Jehovap mianersoqqussutai paatsuugassaanngitsut eqqumaffigaagit?

“Aajuna aqqusineq, taanna ingerlavigissavarsi!” — ESAJA 30:21.

1, 2. Saatanip sunissani aalajangiusimavaa, Biibililu qanoq iluaqutigissavarput?

AQQUSINIKKUT pisullutit angalatillutit allagartaq sammivimmut kukkusumut tikkuussisoq malikkukku tammartajaalersinnaavutit. Tamanna navianarsinnaavoq. Takorlooriaruk ikinngutivit mianersoqqullutit oqarfigigaatit inuup ajortup allagartaq allanngortissimagaa inuit tammartikkusukkamigit. Qularnanngitsumik ikinngutivit mianersoqqussutaa eqqumaffigissavat.

² Qularnanngilluinnarpoq Saatanip, ajuissuusup, uagutsinnik tammartitserusunnera. (Saqqummersitat 12:9) Navianartut allaaserisap matuma siuliani sammisavut Saatanip uagutsinnik Jehovamut naalanngitsitsiniutigisarpai aqqummi inuunermut naassaanngitsumut sammisumiikkunnaarniassagatta. (Matthæusi 7:13, 14) Aammali paasivarput ikinngutitta Jehovap Guutip mianersoqqugaatigut Saatanip ‘allagartaliussaanut’ tammartitsiniutinut. Maanna Saatanip nakutitsiniutigisartagai suli pingasut allat Biibilimilu allassimasut taakkua ingalassimanissaannut iluaqutissavut sammissavavut. Biibili atuaraangatsigu takorloortarsinnaavarput Jehova tunutsinni pisuttoq imalu oqarfigisaraatigut: “Aajuna aqqusineq, taanna ingerlavigissavarsi!” (Esaja 30:21) Mianersoqqussutit paatsuugassaanngitsut taakku sammitillutigit Jehovap iliuusereqqusaatut iliornissarput eqqumaffiginerulissavarput.

Eqqunngitsumik ilinniartitsisut maleqinasigit

3, 4. (a) Sooq eqqunngitsumik ilinniartitsisut puilasutut imeqanngitsutut ippat? (b) Eqqunngitsumik ilinniartitsisut suminngaanneertarpat, sunalu anguniagaraat?

³ Takorlooriaruk angalaninni inoqajuitsukkoortillutit qilalersutit. Puilasuliaq ungasianiit takuat. Tassani imeqarsorivat, tungaanullu aallarputit. Puilasuliamulli apuukkavit imeqanngilaq. Pakatsisupilussuuvutit! Oqartoqarsinnaavoq sallusuissut imertut ittoq, ‘ajoqersuinerluttullu’, imaluunniit eqqunngitsumik ilinniartitsisut, puilasuliatut imeqanngitsutut ittut. Inuit taakkuninnga sallusuissummik peqarsorinnittut pakatsissapput. Jehovap apustilit Paulusi Petrusilu aqqutigalugit eqqunngitsumik ilinniartitsisunut taakkununnga mianersoqquaatigut. (Atuakkit Apustilit Suliaat 20:29, 30; 2 Petrusi 2:1-3). Eqqunngitsumik ilinniartitsisut taakku kikkuugamik? Paulusip Petrusillu allagaannit erserpoq eqqunngitsumik ilinniartitsisut suminngaanneersuunerat inunnillu qanoq nakutitsisarnerat.

⁴ Paulusip utoqqaanertat Efesosimiittut ima oqarfigai: “Ilissi akornassinnit saqqummersoqarumaarpoq angutinik ilumoortuunngitsumik oqaluttunik.” Aamma Petrusip ilagiit arlallit ima allaffigai: ‘Ilissi ajoqersuinerluttunik ilaqalerumaarpusi.’ Tassa eqqunngitsumik ilinniartitsisut ilagiinneersuupput. Tunussisuupput. * Taakkua suna anguniagaraat? Paulusi oqarpoq taakkua Jehovap peqatigiissortaasa qimannissaat naammagineq ajoraat ‘ajoqersukkat imminnut malinnaatikkumasarmatigit’. Ajoqersukkat Paulusip matumani pisai tassaapput Jiisusimut Kristusimut ajoqersukkat. Eqqunngitsumik ilinniartitsisut imminnik malinnaatitsiniaagaangamik ilagiit avataannittuniinngitsoq, ilagiinniittunilli imminnik malinnaatitsiniaasarput. ‘Amaqqutut kiisortutut’ ilagiinniittunik upperunnaarsitsiniaasarput taakkulu sallusuissummik tunussitinniartarlugit. — Matthæusi 7:15; 2 Timotheusi 2:18.

