Komana Mukutiyilila Chinakutusoñamishayi Chikupu Yehova?

“Njila iyi, endenu mwomwenimu.”—ISA. 30:21.

1, 2. Chumanyi chinakufwilayi Satana kwila, nawa Bayibolu yatukwashaña ñahi?

 NEYI munakuya munjila, chinjikijili chinakwinyika kwacheñi chinateli kuyijimbesha. Neyi mujimbelamu munateli kumona kukala. Indi neyi ibwambu denu yayileja nindi kudi mbanji wahimpa chinjikijilu muloña nakukeña nindi antu ajimbaleña. Chakadi nikujina mukutiyilila munayilejiyi mukwenu.

² Bayibolu yahoshaña hanjila jiyedi. Njila yalombolaña kukujilumuka niyaya kuwumi wahaya nyaka. Yahoshaña nawu antu amavulu adi munjila yaya kukujilumuka. Satana nakuyidimba, kufwana neyi ona mbanji wahimpaña chinjikijilu. Nakufwila kutudimba ninetu nawa. (Chim. 12:9) Yuma yatama yitwahanjekahu muchibaaba chinafumuhu diyuma yazatishañayi Satana hakutuleñela tubuleña kumwovwahila Yehova nawa tufumi munjila yaya kuwumi wahaya nyaka. (Mat. 7:13, 14) Ilaña twadizili cheñi netu Yehova Nzambi, ibwambu detu, watusoñamishaña kulonda twiluki tukosi twaSatana. Ichi dinu tuhanjekenu hayuma yisatu yikwawu yazatishañayi Satana hakutudimba niBayibolu chiyatukwashaña hakwila tuyitondolweli. Hakutaña yuma yatusoñamishañayi Yehova muBayibolu, tufwikijeña netu wudi kunyima yetu nakutuleja nindi: “Njila iyi, endenu mwomwenimu.” (Isa. 30:21) Chitukudizaña iyi yuma yinakutusoñamishawu chikupu, tukufwilaña nankashi kwila yuma yinakutulejayi Yehova.

Bayi Mulondela ‘Antañishi Akutwambaku’

3, 4. (a) Muloñadi antañishi akutwamba chekalawu neyi mashima akadi menji? (b) Indi antañishi akutwamba amavulu afumaña kudihi, nawa chumanyi chafwilañawu?

³ Difwikijenu mudi halwendu, munakuhita muchinkalampata nawa munafwi mpwila. Nenu mumbi mesu kutala ishima dina. Muchima wunakuyileja nindi mukuwanamu menji, dichi himukuya nenu mutahi menji. Ilaña kushika kwishima, kuwana mwoma nichawu. Mukutiya kutama nankashi! Tunateli kuhosha netu chalala chidi neyi menji nawa antañishi akutwamba adi neyi mashima oma menji. Antu atoñojokaña nawu awa antañishi akweti nsañu yalala akatiya nsonyi. Kuhitila mudi apostolu aPawulu naPetulu, Yehova watusoñamishaña hadi antañishi akutwamba. (Tañenu Yililu 20:29, 30; 2 Petulu 2:1-3.) Indi antañishi akutwamba anyi? Mazu aPawulu niPetulu atulejaña kwafumaña awa antañishi akutwamba nichadimbañawu antu.

⁴ Pawulu wasonekeleli aeluda amuchipompelu chamuEfwesesa nindi: “Mukachikenwenu aweni mwakanyamuka antu akuhosha yuma yaheña.” Petulu hamukanda watemesheliyi kuyipompelu yayivulu wahosheli nindi: “Nimukachi kenu nawa mwakekala ankuluñaña [antañishi] akutwamba.” Dichi antañishi akutwamba anateli kufuma muchipompelu. Awa antañishi akutwamba hiyakwakusekesha. * Chumanyi chakeñañawu? Pawulu wahosheli nindi chafumawu mukuloñesha kwaYehova, akeñaña ‘kudikokela atumbanji awenawu.’ Atumbanji anakutenayi Pawulu hiyatumbanji twaKristu. Awa antañishi akutwamba hiyayaña nakwilisha atumbanji abula kwikala muchipompeluku. Asendaña hela eyaña atumbanji mukachi kachipompelu. Yesu wahosheli nindi akwakusekesha adi neyi atuñwidi adyaña anyikoku. Akwakusekesha afwilaña kuzeyesha chikuhwelelu chawantu amuchipompelu nawa akeñaña aleki chalala.—Mat. 7:15; 2 Tim. 2:18.

