¿Kasukusunchu Jehová Diospa niwasqanchikkunata?

“Kaymi ñan, chayninta puriychik” (ISA. 30:21).

1, 2. ¿Imatam Satanasqa munanpuni, hinaspa imaynatam Bibliaqa yanapawanchik?

KAYPI piensasun: risqanchik ñanpi huk runawan tuparuchwan hinaspa qawachiwachwan pantay ñanninta rinapaq. Chay runata kasukuspaqa manam tiempollanchiktachu usuchisun, aswanmi wañuytapas tariruchwan. Ichaqa huk amistadninchikmi niwarqanchikña risqanchik ñanpi pitapas mana kasukunapaq, chay runaqa kamachisqam kachkan pantayman apawananchikpaq. Chaymi mana iskayrayaspa amistadninchikpa niwasqanchikta kasukunchik.

² ¿Pitaq kay rikchanachiypi chay runata kamachiqqa? Satanasmi, payqa munanpunim pantarunanchikta (Apo. 12:9). Munantaqmi wiñay kawsayman risqanchikmanta horqoruwananchikta, chaypaqmi servichikun ñawpaq estudiopi qawamusqanchikman hina 3 mana allin ruraykunata (Mat. 7:13, 14). Ichaqa allin Amistadninchik Diosqa willaruwanchikñam chaykunamantaqa. Diabloqa achka toqllakunataraqmi servichikun. Chaymi kunan qawasun 3 toqllankunamanta. Chaykunapi mana wichinapaq Bibliapa yachachiwasqanchikta yuyarispa, piensasun Jehová Dios qepanchikta rispan kayna niwasqanchikpi: “Kaymi ñan, chayninta puriychik”, nispa (Isa. 30:21). Allinmi niwasqanchikpi yuyaymanayqa, chaynapim kallpanchasqa tarikusun kasukunapaq.

Ayqekusun ‘llulla yachachiqkunamanta’

3, 4. a) ¿Imanasqam ninchik llulla yachachiqkunaqa chakisqa pozo hina kasqankuta? b) ¿Maymantam rikurimunku, hinaspa imatam munanku?

³ Kaqmanta rimasun illasqanchikmanta. Ichapas chaki pampanta rispa karumantaraq rikuruchwan huk pozota. Hinaspam yakunayawasqanchikrayku kallpachwan. Chayaruptinchikmi ichaqa pozoqa chaki kachkanman. Maynatachá hukmanyachwan ¿aw? Chaynallataqmi llulla yachachiqkunapas kanku, paykunaman Bibliamanta yachanankupaq lliw riqkunaqa hukmanyasqam qepanku. Chaymi Jehová Diosqa Pedrowan hinaspa Pablowan chaykunamanta willawanchik (leey Hechos 20:29, 30; 2 Pedro 2:1-3). Allinmi kanman niwasqanchikkunapi yuyaymanayqa, chaynapim reqsisun chay llullakuna pikuna kasqankuta, maymanta rikurimusqankuta hinaspa imayna pantachisqankutapas.

⁴ Pablom Efesopi ancianokunata nirqa: “Qamkuna ukumantam wakinkuna hatarinqa llullakunata yachachispanku”, nispa. Pedropas iñiqmasinkunatam nirqa: ‘Qamkuna ukupipas kanqam llulla yachachikuqkuna’, nispa. ¿Qawanchikchu maymanta rikurisqankuta? Yaqa llapanpim congregacion ukumanta. Chaymi apostata sutiwan reqsisqa kanku. * ¿Imatam paykunaqa munanku? Manamá Diospa llaqtanta saqesqankuwanqa hawkachu kanku. Aswanmi Pablopa nisqanman hina munanku “iñiqkuna qatinankuta”. Paykunaqa manamá Diospi mana iñiqkunatachu maskanku qatiqninkuna kanankupaqqa, aswanmi Cristopa qatiqninkunata. “Yarqasqa atoqkuna” hinam, congregacionpi kaqkunapa iñiyninkuta yanqacharuspan cheqap ñanmanta horqoruyta munanku (Mat. 7:15; 2 Tim. 2:18).

5. ¿Ima toqllakunatam servichikunku llulla yachachiqkunaqa?

