“Esaki ta e kaminda, kana den dje.”​—ISA. 30:21.

1, 2. Kiko Satanas ta determiná pa hasi, i kon Beibel ta yuda nos?

SI UN bòrchi riba kaminda ta manda bo den direkshon robes, esei por ta peligroso, no ta bèrdat? Imaginá bo ku un amigu ta spièrta bo ku un hòmber malbado a kambia un bòrchi pasobra e ke pa hende pèrdè kaminda. Lo bo no hasi kaso di su spièrtamentu?

² Beibel ta papia di dos kaminda: un ku ta hiba na destrukshon i un ku ta hiba na bida eterno. Hopi hende ta riba kaminda pa destrukshon debí ku Satanas a gaña nan. Satanas ke gaña nos tambe. (Rev. 12:9) Tur e peligernan ku nos a papia di dje den e artíkulo anterior ta trampanan di Satanas pa pone nos desobedesé Yehova i bandoná e kaminda pa bida eterno. (Mat. 7:​13, 14) Pero nos a papia tambe tokante nos Amigu, Yehova Dios, ku ta spièrta nos di e trampanan di Satanas. Nos lo papia awor di tres trampa mas ku Satanas ta pone den nos kaminda pa desviá nos i nos lo mira kon Beibel ta yuda nos pa evitá nan. Ora nos ta lesa Beibel, ta komo si fuera Yehova ta kana tras di nos i ta bisa: “Esaki ta e kaminda, kana den dje.” (Isa. 30:21) I mas nos reflekshoná riba Yehova su spièrtamentunan, mas determiná nos lo bira pa hasi loke e ta bisa.

No Sigui ‘Maestronan Falsu’

3, 4. (a) Dikon maestronan falsu ta manera pos sin awa? (b) Di unda maestronan falsu ta bini, i kiko nan ke hasi?

³ Imaginá bo awor ku durante bo biahe bo tin ku pasa dor di un desierto. Bo tin set i leu ayá bo ta mira un pos. Bo ta bai na e pos, pero ora bo yega, bo ta ripará ku no tin awa den dje. Ki un desepshon! Nos por bisa ku maestronan falsu ta manera pos sin awa. I esnan ku ta pensa ku e maestronan ei tin e awa di e bèrdat lo keda desepshoná. Yehova ta spièrta nos tokante maestronan falsu mediante apòstel Pablo i Pedro. (Lesa Echonan 20:​29 i 30; 2 Pedro 2:​1-3.) Ken e maestronan falsu ta? E palabranan di Pablo i Pedro ta yuda nos komprondé di unda e maestronan falsu akí ta bini i kon nan ta gaña hende.

⁴ Pablo a bisa e ansianonan di e kongregashon na Efeso: “For di boso mes grupo lo lanta hende ku ta trose bèrdat.” (BPK) I Pedro a skirbi den un karta na algun kongregashon: “Lo tin tambe siñadónan falsu meimei di boso.” Pues, ta for di e kongregashonnan mes ta sali maestronan falsu, òf apóstatanan. * Kiko nan ke? Pablo a bisa ku nan ke “desviá e disipelnan,” esta e disipelnan di Hesukristu, pa nan tambe bandoná e organisashon di Yehova i “bai nan tras.” E maestronan falsu no ta bai buska disipel pafó di kongregashon sino den kongregashon mes. Hesus a bisa ku nan ta manera “lobo hambrá.” Apóstatanan ke kaba ku e fe di e miembronan di kongregashon pa nan tambe bai for di e bèrdat.​—Mat. 7:15; 2 Tim. 2:18.

5. Kon maestronan falsu ta gaña hende?

⁵ Kon maestronan falsu ta gaña hende? Wèl, nan ta hasi esei na un manera masha astuto. Apóstatanan ta trese nan ideanan den kongregashon na un manera “skondí,” meskos ku kontrabandista ta trese merkansia den un pais na un manera klandestino. Apóstatanan ta usa “palabranan di engaño,” òf argumentonan  falsu. Nan ke laga nan ideanan falsu parse bèrdat, meskos ku hende ku ta falsifiká dokumento ke laga nan dokumentonan parse real. Apóstatanan ta trose e bèrdat, splikando tekstonan bíbliko na un manera robes, pa mas tantu hende posibel kere nan “engañonan.” (2 Ped. 2:​1, 3, 13; 3:16) Nan no ta interesá den nos. Si nos bai nan tras, nos lo bandoná e kaminda ku ta hiba na bida eterno.