5. Antañishi akutwamba adimbaña ñahi antu?

 ⁵ Antañishi akutwamba adimbaña ñahi antu? Adimbaña antu mukubabala. Akwakusekesha aletaña yitoñojoka yawu “hambadi” [wumweneni] muchipompelu, neyi amakombi aletaña yuma mwituña mukusweka. Ahoshaña ‘mazu akudimbana.’ Dikwila nawu ahoshaña yuma yaleñelaña yitoñojoka yakutwamba yimwekaneña neyi yalala, neyi chochelañawu amakombi ahimpaña yipapilu yakutwamba yimwekaneña neyi yalala. Afwilaña antu amavulu akuhweleli ‘ntañishilu yawu yakutwamba.’ Petulu neyi wahosheli nindi akeña ‘kuheñesha’ Nsona. Alumbululaña mavasi amuBayibolu munjila yaheña kulonda akwawu eteji yitoñojoka yawu. (2 Pet. 2:1, 3, 13; 3:16) Akwakusekesha hiyatwakamenañaku. Neyi tuyilondela, tukuheñuka munjila yaya kuwumi wahaya nyaka.

6. Bayibolu yatusoñamishaña ñahi chikupu hadi antañishi akutwamba?

⁶ Tunateli kudikaña ñahi nawantañishi akutwamba? Bayibolu yatulejaña chuma chacheni chitwatela kwila. (Tañenu Aroma 16:17; 2 Yowanu 9-11.) Bayibolu yatulejaña chikupu nawu: “Yitondolwelenu.” Dikwila nawu hitwatela kushakama nawu hamuku. Bayibolu yasoñamishaña neyi chochasoñamishaña ndotolu nindi bayi wushakama hamu namuntu wakata chikatu chatela kusambukila akwawuku. Ndotolu weluka nindi neyi musambula chikatu, mukufwa. Chakadi nikujina watusoñamishaña chikupu, nawa twatela kulondela chikupu mwatusoñamishañayi. Bayibolu yahoshaña nawu akwakusekesha ‘atama muchima’ [andala] nawa azatishaña ntañishilu yawu kulonda antu amakwawu atoñojokeña neyi chatoñojokañawu. (1 Tim. 6:3, 4) Yehova wudi neyi ndotolu wamuwahi. Watulejaña chikupu nindi tutondolweli antañishi akutwamba. Mpinji yejima tufwileña kulondela mwatusoñamishañayi.

7, 8. (a) Chumanyi chitwatela kwila kulonda tutondolweli antañishi akutwamba? (b) Muloñadi chimwafwilaña kutondolwela antañishi akutwamba?

⁷ Chumanyi chitwatela kwila kulonda tutondolweli antañishi akutwamba? Hitwayitambwilaña mumataletu hela kuyimushaku. Hitwatañaña cheñi nyikanda yawu, kuyitala hachisanji chanyivwimbimbi, kutaña nsañu yasonekañawu haIntaneti, hela kusoneka mazu etu kunsañu yasonekañawu haIntanetuku. Muloñadi chitwafwilaña kuyitondolwela? Muloña twamukeña Nzambi “yansañu yalala.” Dichi hitwakeñaña kutiyilila kuntañishilu yakutwamba yambuka nansañu yalala yekala Mwizu daNzambuku. (Mas. 31:5; Yow. 17:17) Twakeña kuloñesha kunakuzatishayi Yehova hakututañisha nsañu yayiwahi yalala. Kuloñesha kwaYehova dikwatudizishili ijina daYehova nichidalumbuluka, kufuukula kwindi kudinu iseki, chuma chamwekanaña neyi tunafwi, nikuchiñeja kwakusañuka. Komana mwanukaña chimwazañaleli hampinji yimwadizili iyi nsañu yalala ninsañu yikwawu? Dichi bayi mwiteja nsañu yakutwamba yatañishaña antañishi akutwamba yiyileñeli mufumi mukuloñesha kwayidizishili nsañu yalalaku.—Yow. 6:66-69.

