Anga Hẽ Wa Kapako Alungulo A Yehova?
Anga Hẽ Wa Kapako Alungulo A Yehova?
“Eyi oyo onjila, endelimo.”—ISA. 30:21.
1, 2. Nye Satana a nõlapo oku linga, kuenda ndamupi ondaka ya Suku yi tu kuatisa?
NDA ondimbukiso yoku songuila olongende vonjila ka ya kapiwile ciwa, yi nyelisa omanu, kuenda yi kapa omuenyo wavo kohele. Sokolola ndeci okuti, ekamba limue lia ku lungula hati, ulume umue ongangala wa nyõla ondimbukiso yaco oco a yambule vana ka va lavulula. Ove hẽ, nda wa yeva kelungulo liaye?
2 Satana, o sokisiwa lulume waco ongangala, momo wa nõlapo oku tu yapuisa. (Esit. 12:9) Ovina viosi vĩvi tua konomuisa vocipama ca pita, vi tunda kokuaye kuenda vi kuete ocimãho coku tu yapula vonjila yi tuala komuenyo ko pui. (Mat. 7:13, 14) Pole, Suku yetu ukuahenda o tu lungula oco ka tu ka kuami ‘olondimbukiso’ vionjila yĩvi ya Satana. Tu konomuisi atutu amue atatu Satana a siata oku kuama poku yapuisa omanu, kuenda ndomo Embimbiliya li tu kuatisa oku a yuvula. Osimbu tu tanga Embimbiliya tu sukila oku ivaluka okuti Yehova o kasi oku enda letu loku tu sapuila hati: “Eyi oyo onjila, endelimo.” (Isa. 30:21) Poku lilongisa alungulo aco, tu ka nõlapo oku linga ovina Yehova a tu sapuila.
Ku ka Kuame “Alongisi Vesanda”
3, 4. (a) Alongisi vesanda va sokisiwa ndati lovisimo ka vi kuete ovava? (b) Pi kua tunda alongisi vesanda, kuenda cipi ocimãho cavo?
3 Sokolola ndeci okuti, o kasi oku pita vekango kuenje o yevite enyona. Vocipãla, o mola ocisimo cimue loku lavoka okuti o ka sangamo ovava. Pole, eci o pitila ocipepi, o limbuka okuti ka muli ovava. Hesumuokuolio o yeva! Alongisi vesanda, va kasi ndovisimo ka vi kuete ovava. Omunu wosi enda kokuavo oco a sange ovava ocili condaka ya Suku, o ka yeva esumuo. Vonduko yupostolo Paulu kuenda Petulu, Yehova o tu lungula eci catiamẽla kalongisi vesanda. (Tanga Ovilinga 20:29, 30; 2 Petulu 2:1-3.) Alongisi vaco vesanda velie? Olondaka viovapostolo ava vavali, vi tu kuatisa oku limbuka oku kua tunda alongisi vaco vesanda kuenda ovilinga viavo.
4 Upostolo Paulu wa sapuila akulu vekongelo ko Efeso hati: “Pokati kene muẽle, pa katuka alume va vangula ovina via penga.” Petulu wa sonehelele vamanjaye Akristão hati: “Pokati kene noke pa kala alongisi vesanda.” Pi ku tunda alongisi vaco vesanda? Ovo va tunda muẽle vekongelo. Omanu vaco olonanguluke. a Nye ovo va yongola? Ovo ka va sanjukila lika oku tunda vocisoko cina va solele. Pole, ndomo Paulu a ci popia, ocimãho cavo oku ‘koka oloñame okuti vi va kuama.’ Kũlĩhĩsa ondaka ya popia hati, “oloñame.” Olonanguluke viaco, ka vi endi oku ka tavisa omanu oco va linge olondonge viavo, pole, vi yongola oku koka olondonge via Kristu oco vi va kuame. ‘Ndovimbungu vi kukulula,’ alongisi vesanda va koka omanu vekongelo, loku nyõla ekolelo liavo, kuenda oku va yapula vonjila yocili.—Mat. 7:15; 2 Tim. 2:18.
