Yãmb na n tũu a Zeova saglsã sẽn yaa vẽenesã bɩ?

“Ad sore, bɩ y kẽne.”—EZAI 30:21.

1, 2. Bõe la a Sʋɩtãan tʋll ne a sũur fãa, la wãn to la Wẽnnaam Gomdã sõngd tõndo?

NED sẽn togd sor sã n gõdg n tũ pano sẽn wẽnemd n tees zĩig sẽn pa a sẽn datẽ wã, a tõe n menemame, wall a paam yell sẽn yɩɩd rẽ menga. Tags-y n ges-y wa y zoa sẽn na n keoog-y tɩ y gũus tɩ nin-wẽng n wẽnemd pano wã n dat n tudg so-loaadbã kẽer n maan-b wẽnga. Rẽ yĩnga y kõn tũ a saglgã sɩda?

² Sãmbg sẽn ka be, a Sʋɩtãan yaa bɛ sẽn tʋll ne a sũur fãa n menes-do. (Wil. 12:9) Sõsg ning sẽn loogã pʋgẽ, d goma bũmb toor-toor sẽn tõe n tudg-d yelle. Bõn-kãens fãa yita a Sʋɩtãan nengẽ, la a sẽn datã yaa a kɩt tɩ d bʋdg n bas vɩɩm sẽn kõn sa wã sore. (Mat. 7:13, 14) Zu-noogo, tõnd Wẽnnaamã sẽn yaa nimbãan-zoɛtã keoogd-d lame tɩ d ra tũ a Sʋɩtãan sẽn dat tɩ nebã rɩk soay ninsã ye. Bɩ d gom bũmb a tãab me a Sʋɩtãan sẽn tar n tudgd nebã yell masã. D na n goma Biiblã sagls sẽn tõe n sõng-d to-to t’a ra tõog n menes-dã yell me. D sã n wa gomd rẽ yelle, bɩ d ning d yamẽ t’a Zeova kẽnda d poorẽ, n wilgd d so-sõngã n yet-d woto: “Ad sore, bɩ y kẽne.” (Ezai 30:21) D yãka yam n tũud a Zeova saglsã sẽn yaa vẽenesã. D sã n bʋgsd b zutu, na n kenga d raood tɩ d tõog n ket n maand rẽ ne d sũur fãa.

Ra tũ-y “zãmb karen-saam dãmb” ye

3, 4. a) Bõe yĩng tɩ d tõe n yeel tɩ zãmb karen-saam dãmbã yaa wa bul-koeemse? b) Zãmb karen-saam dãmbã yita yɛ, la bõe la b rata?

³ Tags-y n ges-y wa yãmb sẽn na n togd sor n wa pɩʋʋgd rasempʋɩɩga, n yã bulg sẽn be yɩɩg n bʋdg n na n tɩ yũ koom, n tɩ ta n mik yaa bul-koɛɛnga. Rẽ yĩnga y sũur kõn sãam sɩda? Zãmb karen-saam dãmbã me yaa wa bul-koeemse. Ned ning fãa sẽn na n tɩ kos-b tɩ b sõng-a t’a bãng Biiblã sẽn sɩd yetã, a soab sũur na n sãama wʋsgo. A Zeova ra kɩtame tɩ tʋm-tʋmd a Poll ne a Pɩɛɛr sagl-d tɩ d gũus ne-ba. (Karm-y Tʋʋm 20:29, 30; 2 Pɩɛɛr 2:1-3.) Zãmb karen-saam dãmbã yaa ãnd rãmba? Tʋm-tʋmdb-kãensã b yiibã goam sẽn yit Wẽnnaam nengẽ wã sõngd-d lame tɩ d bãng b sẽn yitẽ, la b sẽn maand to-to n tudgd nebã.