⁸ Hichidi namuloña namazu ahoshañawu antañishi akutwambaku, hitwatela kuyilondelaku! Kwosi chuma chatela kutuleñela kutiyilila kudi antu adi neyi mashima amenji omaku. Antu ayitiyililaña akatiya nsonyi. Tunakufwila kwikala ashinshika kudi Yehova nikukuloñesha kwindi. Kunu kuloñesha kanda kututiyisheñahu dehi nsonyi nawa mpinji yejima kwatwinkaña menji amavulu atooka ansañu yalala yaMwizu daNzambi.—Isa. 55:1-3; Mat. 24:45-47.

 Bayi Mutiyilila ‘Nsañu Yakutwambaku’

9, 10. Kusoñamishanyi kwamulejeluwu Timotewu kudi Pawulu kutalisha hansañu jakutwamba? Nsañwinyi yakutwamba yateneneñayi Pawulu?

⁹ Chinjikijilu chidi kunsa yanjila chinatalishuwu kwacheñi chinateli kutudimba. Mpinji yikwawu chaswayi kwiluka nenu chinjikijilu chinatalishi kwacheñi, ilaña mpinji yikwawu chakala. Chochimu ninsañu jakutwamba jafumaña kudi Satana. Neyi kubabala nehi, nsañu yindi yikwawu yakutwamba yinateli kutudimba. Kapostolu Pawulu watusoñamishaña haniyi nsañu yakutwamba. Wayiteneni nindi “tuheka [nsañu yakutwamba].” (Tañenu 1 Timotewu 1:3, 4.) Indi nsañu yakutwamba hinsañu yamuchidinyi, nawa tunateli kutondolwela ñahi kutiyilila kuniyi nsañu? Twatela tuwani ñakwilu yanawa malwihu kulonda tutwalekuhu kwenda munjila yaya kuwumi wahaya nyaka.

¹⁰ Kusoñamisha kwaPawulu hansañu yakutwamba kwekala mumukanda watachi wasonekeleliyi Timotewu, eluda mukwaKristu. Pawulu wamulejeli Timotewu kuhemba chipompelu chakadi majilu nikukwasha amana kwindi niahela kutwalekahu ashinshika kudi Yehova. (1 Tim. 1:18, 19) Izu dachiGriki dazatishiliyi Pawulu hakutena ‘nsañu yakutwamba’ daya mukwila nawu “makudi” hela “nsañu yakulumbisha.” Mukanda wumu wahosha nawu nsañu yakutwamba hinsañu yamunsakililu yabula wunsahu walala. (The International Standard Bible Encyclopaedia) Hadaha Pawulu watoñojokeleña hamakudi amunsakililu afumineña kunsañu yanyaka yalumbishiluwu antu nawa yaleñeleleña antu amakwawu kwakamena. * Pawulu wahosheli nindi iyi nsañu yadiña yafwana muloña ‘yaletaña kwakwihujola hohu.’ Ichi chinayi mukwila nawu antu atiyililaña iyi nsañu atachikaña kwihula malwihu hayuma yakutwamba nawa atachikaña kukeñakeña ñakwilu. Satana wazatishaña iyi nsañu yakulumbisha nimakudi amunsakililu kulonda antu abuli kwiluka yuma yalema chikupu. Dichi Pawulu watufumbili chikupu nindi: Bayi mutiyilila nsañu yakutwambaku!