6. Ki spièrtamentu Beibel ta duna nos tokante maestro falsu?

⁶ Kon nos por protehá nos mes di maestronan falsu? Beibel ta bisa nos presis kiko pa hasi. (Lesa Romanonan 16:17; 2 Juan 9-11.) E Palabra di Dios ta bisa: “Apartá boso for di nan.” Un otro tradukshon ta bisa: “Keda leu for di nan!” Nos por kompará esaki ku e spièrtamentu ku un dòkter ta duna pa keda leu di un hende ku tin un malesa kontagioso. E sa ku lo bo muri si bo haña e malesa akí. Sin duda, lo bo hasi kaso di su spièrtamentu. Beibel ta bisa ku apóstatanan ta opseshoná ku pleitamentu; nan ta usa nan siñansa pa pone otro hende pensa meskos ku nan. (1 Tim. 6:​3, 4) Yehova ta manera e bon dòkter ei; E ta bisa nos pa keda leu di maestro falsu. Nos ta komprondé kiko e ke men, pero nos ta determiná pa hasi kaso di su spièrtamentu?

7, 8. (a) Kiko nos mester hasi pa evitá maestronan falsu? (b) Dikon bo ta determiná pa evitá maestro falsu?

⁷ Kiko nos mester hasi pa evitá maestronan falsu? Nos no ta papia ku nan ni laga nan drenta den nos kas. Nos no ta lesa nan bukinan, ni wak nan na televishon, ni lesa loke nan ta skirbi riba Internet ni agregá nos komentarionan riba nan website. Dikon nos ta asina determiná pa evitá nan? Na promé lugá, pasobra nos ta stima Yehova, e “Dios di bèrdat.” Pa e motibu akí, nos no ta interesá pa skucha siñansanan falsu ku ta kontradisí e bèrdat ku tin den e Palabra di Dios. (Sal. 31:5, BPK; Juan 17:17) Na di dos lugá, nos ta stima e organisashon ku Yehova ta usa pa siña nos e maravioso bèrdatnan. Ta Yehova su organisashon a siña nos tokante su nòmber i loke e ta nifiká, tokante su propósito p’e tera, loke ta sosodé ku nos ora nos muri i tokante e speransa di resurekshon. Bo ta kòrda kon kontentu bo tabata ora bo a siña e bèrdatnan presioso akí i otro bèrdatnan? P’esei no laga e mentiranan di maestronan falsu influensiá bo pa bai kontra e organisashon ku a siña bo tur e bèrdatnan akí.​—Juan 6:​66-69.

⁸ Ni maske kiko maestronan falsu bisa, nos lo no sigui nan! Nos no ta skucha hende ku ta manera pos sin awa! Esnan ku skucha nan lo keda desepshoná. Nos ta determiná pa keda leal na Yehova i na su organisashon. Su organisashon nunka no a desepshoná nos i semper a sasia nos set ku e awa puru di e bèrdat di e Palabra di Dios.​—Isa. 55:​1-3; Mat. 24:​45-47.

No Presta Atenshon na ‘Fábula’

9, 10. (a) Ki spièrtamentu tokante fábula Pablo a duna Timoteo? (b) Ki fábulanan Pablo tabatin na mente? (Wak nota na pia di página 17.)

