Ita sei halo tuir Jeová nia avizu ka lae?
Ita sei halo tuir Jeová nia avizu ka lae?
“Ida-neʼe mak dalan. Imi laʼo tuir nia bá.”—ISA 30:21.
1, 2. Saida mak Satanás hakarak atu halo? Oinsá mak Maromak nia Liafuan bele ajuda ita?
KUANDU ita halo viajen no haree sinál ida iha dalan neʼebé hatudu ba diresaun sala, ida-neʼe bele halo ita laʼo sala dalan no mós bele sai perigu mai ita. Hanoin toʼok katak ita-nia belun ida fó avizu mai ita kona-ba ema aat ida neʼebé muda sinál neʼe tanba hakarak halo aat ema. Ita sei halo tuir ninia avizu ka lae?
2 Satanás nuʼudar ita-nia inimigu hakarak lohi ita atu laʼo iha dalan neʼebé sala. (Apok 12:9) Perigu hotu neʼebé ita koʼalia iha lisaun kotuk mai husi Satanás, no ninia hakarak mak atu halo ita sees husi dalan neʼebé lori ita ba moris rohan-laek. (Mt 7:13, 14) Maibé, Maromak nuʼudar ita-nia Belun fó avizu mai ita atu labele tuir Satanás nia ‘sinál sira iha dalan’. Nuneʼe, mai ita koʼalia kona-ba perigu tolu tan neʼebé mai husi Satanás no oinsá Maromak nia Liafuan bele ajuda ita atu la husik Satanás lohi ita. Kuandu ita lee Maromak Jeová nia avizu sira iha ninia Liafuan, ida-neʼe hanesan nia laʼo iha ita-nia kotuk atu hatudu mai ita dalan saida mak ita tenke laʼo, hodi dehan: “Ida-neʼe mak dalan. Imi laʼo tuir nia bá.” (Isa 30:21) Hodi hanoin didiʼak kona-ba Jeová nia avizu, ida-neʼe sei hametin ita-nia hakarak atu halo tuir nia.
Labele tuir “mestre bosok sira”
3, 4. (a) Oinsá mak mestre bosok sira hanesan bee-posu maran? (b) Mestre bosok sira dala ruma mai husi neʼebé, no saida mak sira-nia hakarak?
3 Hanoin toʼok katak ita laʼo iha rai-maran fuik no ita hamrook tebes. Ita haree husi dook iha bee-posu ida, no ita laʼo besik atu hetan bee. Maibé, kuandu ita toʼo bee-posu neʼe, ita haree katak maran. Ita la kontente duni! Lia-loos hanesan bee, no mestre bosok hanesan bee-posu neʼebé maran. Nuneʼe, ema neʼebé buka sira atu hetan bee lia-loos nian sei la kontente tanba sira la iha lia-loos. Liuhusi apóstolu Paulo no Pedro, Maromak Jeová fó avizu mai ita kona-ba mestre bosok sira. (Lee Apostolu 20:29, 30; 2 Pedro 2:1-3.) Sé mak mestre bosok sira-neʼe? Paulo no Pedro nia liafuan ajuda ita atu hatene mestre bosok sira-neʼe mai husi neʼebé no oinsá mak sira lohi ema.
4 Hodi koʼalia ba katuas sira iha kongregasaun Éfeso, Paulo hatete: “Husi imi rasik, ema balun sei hamriik hodi hateten buat aat oioin.” Pedro mós koʼalia ba ninia maluk kristaun hodi dehan: “Sei iha mós mestre bosok sira iha imi leet.” Nuneʼe, mestre bosok sira-neʼe mai husi neʼebé? Dala ruma, sira mai husi kongregasaun laran. Ema sira-neʼe uluk tuir lia-loos maibé ikusmai kontra lia-loos. Sira-nia hakarak mak saida? Sira-nia hakarak laʼós deʼit atu husik organizasaun neʼebé uluk sira hadomi, maibé hanesan Paulo esplika, mestre bosok sira-nia hakarak mak “atu dada sai eskolante sira ba sira-nia sorin” hodi hadau Kristu nia dixípulu sira husi kongregasaun laran. Jesus hatete katak sira hanesan “asu-fuik neʼebé kaan-teen” no hakarak han bibi sira. Nuneʼe, mestre bosok sira-nia hakarak mak atu halakon ema kristaun nia fiar no atu halo sira husik lia-loos.—Mt 7:15; 2 Tim 2:18.