11. Indi Satana wazatishaña ñahi nsakililu yakutwamba hakudimba antu? Kusoñamishanyi kutwatela kutiyilila?

¹¹ Nsañwinyi yakutwamba yinateli kutuhuñumuna neyi tubula kubabala? Tunateli kuhosha netu nsañu yakutwamba hintañishilu yidi yejima yamunsakililu yatotomonaña ‘nsañu yalala kumatu etu,’ dikwila nawu, yatukañeshaña kutiyilila kunsañu yalala. (2 Tim. 4:3, 4) Satana wababala. Wazatishaña nsakililu yakutwamba hakudimba antu. Dichamutenenañawu muBayibolu nawu “wadifwikijaña neyi kañelu kachejeji.” (2 Kor. 11:14) Chakutalilahu, nsakililu jamuKristendomu jahoshaña nawu amulondelaña Kristu, ilaña atañishaña nsañu yakutwamba nawu kwekala anzambi asatu nikaluña kachinana. Atañishaña cheñi nawu neyi mujimba wamuntu hiwukufwa wumi hiwafwañaku. Antu amavulu atoñojokaña nawu Krisimansi niIsita yamuzañaleshaña Nzambi, ilaña yuma yelañawu antu hakwanakana iyi yidika yafuma kukudifukula kwakutwamba. Nsañu yakutwamba hiyinateli kutuhuñumunaku neyi tutiyilila chatusoñamishañayi Nzambi nindi twambuki kunsakililu yakutwamba nikubula ‘kukunka kuchuma chatama.’—2 Kor. 6:14-17.

12, 13. (a) Nsañwinyi yakutwamba yisatu yafumaña kudi Satana nawa Bayibolu yahosha nawudi kutalisha haniyi nsañu yakutwamba? (b) Chumanyi chitwatela kwila kulonda Satana yabuli kutudimba nansañu yakutwamba?

¹² Kudi nsañu jikwawu jakutwamba jaSatana jinateli kutuhuñumuna neyi tubula kubabala. Tushinshikenu haniyi nsañu yisatu yakutwamba. Nsañu yatachi yakutwamba yidi yakwila nawu: Wunateli kwila chuma chidi chejima chiwunakeñi. Wunateli kufuukulahu eyaweni yuma yaloña niyabula kuloña. Kakavulu twatiyaña nsañu yamuchidiwu haTV, mumafilimu, munyikanda, muyipapilu yansañu, nihaIntaneti. Chineli mpinji yejima twatiyaña iyi nsañu yakutwamba, chaswayi kutachika kutoñojoka mwenimu nikulondela yililu yatama yamukaayi. Ilaña Nzambi hohu diyi watela kutuleja yuma yayiwahi niyatama. (Yere. 10:23) Nsañu yamuchiyedi yakutwamba yakwila nawu: Nzambi hakafumishahu yuma yatama hanu hamasekiku. Ichi chaleñelaña antu kutoñojoka hohu hayuma yamakonu. Hiyatoñojokaña hampinji yakumbidi hela hakumuzañalesha  Nzambuku. Tunateli kutachika kutoñojoka neyi chatoñojokañawu nikwikala “ankopi, hela akwakubula kusoña nyikabu” mumudimu wetu wakumuzatila Nzambi. (2 Pet. 1:8) Dichi twatela kwiluka netu ifuku daYehova didi mukamwihi nawa twatela kuditalila. (Mat. 24:44) Nsañu yamuchisatu yakutwamba yakwila nawu: Nzambi hayakamenañaku. Satana wakeñaña nindi tukuhweleli netu Nzambi hanateli kutukeñaku. Ilaña tweluka netu Yehova watukeña nawa walemeshaña akwakudifukula indi ejima.—Mat. 10:29-31.

¹³ Twatela kwikala asoñama kulonda tubuleña kutoñojoka neyi antu amukaayi kaSatana. Ilukenu nenu Satana diyi sakutwamba muneni. Twatela kutiyilila kusoñamisha kwamuBayibolu neyi tunakukeña netu Satana yabuli kutudimba nansañu yakutwamba.—2 Pet. 1:16.