⁹ Tin biaha ta fásil pa ripará ku un hende a  bira un bòrchi i ku esaki ta manda bo den direkshon robes. Pero tin biaha ta difísil pa ripará esei. Den kaso di Satanas su mentiranan ta meskos, tin bo ta rekonosé mesora pero otronan nò. Si nos no tene kuidou, fásilmente nos por kai den su trampanan. Apòstel Pablo ta spièrta nos pa un di e trampanan sutil di Satanas: “Fábulanan.” (Lesa 1 Timoteo 1:​3 i 4.) Kiko e fábulanan akí ta? I kon nos por evitá nan? Ta importante pa haña kontesta riba e preguntanan akí pa nos por keda riba e kaminda ku ta hiba na bida eterno.

¹⁰ Pablo a duna spièrtamentu tokante fábula den e promé karta ku el a skirbi Timoteo, un ansiano kristian. El a bisa Timoteo pa mantené e kongregashon limpi i pa yuda su rumannan keda leal na Yehova. (1 Tim. 1:​18, 19) E palabra griego ku Pablo a usa pa ‘fábula’ ta nifiká “mentira” òf “kuenta inventá.” E buki The International Standard Bible Encyclopaedia ta bisa ku fábula ta “un kuenta (religioso) ku no tin nada di haber ku realidat.” Podisé Pablo tabata pensa riba mentiranan religioso ku a bini di kuentanan bieu ku hende a inventá i ku a lanta kuriosidat. * Pablo a bisa ku ta peligroso pa bai tras di e fábulanan ei, ya ku nan ta lanta “pregunta pa investigashon.” (NW) Hende ku ta presta atenshon na fábulanan ta kuminsá hasi pregunta tokante kosnan ku no tin sentido i ta pèrdè nan tempu buskando kontesta. Satanas ta usa kuenta ku hende a inventá i mentira religioso pa kita hende su atenshon for di loke ta mas importante. Pablo su konseho ta bon kla: No presta atenshon na fábulanan!

11. Kon Satanas ta usa religion falsu pa gaña hende, i di ki spièrtamentu nos mester hasi kaso?

¹¹ Kua ta algun fábula ku nos mester tene kuidou kuné? Nos por bisa ku un fábula por ta kualke mito òf siñansa religioso ku ta bira nos “orea for di e bèrdat.” (2 Tim. 4:​3, 4) Di un manera astuto Satanas ta usa religion falsu pa gaña hende, i ta p’esei Beibel ta bisa ku e ta “disfrasá su mes komo un angel di lus.” (2 Kor. 11:14) Por ehèmpel, e religionnan di kristiandat ta bisa ku nan ta sigui Kristu, pero nan ta siña hende doktrinanan falsu manera Trinidat i fièrnu di kandela. Tambe nan ta siña hende ku alma ta sigui biba despues di morto. Hopi hende ta pensa ku Pasku di Nasementu i Pasku di Resurekshon ta agradá Dios, pero en realidat e kosnan ku hende ta hasi durante e selebrashonnan akí ta bini di religion falsu. Si nos hasi kaso di Dios su spièrtamentu pa separá nos mes di religion falsu i “no mishi ku loke ta impuru,” fábulanan lo no gaña nos.​—2 Kor. 6:​14-17.

12, 13. (a) Menshoná tres mentira di Satanas i splika dikon nan no ta bèrdat. (b) Kiko nos mester hasi si nos no ke pa Satanas gaña nos?

¹² Tin otro mentiranan di Satanas ku nos mester tene kuidou kuné. Laga nos papia riba tres di nan. E promé mentira ta: Bo por hasi kiko ku bo ke; abo ta disidí kiko ta bon i kiko ta malu. Medionan di komunikashon i e mundu di entretenimentu konstantemente ta promové e punto di bista inkorekto akí. P’esei ta fásil pa nos kuminsá pensa di e manera ei i sigui e ideanan inmoral di mundu. Pero, e bèrdat ta ku nos mester di Dios su guia pa nos por sa kiko ta bon i kiko ta malu. (Jer. 10:23) E di dos mentira ta: Dios lo no solushoná e problemanan di humanidat. E idea akí ta pone hende pensa pa awe so. Nos por kuminsá pensa meskos ku nan i bira ‘inútil òf keda sin duna fruta.’ (2 Ped. 1:8) E bèrdat ta ku Yehova pronto lo trese kambio riba tera, i e manera ku nos ta biba mester demostrá ku nos realmente ta kere esei. (Mat. 24:44) E di tres mentira ta: Dios no ta interesá den nos. Satanas ke pa nos kere ku Dios no ta stima nos pasobra nos no meresé su amor. Si nos bai tras di e mentira akí, nos lo por stòp di sirbi Yehova. E bèrdat ta ku Yehova ta stima kada un di su sirbidónan, i kada un di nan ta masha importante p’e.​—Mat. 10:​29-31.