5. Eqqunngitsumik ilinniartitsisut qanoq nakutitsiniaasarpat?

⁵ Eqqunngitsumik ilinniartitsisut qanoq nakutitsiniaasarpat? Peqqusersusaartarput. Tunussisut  isummatik “anngiortumik”, imaluunniit malunnaarsaarlutik, ilagiinni saqqummiuttarpaat, pinerluttut anngiorlutik eqqussuisartut pisarnerattut. Tunussisut ‘salluliuutinik oqaluttarput’ isummatik ilumoorpalutsilerlugit, soorlu pinerluttut allakkanik pingaarutilinnik peqquserluuteqartartut ilumoorpasitsilerlugit. Inuit sapinngisamik amerlanerpaat ‘peqquserluutiminnik’ upperinnilersinniartarpaat, Biibilimi allassimasut ‘piumasaannarminnik isumalersortarlugit’ namminneq isummaminnut tulluussarlugit. (2 Petrusi 2:1, 3, 13; 3:16) Tunussisut uagutsinnut pitsaanerpaaq eqqarsaatiginngilaat. Taakku malikkutsigit inuunermut naassaanngitsumut aqqut qimassavarput.

6. Eqqunngitsumik ilinniartitsisut pillugit Biibilimi paatsuugassaanngitsumik qanoq mianersoqquneqarpugut?

⁶ Eqqunngitsumik ilinniartitsisunut imminut qanoq illersorsinnaavugut? Biibilimi siunnersuutigineqartoq paatsuugassaanngilaq. (Atuakkit Romamiut 16:17; 2 Johannesi 9-11). Guutip oqaasiani ima allassimavoq: “Taakku nigorsimaniarsigit!” Takorlooriaruk nakorsap mianersoqqugaatit tuniluuttartumik toqussutaasinnaasumillu nappaatilimmut qanilleqqunak. Nakorsap toqussutaasinnaasumik nappaateqaleqqunak mianersoqquaatit, peqqusineratullu iliorputit. Tunussisut soorlu tassa inuit taamatut nappaatillit, taakkualu ilinniartitsissutitik atorlugit inuit immissut eqqarsalersinniartarpaat. (1 Timotheusi 6:3, 4) Jehovap, nakorsap ajunngitsup, eqqunngitsumik ilinniartitsisunut qanilleqqunngilaatigut. Taassuma mianersoqqussutaanik eqqumaffiginninnissarput aalajangiusimajuartariaqarparput.

7, 8. (a) Eqqunngitsumik ilinniartitsisut qanoq ililluta nigorsimasinnaavavut? (b) Sooq illit eqqunngitsumik ilinniartitsisut nigorsimanissaat aalajangiusimaviuk?

⁷ Eqqunngitsumik ilinniartitsisut qanoq ililluta nigorsimasinnaavavut? Oqaloqatigisarnagillu qaaqqusarnavianngilavut. Taakkua atuakkiaat atuartarnavianngilavut, fjernsynikkut isiginnaartarnaviarnagit, internettimi allagaat atuartarnagit internettimiluunniit taakkua allagaat pillugit isummavut saqqummiuttarnagit. Sooq tamanna taama aalajangiusimatigaarput? Pingaarnerpaamik, ‘Guuti unneqqarissoq’ asagatsigu. Taamaattumik ajoqersuutinik eqqunngitsunik sallusuissummut Guutip oqaasianiittumut naapertuutinngitsunik tusarnaarusunngilagut. (Tussiaat 31:6; Johannesi 17:17) Aamma peqatigiissortat Jehovap sallusuissutit nuanningaartut pillugit uagutsinnik ilinniartitsinermut atortagai nuannaraavut. Taakku aqqutigalugit Jehovap aqqa tamatumalu isumaa, taassuma nunarsuarmut siunertaa, toqugutta qanoq pisoqassanera makititaanissamillu neriuut pillugit ilinniartinneqarpugut. Illit eqqaamaviuk taakku allallu pillugit ilumoortut paasigakkit qanoq nuannaartigalutit? Taamaattumik eqqunngitsumik ilinniartitsisut salluliuutaat peqatigiissortanik sallusuissutinik taakkuninnga paasinninnissamut iluaqutigisannik akerlilersuilissutigeqinagit. — Johannesi 6:66-69.

