Dirava Ena Hadibaia Hereva Do Oi Badinaia, A?

“Dala be inai, ia dekenai do umui raka lao.”​—⁠ISA. 30:⁠21.

1, 2. Satani ena ura be dahaka, bona edena dala ai Baibel ese ita ia durua?

 TAU ta be dala ena saini ia haidaua bona taunimanima ia koia dala kererena idia abia hidi totona. Unai saini oi badinaia neganai, dika oi davaria diba. To, emu turana ese oi ia hadibaia kara dika tauna ta ese unai ia karaia badina ia ura taunimanima do idia boio. Oiemu turana ena hadibaia hereva do oi badinaia, a?

² Baibel be dala rua ia herevalaia. Dala ta be dika ia lao henia bona ma ta be mauri hanaihanai ia lao henia. Satani be taunimanima ia koia dainai momo be dika ia lao henia dalana ai idia raka noho. Satani ia ura ita ia koia danu. (Apok. 12:⁠9) Vanegai stadi ai Satani ese ia gaukaralaia gaudia toi ita herevalaia. Unai gaudia amo ita ia veria Iehova ita gwau-edeede henia bona mauri hanaihanai ena dala ita rakatania totona. (Mat. 7:​13, 14) To ita diba Iehova Dirava be iseda turana bona ita dekenai Satani ena koikoi karadia ia hahedinaraia. Inai stadi ai, Satani ese ia gaukaralaia gaudia toi, bona Baibel ese ita ia durua ena koikoi karadia ita dadaraia diba daladia do ita herevalaia. Baibel ita duahia neganai, unai be hegeregere Iehova be ita ia hamaoroa: “Dala be inai, ia dekenai do umui raka lao.” (Isa. 30:21) Iehova ena hadibaia herevadia ita stadilaia neganai, ita ia durua unai sisiba ita badinaia totona.

“Hadibaia Koikoi Taudia” Badinaia Lasi

3, 4. (a) Dahaka dainai aposteit taudia be ia kaukau ranu guri bamona? (b) Aposteit taudia be edeseni amo idia mai, bona edia ura be dahaka?

³ Mani oi laloa, oi be tano gagaena ai oi raka bona oi ranu mase. Daudau amo ranu guri ta oi itaia, oi laloa ranu do oi davaria dainai, oi raka lao. To, oi ginidae neganai, ranu be lasi bona oi lalohisihisi! Ita gwau diba hereva momokani be ranu bamona, bona hadibaia koikoi taudia be ia kaukau ranu guri bamona. Taunimanima momo idia laloa unai taudia be hereva momokani idia hadibaia, to idia lalohisihisi badina unai taudia ese idia koidia. Iehova be aposetolo Paulo bona Petero amo unai hadibaia koikoi taudia edia kara ia herevalaia. (Kara 20:​29, 30; 2 Petero 2:​1-3 duahia.) Unai hadibaia koikoi taudia be daidia? Paulo bona Petero ese hadibaia koikoi taudia idia hedinarai dalana bona edia koikoi herevadia be ita dekenai idia hahedinaraia.

⁴ Paulo be Efeso kongrigeisen ena elda taudia ia hamaoroa: “Umui huana amo tatau haida do idia toreisi bona hereva momokani do idia mogea.” Bona Petero be kongrigeisen haida ia tore henidia neganai, ia gwau: “Umui huanai danu hadibaia koikoi taudia do idia noho.” Unai siri ese idia hahedinaraia hadibaia koikoi taudia be kongrigeisen lalonai do idia hedinarai. Unai hadibaia koikoi taudia be aposteit taudia. * Idia be dahaka idia ura? Paulo ia gwau idia be Iehova ena orea idia rakatania neganai, “hahediba taudia do idia hakaua siri, edia murinai idia raka totona.” Paulo ese ia herevalaia hahediba taudia be Iesu Keriso murinai idia raka taudia. Aposteit taudia be hahediba taudia matamata idia tahua lasi. To, idia ura kongrigeisen amo hahediba taudia idia henaoa. Iesu ia gwau aposteit taudia be mamoe idia ania uda sisia bamona. Idia ura kongrigeisen taudia edia abidadama idia hadikaia bona hereva momokani idia rakatania.​—⁠Mat. 7:15; 2 Tim. 2:⁠18.