⁴ A Poll yeela Efɛɛz tigingã kãsem dãmb woto: “Neb na n yika yãmb sʋk n zãms nebã sẽn ka sɩda.” Tʋm-tʋmd a Pɩɛɛr me yeela a tẽed-n-taasã woto: “Zãmb karen-saam dãmb na n zĩnda yãmb sʋka.” Woto fãa wilgdame tɩ zãmb karen-saam dãmbã yita yɛ? B tõe n yii tigingã pʋgẽ. Bãmb dãmbã yaa sɩdã kɩɩsdba. Bõe la b rata? Yaa neb sẽn da zĩnd siglgã pʋgẽ hal tɩ b sũur da noom ne-a, la b wa n yãka yam n yi a pʋgẽ. La pa rẽ bal ye, a Poll bilgame tɩ b rat n “belga karen-biisã tɩ b tũ bãmba.” Yãmb wʋmame bɩ? A yeelame tɩ b na n bao n belga “karen-biisã.” Wall tɩ b yi yɩng n tɩ bao b karen-biisã, yaa Kiristã karen-biisã la b tʋll n tudgi. Wa “kata sẽn yaa wẽnse,” zãmb karen-saam dãmbã rat n sãama tigingã neba, rat n yeel tɩ b rat n sãama b tẽebã n kɩt tɩ b lak n bas sɩdã.—Mat. 7:15; 2 Tɩm. 2:18.

5. Wãn to la zãmb karen-saam dãmbã maand n tudgd nebã?

⁵ Wãn to la zãmb karen-saam dãmbã maand n tudgd nebã? B sẽn maand to-to wã wilgdame tɩ b tʋmda ne sɩlem. Sɩdã kɩɩsdb ‘zãmsda nebã zãmsg sẽn sãamd-ba.’ Wa fordɛɛr dãmb sẽn soosd n gind duannã to-to n kẽesd koosem tẽng pʋgẽ wã, sɩdã kɩɩsdb me maanda sɩlem n wat ne tagsa sẽn kɩɩsd sɩdã tigingã pʋgẽ. La wa neb nins sẽn maand ligd-yoodã sẽn dat tɩ nebã  tẽ tɩ b ligdã yaa sõma wã, sɩdã kɩɩsdb me gomda “sɩlem-goam” n dat tɩ nebã sak n deeg tɩ b tagsa wã yaa sɩda. B yelgda b zɩlem-beedã, n “tekd . . . Gʋlsg Sõamyã” n dat tɩ zems ne bãmb mensã tagsgo. (2 Pɩɛ. 2:1, 3, 13; 3:16) Yaa vẽeneg tɩ sɩdã kɩɩsdb pa rat tõnd neer ye. D sã n pʋg-ba, d pa tõe n pa bʋdg n bas vɩɩm sẽn kõn sa wã sor ye.

6. Sagl-bʋg la Biiblã kõt-d zãmb karen-saam dãmb wɛɛngẽ vẽenega?

⁶ Wãn-wãn la d tõe n maan tɩ zãmb karen-saam dãmbã ra tõog n menes-do? Biiblã wilgd-d-la d sẽn segd n maanegã vẽenega. (Karm-y Rom dãmb 16:17; 2 Zã 9-11.) Wẽnnaam Gomdã yet-d lame tɩ d ‘lak ne-ba.’ Biibl dãmb kẽer pʋsẽ, b lebga gom-kãensã tɩ “gil-ba,” “zãag ne-ba,” wall “ra pẽneg-b” ye. Sagl-kãensã sẽn yit Wẽnnaam nengẽ wã yaa vẽenese. D rɩk makr wa logtor sẽn na n yeel-y tɩ y lak y meng ne ned sẽn bẽed bã-kʋʋdga, t’a bãagã tõe n long neda. Yaa vẽeneg tɩ y wʋmda rẽ sẽn dat n yɛɛlga, la y na n tũu a saglgã ne y sũur fãa. Sɩdã kɩɩsdb me yaa wa bãad a woto, n tũnugd ne b zãmsgã n dat tɩ d tall b tagsa wã buudu. (1 Tɩm. 6:3, 4) A Zeova sẽn yaa Logto-kãsengã sagend-d lame tɩ d lak d mens ne-ba. Yaa sɩd tɩ d mii a sẽn dat n yɛɛlgã. La rẽ yĩnga, d tʋll n tũu a saglgã ne d sũur fãa bɩ?