⁸ Eqqunngitsumik ilinniartitsisut qanorluunniit oqalukkaluarpata malinnavianngilavut! Inuit puilasuliatut imeqanngitsutut ittut tusarnaarnissaannut pissutissaqanngilagut. Taakkununnga tusarnaartut pakatsissapput. Jehovamik taassumalu peqatigiissortaanik ilumoorfiginninnissarput aalajangiusimavarput. Peqatigiissortat taakku pakatsissutigisimanngisaannarpavut, aamma peqatigiissortani taakkunani sallusuissutip ernganik Guutip oqaasianeersumik naammangaartumik tunineqartuaannarpugut. — Esaja 55:1-3; Matthæusi 24:45-47.

 ‘Oqaluttuatoqqanik sammisaqarniaqinak’

9, 10. Paulusip Timotheusi oqaluttuatoqqat pillugit qanoq mianersoqquaa, oqaluttuatoqqallu suut Paulusip eqqarsaatigai? (Aamma takuuk ilanngussaq).

⁹ Ilaannikkut allagartap sammivimmut kukkusumut tikkuussilersillugu allanngortinneqarsimagaangat erseqqittarpoq. Ilaannikkulli takujuminaassinnaasarpoq. Saatanip salluliaanut tunngatillugu aamma taamaappoq. Mianersunngikkutta salluliuutaasa ilaat nakutitaassutigisinnaavavut. Apustilip Paulusip salluliuutinut — ‘oqaluttuatoqqanik’ taasaminut — mianersoqquaatigut. (Atuakkit 1 Timotheusi 1:3, 4). Oqaluttuatoqqat taakku suugamik, aamma qanoq ililluta samminaveersaarsinnaavavut? Aqqummi inuunermut naassaanngitsumut sammisumiiginnarumalluta apeqqutit taakku akissutissarsisariaqarpavut.

¹⁰ Paulusip oqaluttuatoqqanut taakkununnga mianersoqqussutaa Timotheusimut, utoqqaanertaasumut kristumiumut, allagaani siullermiippoq. Paulusip Timotheusi allaffigaa ilagiit minguitsuuteqqullugit Jehovamillu ilumoorfiginnittuarnissamut qatanngutiminik ikiueqqullugu. (1 Timotheusi 1:18, 19) Oqaaseq grækerisooq Paulusip atugaa matumani ‘oqaluttuatoqqat’-nik nutserneqarsimasoq ‘salluliaq’-mik ‘oqaluttualiaq’-milluunniit isumaqarpoq. Qinerlerfissiami The International Standard Bible Encyclopaedia-mi allassimavoq oqaaseq taanna “(upperisarsiornikkut) oqaluttualiamut piviusumut attuumassuteqanngitsumut” tunngatillugu atorneqartartoq. Immaqa Paulusip eqqarsaatigai upperisarsiornikkut salluliuutit inuit oqaluttuatoqaanneersut assut uissuummissutigineqartartut. * Paulusi allappoq oqaluttuat taakku mianersorfissaasut “eqqarsaatersornerinnarnik pilersitsisarmata”. Tassa inuit oqaluttuatoqqanik taakkuninnga soqutigisaqartut salluliat taakku pillugit apeqqutissaqalertarput piffissangaatsiarlu atorlugu akissutissarsinialertarlugit. Saatanip oqaluttualiat upperisarsiornikkullu salluliuutit taakku atorlugit inuit pingaarnerpaanik puiuisittarpai. Paulusip oqaasii paatsuugassaanngillat: “Oqaluttuatoqqanik” sammisaqaqinak!