5. Oinsá mak mestre bosok sira lohi ema?
5 Oinsá mak mestre bosok sira lohi ema? Sira halo ida-neʼe ho matenek. Hanesan ema neʼebé lori tama sasán subasubar hodi la tuir lei, mestre bosok sira mós ‘subasubar lori mai hanorin aat’. Sira habelar ideia ka “hanorin laloos” hodi uza “eskritura” tuir deʼit sira rasik nia hanoin. (2 Ped 2:1, 3, 13; 3:16) Ida-neʼe hatudu ho klaru katak sira lakohi ita atu tuir buat neʼebé loos. Maibé, se ita tuir sira, ita sei sees husi dalan neʼebé lori ba moris rohan-laek.
6. Bíblia fó konsellu saida kona-ba mestre bosok sira?
6 Oinsá mak ita bele proteje ita-nia an husi mestre bosok sira? Bíblia hatete ho klaru saida mak ita presiza halo. (Lee Roma 16:17; 2 Joao 9-11.) Maromak nia Liafuan hatete atu ita “hadook an husi sira”. Tradusaun Bíblia seluk tradús liafuan neʼe nuʼudar “sees an husi sira”, no “fila kotuk ba sira”. Nuneʼe, Bíblia nia konsellu neʼe klaru tebes. Hanoin toʼok katak doutór hatete ba ita atu hadook an husi ema neʼebé iha moras neʼebé bele hadaʼet ba ema seluk no bele oho ema. Ita sei halo tuir duni buat neʼebé doutór hatete. Mestre bosok sira hanesan ema moras neʼe, no Bíblia hatudu katak sira buka atu hadaʼet sira-nia hanorin falsu ba ema kristaun. (1 Tim 6:3, 4) Maromak Jeová nuʼudar ita-nia Doutór Boot hatete mai ita atu hadook an husi sira. Tan neʼe, mai ita nafatin halo tuir ninia avizu.
7, 8. (a) Saida mak ita presiza halo atu bele hadook an husi mestre bosok sira? (b) Tansá mak ita foti desizaun atu hadook an husi sira?
7 Saida mak ita presiza halo atu bele hadook an husi mestre bosok sira? Ita labele simu sira iha ita-nia uma ka kumprimenta sira. Ita mós lakohi atu lee sira-nia livru, haree sira-nia programa iha televizaun, ka lee informasaun kona-ba sira iha internét. Tansá mak ita foti desizaun metin hanesan neʼe? Ulukliu hotu, tanba ita hadomi “Maromak lia-loos nian”. Tan neʼe, ita lakohi rona ba hanorin falsu neʼebé kontra lia-loos iha Maromak nia Liafuan. (Sal 31:5; Joao 17:17) Ita mós hadomi Maromak Jeová nia organizasaun neʼebé hanorin ita lia-loos neʼebé furak tebes, hanesan Jeová nia naran no ninia naran nia arti, Maromak nia hakarak ba mundu neʼe, saida mak akontese ba ema neʼebé mate, no esperansa kona-ba moris-hiʼas. Ita sei hanoin-hetan ka lae oinsá ita sente kuandu ita foin aprende kona-ba lia-loos sira-neʼe? Nuneʼe, mai ita la husik mestre bosok sira halo ita kontra ita-nia organizasaun neʼebé hanorin ita lia-loos sira-neʼe.—Joao 6:66-69.