7, 8. a) Zãmb karen-saam dãmbã gilb baooda bõe maanego? b) Bõe yĩng tɩ y yãk yam n pa na n tol n tũ zãmb karen-saam dãmbã?

⁷ Zãmb karen-saam dãmbã gilbã baooda bõe maanego? D pa segd n deeg-b d zagsẽ wall d pʋʋs-b ye. Sẽn paase, d pa segd n karemd b sɛbã wall d kelgd b sõssã televiziõ wã pʋgẽ, radio rãmbẽ wã, pa rẽ bɩ ẽntɛrnetã zug ye. Bõe yĩng tɩ d segd n gũus d mens woto fãa? Yaa d sẽn nong “Wẽnnaam sẽn so sɩdã” yĩnga. Woto kɩtame tɩ d toog kae ne zãmsg buud fãa sẽn kɩɩsd a Gomdã sẽn yaa sɩdã ye. (Yɩɩl 31:6; Zã 17:17) Sẽn paase, d nonga a Zeova siglgã sẽn sõng-d tɩ d bãng yɛl wʋsg Biiblã sẽn yet tɩ be yamleoogã. Wala makre, d bãnga Wẽnnaam a Zeova yʋʋrã la a võorã, a sẽn sɩng n dat tɩ tẽngã zug vɩɩm yɩ to-to wã. D bãnga Biiblã sẽn yet bũmb ning kũ-rãmbã wɛɛngẽ wã, la kũum vʋʋgr saagrã. Tẽeg-y sũ-noog ning y sẽn paame, y sẽn wa n bãng bõn-kãensã la a taab paalmã. Bõe yĩng masã tɩ y na n bas tɩ y sũur sãam ne siglg ning sẽn sõng-y woto fãa wã, ned sẽn wɩt-a yĩnga?—Zã 6:66-69.

⁸ Baa zãmb karen-saam dãmbã sẽn yɛtg fãa, d pa na n sak n tũ-b ye! Bõe yĩng tɩ d na n kẽng nin-kãensã sẽn yaa wa bul-koeemsã nengẽ tɩ b tudg-d la b sãam d sũy zaalem? Bɩ d kell n sak a Zeova ne a siglgã ne d sũur fãa, bala, hal n tãag masã, yaa bãmb n sõngd tõnd tɩ d bãngd bũmb nins Wẽnnaam Gomdã sẽn yet tɩ kengd raoodã.—Ezai 55:1-3; Mat. 24:45-47.

Ra tũ-y “soalem” ye

9, 10. Soalmã wɛɛngẽ, sagl-bʋg la a Poll kõ a Tɩmote, la tõe tɩ bõe n da be a Poll yamẽ? (Ges-y notã sẽn be tẽngrã me.)

⁹ Wakat ninga, b sã n wẽnemd pano sẽn be sor noor n tees zĩig sẽn pa y sẽn datẽ wã, y  bãngda nana-nana. La sasa ninga, tõe n yɩɩ toogo. Yaa a woto me ne a Sʋɩtãan sẽn maand to-to n tudgd nebã. A sɩlem kẽer bãngr yaa nana n yɩɩd sãnda. Tʋm-tʋmd a Poll wilg-d-la bũmb a yembr a Sʋɩtãan sẽn tũnugd n tudgd nebã. Yaa “soalmã.” (Karm-y 1 Tɩmote 1:3, 4.) Soalmã sẽn tõe n wa kɩt tɩ d bʋdg n bas vɩɩm sorã yĩnga, segdame tɩ d modg n bãng b sẽn yaa bũmb ninsi, la d sẽn tõe n maan to-to n da kelg-b ye.

