang ila mga pagtamod. Nagapalapta sila sing “madaya nga mga panudlo,” kag ‘ginapatiko ang Kasulatan’ agod magsanto sa ila mga ideya. (2 Ped. 2:1, 3, 13; 3:16) Maathag nga wala nagaulikid sa aton ang mga apostata. Indi naton mausoy ang dalan nga nagapadulong sa kabuhi nga dayon kon magsunod kita sa ila.

6. Ano ang maathag nga laygay sang Biblia batok sa di-matuod nga mga manunudlo?

⁶ Paano naton maamligan ang aton kaugalingon batok sa di-matuod nga mga manunudlo? Maathag ang laygay sang Biblia. (Basaha ang Roma 16:17; 2 Juan 9-11.) “Likawi ninyo sila,” siling sang Biblia. Ang iban nga badbad nagasiling, “magpahilayo kamo sa ila,” kag “maglikaw kamo sa ila!” Maathag gid ini nga laygay. Halimbawa, ginsilingan ka sang doktor nga indi ka magpalapit sa may makalalaton kag makamamatay nga balatian. Nahangpan mo na ang buot silingon sang doktor, kag sigurado nga sundon mo sia. Pareho sina ang mga apostata. ‘May balatian sila sa hunahuna’ kag luyag nila nga latnan ang iban sang ila di-matuod nga mga panudlo. (1 Tim. 6:3, 4) Ginasilingan kita sang Pinakamaayo nga Doktor, si Jehova, nga likawan sila. Nahangpan naton ang iya buot silingon, apang determinado bala kita nga sundon ang iya paandam?

7, 8. (a) Ano ang nadalahig sa paglikaw sa di-matuod nga mga manunudlo? (b) Ngaa determinado ka nga likawan ang di-matuod nga mga manunudlo?

⁷ Ano ang nadalahig sa paglikaw sa di-matuod nga mga manunudlo? Wala naton sila ginabugno ukon ginabaton sa aton puluy-an. Wala naton ginabasa ang ila literatura ukon ginatan-aw ang ila mga programa sa TV. Wala man naton ginausisa ang ila mga Web site, ukon nagakomento sa ila mga blog. Ngaa? Bangod sa gugma. Ginahigugma naton ang “Dios sang kamatuoran,” gani indi kita interesado sa tiko nga mga panudlo nga supak sa iya Pulong sang kamatuoran. (Sal. 31:5; Juan 17:17) Ginahigugma man naton ang organisasyon ni Jehova nga nagtudlo sa aton sang kamatuoran, subong sang ngalan ni Jehova kag sang kahulugan sini, katuyuan sang Dios sa duta, kahimtangan sang patay, kag paglaum nga pagkabanhaw. Madumduman mo pa bala kon ano ang imo ginbatyag sang natun-an mo ining hamili nga mga kamatuoran? Ti, ngaa tugutan mo nga palas-ayon ka sang iban sa organisasyon nga nagtudlo sa imo sini nga mga kamatuoran?—Juan 6:66-69.

⁸ Bisan ano pa ang isiling sang di-matuod nga mga manunudlo, indi naton sila pagsundon! Ngaa masag-ob ka sa bubon nga wala sing tubig? Sa baylo, dapat kita magpabilin nga mainunungon kay Jehova kag sa iya organisasyon kay amo ini ang nagabulong sang aton kauhaw paagi  sa matin-aw kag mabugnaw nga tubig sang kamatuoran gikan sa Pulong sang Dios.—Isa. 55:1-3; Mat. 24:45-47.

Indi Magsunod sa “Butig nga mga Sugilanon”

9, 10. Ano ang laygay ni Pablo kay Timoteo parte sa “butig nga mga sugilanon,” kag ano ang ginapatuhuyan ni Pablo? (Tan-awa ang footnote.)