⁵ ¿Imaynatataq pantachinku chay llulla  yachachiqkunaqa? Sacrellawanñam. Bibliaqa ninmi piensasqankuta ‘mana musyaylla’ congregacionman yaykuchisqankuta. Kayqa rikchakunmi mana musyaylla drogata ruraqkunaman. Chaymantapas, imaynam pantay qollqeta ruraqkunapas munanku chay qollqenkuta chaskinanchikta, chaynataqmi kay llulla yachachiqkunapas munanku pantay yachachisqankunata chaskinanchikta. Pedropas ninmi paykunaqa Bibliapi wakin textokunata ‘qewisqankuta’, chaynapi nisqankuwan tupananpaq (2 Ped. 2:1, 3, 13; 3:16). Paykunaqa manamá allinninchiktaqa munankuchu. Nisqankunata kasukuspaqa, wiñay kawsayman risqanchikmantam karunchakuruchwan.

6. ¿Ima kamachikuytam Biblia qowanchik llulla yachachiqkunamanta?

⁶ ¿Imaynatam paykunamanta cuidakuchwan? Diospa niwasqanchikta kasukuspam (leey Romanos 16:17; 2 Juan 9-11). Bibliaqa niwanchikmi Diospa llaqtanmanta lloqsispanku contranpi churakuqkunawan mana kuskanchakunapaq, otaq huk Bibliakunapa nisqanman hina karunchakunapaq otaq lluptikunapaq. ¿Imatam rurachwan runapa onqoynin mana rataykuwananchikpaq karunchakunapaq huk doctor niwaptinchik? Kasukuchwanchá. Diospas niwanchikmi llaqtanmanta lloqsispanku contranpi churakuqkunamanta karunchakunapaq, paykunaqa ‘muspaypi hina’ tarikuspankum nisqankunata kasukunanchikta munanku (1 Tim. 6:3, 4). Qawasqanchikman hinaqa Diospa niwasqanchikqa sutillamá kachkan, ichaqa ¿hinallachu kasukusun haykapipas?

7, 8. a) ¿Imakunata ruraspam llulla yachachiqkunamanta karunchakunchik? b) ¿Imanasqam llulla yachachiqkunamanta qamqa karunchakunki?

⁷ ¿Imakunata ruraspam llulla yachachiqkunamanta karunchakuchwan? Mana rimaykuspa hinaspa mana wasinchikman yaykuchispa. Manataqmi haykapipas uyarinchikchu televisionpi hinaspa Internetpi nisqankunataqa nitaq leenchikchu qellqankunatapas, nitaqmi nisqankunamantaqa Internetpi qellqanchikchu. ¿Imanasqam chayta ruranchik? Puntataqa Jehová Diosta kuyasqanchikraykum, payqa ‘cheqap Diosninchikmi’. Chaymi Bibliapa nisqanta qewispanku llulla nisqankutaqa, mana kaqpaqpas hapinchikchu (Sal. 31:5; Juan 17:17). Chaymantapas Diospa llaqtantam kuyanchik, chaypim yacharunchik Diospa sutintawan ima ninan kasqanta, kay Pachata Dios imapaq unanchasqanmanta, wañuqkuna imayna tarikusqankumanta hinaspa kawsarimuymantapas. ¿Yuyanchikchu imaynam tarikurqanchik kay sumaq yachachikuykunata chayllaraq uyarispa? Hinaptinqa, ¿imanasqamá Diospa llaqtanpa contranpi rimaqkunataqa uyarisun? Uyarispaqa paykuna hinachá kasun (Juan 6:66-69).

⁸ Chay llulla yachachiqkuna imataña niptinkupas, manamá kasusunchu. Paykunaqa chaki pozo hina kaspankum, hukmanyachikunku hinaspa pantachikunku. Ñoqanchikqa hinallamá Jehová Diosmanwan llaqtanmanpas hapipakusun, paykunam unay tiempoña  sumaqllaña cheqap yachachikuyta qowanchik (Isa. 55:1-3; Mat. 24:45-47).