¹⁰ Yaa a Poll pipi lɛtr ning a sẽn tool a Tɩmote wã pʋgẽ la a sagl kiris-nebã tɩ b gũus b mens ne soalmã. A Tɩmote ra yaa kãsem soab b sẽn da yãk t’a segd n ges tɩ tigingã kell n yɩ yɩlemde, la a sõng a tẽed-n-taasã tɩ b tall b tẽebã kãn-kãe. (1 Tɩm. 1:18, 19) Gɛrkã gom-bil ning a Poll sẽn pʋd tɩ b lebg tɩ “soalmã” rat n yeelame tɩ kibay sẽn pa sɩda, neb sẽn wʋge. Sebr a yembr (The International Standard Bible Encyclopaedia) yeelame tɩ gom-bi-kãng gomda “kibay sẽn gomd (tũudum yelle,) n yaool n pa sɩd ye.” Tõe t’a Poll sẽn da wa n yet woto wã t’a ra tagsda goam sẽn yaa ziri b sẽn da tũnugd ne kibay b sẽn wʋge, n dat tɩ nebã tẽ tɩ yita Wẽnnaam nengẽ. * Kiba-kãensã “wata ne no-koɛɛm” sẽn pa nafd neda. Soalem a woto buudã yita a Sʋɩtãan sẽn yaa belgr naabã nengẽ. A sẽn datã yaa paam n menes neb nins sẽn pa gũusdã ne kiba-kãensã sẽn yaa ziri wã. A Poll saglgã yaa vẽenega. A yeel-d lame tɩ d ra kelg soalem a woto buud ye.

11. Wãn to la a Sʋɩtãan maand sɩlem n tũnugd ne ziri tũudmã n menes nebã, la sagl-bʋg tũub n tõe n sõng-d t’a ra menes-do?

¹¹ Soalem nins sẽn tõe n menes sẽn pa gũusd-bã kẽer la bʋse? D tõe n yeela koɛɛg-koɛɛg tɩ soalem nins yell d sẽn gomdã yaa goam buud fãa sẽn yaa ziri, b sẽn togsd nebã n yetẽ tɩ yita Wẽnnaam nengẽ, tɩ tõe n kɩt tɩ d pa “le kelg sẽn yaa sɩd ye.” (2 Tɩm. 4:3, 4) A Sʋɩtãanã sẽn dat tɩ nebã tẽ t’a yaa “vẽenem malɛkã” maana sɩlem n tũnug ne ziri tũudmã n menes neb wʋsgo. (2 Kor. 11:14) A tõogame tɩ neb kẽer sẽn yet tɩ b yaa kiris-neb zãmsd nebã yɛl toor-toor sẽn pa sɩda. Wala makre, b wilgda nebã tɩ Wẽnnaam tara mens a tãabo, tɩ bugum yir n be, la tɩ ninsaal tara sɩɩg sẽn pa kiidi. La woto fãa yaa kibay b sẽn wʋge. Kiris-neb ne yʋʋrã maanda tig toor-toor me. Wala makre, Nowɛllã la Pakã. Yel-maandɩ nins b sẽn maand kibs-kãens sasa wã wõnda pa wẽnga, la b fãa yaool n tika soalem la pĩnd wẽndẽ ziri tũudum toɛy-toɛy yɛl zutu. D sã n tũ saglg ning Wẽnnaam sẽn kõ tõnd n yeel tɩ d welg toor ne-b la d “ra sɩɩs bũmb sẽn ya rẽgdã,” soalmã pa na n tõog n menes-d ye.—2 Kor. 6:14-17, Kãab-paalgã Koe-noogo.

12, 13. a) Bõe la a Sʋɩtãan rat tɩ nebã tẽ, la bõe n wilgd tɩ rẽ fãa yaa ziri? b) Bõe la d tõe n maan t’a Sʋɩtãan ra tõog n menes-d ne gom-kãens maasem?