8 Buat naran deʼit neʼebé mestre bosok sira hatete, ita sei la rona sira! Ita lakohi tuir ema neʼebé hanesan bee-posu neʼebé maran. Entaun, mai ita nafatin laran-metin ba Jeová no ba ninia organizasaun neʼebé sempre fó mai ita bee lia-loos nian neʼebé moos husi Maromak nia Liafuan.—Isa 55:1-3; Mt 24:45-47.
Labele tuir “doutrina neʼebé laloos”
9, 10. Avizu saida mak Paulo fó ba Timóteo kona-ba “doutrina neʼebé laloos”? Kuandu Paulo temi liafuan neʼe, nia hanoin kona-ba saida? (Haree mós nota-rodapé.)
9 Dala ruma, karik fasil ba ita atu haree katak ema ruma mak muda sinál iha dalan atu hatudu ba diresaun sala. Maibé, dala ruma mós susar atu hatene se sinál neʼe hatudu ba diresaun loos ka sala. Hanesan neʼe mós ho dalan neʼebé Satanás uza atu lohi ema. Se ita la kuidadu, fasil deʼit atu ninia lia-bosok lohi ita. Apóstolu Paulo fó avizu kona-ba lia-bosok neʼe nuʼudar “doutrina neʼebé laloos”. (Lee 1 Timoteo 1:3, 4.) Atu ita bele nafatin laʼo iha dalan neʼebé lori ita ba moris rohan-laek, ita presiza hatene saida mak doutrina neʼebé laloos no oinsá mak ita bele hadook an husi sira.
10 Paulo fó avizu kona-ba doutrina neʼebé laloos kuandu nia hakerek ninia karta primeiru ba Timóteo, neʼebé serbí nuʼudar katuas kristaun. Paulo hatete ba nia atu halo kongregasaun moos nafatin no atu ajuda ema kristaun sira atu laran-metin nafatin ba Jeová. (1 Tim 1:18, 19) Liafuan gregu neʼebé Paulo uza, no neʼebé tradús nuʼudar “doutrina neʼebé laloos”, mós iha arti “istória neʼebé ema inventa deʼit” ka “lia-bosok”. Tuir livru The International Standard Bible Encyclopaedia, liafuan neʼe mós iha arti “istória (relijiaun nian) neʼebé la tuir realidade”. Karik kuandu Paulo temi liafuan neʼe, nia hanoin kona-ba lia-bosok relijiaun nian neʼebé mai husi istória neʼebé ema inventa deʼit. * Istória sira-neʼe “lori deʼit liafuan barak neʼebé folin la iha” no halo ema lakon tempu hodi buka-hatene liután kona-ba istória sira-neʼe. Satanás uza istória sira-neʼe atu halo ema kristaun hadook an husi lia-loos. Paulo nia konsellu klaru, neʼe mak labele see tilun ba istória ka doutrina neʼebé laloos!
11. Oinsá mak Satanás uza relijiaun falsu atu lohi ema? Ita presiza halo tuir avizu saida?
11 Istória ka doutrina laloos saida deʼit mak bele lohi ita? Tuir loloos, ita bele dehan katak “doutrina neʼebé laloos” mós aplika ba hanorin falsu relijiaun nian neʼebé halo ema “lakohi rona lia-loos”. (2 Tim 4:3, 4) Satanás, neʼebé finje katak nia “anju naroman ida”, nia uza relijiaun falsu atu lohi ema. (2 Kor 11:14) Porezemplu, relijiaun sira neʼebé bolu sira-nia an kristaun hanorin kona-ba doutrina laloos, hanesan Trindade, infernu, no katak ema nia klamar moris hela kuandu sira mate. Ema barak mós fiar katak Maromak kontente kuandu sira selebra Natál no Páskua, maibé tuir loloos, selebrasaun sira-neʼe mai husi adorasaun neʼebé falsu. Tan neʼe, kuandu ita rona ba Maromak nia avizu atu haketak an husi relijiaun falsu no la “kona buat neʼebé foʼer”, doutrina neʼebé laloos sei la lohi ita.—2 Kor 6:14-17.