⁹ Kon kaisa, madali matalupangdan nga sala ang karatula, pero kon kaisa indi man. Amo man ang mga katalagman nga ginagamit ni Satanas; ang iban madali makita kag ang iban indi. Si apostol Pablo nagpaandam batok sa isa pa ka taktika ni Satanas, ang “butig nga mga sugilanon.” (Basaha ang 1 Timoteo 1:3, 4.) Gani, agod indi kita maglisa sa dalan nga nagapadulong sa kabuhi, hibaluon naton kon ano ining butig nga mga sugilanon, kag kon paano malikawan ang pagpamati sa sini.

¹⁰ Ang paandam ni Pablo tuhoy sa butig nga mga sugilanon bahin sang iya nahauna nga sulat kay Timoteo nga isa ka gulang. Ginsugo sia ni Pablo nga amligan ang katinlo sang kongregasyon kag buligan ang mga masigkatumuluo nga magpabilin nga matutom. (1 Tim. 1:18, 19) Si Pablo naggamit sang Griegong tinaga nga nagapatuhoy sa uluistorya, sugidsugid, ukon kabutigan. Suno sa The International Standard Bible Encyclopaedia, ini nga tinaga nagapatuhoy sa “isa ka (relihioso) nga sugilanon nga wala sing kamatuoran.” Mahimo ginapatuhuyan diri ni Pablo ang relihioso nga mga kabutigan nga ginpalapta paagi sa makagalanyat ukon makawiwili nga mga sugilanon. * Ini nga mga sugilanon “nagapautwas sang mga pamangkot para sa pagpanalawsaw”—wala sing pulos kag wala sing padulungan nga mga pamangkot. Ang butig nga mga sugilanon isa ka taktika sang panguna nga manugdaya, si Satanas. Ginagamit niya ang relihioso nga mga kabutigan kag himuhimo nga mga istorya para malipatan sang mga tawo ang mas importante nga mga butang. Maathag ang laygay ni Pablo: Indi magpamati sa butig nga mga sugilanon!

11. Paano ginagamit ni Satanas ang butig nga relihion sa pagpatalang sa mga tawo, kag ano nga paandam ang dapat naton pamatian agod indi kita mapatalang?

¹¹ Ano ang pila ka butig nga mga sugilanon nga makapatalang sa indi mainandamon? Ang ekspresyon nga “butig nga mga sugilanon” maaplikar man sa bisan ano nga relihioso nga kabutigan ukon sugilanon nga ‘makapahilayo sa aton sa kamatuoran.’ (2 Tim. 4:3, 4) Si Satanas, nga nagapakunokuno nga “anghel sang kapawa,” eksperto gid sa paggamit sang butig nga relihion sa pagpatalang sa mga tawo. (2 Cor. 11:14) Ining butig nga relihion nga nagapakunokuno subong Cristiano nagapanudlo sang mga doktrina kaangay sang Trinidad, impierno, kag pagkadimamalatyon sang kalag, nga puro kabutigan. Ginatudlo man sini nga wala sing malain sa mga kapiestahan, pareho sang Krismas kag Easter, pero ang matuod naghalin ini sa mga pagano. Indi kita mapatalang sang butig nga mga sugilanon kon pamatian naton ang paandam sang Dios nga magbulag kita kag ‘untatan ang pagtandog sa di-matinlo nga butang.’—2 Cor. 6:14-17.

12, 13. (a) Ano ang tatlo ka kabutigan nga ginapalapta ni Satanas, apang ano ang kamatuoran parte sa sini? (b) Paano naton malikawan nga mapatalang sang butig nga mga sugilanon ni Satanas?

