Yu o gi yesi na den krin warskow fu Yehovah?

„Disi na a pasi. Waka na tapu, un pipel.”​—YES. 30:21.

1, 2. San Satan de nomonomo fu du, èn fa Gado Wortu e yepi wi?

A NO DE FU TAKI, dati te wan bigi bord e sori yu wan spesrutu pasi, aladi dati no de a yoisti pasi di yu musu teki, dan a sani dati kan kori yu èn a kan poti yu na ini problema tu. Kon meki wi taki dati wan mati warskow yu taki wan ogri-ati man fu espresi kenki wan bord di e sori sma sortu pasi den musu teki. Na ogri-ati man du dati fu di a wani du ogri nanga sma di e teki a pasi dati sondro taki den sabi san pasa. Yu ben o gi yesi na a warskow dati?

² A no de fu taki dati Satan na wan ogri-ati feanti di de nomonomo fu tyari wi go na tapu wan pasi di no bun (Openb 12:9). Na ini na artikel na fesi wi ben taki fu difrenti sani di kan abi krakti na wi tapu. Soleki fa wi kon si, dan ala den sani dati e komoto fu Satan, èn a e gebroiki den fu hari wi puru na a pasi di e tyari wi go na têgo libi (Mat. 7:13, 14). Wi de nanga tangi taki wi lobi-ati Gado e warskow wi fu no poti prakseri na den agersi bord di Satan e poti na pasi fu kori wi. Wi sa poti prakseri now na ete dri fu den sani di Satan e gebroiki fu kori wi. Te wi sa luku fa Gado Wortu e yepi wi fu no fadon na ini den trapu fu Satan, dan a bun te wi e prakseri taki Yehovah e waka na wi baka èn taki a e sori wi a yoisti pasi. Iya, a musu de neleki a e taigi wi: „Disi na a pasi. Waka na tapu, un pipel” (Yes. 30:21). Te wi e prakseri den krinkrin warskow di Yehovah gi wi, dan dati sa gi wi moro deki-ati fu gi yesi na den.

No waka baka „falsi leriman”

3, 4. (a) Fu san ede falsi leriman de leki drei peti? (b) Fu pe falsi leriman e komoto nofo tron, èn san den wani?

³ Kon meki wi taki dati yu e teki waka na ini wan drei sabana. Fu farawe yu e si wan peti, èn yu e waka go na en fu di yu e howpu taki yu sa feni pikinso watra fu dringi. Ma te yu e doro na a peti, dan yu e si taki a drei. A no de fu taki dati a sani disi o hati yu srefisrefi! Falsi leriman de leki drei peti. Iniwan sma di e go na den fu suku a watra di e prenki den tru leri fu Bijbel, no sa feni san a ben fruwakti. Nanga yepi fu den apostel Paulus nanga Petrus, Yehovah e warskow wi gi falsi leriman. (Leisi Tori fu den Apostel 20:29, 30; 2 Petrus 2:1-3.) Suma na den leriman dati? Den sani di den tu apostel disi skrifi nanga yepi fu santa yeye, o yepi wi fu kon frustan fu pe den falsi leriman disi komoto, èn fa den e wroko.

⁴ Paulus ben taigi den owruman na ini a gemeente fu Efeise: „Sma sa opo na un mindri, èn den sa taki kruktu sani.” Petrus ben skrifi disi gi den Kresten: „Falsi leriman o de tu na un mindri.” Sobun, fu pe den falsi leriman e komoto? A kan taki den e komoto fu inisei fu a gemeente. Den sma disi fadon komoto na bribi. San den wani? A no sari gi den taki den gowe libi na organisâsi di kande den ben lobi fosi. Paulus e sori taki den sma disi wani „hari den disipel kon na den baka”. Luku taki Paulus ben taki fu „den disipel”. Na presi taki den sma disi di fadon komoto na bribi e go suku fu meki den eigi disipel, den e pruberi fu hari den disipel fu Krestes go na den baka. Neleki „ogri busidagu”, den falsi leriman disi e suku fu kori reti-ati memre fu a gemeente, soso fu pori a bribi fu den èn fu meki den drai baka gi a tru bribi.​—Mat. 7:15; 2 Tim. 2:18.