5. Edena dala ai aposteit taudia ese taunimanima idia koia?

 ⁵ Edena dala ai aposteit taudia ese taunimanima idia koia? Aposteit taudia ese “hehuni dalanai” edia lalohadai be kongrigeisen lalonai idia abia vareai. Idia ese hahediba koikoi herevadia amo taunimanima idia hakaua kerere. Idia ura taunimanima momo ese edia “hadibaia hereva koikoidia” idia abia dae. Idia be taravatu utua taudia bamona, gavamani ese ia taravatua kohudia be hehuni dalanai tano ta dekenai idia abia vareai. Idia ese pepa koikoidia idia gaukaralaia gavamani idia koia totona. Petero ia gwau, aposteit taudia be Baibel ena hereva idia mogea bona haida idia doria edia lalohadai idia abia dae totona. (2 Pet. 2:​1, 3, 13; 3:16) Idia be ita idia laloa bada lasi. Bema aposteit taudia ita badinaia, mauri hanaihanai ena dala ita rakatania diba.

6. Baibel ese aposteit taudia be edena bamona ia herevalaia?

⁶ Edena dala ai aposteit taudia amo sibona ita gimaia diba? Baibel ia gwau: “Idia amo umui raka siri.” (Roma 16:17; 2 Ioane 9-11 duahia.) Anina be idia do ita dadaraia. Baibel ena hadibaia herevadia be doketa ese ita ia hamaoroa daihanai gorerena ia abia tauna kahirakahira ita lao lasi ena hereva hegeregerena. Doketa ia diba bema unai gorere oi abia do oi mase. Iena sisiba do oi badinaia, a? Baibel ia gwau aposteit taudia be laloparara lasi taudia bamona bona ma haida idia hakaua kerere. (1 Tim. 6:​3, 4) Iehova be unai doketa namona bamona. Ita ia hamaoroa aposteit taudia ita dadaraia totona. Namona be nega ibounai iena hadibaia hereva ita badinaia.

7, 8. (a) Edena bamona aposteit taudia ita dadaraia diba? (b) Dahaka dainai aposteit taudia oi dadaraia be namo?

⁷ Aposteit taudia ita dadaraia totona, dahaka ita karaia diba? Ita hereva henidia lasi, eda ruma dekenai ita abidia dae lasi, edia buka ita duahia lasi, TV dekenai edia program ita itaia lasi, Intanet ai idia torea gaudia ita duahia lasi o edia hereva dekenai eda lalohadai ita torea lasi. Dahaka dainai idia ita dadaraia be namo? Badina ginigunana be ita be hereva momokani Diravana ita lalokau henia. Unai dainai, ita ura lasi Dirava ena hereva idia hadikaia taudia edia hahediba hereva koikoidia ita kamonai. (Sal. 31:5; Ioa. 17:17) Badina iharuana be, Iehova ena orea ita lalokau henia, ia ese ita dekenai hereva momokani ia hadibaia. Ita dibaia gaudia haida be inai: Iehova ena ladana bona ena anina, ena ura tanobada totona, mase neganai dahaka ia vara, bona toreisi lou helarona. Nega ginigunana unai hereva momokanidia oi dibaia neganai, oi moale, ani? Vadaeni namo lasi hahediba koikoi taudia edia hereva oi kamonai bena Iehova ena orea oi gwauraia dika.​—⁠Ioa. 6:​66-69.

⁸ Herevana aposteit taudia edia hereva be dahaka, to do ita badinaia lasi! Idia be ia kaukau ranu gurina bamona. Edia hereva idia kamonai taudia be do idia lalohisihisi. To, gau badana be ita ese Iehova bona ena orea ita badinaia noho. Iena orea be hahediba koikoi herevadia ia gwauraia lasi, to ita dekenai hereva momokani  ena ranu goevana ia henia.​—⁠Isa. 55:​1-3; Mat. 24:​45-47.

“Sivarai Koikoidia” Kamonai Lasi

9, 10. Paulo ese Timoteo dekenai dahaka hadibaia herevana ia henia? Unai sivarai koikoidia be dahaka? (Futnout itaia danu.)