11. Saatanip upperisarsiorneq eqqunngitsoq qanoq nakutitsiniutigisarpaa, peqqussullu suna eqqumaffigisariaqarparput?

¹¹ Oqaluttuatoqqat suut uagut mianersunngikkutta nakutitaassutigisinnaavavut? Oqartoqarsinnaavoq oqaluttuatoqaq tassaasoq upperisarsiornikkut ajoqersuut ‘sallusuissummik tusarumajunnaassutigisinnaasarput’ sunaluunniit. (2 Timotheusi 4:3, 4) Saatanip, ‘qaamasup inngiliatut pissuseqartuusaartartup’, upperisarsiorneq eqqunngitsoq inunnik nakutitsiniutigisarpaa. (2 Korinthimiut 11:14, 1936) Assersuutigalugu upperisarsioqatigiit kristumiuunerartut Kristusimik malinninnerarput, kisianni ataasiullunilu pingasuussuseq, anniarfik tarnillu toqujuitsuunera ajoqersuutigisarpaat. Aamma juullisiornermi poorskisiornermilu ileqqulersuutigineqartartut upperisarsiornermit eqqunngitsumit aallaaveqarput. Oqaluttuatoqqat nakutitaassutiginavianngilavut Guutip upperisarsiornermit eqqunngitsumit avissaaqqajuaqqusissutaa ‘mingunnartumillu attueqqusinnginnera’ eqqumaffigigutsigu. — 2 Korinthimiut 6:14-17.

12, 13. (a) Saatanip suut salluliuutigai, salluliallu taakku pillugit ilumoortut suuppat? (b) Qanoq ililluta Saatanip salluliaanit nakutitaanaveersaarsinnaavugut?

¹² Saatanip salluliai allat mianersunngikkutta nakutitaassutigisinnaavavut. Taakkua ilaat pingasut sammeriartigit. Siulleq tassaavoq: Qanorluunniit iliorsinnaavutit; illit nammineq aalajangissavat suup eqqortuunera suullu eqqunngitsuunera. Isuma tamanna tv-kkut, filmini, atuagassiani, aviisini internettikkullu siuarsarneqartarpoq. Salluliaq tamanna tusartuartaratsigu taamatut eqqarsartaaseqaleriaannaavugut silarsuarmilu matumani ileqqussatigut najoqqutarineqartut malilerlugit. Ilumoortorli unaavoq: Suup eqqortuuneranik suullu eqqunngitsuuneranik Guutimit paasitinneqarnissarput pisariaqartipparput. Soorlu Biibilimi allassimasoq: “Inuup ingerlavissi [oqartussaaffiginngilaa]. Ingerlasup alloriartarnini aqussinnaanngilai.” (Jeremia 10:23, NV) Salluliat aappaat imaappoq: Guuti nunarsuarmi pissutsinut akuliunnavianngilaq. Inuit taama isumaqartut ullumiinnaq eqqarsaatigalugu inuusarput. Siunissaq Guutimillu iluarisaanissartik soqutiginngilaat. Uagut taakkunatut eqqarsartaaseqalersinnaavugut Guutimullu kiffartornitsinni ‘ilatsiinnartunngorluta inerititaqanngitsoorlutalu’. (2 Petrusi 1:8) Ilumoortoq unaavoq: Jehova nunarsuarmi pissutsinik qanittukkut allannguiumaarpoq, uagullu inooriaatsitsigut  ersersittariaqarparput tamanna ilumut upperalutigu. (Matthæusi 24:44) Pingajuat imaappoq: Guutip inuttut soqutiginngilaatit. Saatanip salluliaa tamanna upperigutsigu naggataatigut uniinnarsinnaavugut, misigaluta Guutimit asaneqarnissamut naleqqutilinngisaannassalluta. Ilumoortoq unaavoq: Jehovap kiffani tamaasa immikkut asallugillu pingaartippai. — Matthæusi 10:29-31.

¹³ Inuit Saatanip silarsuaaniittut eqqarsartaasiattut eqqarsartaaseqalernaveersaartuartariaqarpugut. Ilaannikkut taakkua oqaasii eqqarsaataallu ilumoorpasissinnaasarput. Eqqaamajulli Saatanip salloqittaallammaanera. Biibilimi mianersoqqussutigineqartut eqqumaffigisariaqarpavut Saatanimit nakutitaajumanngikkutta. — 2 Petrusi 1:16.

‘Saatanimik malinneqinak’

14. Paulusi uillarnernik inuusuttunik qanoq mianersoqqusiva, aamma sooq mianersoqqussut tamanna tamatta eqqumaffigisariaqarparput?