12, 13. (a) Lia-bosok tolu saida mak Satanás habelar? Saida mak lia-loos kona-ba lia-bosok ida-idak neʼe? (b) Saida mak ita tenke halo hodi Satanás la bele lohi ita?
12 Satanás habelar lia-bosok seluk tan neʼebé bele lohi ita se ita la kuidadu. Hanoin toʼok kona-ba ezemplu tolu. Lia-bosok primeiru: Ita bele halo buat naran deʼit neʼebé ita hakarak maski loos ka sala, tuir deʼit buat neʼebé ita sente. Dala ruma, ita bele rona beibeik ideia hanesan neʼe iha televizaun, iha filme sira, iha jornál, ka iha internét. Ideia hanesan neʼe bele book ita atu halo tuir mundu nia hanoin neʼebé sala. Maibé tuir loloos, ita presiza Maromak atu hatete mai ita saida mak loos no saida mak sala. (Jer 10:23) Lia-bosok segundu: Maromak sei nunka muda buat ida iha mundu neʼe. Ideia ida-neʼe bele halo ita hanoin deʼit kona-ba ohin hodi la hanoin kona-ba futuru, no bele halo ita sai ema neʼebé “fuan la iha” ka ladún halo buat barak iha ita-nia serbisu ba Maromak. (2 Ped 1:8) Maibé tuir loloos, lakleur tan Maromak Jeová sei muda buat hotu iha mundu neʼe, no ita tenke hatudu katak ita fiar duni ba ida-neʼe. (Mt 24:44) Lia-bosok terseiru: Maromak la hanoin ita ida-idak. Se ita fiar ba lia-bosok neʼe husi Satanás, ida-neʼe bele halo ita sente katak ita la merese atu Maromak hadomi ita no bele hapara ita atu serbí Jeová. Maibé tuir loloos, Jeová hadomi no hafolin ita ida-idak nuʼudar ninia atan sira.—Mt 10:29-31.
13 Ita tenke kuidadu nafatin atu la iha hanoin hanesan ema iha Satanás nia mundu. Dala ruma, karik ita bele sente katak buat neʼebé sira hatete ka hanoin mak loos. Maibé, keta haluha katak Satanás mak lohidór neʼebé matenek. Nuneʼe, atu la husik Satanás lohi ita ho “hanorin naranaran deʼit neʼebé ema haktuir ho matenek”, ita tenke halo tuir konsellu no avizu husi Maromak nia Liafuan.—2 Ped 1:16.
Labele “tuir Satanás”
14. Avizu saida mak Paulo fó ba feto-faluk foin-saʼe? Tanbasá mak ita hotu tenke halo tuir ninia liafuan?
14 Hanoin toʼok katak sinál ida iha dalan hatete: “Dalan neʼe atu tuir Satanás.” La iha ema kristaun ida neʼebé sei tuir sinál hanesan neʼe, loos ka lae? Maibé, Paulo fó avizu mai ita kona-ba dalan oioin neʼebé ema kristaun loos dala ruma komesa atu “tuir Satanás”. (Lee 1 Timoteo 5:11-15.) Maski Paulo koʼalia ba “feto-faluk foin-saʼe sira”, maibé matadalan neʼe mós ba ita hotu. Karik feto-faluk sira-neʼe hanoin katak sira la tuir Satanás, maibé buat neʼebé sira halo hatudu katak tuir loloos sira tuir Satanás. Saida mak bele ajuda ita atu la tuir Satanás maski ita la hatene? Mai ita koʼalia kona-ba Paulo nia avizu atu la koʼalia aat kona-ba ema seluk.