¹² A Sʋɩtãan yelgda zɩlem-beed a taab me tɩ d sã n pa gũus bɩ b tõe n menes-do. Wala makre, a kɩtame tɩ neb wʋsg tẽed tɩ sõma la wẽngã bee ne ned kam fãa tagsgo. Filim dãmbã la mizik rãmb wʋsg kɩtame tɩ neb wʋsg tagsd woto. Yaa a Sʋɩtãan n wa ne tags-kãngã sẽn kɩɩsd Wẽnnaam Gomdã noyã n dat tɩ d kɩɩs sẽn gɩdg fãa n maan d yam. Ninsaal yaool n data sor-wilgr sẽn na yɩl n tõog n bãng sẽn yaa sõma la wẽng n bake, la yaa Wẽnnaam a ye bal n tõe n wilg-a sore. (Yel. 20:24) A Sʋɩtãan kɩtame me tɩ neb wʋsg tagsdẽ tɩ Wẽnnaam pa na n tol n kẽes a toog ninsaalbã yɛlẽ ye. D sã n tar tagsg a woto sẽn wilgd tɩ d pa tagsd beoog yellã, na n kɩtame tɩ d yɩ “kʋɩɩmba, wall neb sẽn ka womd biisi.” (2 Pɩɛ. 1:8) La sɩdã yaa t’a Zeova daarã tara pẽnegre, tɩ d segd n ket n gũud-a. (Mat. 24:44) A Sʋɩtãan leb n datame tɩ d tẽ tɩ ned baa a ye yell pa pak Wẽnnaam ye. La yaa ziri fasɩ. D sã n tẽ rẽ, na n kɩtame tɩ d tags tɩ d pa tol n tõe n paam tɩ Wẽnnaam nong-d ye. Sɩdã yaa t’a Zeova nonga a nin-buiidã ned kam fãa la a nand b ned kam fãa wʋsgo.—Mat. 10:29-31.

 ¹³ D segd n gũusda d mens wakat fãa, bala a Sʋɩtãan dũniyã neb tagsa la b manesem tõe n mi n wõnda wa yaa sõma. Tẽeg-y t’a Sʋɩtãan yaa bɛlgd sẽn ka to. Yaa Wẽnnaam saglsã tũub bal n tõe n sõng-d t’a Sʋɩtãan ra tõog n menes-d ne “soalem b sẽn tags n naan” ye.—2 Pɩɛ. 1:16, Kãab-paalgã Koe-noogo.

Ra tũ-y-yã “a Sʋɩtãan” ye

14. Sagl-bʋg la a Poll kõ pʋg-kõap kẽere, la bõe yĩng t’a sẽn yeelã pak tõnd fãa?

¹⁴ Tags-y n ges-y wala pano sẽn na n be sor noor tɩ b gʋls a zugã tɩ f sã n dɩk so-kãngã, a Sʋɩtãan la f pʋgda. Tõnd sʋkã, ãnd n na n sak n dɩk so-kãnga? La a Poll yaool n keoog-d lame tɩ d gũus tɩ yɛl toor-toor n be kiris-ned sẽn tõe n maan tɩ kɩt t’a bʋdg “n tũud Sʋɩtãanã.” (Karm-y 1 Tɩmote 5:11-15.) Yaa sɩd tɩ yaa pʋg-kõap kẽer sẽn da nan pa kʋʋl yell la a Poll sẽn gomã. La a sẽn yeelã paka tõnd ned kam fãa. Tõe tɩ pipi kiris-nebã wakatẽ pʋg-kõap nins yell a Poll sẽn gomã ra pa tagsd tɩ b tũuda a Sʋɩtãan ye. La b sẽn da maandã yaool n wilgdame tɩ yaa a Sʋɩtãan la b ra tũuda. Rẽnd d tõe n wa tũuda a Sʋɩtãan n pa miẽ ye. Bõe la d tõe n maan t’a buudã ra wa paam-do? Bɩ d gom a Poll sẽn sagl-d tɩ d gũus ne tẽnkãnemã yelle.