¹⁴ Takorlooriaruk aqqusinermi ima allannertalimmik allagartaqartoq: “Saatani malinniarukku maanaarit.” Soorunami kristumiut kikkulluunniit allagartamik taama ittumik malinninnavianngillat. Kristumiulli ilumoortuugaluilluunniit ‘Saatanimik malinnilersinnaapput’. Paulusip tamanna pillugu mianersoqquaatigut. (Atuakkit 1 Timotheusi 5:11-15). Nalimini uillarnerit inuusuttut ilagiinniittut allaatigai, oqaasiili tamatta ilinniarfigisinnaavavut. Uillarnerit taakku eqqarsanngillat Saatani malillugu, iliuusiinilli oqaluuserisaannillu erserpoq Saatanimik malinnittut. Qanoq ililluta piaarinngikkaluarluta Saatanimik malinninnaveersaarsinnaavugut? Maanna Paulusip oqaatissuaaneq pillugu mianersoqqussutaa sammeriartigu.

15. Saatanip suna anguniagaraa, Paulusilu naapertorlugu Saatanip piumasamisut iliortinniarluta periaaserisartagaasa ilaat suuppat?

¹⁵ Saatanip upperisatsinnik eqqartuinissarput kissaatiginngilaa. Nutaarsiassamik nuannersumik oqaluussissutiginnittarunnaarsikkusuppaatigut. (Saqqummersitat 12:17) Kissaatigaa piffissarput asiutissagipput imaluunniit Jehovap innuttaanik avissaartuutaasunut atussagipput. Saatanip piumasamisut iliortinniarluta periaaserisartagaasa ilaat Paulusip eqqaavai. Paulusi allappoq taamanikkut uillarnerit ‘pulaaqattaartuarnertik tarfiinnartunnguutigigaat’. Uillarnerit taakku piffissamik annersaa pulaaqattaarnermut pingaaruteqanngitsunillu oqallisiginninnermut atortarpaat. Uagut taamaaliornaveersaartariaqarpugut. Assersuutigalugu nammineq piffissaajaatigisatsinnik allallu piffissaajaatigisaannik e-mailinik pingaaruteqanngitsunut immaqalu eqqunngitsunut tunngasunik atuaqattaarlutalu nassitsisaqattaarsinnaavugut. Aamma Paulusi allappoq uillarnerit ‘oqalukkumavallaarnerarlugit’. Oqalukkumavallaartut ilaannikkut oqaatissuaatiginnittarput. Tamanna ulorianarpoq, oqaatissuaanermi mamarliininnguussinnaavoq, tassa allanik salluliuutiginninnguussinnaavoq, kamaattoqalerneranillu kinguneqarluni. (Ussatit 26:20) Inuit allanik salluliuutiginnittut sianiginagu Saatani Diaavulu ilaartarpaat. * Paulusi aamma allappoq uillarnerit ‘susassarinngisaminnut akuliuttartut’. Allat qanoq inuunissaannik oqaluttuunnissaannut pisinnaatitaanngilagut. Taamatut ileqqoqarutta Jehovap uagutsinnut suliassiissutaa pingaarutilik eqqarsaatigiunnaarsinnaavarput. Piffissarput Guutip naalagaaffianik oqaluussissutiginninnermut atortariaqarparput. Oqaluussisarunnaarutta Saatanimik malinnilersimassaagut. Saatanilu illersorutsigu Jehovamik akerlilersuilersimassaagut. Kimut ililiunniarnerluta aalajangertariaqarpugut. — Matthæusi 12:30.