5. Fa falsi leriman e pruberi fu kori sma?

⁵ Fa falsi leriman e wroko? Den e wroko na wan triki fasi. Den sma di fadon komoto na  bribi e panya den falsi leri fu den „na wan kibri fasi”. Den de leki sma di e tyari sani kibrikibri kon na ini wan kondre, fu di den e handri na wan bedrigifasi, èn safrisafri den e tyari falsi leri kon na ini a gemeente. Èn neleki fa wan koni bedrigiman e pruberi fu kori sma nanga falsi papira, na so wan sma di fadon komoto na bribi, e gebroiki „falsi tori” fu kori sma. Den sma disi e panya „falsi leri” èn na so den e ’drai den sani di skrifi na ini Gado Buku’ soso fu meki sma bribi den sani di den e taki (2 Petr. 2:1, 3, 13; 3:16). A de krin taki sma di fadon komoto na bribi no abi a bun fu wi na prakseri. Te wi ben o waka na den baka, dan seiker dati ben o puru wi fu a pasi di e tyari wi go na têgo libi.

6. Sortu krin rai Bijbel e gi wi te a abi fu du nanga falsi leriman?

⁶ Fa wi kan kibri wisrefi gi falsi leriman? Bijbel e gi krin rai di e sori wi fa wi musu handri nanga den sma disi. (Leisi Romesma 16:17; 2 Yohanes 9-11.) Gado Wortu e taki: „No bumui nanga den.” Tra Bijbel vertaal den wortu disi nanga „wai pasi gi den”, „tan farawe fu den”, èn „no moksi nanga den!” A no de fu taki dati a rai disi na krin rai. Kon meki wi taki dati wan datra e taigi yu fu tan farawe fu wan sma di abi wan takru siki di trawan kan kisi makriki. Yu ben o frustan san a datra wani taigi yu, èn seiker yu ben o gi yesi na a warskow fu en. We, sma di fadon komoto na bribi ’lobi poti aksi di e tyari trobi kon èn den lobi haritaki fu wortu ede’. Den wani kori trawan fu bribi den leri fu den di no e kruderi nanga Bijbel (1 Tim. 6:3, 4). Yehovah, a Bigi Datra, e taigi wi fu wai pasi gi den sma dati. Wi e frustan san a e taigi wi. Ma wi abi a fasti bosroiti fu gi yesi na a warskow dati ala ten?

7, 8. (a) San a wani taki fu wai pasi gi falsi leriman? (b) Fu san ede yu abi a fasti bosroiti fu no waka baka falsi leriman?

⁷ San a wani taki fu wai pasi gi falsi leri? Wi no e kari den kon na ini wi oso, èn wi no e gi den odi. Wi e weigri tu fu leisi den publikâsi fu den, wi no e luku telefisi programa di abi fu du nanga den, wi no e go leisi sani na tapu den Web site fu den, èn wi no e gi piki tapu den sani di den e skrifi tapu den Web site dati. Fu san ede wi abi a fasti bosroiti disi? Fu di wi abi lobi. Wi lobi „a Gado di no e fruteri lei” èn fu dati ede wi no e poti parkseri na falsi leri di no e kruderi nanga den tru leri di de na ini a Wortu fu en (Ps. 31:5; Yoh. 17:17). Wi lobi Yehovah en organisâsi tu di leri wi tumusi moi tru tori, soleki a nen fu Yehovah èn san a nen dati wani taki. Wi leri tu san a abi na prakseri fu du nanga grontapu, san na a situwâsi fu den dedewan, èn taki den dedewan o kisi wan opobaka. Yu kan memre fa yu ben e firi di yu kon sabi den tumusi moi tru tori disi? We dan, fu san ede yu ben o gi pasi taki wan sma di e krutu na organisâsi di leri yu den tru tori disi, meki yu lasi bribi?​—Yoh. 6:66-69.

⁸ Awansi san falsi leriman e taki, wi no sa waka na den baka! Fu san ede yu ben o go na drei peti, soso fu si taki nowan watra de na ini? A sani dati ben o hati yu, a no so? Na presi fu dati, meki wi abi a fasti bosroiti fu tai hori na Yehovah èn na a organisâsi di langa ten kaba e gi wi  watra di soifri èn di e gi wi krakti baka. Iya, a watra disi na den tru tori fu Gado Wortu di skrifi nanga yepi fu santa yeye.​—Yes. 55:1-3; Mat. 24:45-47.