15. Bõe la a Sʋɩtãan data, la a sɩlem bʋs la a Poll sõdg-yã?

¹⁵ A Sʋɩtãan sẽn datã yaa a koms tõnd tẽebã n kɩt tɩ d bas koe-noogã moonego. (Wil. 12:17) Sẽn na yɩl n tõog n maan dẽ, a rat n tus-d lame tɩ d sãam d sẽkã tʋʋm a taab pʋsẽ, wall d maand yɛl sẽn na n sãam d zems-n-taarã. A Poll wilga a Sʋɩtãan sɩlem kẽere. Wala makre, a sõdga ‘kʋɩɩng la yi-saabo.’ Masã sẽn yaa telefõn selilɛɛr dãmb la ordinatɛɛr dãmb zãmaanã yĩnga, d sã n pa gũusi, d tõe n wa sãamda d sẽkã la d taabã me sẽka, d sẽn na n toond-b kibay sẽn ka yõod wall sẽn tõe n pʋd n yaa ziri menga. A Poll goma “yel-kãnesdb” yell me. Wɩdg tõe n wa lebga tẽnkãnem n wa ne zaba. (Yel. 26:20) Tẽnkãn-nebã mi tɩ b pa mi me, yaa a Sʋɩtãan naoor la b rɩkda, bala munaafɩglem sɩnga ne yẽ. * A Poll goma “gom-yaals” bɩ goam sẽn pa pak-f pʋgẽ kẽeb me yelle. Pa tõnd n segd n wilg d taabã b sẽn segd n manes b yɛlã to-to ye. Yaa ned sẽn pa tar tʋʋm n kẽed yɛl sẽn pa pak-a pʋgẽ. La rẽ maaneg wata ne zu-loeese, n tõe n wa kɩt meng tɩ d bas Rĩungã koɛɛg Wẽnnaam sẽn bobl-dã moonego. D sã n yaool n bas a Zeova tʋʋmdã tʋmbo, d sɩnga a Sʋɩtãan pʋgbo. Bala d pa tõe n pa yãk zĩig n beẽ ye.—Mat. 12:30.

16. Sagl-bʋs tũub n tõe n sõng-d tɩ d ra wa bʋdg “n tũud Sʋɩtãanã”?

¹⁶ D sã n tũud Biiblã saglse, na n sõng-d lame tɩ d tõog n da bas tɩ bũmb wa kɩt tɩ d bʋdg “n tũud Sʋɩtãanã” ye. Sagl-kãens kẽer a Poll sẽn kõ-d la woto: “Bɩ y maan Zusoabã tʋʋmd wʋsgo.” (1 Kor. 15:58) D sã n tʋmd Rĩungã tʋʋm wʋsgo, d pa na n yãt sẽk n yeebdẽ wall d maand yɛl a taab sẽn sãamd d sẽkã ye. Rẽ na n kɩtame tɩ d gil manesem kãensã fãa sẽn wat ne yɛl ninsã. (Mat. 6:33) A Poll yeela woto me: “Bɩ y gom sẽn yaa sõma sõngr yĩnga.” (Ef. 4:29) Yãk-y yam n da tol n kelg tẽnkãnem, la y ra yeelg-a me ye. * Modg-y n kɩs-y y tẽed-n-taasã sɩda, la y waoogd-ba. D sã n maand woto, d na n nong n gomda goam sẽn kengd d taabã raoodo, n da komsd b raood ye. A Poll yeelame me tɩ “ned kam fãa ges a meng yelle.” (1 Tes. 4:11) Yaa sɩd tɩ d tõe n gesa d taabã yell me,  la y segd n maanda rẽ ne waoogre, la y ra ningd-b yãnd ye. Tẽeg-y me tɩ d pa segd n modg d taabã tɩ b tũ tõnd tagsg n manes yɛl sẽn yaa bãmb mensã n segd n maneg ye.—Gal. 6:5.

17. a) Bõe yĩng t’a Zeova wilg tõnd yɛl kẽer d sẽn pa segd n tũ? b) A Zeova sẽn dat tɩ d tũ sor ningã wɛɛngẽ, bõe la yãmb yãk yam n na n maane?