¹² May iban pa nga kabutigan nga ginagamit si Satanas nga magapatalang sa aton kon indi kita maghalong. Binagbinaga ang pila ka halimbawa. Pagusto ka lang. Himua kon ano sa banta mo ang maayo. Amo sini ang pirme naton mabatian sa media. Ini nga pagtamod makaimpluwensia sa aton nga balewalaon ang talaksan sang Dios sa moral. Pero ang matuod, kinahanglan gid naton ang panuytoy sang Dios. (Jer. 10:23) Indi magpasilabot ang Dios sa ginahimo naton. Kon may panimuot kita nga ‘bahala na ang buas,’ ‘mangin di-aktibo kita ukon di-mabungahon.’ (2 Ped. 1:8) Ang adlaw ni Jehova madasig nga magaabot, kag dapat padayon naton nga hulaton ini. (Mat. 24:44)  Ang Dios wala nagaulikid sa imo subong indibiduwal. Kon patihan naton ining kabutigan ni Satanas maluyahan kita kag magabatyag nga indi takus higugmaon sang Dios. Ang matuod, palangga gid kag ginapabaloran ni Jehova ang iya mga sumilimba subong mga indibiduwal.—Mat. 10:29-31.

¹³ Dapat kita magbantay kay daw mapatihan man ang panghunahuna kag panimuot sang kalibutan ni Satanas. Dumdumon naton nga si Satanas lantip sa paglimbong. Kon sundon naton ang laygay kag mga pahanumdom sang Biblia, indi kita mapatalang sang “butig nga mga sugilanon nga ginhimo sing malalangon [“himo-himo lang nga mga sugilanon,” Ang Pulong sang Dios, APD].”—2 Ped. 1:16.

Indi “Magsunod kay Satanas”

14. Ano ang paandam ni Pablo sa lamharon nga mga balo, kag ngaa dapat man naton ini pamatian?

¹⁴ Sin-o sa aton ang masunod sa karatula nga nagasiling, “Diri Agi Kon Gusto Mo Magsunod Kay Satanas”? Pero ginapaandaman kita ni Pablo sang pila ka paagi nga posible ‘magpaliso sa mga Cristiano agod sundon si Satanas.’ (Basaha ang 1 Timoteo 5:11-15.) Ining paandam ni Pablo para sa “lamharon nga mga balo,” apang ang mga prinsipio sini para man sa aton. Mahimo wala ginhunahuna sang mga Cristianong babayi sang unang siglo nga ginasunod nila si Satanas, pero amo na gali sina ang ila ginahimo. Paano naton malikawan nga magsunod sing indi hungod kay Satanas? Usisaon naton ang paandam ni Pablo parte sa kutsokutso.

15. Ano ang tulumuron ni Satanas, kag paano ginpatalupangod ni Pablo ang mga taktika ni Satanas?

¹⁵ Luyag ni Satanas nga mag-untat kita sa pagbantala sang maayong balita. (Bug. 12:17) Ginatinguhaan niya nga mangin masako kita sa mga hilikuton nga nagaubos sang tion ukon nagapabahinbahin sa aton. Gani, ginpatalupangod ni Pablo ang mga taktika ni Satanas. ‘Wala sing ginahimo, nagapanumbalay.’ Bangod sang teknolohiya subong, mahapos lang maubos ang aton tion kag ang tion sang iban, halimbawa, paagi sa pagpasa sing indi importante ukon indi matuod nga mga text kag e-mail. “Kutsokutsera.” Ang kutsokutso magadul-ong sa pagpasipala, nga sa masami ginatunaan sang inaway. (Hulu. 26:20) Hungod man ukon indi, ginailog sang mga manugpasipala si Satanas nga Yawa. * “Hilabtera sa mga hilikuton sang iban.” Wala kita sing kinamatarong nga diktahan ang iban sang ila himuon. Ining wala sing pulos kag makaulugot nga batasan makaupang sa aton pagbantala, ang hilikuton nga ginsugo sang Dios. Kon indi kita aktibo sa hilikuton ni Jehova, ginasunod naton si Satanas. Duha lang ang aton pililian, kag indi puede sa tunga!—Mat. 12:30.