No poti prakseri na „leitori”

9, 10. Sortu warskow Paulus gi Timoteyus te a abi fu du nanga „leitori”? San Paulus ben kan abi na prakseri? (Luku sosrefi a futuwortu.)

⁹ Son leisi, a makriki fu si taki sma kenki wan bord di e sori sma a pasi. Kande a bord dati e sori sma fu teki wan pasi di no de a yoisti wan. Ma tra leisi baka, a kan muilek fu si efu sma kenki a bord. Na so Satan e pruberi fu kori wi tu. Son leisi wi kan si dati makriki, ma tra leisi baka, a muilek fu si. Na apostel Paulus e warskow wi gi wan fu den sani di Satan e gebroiki fu kori wi. Dati na „leitori”. (Leisi 1 Timoteyus 1:3, 4.) Efu wi no wani komoto fu a pasi di e tyari wi go na têgo libi, dan wi musu kon sabi san na leitori. Wi musu kon sabi tu fa wi kan sorgu taki wi no e poti prakseri na den tori disi.

¹⁰ Paulus ben gi den Kresten a warskow disi fu no poti prakseri na leitori, di a ben skrifi a fosi brifi gi Timoteyus, wan Kresten owruman. Timoteyus ben abi a frantwortu fu sorgu taki a gemeente tan krin, èn a ben musu yepi den Kresten brada nanga sisa fu en fu tan gi yesi na Gado (1 Tim. 1:18, 19). Paulus gebroiki wan Griki wortu di kan abi fu du nanga wan anansitori, noso wan lei. Soleki fa wan buku e taki, dan a wortu disi abi fu du nanga „wan kerkileri di no tru” (The International Standard Bible Encyclopaedia). Kande Paulus ben abi den falsi kerkileri na prakseri di komoto fu fositen tori di sma srefi meki. * A wan-enkri sani di den tori dati e du, na taki den e gi sma deki-ati fu go ondrosuku sani fu soso. A moro bigi bedrigiman, Satan, e gebroiki falsi tori fu kori sma di no de na ai. A e gebroiki falsi kerkileri fu puru den sma disi na tapu a yoisti pasi. A rai di Paulus e gi wi de krin: No poti prakseri na leitori!

11. Fa Satan gebroiki falsi bribi na wan koni fasi fu kori sma? Èn na sortu warskow wi musu gi yesi fu sorgu taki Satan no e kori wi?

¹¹ San na wan tu falsi tori di kan kori den wan di no de na ai? Fu taki en leti, a wortu „leitori” kan abi fu du nanga iniwan falsi kerkileri noso anansitori di kan meki wi drai baka gi a tru bribi (2 Tim. 4:3, 4). Satan, di e du neleki en na „wan engel fu leti”, gebroiki falsi bribi na wan koni fasi fu kori sma (2 Kor. 11:14). Den kerki fu Krestenhèit di e du neleki den e waka baka Krestes, e leri sma falsi leri soleki a Dri-wánfasi, nanga helfaya. Den e leri sma tu taki a sili no man dede. Den falsi leri dati na soso anansitori nanga lei. Krestenhèit e gi sma deki-ati tu fu hori fesa soleki Kresneti nanga Pasen. Fu taki en leti, den gwenti disi di gersi bun gwenti, e komoto fu anansitori nanga heiden bribi. Te wi e gi yesi na a warskow di Gado e gi wi fu hori wisrefi aparti fu den sani disi èn fu „no fasi den sani moro di no krin”, dan wi no sa bribi leitori.​—2 Kor. 6:14-17.

12, 13. (a) Sortu lei Satan e panya, èn san tru te a abi fu du nanga ibriwan fu den lei dati? (b) Fa wi kan sorgu taki Satan no e kori wi nanga den leitori fu en?