¹⁷ Ad d sũy yaa noogo, a Zeova sẽn wilg-d bũmb nins d sẽn pa segd n tũ wã vẽenegã! La segdame tɩ d tẽeg me tɩ yaa a Zeova sẽn nong tõnd wʋsgã yĩng n kɩt t’a kõ-d sagls nins d sẽn paam sõs-kãngã pʋgẽ, la sẽn loog-a soabã pʋgẽ wã. A Sʋɩtãan sẽn teesd nebã soay ninsã tũub wata ne sũ-sãams la toogo. A Zeova ratame tɩ d põs rẽ fãa. Yaa sɩd t’a sẽn dat tɩ d rɩk sor ningã yaa bãanega, la baasgo, a sẽn debd zĩig ningã sõmblem ka to ye. Yaa vɩɩm sẽn kõn sa zĩigẽ. (Mat. 7:14) Woto yĩnga, bɩ d yãk yam n ket n tũud saglg ning a Zeova sẽn kõ-dã. A yeela woto: “Ad sore, bɩ y kẽne.”—Ezai 30:21.

[Tẽngr not rãmbã]

Y na n leokame tɩ bõe?

Sagl-bʋs la yãmb ned kam fãa paam vɛrse nins sẽn pʋgdã pʋsẽ?

• 2 Pɩɛɛr 2:1-3

• 1 Tɩmote 1:3, 4

• 1 Tɩmote 5:11-15

[Zãmsgã sogsgã]

[Zĩ-gũbri/Foto rãmba, seb-​neng 19]

No-kõbd b sẽn yelge

  Zʋɩf rãmbã kʋdem-wẽndẽ kibar n wilgd tẽnkãnem yelgr sẽn wat ne yell ningã. B sẽn wae n togsd kib-kãng to-to wã yaa toor-toore, la ad a sẽn yetã koɛɛg-koɛɛga.

Tẽng a ye pʋgẽ, rao n wa n yik n gilgd n sãamd tẽngã ned ning sẽn tar-a yam n yɩɩdã yʋʋre. La kaoosg zugẽ, tẽnkãn-nedã wa n mikame t’a sẽn maanã pa sõma, t’a babs yam soabã n na n tɩ kos sugri. A yeel-a lame t’a na n sak n maana bũmb ning fãa a sẽn segd n maan t’a kõ-a sugrã. La yam soabã kos-a-la bũmb a yembre: A yeela-a lame t’a tɩ rɩk zu-kʋka, n pusg-a n zuk no-kõbdã sẽn be a pʋgẽ wã n yelg tɩ tũ sebgã. Tẽnkãn-nedã pa wʋm a sẽn kos-a bũmb ningã võor sõma ye. La baasgo, a kẽng n tɩ maana woto n lebg n leb yam soabã nengẽ.

A sẽn ta, a soka woto: “Y kõ-m-la sugr masã bɩ”?

Tɩ yam soabã leok-a yaa: “Reng n lebg n tɩ tigs no-kõbdã fãa fo sẽn yelgã nanda.”

La raoã leok-a woto: “Sebgã sẽn dɩk no-kõbdã, m yɩta wãn n tõog n tigim-ba?”

Tɩ yam soabã yeel-a yaa: “Bɩ f bãng tɩ no-kõbd sebg sẽn dɩk tigsg sẽn yaa toog to-to wã, yell f no-goam sẽn sãam me manegr yaa toogo.”

Saglgã yaa vẽenega. Gomd sã n yi f noorẽ, a kokr lebga toogo, la a sẽn sãam yell ningã me manegr tõe n yɩɩ toogo. Nand tɩ d yelg tẽn-kãnem baa yaa bilfu, bɩ d tẽeg tɩ yaa wa no-kõbd d sẽn na n yelg tɩ sebg rɩke.

[Foto, seb-​neng 16]

Wãn to la kẽer tõe n bas tɩ sɩdã kɩɩsdb kẽ b zagsẽ?