 ¹³ Tur ora bai nos mester tene kuidou pa nos no pensa manera hende den e mundu di Satanas. Tin bes por parse ku loke nan ta bisa i pensa realmente ta bèrdat. Pero kòrda ku Satanas ke gaña nos, i e ta eksperto den esei. P’esei si nos no ke pa Satanas gaña nos ku fábulanan, nos mester hasi kaso di Beibel su spièrtamentunan.​—2 Ped. 1:16.

No “Sigui Tras di Satanas”

14. (a) Ki spièrtamentu Pablo a duna algun biuda hóben? (b) Dikon nos tur mester hasi kaso di e spièrtamentu ei?

¹⁴ Imaginá bo ku tin un bòrchi riba kaminda ku ta bisa: “Bira Aki pa Sigui Satanas.” Ta klaru ku ningun kristian lo no sigui e bòrchi ei. Pero tin biaha algun kristian berdadero ta “sigui tras di Satanas” sin ku nan sa. Pablo ta spièrta nos kon esei por sosodé. (Lesa 1 Timoteo 5:​11-15.) Aunke Pablo su palabranan tabata dirigí na algun ‘biuda hóben,’ tòg nos tur por siña for di loke el a bisa. E biudanan no a pensa ku nan tabata sigui Satanas, pero esei ta eksaktamente loke nan tabata hasiendo. Kon nos por hasi sigur ku esaki no ta pasa ku nos? Laga nos ban papia tokante un di e trampanan sutil di Satanas ku Pablo a spièrta hende tokante dje: hasimentu di redu.

15. (a) Kiko Satanas ke? (b) Kiko ta algun táktika ku Satanas ta usa pa pone nos hasi loke e ke?

¹⁵ Satanas no ke pa nos papia tokante nos kreensianan; e ke pa nos stòp di prediká e bon notisia. (Rev. 12:17) P’esei e ta purba influensiá nos pa hasi kosnan ku ta pone nos pèrdè tempu òf pleita ku otro. Pablo a menshoná algun di e táktikanan ku Satanas ta usa pa pone nos hasi loke e ke. Pablo a bisa ku algun biuda den su tempu tabata ‘kana pòrnada na kas di hende.’ Nos mester tene kuidou pa nos no hasi esei. Por ehèmpel, nos no mester pèrdè nos tempu ni pone otro hende pèrdè nan tempu na lesa i manda E-mail tokante kosnan ku no ta importante i ku tin biaha no ta bèrdat. Pablo a bisa tambe ku e biudanan tabata kana “hasi redu.” Esei ta peligroso pasobra redu por hiba na kalumnia, esta, mentira tokante otro hende. I mentira por kousa pleitu. (Pro. 26:20) Hende ku ta papia malu di otro hende ta sigui Satanas e Diabel, asta si nan no ta realisá esei. * Despues, Pablo a bisa ku e biudanan tabata “mete den asuntu di otro hende.” Ningun hende no tin derecho di bisa otro hende kiko pa hasi. Tur e tres táktikanan ku nos a kaba di menshoná por pone nos stòp di enfoká riba e trabou importante ku Yehova a duna nos. Nos mester usa nos tempu pa prediká tokante e Reino di Dios. Si nos stòp di prediká, nos ta kuminsá sigui Satanas. I si nos ta na banda di Satanas, nos ta kontra Yehova. Nos tur mester skohe na kua banda nos ke ta.​—Mat. 12:30.