⁹ Dala dekenai ia noho saini ta ese ita ia koia diba. Nega haida oi diba tau ta ese saini ia haidaua, to nega haida do oi diba lasi. Satani ena hereva koikoi be unai bamona. Bema ita naria namonamo lasi, iena koikoi herevadia ese ita idia koia diba. Aposetolo Paulo ia gwau idia be “sivarai koikoidia.” (1 Timoteo 1:​3, 4 duahia.) Unai sivarai koikoidia be dahaka, bona edena dala ai ita dadaraia diba? Mauri ia lao henia dalana ai ita raka noho totona, unai henanadai ena haere ita diba be namo.

¹⁰ Paulo ese elda tauna Timoteo ia tore henia neganai, ia hamaoroa sivarai koikoidia amo kongrigeisen ia gimaia be namo. Danu tadikaka taihu do ia durua Iehova idia badinaia totona. (1 Tim. 1:​18, 19) Buka ta, (The International Standard Bible Encyclopaedia) ia gwau inai hereva “sivarai koikoi” be tomadiho edia gori sibona. Reana Paulo be taunimanima ese idia gwauraia gori sivaraidia ia herevalaia. * Paulo ia gwau unai gori ese taunimanima ia durua lasi, to daradara ia havaraia. Anina be unai gori idia kamonai taudia be edia nega bada idia haorea gori edia badina idia tahua totona. Satani ese gori bona hahediba hereva koikoidia amo taunimanima ia koia anina lasi gaudia idia laloa bada totona. Paulo ena sisiba be: Sivarai koikoidia do ita kamonai lasi!

11. Edena dala ai Satani ese tomadiho koikoi amo taunimanima ia koia? Edena bamona hadibaia herevadia ita badinaia be namo?

¹¹ To, edena bamona sivarai koikoidia ese ita idia koia diba? Tomadiho ena hahediba koikoi herevadia. Ita idia koia dainai ita be ‘hereva momokani do ita kamonai henia lasi.’ (2 Tim. 4:​3, 4) Satani be tomadiho koikoi amo taunimanima ia koia. Unai dainai, Baibel ia gwau ia sibona be “diari aneruna” ai ia halaoa. (2 Kor. 11:14) Hegeregere, Kerisendom taudia idia gwau Keriso idia badinaia, to idia ese Toi Tamona bona hel lahina ena hereva idia hadibaia. Danu idia gwau ta ia mase murinai iena lauma be gabu ta dekenai ia lao. Momo idia laloa Krismas bona Ista aria be Dirava ese ia abia dae, to unai aria be tomadiho koikoi amo idia hamatamaia. Sivarai koikoidia ese ita do idia koia lasi, bema Dirava ena hahediba herevadia ita badinaia, tomadiho koikoi ita dadaraia bona ‘miro gauna ita dogoatao lasi.’​—⁠2 Kor. 6:​14-17.

12, 13. (a) Satani ena koikoi herevadia toi be dahaka? To hereva momokani be dahaka? (b) Satani ese ita ia koia lasi totona, dahaka ita karaia be namo?

¹² Bema ita naria namonamo lasi, Satani ena koikoi herevadia ma haida ese ita ia koia diba. Mani ena koikoi herevadia toi ita herevalaia. Koikoi ginigunana: Sibona emu ura karadia oi karaia diba; dahaka be kerere bona dahaka be maoro oi abia hidi diba. Unai lalohadai be nega momo TV, muvi, magasin, niuspepa bona Intanet amo ita itaia. Bema ita itaia hanaihanai, tanobada ena lalohadai bona matabodaga karadia ita abia dae diba. To, hereva momokani be inai: Dirava sibona be mai ena maoro dahaka be maoro bona dahaka be kerere ia abia hidi totona. (Ier. 10:23) Koikoi iharuana: Dirava be tanobada dekenai idia vara gaudia do ia haidaua lasi. Unai lalohadai dainai taunimanima be hari do idia karaia gaudia sibona idia laloa bada. Nega vaira bona Dirava hamoalea karadia idia laloa bada lasi. Reana, ita danu be unai bamona ita laloa bona iseda hesiai gaukara ita hesikulaia bona ita “noho kava.” (2 Pet. 1:⁠8) To, hereva momokani be inai: Iehova be kahirakahira tanobada ai idia vara gaudia do ia haidaua. Namona be eda kara amo ita hahedinaraia unai hereva ita abia dae momokani. (Mat. 24:44) Koikoi ihatoina: Dirava be ita ia laloa bada lasi. Satani ia ura do ita laloa ita be anina lasi, bona Dirava be ita ia lalokau henia lasi.  Bema Satani ena hereva ita abia dae, Iehova do ita rakatania. To, hereva momokani be inai: Iehova be iena hesiai taudia ta ta ia lalokau henia.​—⁠Mat. 10:​29-31.