¹² Satan kon nanga tra lei di kan kori wi te wi no de na ai. Luku wan tu eksempre. Du san yu wani. Yusrefi kan bosroiti san bun noso san fowtu. Na a denki disi sma e panya nanga yepi fu radio, telefisi, nanga Internet. A fowtu denki disi di sma abi fu den markitiki fu Gado, e gi wi deki-ati fu tyari wisrefi soleki fa wisrefi wani. Ma fu taki en leti, wi abi rai fanowdu di e sori wi san na a yoisti fasi fu libi, èn na Gado wawan man gi wi a rai dati (Yer. 10:23). Gado no sa tyari wan kenki kon na ini den afersi fu libisma. Te wi abi a denki disi di e gi sma deki-ati fu no broko den ede nanga a tamara, dan dati kan meki taki wi e tron sma di „no e du noti èn di no e meki froktu” (2 Petr. 1:8). San tru, na taki a dei fu Yehovah de krosibei, èn wi musu tan fruwakti a dei dati (Mat. 24:44). Gado no e broko en ede nanga yu. Te wi e bribi a lei disi di e komoto fu Satan, dan  dati kan meki taki wi tapu fu dini Gado, fu di wi feni taki wi no warti taki Gado lobi wi. Ma fu taki en leti, Yehovah lobi ibriwan fu den anbegiman fu en, èn a e warderi den tu.​—Mat. 10:29-31.

¹³ Wi musu tan na ai, fu di a ben kan gersi leki a denki fu a grontapu fu Satan na a yoisti denki. Ma hori na prakseri taki Satan na wan bigi bedrigiman. Na soso te wi e gi yesi na den rai na ini Gado Wortu, dan wi o man sorgu taki Satan no e kori wi nanga yepi fu ’leitori di ensrefi meki’​—2 Petr. 1:16.

No „waka na baka Satan”

14. Sortu warskow Paulus gi yongu uma di ben lasi den masra na ini dede? Fu san ede wi alamala musu gi yesi na a warskow fu en?

¹⁴ Kon meki wi taki dati wan bord de na sei pasi èn na tapu a bord dati skrifi: „A pasi fu Satan.” Suma ben o teki a pasi dati? Toku Paulus e warskow wi gi difrenti sani di kan meki taki Kresten di e dini Gado fayafaya, e ’drai gowe fu waka na baka Satan’. (Leisi 1 Timoteyus 5:11-15.) A tru taki Paulus ben skrifi den sani disi fu warskow spesrutu den ’yongu uma di ben lasi den masra na ini dede’. Ma den gronprakseri disi fiti gi wi alamala. Kande den Kresten uma fu a fosi yarihondro no ben e denki taki den ben e waka na baka Satan, ma den sani di den ben e du ben e sori taki dati ben de so. Fa wi kan luku bun taki wi no e waka na baka Satan sondro fu wi sabi? Meki wi go luku a warskow di Paulus e gi wi fu no taki ogri fu trawan.

15. San Satan wani du, èn fa Paulus e tyari den triki fu Satan kon na krin?

¹⁵ Satan wani pori a bribi fu wi, iya, a wani taki wi musu tapu fu preiki a bun nyunsu (Openb. 12:17). Fu dati ede a e pruberi fu meki wi du sani di kan meki wi lasi ten, noso di kan tyari prati kon na wi mindri. Luku fa Paulus e tyari kon na krin fa Satan e pruberi fu kori sma. A ben taki fu: ’Sma di no abi noti fu du èn di e waka e go na sma oso.’ Na ini a ten disi pe furu sma man go tapu Internet, a kan pasa makriki taki wi du sani di e meki wi lasi wi eigi ten èn a di fu trawan. Fu eksempre, kande wi e seni lawlaw boskopu gi sma, noso kande wi e seni e-mail srefi gi den di abi fu du nanga tori di no tru. „Konkruman”. Te sma e taki ogri fu trawan, dan dati kan meki taki den e pori sma nen, èn nofo tron a sani dati e tyari prati kon (Odo 26:20). Awansi den sma disi sabi, noso awansi den no sabi, fu taki en leti den e teki na eksempre fu Satan Didibri. * ’Sma di e bumui nanga tra sma tori.’ Wi no abi a reti fu fruteri trawan fa den musu libi. Te wi e du den sani disi di e meki wi lasi ten èn di e tyari problema kon, dan dati kan puru wi prakseri fu a wroko di wi kisi fu preiki a bun nyunsu fu a Kownukondre. Te wi e tapu fu teki prati na a wroko fu Yehovah, dan wi e bigin waka baka Satan. Tra fasi no de.​—Mat. 12:30.