16. Kiko nos mester hasi si nos no ke sigui Satanas?

¹⁶ Si nos hasi kaso di konseho bíbliko, nos lo no sigui Satanas. Pablo a duna algun konseho ku por yuda nos. El a bisa ku nos mester ‘abundá den e trabou di Señor.’ (1 Kor. 15:58) Ora nos ta traha duru pa Yehova, nos no tin tempu pa kosnan ku no ta importante i ku por perhudiká nos. (Mat. 6:33) Un otro konseho ku Pablo a duna nos ta pa papia tokante kosnan “ku ta bon pa edifikashon.” (Efe. 4:29) Nos no mester hasi redu ni skucha ora otronan ta hasi redu. * Nos mester konfia i respetá nos rumannan. Si nos hasi esei,  semper nos lo papia bon di nan. Pablo a bisa tambe kiko mester ta nos meta. El a bisa: “Atendé boso ku boso mes asuntu.” (1 Tes. 4:11) Mustra hende ku bo ta interesá den nan, pero ku rèspèt pa nan privasidat i nan dignidat. Kòrda ku nos no mester tuma desishon pa otro hende tokante kosnan ku nan mes mester disidí.​—Gal. 6:5.

17. (a) Dikon Yehova ta spièrta nos? (b) Kiko nos mester ta determiná pa hasi?

¹⁷ Nos ta gradisidu ku Yehova ta bisa nos bon kla kiko nos tin ku evitá! Nos mester kòrda semper ku Yehova ta duna nos e spièrtamentunan ku nos a trata den e dos artíkulonan akí pasobra e ta stima nos masha hopi mes. E no ke pa Satanas gaña nos i pone nos sufri. E kaminda ku Yehova ke pa nos skohe ta smal, pero e ta e úniko kaminda ku ta hiba na bida eterno. (Mat. 7:14) Semper nos mester ta determiná pa hasi kaso ora Yehova bisa nos: “Esaki ta e kaminda, kana den dje.”​—Isa. 30:21.

[Nota]

Kiko Ta Bo Kontesta?

Kon bo por mustra ku bo ta hasi kaso di e spièrtamentunan ku e siguiente tekstonan di Beibel ta kontené?

• 2 Pedro 2:​1-3

• 1 Timoteo 1:3 i 4

• 1 Timoteo 5:​11-15

[Preguntanan di Estudio]

[Kuadro/​Plachinan na página 19]

Redu Ta Manera Pluma den Bientu

Tin un kuenta hudiu bieu ku ta mustra kuantu daño redu ta hasi.

Tabatin un hòmber ku a kana hasi redu riba e hòmber mas sabí den su pueblo. Dado momento, e hòmber a realisá ku el a hasi malu i tabata ke pa e hòmber sabí pordon’é. P’esei el a puntra e hòmber sabí: “Kiko mi por hasi pa drecha e asuntu?” E hòmber sabí a bis’é: “Tin un kos ku bo por hasi. Kue un kusinchi di pluma, habrié i tira e plumanan den bientu.” Maske e no a komprondé dikon, tòg el a hasi loke e hòmber sabí a bis’é. Despues, el a bai bèk serka e hòmber sabí.

El a puntr’é: “Bo ta pordoná mi awor?”

E hòmber sabí a kontest’é: “Promé ku mi pordoná bo, bai i piki tur e plumanan.”

Pero e hòmber a bis’é: “Esei ta masha difísil, pasobra bientu a bai ku tur e plumanan. Mi no por haña nan mas.”

E hòmber sabí a bis’é: “Meskos ku bientu a bai ku tur e plumanan, loke bo a kana papia tambe a plama. I meskos ku bo no por haña e plumanan bèk, ta masha difísil pa bo pone hende lubidá loke bo a bisa.”

E lès ta bon kla: Unabes ku nos a bisa algu, nos no por hala nos palabranan atras. I tin bes ta imposibel pa drecha e daño ku nos a kousa. P’esei promé ku nos hasi redu, ta bon pa nos kòrda ku nos palabranan lo por plama manera pluma den bientu.

[Plachi na página 16]

Kon algun hende ta laga apóstatanan drenta den nan kas?