16. Siunnersuutit suut Saatanimik malinninnaveersaarnissamut iluaqutigisinnaavavut?

¹⁶ Biibilimi allassimasut eqqumaffigigutsigit Saatanimik malinninnavianngilagut. Paulusi iluaqutigisinnaasatsinnik eqqaasaqarpoq. Allappoq ‘tamaviaarluta Naalagaq kiffartuutissagipput’. (1 Korinthimiut 15:58) Jehovamut kiffartornermik ulapputiginninnerput tarfiinnannginnissamut pingaaruteqanngitsunillu sammisaqannginnissamut illersuutigissavarput. (Matthæusi 6:33) Aamma Paulusi peqqusivoq ‘ineriartornartunik’ eqqartuisaqqulluta.  (Efesosimiut 4:29) Oqaatissuaatiginneqinak, allallu taamatut oqaluttut tusarnaaqinagit. * Qatanngutitit tatigalugillu ataqqikkit. Tatigalugillu ataqqigukkit ajunngitsumik eqqartortuassavatit. Aamma Paulusi allappoq ‘uagut nammineq pisassavut aallutarisassagivut’. (1 Thessalonikamiut 4:11) Allat inuttut soqutigisakkit — ataqqinnillutit. Eqqaamajuk imaassinnaasoq imminut tunngasut aalajangersimasut oqaluttuarerusunngikkaat aamma allanut paasitikkusunngikkaat. Aamma eqqaamajuk allat namminneq aalajangigassaannik aalajangiissuttussaanngikkivut. — Galatiamiut 6:5.

17. (a) Sooq Jehovap mianersoqqujuarpaatigut? (b) Sunissarput aalajangiusimasariaqarparput?

¹⁷ Jehovap sunik malinneqqunata erseqqissumik paasitimmatigut qujamasoqaagut! Eqqaamajuartariaqarparput Jehovap mianersoqqusaraatigut assut asagamisigut. Saatanimit salloqittarneqarnissarput naalliunnissarpullu kissaatiginngilaa. Aqqut Jehovap uagutsinnut ingerlavigeqqusaa ingerlavigiuminaappoq, inuunermulli naassaanngitsumut aqqutissatuaavoq. (Matthæusi 7:14) Qanortoq aalajangiusimajuartigu Jehovap peqqussutaanik matuminnga eqqumaffiginninnissarput: “Aajuna aqqusineq, taanna ingerlavigissavarsi!” — Esaja 30:21.

[Quppernerup ataani ilanngussat]

Qanoq akissavit?

Qanoq ilillutit ersersissinnaaviuk allassimaffinni ukunani mianersoqqussutigineqartut eqqumaffigalugit?

• 2 Petrusi 2:1-3

• 1 Timotheusi 1:3, 4

• 1 Timotheusi 5:11-15

[Atuaqqissaarnermi apeqqutit]

[Qupp. 21-mi ungalusaq/assiliartaq]

Anorimi qiviunik teqqaatitsineq

Juutit oqaluttuatoqaasa ilaanni allanik ajortumik oqaatissuaatiginninnerup kingunerisartagaa erseqqissarneqarpoq. Ima pingaarnersiorneqarsinnaavoq:

Angutip angut alla illoqarfimminni silatunersaasoq inuppassuarnut oqaatissuaatigaa. Kingusinnerusukkut oqaatissuaatiginnittoq angummut silatuumut isumakkeerfigeqquvoq, oqarfigalugu aaqqiiniarluni qanorluunniit iliuuseqarumalluni. Angut silatooq ataatsimik piumasaqarpoq: Oqaatissuaatiginnittoq akimmik qiviunik imalimmik alittuissaaq qiviunillu teqqaatitsilluni. Oqaatissuaatiginnittup paasilluanngikkaluarlugu sooq taamaaliussanerluni peqquneqarnermisut iliorpoq angullu silatooq uterfigalugu.

Ima aperaaq: “Maanna isumakkeerfigereerpinga?”

“Qiviut tamaasa katersoqqaassavatit”, angut silatooq akivoq.

“Qanoq ilillunga katersorsinnaassavakka? Anorimimmi teqqaanneqareerput.”

“Soorlu qiviut sumi tamaaniittut, taamatuttaaq salluliatit inuppassuarnut anngutereerput. Aamma soorlu qiviut katersoqqissinnaanngikkitit, taamatuttaaq inuit oqaatsitit puiorsinnaanngilaat.”

Matumani ilinniutigineqartoq paasiuminarpoq. Oqaaserisimasavut uterteqqissinnaanngilavut. Ilaannikkullu oqaatsitta sunniutipilui allanngortissinnaaneq ajorpavut. Taamaattumik oqaatissuaatiginninnginnitsinni silatusaassaagut eqqaamagutsigu oqaatsivut qiviutut teqqaasutut ittut.

[Qupp. 18-mi assiliartaq]

Qanoq ililluta tunussisunik pulaartitsisinnaavugullusooq?