Bayi ‘Mulondela Satanaku’

14. Indi Pawulu wayisoñamishili nindidi anfwila ansanda, nawa muloñadi wonsu wetu chitwatela kutiyilila iku kusoñamisha?

¹⁴ Toñojokenu neyi muwana chinjikijilu chidi munjila chinakumwekesha nawu: “Iyi Diyi Njila Yakulondela Satana.” Kwosi mukwaKristu wunateli kulondela chinjikijilu chamuchidiwu. Pawulu watusoñamishili hanjila yayivulu yinateli kuleñela akwaKristu adihana ‘asenuki nakulonda Satana.’ (Tañenu 1 Timotewu 5:11-15.) Wasonekeli awa mazu kudi anfwila ansanda amuchipompelu kumpinji yakunyima, ilaña wonsu wetu tunateli kudizila kumazu ahosheliyi. Awa afwila hiyelukili nawu adiña nakumulondela Satanaku, ilaña yuma yakoñeleñawu ninsañu jahosheleñawu jamwekesheleña nawu adiña nakumulondela. Tukutondolwela ñahi kulondela Satana chakadi kwiluka? Tushinshikenu chatusoñamishiliyi Pawulu hamatuñu, dikwila nawu, kuhosha yuma yatama hadi antu amakwawu.

15. Chumanyi chakeñañayi Satana? Kwesekeja nachahosheliyi Pawulu, yumanyi yazatishañayi Satana kulonda twileña yuma yakeñañayi?

¹⁵ Satana hakeñaña nindi tuhosheña hayuma yitwakuhwelelaku. Wakeñaña tuleki kushimwina nsañu yayiwahi. (Chim. 12:17) Wakeñaña tumanishileña mpinji yetu nakwila yuma yamukunkulu hela yaletaña chaambu mukachi ketu. Pawulu wateneni yuma yazatishañayi Satana yatuleñelaña twileña yuma yinakukeñayi. Pawulu wahosheli nindi anfwila akushankulu ‘alekeli kukoña mudimu, ayileña nakukimboka.’ Munanu mafuku munatuñuwu yozelu yayiha, tunateli kumanisha mpinji yetu niyawantu amakwawu, kuhitila mukuditemeshelaña nsañu jamukunkulwayi hela jakutwamba. Pawulu wahosheli cheñi nindi anfwila adiña “akwansachi.” Nsachi yaletaña matuñu, nawa yaletaña ndombu. (Yish. 26:20) Antu atuñulaña akwawu adi neyi Satana Diyabolu, hela chakwila hiyelukaku. * Pawulu wahosheli cheñi nindi anfwila adiña ‘atuvuba adiñijileña munsañu jawakwawu.’ Hitukweti wuswa wakuleja antu amakwawu chatelawu kushakamawuku. Iyi yuma yatama yinateli kutuleñela tuleki kutoñojoka hamudimu walema watwinkayi Yehova. Neyi tuleka kukalakala chikupu mudimu waYehova, dikwila nawu tukutachika kumulondela Satana. Twatela kwiluka kukabadi kutudi.—Mat. 12:30.

16. Chumanyi chitwatela kwila neyi hitunakukeña kumulondela Satanaku?

¹⁶ Neyi tutiyilila munakutufumba Bayibolu hitunateli kumulondela Satanaku. Pawulu washimwini yuma yinateli kutukwasha. Wahosheli nindi ‘tuswejenu kukalakala mudimu waMwanta.’ (1 Kor. 15:58) Neyi tuswejaña kumukalakela Yehova hitukwikalaña nampinji yakuhosha hayuma yamukunkulwayi yinateli kutuletela kukalaku. (Mat. 6:33) Twatela kuhoshaña “mazu amawahi anatweshi kukolesha antu.” (Efwes. 4:29) Bayi mutuñulaña akwenuku nawa bayi mutiyililaña kudi akamatuñuku. (Talenu chikasha chinakuhosha nawu “Kunatila Mavuji Mumpepela.”) Kuhwelelenu nikulemesha amanakwenu niahela. Neyi mwila mwenimu mukuhoshaña yuma yayiwahi hadi wena. Pawulu watulejeli cheñi  nindi tushakameña “nakudowa (kusha maana kuyuma yetu).” (1 Tesa. 4:11) Mwekeshenu kudi antu nenu mwayakamena, ilaña ilenu mwenimu mukalemesha. Ilukenu nenu, hitwatela kuyilejaña amakwawu mutunakutoñojoka hayuma yatela kudifuukwilawu aweniku.—Ŋal. 6:5.