16. Ano nga laygay ang makabulig sa aton nga indi ‘magliso agod magsunod kay Satanas’?

¹⁶ Ang pagpamati sa laygay sang Biblia makabulig sa aton nga indi ‘magliso agod magsunod kay Satanas.’ Binagbinaga ang pila ka laygay ni Pablo. “May madamo pirme nga ginahimo sa hilikuton sang Ginuo.” (1 Cor. 15:58) Malikawan naton nga magtinamad kag uyangan ang aton tion sa wala pulos nga mga butang, kon masako kita sa mga hilikuton sang Ginharian. (Mat. 6:33) Magpamulong sing “maayo para sa pagpabakod.” (Efe. 4:29) Mangin determinado nga indi magpamati kag indi magpalapta sang kutsokutso. * Palambua ang pagsalig kag pagtahod sa mga masigkatumuluo. Kon himuon naton ini, ang aton ihambal indi makaguba, kundi makapabakod. “Himuon ninyo nga tulumuron nga . . . asikasuhon ang inyo kaugalingon nga buluhaton.” (1 Tes. 4:11) Ipakita  ang personal nga interes sa iban, nga wala ginahilabtan ang ila pribado nga pangabuhi ukon ginatapakan ang ila dignidad. Indi pag-ipilit ang imo opinyon sa mga butang nga sila dapat ang magdesisyon.—Gal. 6:5.

17. (a) Ngaa ginapaandaman kita ni Jehova sang dapat naton likawan? (b) Ano ang imo determinasyon tuhoy sa dalan nga luyag ni Jehova nga agihan naton?

¹⁷ Nagapasalamat gid kita kay ginapaandaman kita ni Jehova sang dapat naton likawan! Dumduma nga ang mga paandam ni Jehova nga ginbinagbinag naton sa sini kag sa nagligad nga artikulo ginhimo niya bangod sa iya gugma sa aton. Gusto niya nga malikawan naton ang kapaslawan kag kasakit nga resulta sang pagsunod sa makapatalang nga ‘mga karatula’ ni Satanas. Ang dalan nga luyag ni Jehova nga agihan naton makitid, pero nagapadulong ini sa pinakamaayo nga kaladtuan—ang kabuhi nga wala sing katapusan. (Mat. 7:14) Kabay nga mangin determinado kita nga pamatian ang sugo ni Jehova: “Ini amo ang dalan, lakat kamo sa sini.”—Isa. 30:21.

[Mga Nota]

Ano ang Imo Sabat?

Paano mo mapakita nga ginapamatian mo ang mga paandam sa sini nga mga teksto?

• 2 Pedro 2:1-3

• 1 Timoteo 1:3, 4

• 1 Timoteo 5:11-15

[Mga Pamangkot sa Pagtinuon]

[Kahon/Mga Retrato sa pahina 19]

 Pagsabwag sang Bulbol sa Hangin

May istorya ang mga Judiyo nga nagapakita kon daw ano ang epekto sang kutsokutso. Sarisari ang paagi sa pag-istorya sini, pero amo sini ang sumaryo.

Naglibot ang kutsokutsero sa bilog nga banwa kag ginpasipalahan ang isa ka maalam nga tawo. Sang ulihi, narealisar niya ang iya sayop kag nangayo sing patawad sa maalam nga tawo kag nagsiling nga himuon niya ang tanan para mapatawad sia. Isa lang ang ginpangayo sang maalam nga tawo: Ginsugo niya ang kutsokutsero nga magkuha sang ulunan nga bulbol ang unod, abrihan ini, kag isabwag sa hangin. Bisan natingala ang kutsokutsero, nagtuman sia kag nagbalik sa maalam nga tawo.

“Ti, napatawad mo na ako?” pamangkot niya.

“Tipuna anay ang tanan nga bulbol,” sabat sang maalam nga tawo.

“Imposible ina kay nagkalapalid na ato.”

“Kon daw ano kabudlay nga tipunon ang mga bulbol, amo man sina kabudlay ibalik ang halit sang imo mga ginpanghambal.”

Maathag ang leksion. Indi na naton mabawi ang aton ginhambal kag imposible na nga makay-o ang kasakit nga gintuga sini. Antes kita magkutsokutso, dapat naton dumdumon nga pareho lang ini sa pagsabwag sang bulbol sa hangin.

[Retrato sa pahina 16]

Paano mahimo mapasulod sang iban ang mga apostata sa ila balay?