¹³ To namona be ita naria namonamo, ita ura lasi tanobada ena lalohadai ita abia dae. Reana, nega haida do ita laloa edia hereva be momokani. To, namona be ita laloatao, Satani ia diba edena dala ai ita ia koia diba. Gau badana be Baibel ena hadibaia herevadia ita badinaia, unai amo Satani ese sivarai koikoidia amo ita do ia koia lasi.​—⁠2 Pet. 1:⁠16.

‘Satani Badinaia’ Lasi

14. Vabu matamatadia dekenai Paulo ena sisiba be dahaka? Dahaka dainai unai sisiba ita badinaia be namo?

¹⁴ Mani oi laloa, dala dekenai saini ta ia gwau: “Satani Murinai Oi Lao Totona, Inai Dala Oi Badinaia.” Momokani, Keristani tauna do ia ura lasi unai dala ia badinaia. To, bema ita naria namonamo lasi, ‘Satani ita badinaia’ diba. Paulo ese unai ia herevalaia. (1 Timoteo 5:​11⁠-15 duahia.) Ia gwau iena negai idia noho vabu matamata edia kara bona hereva ese ia hahedinaraia idia be Satani idia badinaia, ena be unai idia diba lasi. Idia dekenai ia henia sisiba be ita ia durua diba. Mani Paulo ena sisiba udu mauri karana dekenai ita herevalaia.

15. Satani ena ura be dahaka? Bona ena kara haida be dahaka?

¹⁵ Satani ia ura lasi ma haida dekenai hereva momokani ita harorolaia. (Apok. 12:17) Ia ura anina lasi gaudia dekenai iseda nega ita haorea kava, o tadikaka taihu huanai heiriheiri ita havaraia. Paulo ese Satani ena kara haida ia gwauraia hedinarai. Ia gwau unai vabu be “lahedo karana idia manadalaia, ruma idauidau dekenai idia lao kava.” Nega bada idia haorea edia turadia idia vadivadi anina lasi gaudia idia kikilaia totona. Unai kara dekenai do ita naria namonamo. Hegeregere, e-mail amo anina lasi herevadia ita duahia bona haerelaia karana dekenai ita bona ma haida edia nega ita haorea kava diba. Danu, Paulo ia gwau unai vabu be “idia udu mauri.” Udu mauri taudia be ma haida edia ladana idia hadikaia, bona heai idia havaraia. (Aon. 26:20) Ena be idia diba lasi, to edia kara be Satani Diabolo ena kara bamona. * Danu, unai vabu be “ma haida edia mauri lalonai idia vara gaudia idia kikilaia.” Idia ura ma haida edia mauri idia biagua. Ita be maoro lasi ma haida totona abia hidi ita karaia. Unai ita karaia neganai, nega be lasi Iehova ita hesiai henia totona. Namona be iseda nega ita gaukaralaia Dirava ena Basileia ita harorolaia totona. Bema unai ita karaia lasi, ita be Satani ita badinaia bona Iehova ena inai taudia ai ita lao. Namona be ita ibounai ese abia hidi ita karaia daika ena kahanai do ita gini.​—⁠Mat. 12:⁠30.