17. (a) Muloñadi Yehova chatusoñamishañayi kuyuma yejimiyi yitunahanjekuhu? (b) Chumanyi chitwatela kufwila kwila?

¹⁷ Tunakumuhameka Yehova hakutuleja chikupu yuma yitwatela kutondolwela! Twatela kwanukaña netu Yehova watusoñamishaña muyuma yejima muloña watukeña nankashi. Hakeñaña nindi Satana yatudimbeña nikutuyandishaku. Yehova nakukeña nindi tulondeli njila yanyanya, nawa diyi njila yaya kuwumi wahaya nyaka. (Mat. 7:14) Mpinji yejima twatela kufuukulahu kumutiyilila Yehova neyi nakutuleja nindi: “Njila iyi, endenu mwomwenimu.”—Isa. 30:21.

[Tumazu twaheshina]

Mukwakula Nenudi?

Munateli kumwekesha ñahi nenu munakutiyilila kusoñamisha kudi muniji Nsona?

• 2 Petulu 2:1-3

• 1 Timotewu 1:3, 4

• 1 Timothy 5:11-15

[Malwihu aKuzatisha haKudiza]

[Chikasha/Nyevulu yidi hefu 19]

Kunatila Mavuji Mumpepela

Kwekala nsañu yakunyaka yawaYudeya yamwekeshaña wubanji wekala mumatuñu.

Iyala wumu washimwini nsañu yakutwamba kudi antu amavulu hadi iyala wamaana mumukala washakamineñayi. Chimwahitili mpinji, iyala watwambili wakeñeleña nindi iyala wamaana yamwanakeni. Dichi wamwihwili iyala wamaana nindi: “Chumanyi chinatela kwila kulonda nimwekeshi nami nadanakeni hayuma yinahosheli?” Iyala wamaana wamulejeli nindi: “Kudi chuma chiwatela kwila. Sendaku musawu mudi mavuji. Wuyilakumuni kulonda mavuji aleloki nampepela.” Ona iyala helukili mwatalishili iyala wamaanaku, ilaña wakoñeli mwamulejeliyi. Nkumininaku wafuntili kudi iyala wamaana nakumwihula nindi:

“Ichi dinu munañanakeni?”

Iyala wamaana wamwakwili nindi: “Sambilaku wuyi wakakuñuli mavuji ejima iwalakumuna.”

Ona iyala wahosheli nindi: “Hinukutweshaku. Mavuji analeloki dehi nampepela. Hinikutwesha cheñi kuyikuñulaku.” Kuhiñahu, iyala wamaana wamwakwili nindi: “Neyi chochinalelokeli mavuji kumaluña amavulu, kutwamba kweyi akutiya kudi antu amavulu. Nawa neyi chochiwukukañanya kukuñula mavuji analeloki, hiwunateli kuleñela antu ajimbali mazu iwahoshaku.”

Tunadiziliku netu, chitwahosha mazu hitunateli kuyihimpaku. Nawa mpinji yikwawu hitunateli kuhimpa yuma yatama yafumaña mumazu itwahoshaku. Dichi henohu kanda tutachiki kutuñula muntu, twatela kwanuka netu mazu etu adi neyi mavuji analeloki nampepela.

[Mwevulu wudi hefu 16]

Indi antu amakwawu anateli kutambika ñahi akwakusekesha mumatalawu?