16. Na sortu rai wi musu gi yesi efu wi no wani ’drai gowe fu go waka na Satan baka’?

¹⁶ Te wi e gi yesi na a rai di Bijbel e gi, dan dati kan yepi wi fu no ’drai gowe fu go waka na Satan baka’. Luku wan tu koni rai di Paulus e gi wi: „Abi furu fu du na ini a wroko fu Masra” (1 Kor. 15:58). Te wi e tan teki prati na Kownukondre afersi, dan wi no sa du sani di o meki wi lasi ten, èn wi no sa kisi takru bakapisi (Mat. 6:33). „Taki sani di bun, so taki unu kan gi sma deki-ati” (Ef. 4:29). Abi a fasti bosroiti fu no arki sma di e fruteri ogri-ati lei fu trawan, èn no panya den tori dati tu. * Leri fu frutrow èn fu lespeki yu Kresten brada nanga sisa. Na so wi o kisi a gwenti fu taki sani di e bow trawan, na presi taki wi e broko  den saka. ’Du muiti fu bumui nanga un eigi tori’ (1 Tes. 4:11). Poti prakseri na tra sma, ma sorgu taki yu no e bumui na ini den tori, èn sori lespeki gi den. Hori na prakseri tu taki wi no musu dwengi trawan fu denki leki wi te a abi fu du nanga afersi pe den musu teki den eigi bosroiti.​—Gal. 6:5.

17. (a) Sortu warskow Yehovah e gi wi, èn fu san ede? (b) Sortu fasti bosroiti yu abi te a abi fu du nanga a pasi di Yehovah wani wi fu teki?

¹⁷ A no de fu taki dati wi de nanga tangi taki Yehovah e taigi wi krin sortu sani wi no musu du! Ma noiti wi no musu frigiti taki den rai fu Yehovah di wi luku na ini na artikel disi èn na ini a wan na fesi, na warskow di a gi wi fu di a lobi wi trutru. A no wani taki wi e teki den pasi fu Satan di sa tyari wi go lasi, fu di dati ben o tyari soso sari kon gi wi. A pasi di Yehovah wani taki wi musu teki, na wan smara pasi, ma a e tyari wi go na a moro bun presi, èn dati na têgo libi (Mat. 7:14). Meki wi noiti no tweifri fu gi yesi na a rai disi di Yehovah e gi wi: „Disi na a pasi. Waka na tapu.”​—Yes. 30:21.

[Futuwortu]

San yu ben sa piki?

Fa yu kan gi yesi na den warskow di de na ini den Bijbeltekst disi?

• 2 Petrus 2:1-3

• 1 Timoteyus 1:3, 4

• 1 Timoteyus 5:11-15

[Aksi fu a tori disi]

[Faki/​Prenki na tapu bladzijde 19]

 Te winti e tyari fowru wiwiri gowe

Wan owru Dyu tori e sori krin sortu takru bakapisi a e tyari kon te wi e fruteri ogri-ati lei fu trawan. A tori disi fruteri na difrenti fasi, èn a e taki so:

Wan man ben e waka lontu na ini wan foto e fruteri lei fu wan koniman di ben e tan drape. Bakaten, na ogri-ati leiman disi kon si taki san a du no bun, èn a go na a koniman fu aksi en pardon. A taigi a koniman taki a ben o du iniwan sani fu meki sani bun baka nanga en. A koniman taigi en fu du wán sani nomo. A taigi a leiman taki a ben musu teki wan kunsu di ben lai nanga fowru wiwiri, a ben musu koti en opo, èn a ben musu fringi den wiwiri meki winti tyari den gowe. Aladi a leiman no ben man frustan fu san ede a koniman ben taigi en a sani dati, toku a du san a ben aksi fu en, èn a go baka na a koniman.

A aksi en: „Yu gi mi pardon now?”

A koniman piki en: „Go piki ala den wiwiri fosi.”

A man aksi en: „Ma fa mi o du dati? A winti tyari ala den wiwiri gowe.”

A koniman piki en: „Neleki fa a muilek fu feni ala den wiwiri, na a so a muilek tu fu krin mi nen baka.”

Wi e frustan krin san a tori disi e leri wi. Te wi taki wan sani, dan wi no o man teki den wortu dati baka, èn wi no o man puru a sari di den wortu fu wi tyari kon gi wan sma. Fosi wi e panya wan tori, dan wi musu hori na prakseri taki kande wi o fringi fowru wiwiri meki winti tyari den gowe.

[Prenki na tapu bladzijde 16]

Fa son sma e kari sma di fadon komoto na bribi kon na ini den oso?