15. Satanás nia hakarak mak saida? Saida deʼit mak Paulo hatete kona-ba Satanás nia hakarak?
15 Satanás lakohi ita atu koʼalia kona-ba ita-nia fiar, ninia hakarak mak atu hapara ita haklaken lia-foun diʼak. (Apok 12:17) Tan neʼe, nia hakarak ita atu gasta tempu atu halo buat neʼebé la iha folin ka atu halo ita haketak malu. Paulo koʼalia kona-ba buat balu neʼebé Satanás hakarak ita atu halo. Porezemplu, Paulo hatete katak feto-faluk foin-saʼe sira “sai baruk-teen laʼo husi uma ba uma”. Tanba feto-faluk sira-neʼe ladún iha buat barak atu halo, sira “laʼo husi uma ba uma” atu vizita sira-nia kolega atu koʼalia kona-ba buat neʼebé la importante. Ohin loron, ita presiza kuidadu atu la halo hanesan neʼe. Porezemplu, ita bele lakon tempu barak atu lee ka haruka e-mail ba kolega sira kona-ba buat neʼebé ladún importante no dala ruma la loos. Paulo mós hatete katak feto-faluk sira-neʼe “koʼalia barak”. Ema neʼebé koʼalia barak, dala ruma koʼalia lia-bosok kona-ba ema seluk, no ida-neʼe bele halo ema istori malu. (Prov 26:20) Ema neʼebé hatoʼo lia-bosok kona-ba ema seluk, maski sira hatene ka la hatene, sira halo tuir Diabu Satanás nia hahalok. * Paulo mós hatete katak feto-faluk koʼalia kona-ba “buat neʼebé sira labele hateten”. Sira hatete ba ema seluk oinsá atu halaʼo sira-nia moris. Maibé, ema ida la iha direitu atu mete iha ema seluk nia moris. Hahalok sira-neʼe bele hanetik ita atu halaʼo serbisu importante neʼebé Maromak Jeová fó mai ita, neʼe mak haklaken kona-ba ninia Ukun. Se ita para atu haklaken, ita sei komesa atu tuir Satanás. Se ita tuir Satanás, ita sei kontra Jeová. Ita hotu presiza hili ida-neʼebé mak ita hakarak tuir.—Mt 12:30.
16. Atu ita la “tuir Satanás”, ita presiza halo tuir konsellu saida?
16 Hodi halo tuir Bíblia nia konsellu, ida-neʼe bele ajuda ita atu la “tuir Satanás”. Paulo fó konsellu atu ita “badinas nafatin ba Naʼi nia serbisu”. (1 Kor 15:58) Kuandu ita badinas ba Maromak Jeová nia serbisu, ida-neʼe sei proteje ita husi perigu neʼebé bele mai husi atividade sira neʼebé la importante no neʼebé gasta tempu deʼit. (Mt 6:33) Paulo mós hatete mai ita atu “koʼalia deʼit liafuan neʼebé diʼak atu hametin” ita-nia maluk. (Ef 4:29) Nuneʼe, mai ita hakaʼas an atu la rona ka habelar lia-bosok kona-ba ema seluk. * Mai ita respeitu no tau fiar ba ita-nia maluk kristaun, hodi nuneʼe, ita sei koʼalia deʼit liafuan neʼebé diʼak kona-ba sira. Paulo mós fó konsellu tan, hodi dehan: “Hakaʼas an atu . . . haree kona-ba imi rasik nia moris.” (1 Tes 4:11) Kuandu ita hatudu ba ema katak ita hanoin no respeita sira, ita la koʼalia kona-ba sira-nia moris ka kona-ba buat ruma neʼebé sira lakohi ema seluk atu hatene. Ita mós la obriga ema atu simu ita-nia hanoin kuandu sira presiza foti desizaun ruma iha sira-nia moris.—Gal 6:5.
17. (a) Tanbasá mak Jeová fó-hatene mai ita kona-ba saida mak ita labele tuir? (b) Ita presiza hakaʼas an atu halo saida?