‘Amayá kasusunchu cuentokunataqa’

9, 10. ¿Imamantam Pabloqa Timoteoman willarqa, hinaspa imamantam rimachkanman karqa ‘cuentokunamanta’ rimaspan? (Qaway willakuyta.)

⁹ Wakinpiqa chayllam musyakurunchik risqanchik ñanta huk lawman muyurachisqankuta. Wakinpiñataqmi mana. Chaynallataqmi Satanaspa toqllankunapas. Wakinqa sutillam, wakinñataqmi mana sutillachu kanku yanqa ‘cuentokuna’ hina (leey 1 Timoteo 1:3, 4). Wiñay kawsayman apaq ñanmanta mana lloqsinapaqqa, yachananchikmi chay cuentokuna ima kasqanta hinaspa mana pantarachiwananchikpaq ima ruranamantapas.

¹⁰ Chay yanqa cuentokunamanta karunchakunapaq willakuyqa tarikunmi Timoteoman Pablopa punta cartasqanpi. Chaypim Pabloqa Timoteota nin iñiqmasinkunata iñiyninkupi cuidananpaq hinaspa Diosman sonqo hinalla kanankupaq yanapananpaqpas (1 Tim. 1:18, 19). Griego rimaypi ‘cuentokuna’ ninanqa, yanqa otaq llulla willakuykunam. Ancha reqsisqa qellqapa nisqanman hinapas, chay rimaytaqa servichikunkum “umallankumanta horqosqa willakuykunata” rimanankupaq. Yaqapaschá Pabloqa rimachkarqa Diosmanta yanqa willakuykunata runakuna rikurichisqankumanta. * Payqa nirqam chay cuentokunaqa ‘yanqa atipanakuyllaman’ apasqanta. Chaykunata uyariqqa chaykunamantam tapukuyta qallarin, hinaptinmi yachayta munaspanku tiemponkuta usuchinku. Diosmanta kay yanqa willakuykunatam Satanasqa servichikun aswan allin kaqkunata runakuna mana maskanankupaq. Chaymi chaykunata qepanchanapaq Pablopa niwasqanchikta kasukunanchik.

11. ¿Imaynatam Satanasqa runakunata pantay religionkunawan pantachin, ima willakuymi yanapawasun chaykunapi mana wichinapaq?

¹¹ ¿Ima yanqa cuentokunam pantarachiwanchikman? Yaqa llapanpim Bibliawan mana tupaq llulla yachachikuykuna. ¿Imanasqam chaykunaqa mana allinchu? Bibliam nin chayrayku achka runakuna ‘cheqap kaq yachachikuykunamanta karunchakusqankuta’ (2 Tim. 4:3, 4). Satanasqa ‘achkirichkaq angel’ hinam pantay religionkunata servichikun runakunata pantarachinanpaq (2 Cor. 11:14). Pantay religionkunaqa cheqapta hinam yachachinku hukllapi kimsa dioskuna kasqanta, wañuspa hinalla kawsanamanta chaynataq infiernomantapas. Chaymantapas Navidad hinaspa Semana Santa fiestakunatam allinpaq hinata qawachinku, chaykunaqa hamun pantay religionkunamantam. Kaykunawan mana pantachisqa kanapaqmi Diospa kayna nisqanta kasukuna: “Paykunamantayá sapaqchakuychik” (2 Cor. 6:14-17).

12, 13. a) ¿Ima 3 llullakuykunatam Satanasqa cheqechichkan ichaqa imatam chaykunamanta nichwan? b) ¿Imatam rurananchik Satanaspa cuentonkunapi mana wichinapaq?

¹² Diabloqa pantachiwananchikpaqmi huk llullakuykunatapas rikurichin. Qawasun kimsa llullakuykunamanta. Ninmi: Ima munasqaykitapas ruray nispa. Chayta ruranapaqmi televisionpi, Internetpi hinaspa huk qellqakunapi qawaykunata servichikun, chaynapi Diospa kamachikuyninkunata qepanchanapaq. Ichaqa llapanchikmi necesitanchik imayna kawsanapaq Diospa yanapakuyninta (Jer. 10:23). Nintaqmi: Diosqa manam haykapipas runakunapa sasachakuynintaqa allichanqachu nispa. Kay llullakuymi runakunata tanqan imakunapipas afanakunankupaq. Chaynata kawsaspaqa iñiyninchikpim chiriyaruchwan (2 Ped. 1:8). Diospa piñakuynin punchawmi ichaqa chayaykamuchkanña, chaymi rikchan-rikchanlla kananchik (Mat. 24:44). Satanasqa nintaqmi: Diosqa manam yanapakunchu nispa. Kaywanmi Satanasqa munan Dios mana kuyawasqanchikta  piensananchikpaq, chaynapi hukmanyarunapaq. Diosmi ichaqa sapakamata kuyawanchik hinaspa chaninchawanchik (Mat. 10:29-31).