16. Bema ita ura Satani ita dadaraia, dahaka ita karaia be namo?

¹⁶ Bema Baibel ena hereva ita badinaia Satani ita dadaraia diba. Paulo ese ita idia durua diba gaudia ia herevalaia. Ia gwau: “Lohiabada ena gaukara idauidau lalonai do umui bisi.” (1 Kor. 15:58) Iehova ena gaukara lalonai ita bisi neganai, ita be nega lasi anina lasi gaudia ita kikilaia totona. (Mat. 6:33) Ma ia gwau: “Hereva namodia umui gwauraia, unai amo emui hereva idia kamonai taudia do umui hagoadaia.” (Efe. 4:29) Ma haida ita udu maurilaia lasi bona udu mauri taudia edia hereva ita kamonai lasi be namo. * Namona be emu tadikaka taihu oi laloa kerere lasi bona oi matauraidia. Danu, ma ia gwau: “Ma haida edia mauri ai idia vara gaudia lalonai do umui vareai lasi.” (1 Tes. 4:11) Namona be oi hahedinaraia oi be  ma haida oi matauraia bona oi laloa bada. Namona be ita laloatao, haida idia ura lasi edia mauri lalonai idia vara gaudia idia herevalaia. Bona namona be ita laloatao, ma haida ese sibodia edia abia hidi idia karaia be namo bona ita biagudia lasi.​—⁠Gal. 6:⁠5.

17. (a) Dahaka dainai Iehova be ita dekenai hadibaia herevadia ia henia? (b) Iseda lalona ita hadaia dahaka ita karaia totona?

¹⁷ Iehova ita tanikiu henia, badina do ita dadaraia gaudia be ita ia hadibaia! Namona be ita laloatao, Iehova ese ita dekenai hadibaia herevadia ia henia badina ita ia lalokau henia. Ia ura lasi Satani ese ita ia koia bena dika ita davaria. Herevana Iehova ia ura do ita badinaia dalana be ia auka, to mauri hanaihanai ia lao henia dalana tamona be unai. (Mat. 7:14) Iehova ia gwau: “Dala be inai, ia dekenai do umui raka lao.” Hanaihanai unai hereva ita badinaia be namo.​—⁠Isa. 30:⁠21.

[Footnotes]

Emu Haere be Dahaka?

Edena dala ai inai siri lalonai idia noho hadibaia herevadia oi badinaia diba?

• 2 Petero 2:​1-3

• 1 Timoteo 1:​3, 4

• 1 Timoteo 5:​11-15

[Study Questions]

[Box/​Pictures on page 19]

Manu Huina be Lai ese Ia Odaia Lao

Iuda taudia edia sivarai gunana ta ese udu mauri ena dika ia hahedinaraia.

Hanua ta dekenai, tau ta ese sivarai koikoi amo aonega tauna ta ena ladana ia hadikaia. Taunimanima momo dekenai unai tau ia kikilaia. Gabeai, ia ura aonega tauna ese ena dika do ia gwauatao. Aonega tauna ia nanadaia: “Egu dika oi gwauatao totona, dahaka lau karaia be namo?” Aonega tauna ia gwau: “Gau ta oi karaia diba. Manu huina amo idia hahonua pilo ta oi utua bona lai dekenai oi negea.” Aonega tauna ena hereva ia lalopararalaia lasi, to ia karaia sibona.

Gabeai, ia giroa lou bona aonega tauna ia nanadaia: “Hari, egu dika do oi gwauatao, a?”

Aonega tauna ia haere: “Namona be oi lao bona manu huina ibounai oi gogoa guna.”

Unai tauna ia gwau: “To, unai lau karaia diba lasi, badina lai ese manu ena huina ibounai be gabu idauidau dekenai ia odaia lao vadaeni, bona lau davaria diba lasi.”

Vadaeni, aonega tauna ia gwau: “Manu ena huina ibounai be gabu idauidau dekenai idia lao hegeregerena, emu koikoi herevadia be momo ese idia kamonai. Bona manu huina oi davaria diba lasi hegeregerena, emu udu mauri herevadia do idia laloaboio lasi.”

Ita dibaia gauna be: Ita gwauraia vadaeni herevadia be ita haidaua diba lasi. Bona nega haida iseda udu mauri dainai idia vara dika ita hanamoa diba lasi. Bema ita ura ta ena ladana ita hadikaia gwauraia, namona be ita laloatao iseda hereva be lai ese ia odaia lao manu huina bamona.

[Picture on page 16]

Edena dala ai haida be edia ruma lalonai aposteit taudia idia abia dae?