17 Ita agradese tebes ba Maromak Jeová tanba nia fó-hatene mai ita ho klaru kona-ba saida mak ita labele tuir! Mai ita nunka haluha katak avizu neʼebé Jeová fó mai ita iha lisaun neʼe no iha lisaun kotuk, hatudu katak nia hadomi tebes ita. Jeová lakohi Satanás atu lohi ita no halo ita terus. Maski dalan neʼebé Jeová hakarak ita atu laʼo kloot tebes, maibé dalan neʼe mak lori ita ba moris rohan-laek. (Mt 7:14) Tan neʼe, mai ita hakaʼas an atu sempre halo tuir Jeová nia avizu neʼebé dehan: “Ida-neʼe mak dalan. Imi laʼo tuir nia bá.”—Isa 30:21.
[Nota–rodapé]
^ par. 10 Porezemplu, ema barak hanoin katak livru Tobite (Tobias) parte husi Bíblia. Livru neʼe hakerek besik tinan 300 molok Kristu, no iha ona iha Paulo nia tempu. Livru neʼe nakonu ho istória barak kona-ba masonik no maninga. Istória sira-neʼe ema inventa deʼit nuʼudar istória neʼebé loos.—Haree livru Pemahaman Alkitab, Jilid 1, pájina 162.
^ par. 15 Liafuan gregu neʼebé tradús nuʼudar “diabu” mak diábolos. Neʼe katak “ida neʼebé habelar lia-bosok kona-ba ema seluk”. Bíblia uza liafuan neʼe nuʼudar títulu ba Satanás, ida neʼebé bosok-teen primeiru.—Joao 8:44; Apok 12:9, 10.
^ par. 16 Haree kaixa “Soe namkari manu-fulun ba anin”.
Oinsá Ita hatán?
Oinsá mak ita bele halo tuir avizu iha eskritura sira tuirmai neʼe?
[Pergunta estudu nian]
[Kaixa/Dezeñu iha pájina 19]
Soe namkari manu-fulun ba anin
Istória antigu ida husi Israel hatudu ho klaru saida mak akontese kuandu ema koʼalia lia-bosok kona-ba ema seluk. Istória neʼe konta hanesan neʼe.
Mane ida konta lia-bosok kona-ba ema neʼebé matenek liu iha nia sidade. Maibé ikusmai, mane neʼe haree katak nia halo sala no nia bá hasoru ema matenek neʼe hodi husu deskulpa. Nia mós husu ba ema matenek neʼe saida mak nia bele halo atu hadame fali ho nia. Ema matenek neʼe hatete ba nia: “Iha buat ida neʼebé ó bele halo. Foti toʼok xumasu neʼebé ho manu-fulun iha laran, halo kuak no depois soe namkari manu-fulun ba anin.” Maski mane neʼe la hatene tansá nia tenke halo ida-neʼe, maibé nia halo tuir deʼit.
Depois, mane neʼe bá fali ema matenek hodi husu: “Ita perdua ona haʼu ka lae?”
Ema matenek neʼe hatete: “Ulukliu, bá no hili fali manu-fulun hotu.”
Mane neʼe hatete: “Maibé oinsá mak haʼu bele halo ida-neʼe? Anin huu manu-fulun hotu namkari ona.”
Ema matenek hatete ba nia: “Sin, susar duni atu halibur fali manu-fulun hotu, nuneʼe mós susar atu hadiʼa fali rezultadu aat husi liafuan neʼebé ó hatete sai.”
Lisaun neʼebé ita aprende husi istória neʼe klaru tebes. Liafuan neʼebé ita hatete sai ona, ita la bele dada fali, no ita la bele halakon kanek neʼebé ita halo ba ema seluk. Tan neʼe, antes ita atu koʼalia buat ruma kona-ba ema seluk, ita presiza hanoin-hetan katak halo ida-neʼe hanesan ita soe namkari manu-fulun ba anin.
[Dezeñu iha pájina 16]
Oinsá mak ema balu konvida mestre bosok sira iha sira-nia uma?