¹³ Ichaqa rikchan-rikchanllam kananchik. Mana chayqa runakunapa imayna tanteasqankutawan imayna kawsasqankutam allinpaq hapiruchwan. Chaymi kunanqa astawanraq kasukunanchik Bibliapa nisqankunata. Chayta ruraspallam llulla yachachiqpa yanqa ‘cuentokunapi’ mana wichisunchu (2 Ped. 1:16).

Ama ‘Satanastaqa qatisunchu’

14. ¿Imatam Pablo nirqa kallpanpiraq kaq viudakunata, hinaspa imanasqam kasukunanchik?

¹⁴ Kaqmanta rimasun illasqanchikmanta. Sichu risqanchik ñanpi huk runa niwanchikman: “Kay ñanqa Satanasta qatinapaqmi”, nispa. Manachá chay ñantaqa richwanchu, ¿aw? Ichaqa Pablom niwanchik, Diospa serviqninkunapas Satanastañam qatiyta qallaykunmanku cheqap ñanmanta karunchakuspanku (leey 1 Timoteo 5:11-15). Kaytaqa Pablom nichkarqa ‘kallpanpiraq kaq viudakunata’, ichaqa chay nisqanqa allinpunim llapallanchikpaq. Chay punta pachak watapi cristianakunaqa manachá piensarqakuchu Diablota qatisqankutaqa, ichaqa mana allin rurasqankunawanmi chayta qawachichkarqaku. Paykunaqa cuento qepim karqaku. Kaymanta Pablopa ima nisqantayá qawasun, yanapawasunmi Satanasta mana musyaylla qatisqanchikmanta cuentata qokunanchikpaq.

15. ¿Ima rurananchiktam Satanasqa munan, hinaspa ima toqllakunamantam Pablo willawanchik?

¹⁵ Satanasqa munanmi Diospa allin noticiankunamanta mana willakunanchikta (Apo. 12:17). Willakunanchikta mana munaspanmi, tukuyta ruran imapipas tiemponchikta usuchinapaq hinaspa rakinasqa kananchikpaqpas. Chaytam rurarqa punta pachak watapi viudakunawan. Pablopa nisqanman hinam Satanaspa achka toqllankunapi wichiykurqaku. Paykunaqa ‘mana imapas rurananku kaptinmi wasin-wasin purichkarqaku’. Kunanpas tiemponchiktawan hukkunapa tiemponkutapas usuchichwanmi, celularnintakama otaq Internetwan yanqa otaq iskayrayanapaq willakuykunata apachispa. Chaymantapas chay viuda cristianakunaqa ‘cuento qepim’ rikurirurqaku. Ñoqanchikpas yanqakunatam hukkunamanta rimayta qallaykuchwan, hinaspam kamiyta qallaykuspa piñanakuruchwan (Prov. 26:20). Musyakuspapas otaq manapas, cuento qepikunaqa Satanastam qatipakuchkanku. * Chaymantapas chay viudakunaqa hukkunapa vidankumanmi ‘chapukuqku’. Manamá pipas kanchikchu hukkunata vidankupi imata ruranankupaq ninanchikpaqqa. Kay 3 toqllakunamanta mayqanmanpas wichiykuspaqa, yanqakunapim tiemponchikta usuchichwan predicanamantaqa. Arí, sonqomanta predicayta saqeruspanchikqa Satanastam qatichkachwan (Mat. 12:30).

16. ¿Pablopa ima nisqankunam yanapawasun Satanasta mana qatinapaq?

¹⁶ ¿Imatam rurachwan Satanasta mana qatinapaq? Bibliapa nisqantam kasukuna. Qawasun iñiqmasinkunaman Pablopa ima nisqanta. Nirqam: “Aswan llamkaychik Señorpa rurayninpi”, nispa (1 Cor. 15:58). Tukuy sonqomanta Diospa munayninta ruraspaqa, manam tiemponchiktaqa yanqakunapiqa usuchisunchu (Mat. 6:33). Nirqataqmi: “Allin kaqkunallatayá rimaychik [. . .] wiñanankupaq”, nispa (Efe. 4:29). Manam hukkunamantaqa yanqakunata uyarinachu nitaq willakachakunachu. * Aswanmi kallpanchakuna  iñiqmasinchikkunamanta allinta piensanapaq. Manam sientichiq rimaykunataqa rimanachu, aswanmi kallpanchaq rimaykunata. Pabloqa ninraqmi: “Ocupakuychik imapas ruranaykichikpi”, nispa (1 Tes. 4:11). Hukkunata yanapayta munaspapas, manam vidankupiqa chaqrukunachu. Manataqmi paykunapa rantinpiqa tanteanachu (Gal. 6:5).

17. a) ¿Imanasqam Diosqa niwanchik imakuna mana ruranamanta? b) ¿Imatam hinalla rurana?

¹⁷ Anchatam kusikunchik imakunata mana ruranapaq Diospa niwasqanchikmanta. Chaymantam kaypi hinaspa ñawpaq yachachikuypi qawarqanchik. Ama qonqasunchu kuyawasqanchikrayku hinaspa Satanasta qatispa mana ñakarinanchikta munasqanrayku chaykuna niwasqanchikta. Yaqachá Diospa ñanninta riyqa sasa kanman, ichaqa wiñay kawsaymanmi apawanchik (Mat. 7:14). Chaynaqa, ama iskayrayaspayá kayna niwasqanchikta kasukusun: “Kaymi ñan, chayninta puriychik” (Isa. 30:21).

[Willakuykuna]

¿Ima niwaqtaq?

¿Imaynatam rurayman churawaq kay textokunapa nisqanta?

• 2 Pedro 2:1-3

• 1 Timoteo 1:3, 4

• 1 Timoteo 5:11-15

[Kay yachachikuypa tapukuyninkuna]

[19 kaq paginapi dibujokuna hinaspa recuadro]

 Wayraman puruta maqchispa

Judiokunapam kan huk willakuy cuento qepi kay mana allin kasqanmanta. Imaynanpataña willakuptinkupas kaynatam nin:

Huk runas llaqtapi yachaysapa runamanta yanqakunata willakusqa. Tiempopa risqanman hinam chay cuento qepi runaqa musyakururqa mana allin rurasqanmanta. Chaymi chay yachaysapa runaman rispan nirqa pampachaykunanpaq ima ruranamanta. Yachaysapa runañataqmi nirqa sanuata cuchillowan kichaspan ukunpi kaq purukunata wayraman maqchinanpaq. Hukmanyaruspanpas cuento qepi runaqa kasukurqamá. Rurarusqanmanta kutiramuspanmi yachaysapa runata nirqa:

—¿Pampachaykuwankiñachu?, nispa.

—Yachaysapa runañataqmi nirqa: Puntataqa lliw maqchisqayki purukunatam huñunayki, nispa.

—Cuento qepiñataqmi nirqa: ¡Chayqa manamá atikunmanchu! Wayram cheqerachinña, nispa.

—Yachaysapa runañataqmi nirqa: Chaynam mana atikunmanchu yanqa rimasqaykikunata allichaytaqa, nispa.

Kaytam yachachiwanchik: rimarusqanchiktaqa manañam kutichiyta atichwanñachu, manataqmi yaqa llapanpi allichaytaqa atichwanchu. Chaymi pimantapas manaraq rimachkaspa yuyarinanchik wayraman puruta maqchinapaq hinaña kasqanchikta.

[16 kaq paginapi dibujo]

¿Imaynatam Diospa llaqtanmanta lloqsiruspa contranpi churakuqkuna wasinchikman yaykuramunmanku?