5. Olonjila vipi alongisi vesanda va siata oku kuama oco va yapuise omanu?
5 Alongisi vesanda va siata oku yapula ndati omanu? Ovo va ci linga latutu. Omanu vana va siapo efendelo liocili, va longisa ‘vuyombeki ovilongua’ vi nyõla. Eci ci lomboloka okuti, omanu vaco va pengisa ovilongua viocili ndeci ocingumba ci pitisa ovicapa viuhembi loku vi soneha ndu okuti viocili. Ovo va seteka oku vetiya omanu valua oku tava kalongiso avo esanda. Upostolo Petulu wa lombololavo okuti, omanu vaco va “pengisila” Ovisonehua kovilongua viavo. (2 Pet. 2:1, 3, 13; 3:16) Ocili okuti, vana va siapo efendelo liocili, ka va tu yonguila ekalo liwa. Nda tua va kuama tu yapuka vonjila yi tuala komuenyo ko pui.
6. Elungulo lipi Embimbiliya li tu ĩha lia tiamẽla kalongisi vesanda?
6 Tu liteyuila ndati kalongisi vesanda? Embimbiliya li lekisa ciwa ndomo tu pondola oku ci linga. (Tanga Va Roma 16:17; 2 Yoano 9-11.) Olio li tu lungula hati: “Yuvula omanu vaco.” Ambimbiliya akuavo a popia hati, “Litepa lavo,” “siapo omanu vaco,” kuenda “va yanduluka!” Elungulo eli liovisonehua, lia lomboloka ciwa. Sokolola ndeci okuti, ndotolo wa ku sapuila oku yuvula omunu umue o kuete uveyi u sambuka, haiwo u ponda lonjanga. Eye wa kũlĩha okuti, nda ove wa kuatiwa luveyi waco, o fa. Omo okuti ndotolo wa ku sapuila ciwa ohele yaco, ove o pokola konumbi yaye. Ocili okuti, vana va siapo efendelo liocili va “mamõha lolondaka” kuenje va sandiliya oku sambuisako vakuavo alongiso avo esanda. (1 Tim. 6:3, 4) Yehova Ondotolo Yinene, o tu lungula oku yuvula omanu vaco. Tua kũlĩha eci eye a tu yonguila. Anga hẽ tua nõlapo oku pokola kalungulo aye?
7, 8. (a) Nye ca kongela voku yuvula alongisi vesanda? (b) Momo lie wa nõlelapo oku tamalãla lalongisi vesanda?
7 Nye ca kongela voku yuvula alongisi vesanda? Tu sukila oku yuvula oku va tambula kolonjo vietu ale oku va lama. Tu sukilavo oku yuvula oku tanga alivulu avo, oku tala ovipama viavo vo Televisãu, oku konomuisa asapulo avo vo Internet, ale oku sapela olondaka viavo. Momo lie tu nõlelapo onjila yaco? Momo liocisola. Omo okuti tu sole “Suku yocili,” ka tu sanjukila alongiso a pengisa ocili Condaka yaye. (Osa. 31:5; Yoa. 17:17) Etu tu solevo ocisoko ca Yehova, cina ca siata oku tu longisa ocili, oku kongelamo onduko ya Yehova lelomboloko liayo, ocipango ca Suku catiamẽla koluali, ekalo liava va fa, kuenda elavoko liepinduko. Ove hẽ, o tẽla oku ivaluka esanju wa kuata eci wa lilongisa ovina evi, kuenda ovina vikuavo viatiamẽla kocili condaka ya Suku? Momo lie wecelela oku kembiwa lalongisi vesanda vana va sepula ocisoko cina ca ku longisa ocili covina evi?—Yoa. 6:66-69.
8 Ka tu ka tavi kovina vi popiwa lalongisi vesanda! Momo lie tu sandela ovisimo viaco ka vi kuete ovava oco tu kembiwe loku sumuisiwa? Omo liaco, tu nõlipo oku kolela ku Yehova kuenda kocisoko caye. Ocisoko caco lalimue eteke ci ka tu sumuisa kuenda ci ka amamako oku tu ĩha ovava awa ocili Condaka ya Suku.—Isa. 55:1-3; Mat. 24:45-47.
Ku ka Kuame ‘Olosapo Viesanda’
9, 10. Elungulo lipi Paulu a eca ku Timoteo liatiamẽla ‘kolosapo viesanda’, kuenda nye Paulu a yonguile oku popia? (Tala etosi pombuelo yemẽla.)
9 Olonjanja vimue ca leluka oku limbuka ondimbukiso ya kapiwa lãvi vonjila kuenda ndomo yi pondola oku tu songuila konjila yĩvi. Pole, pamue ka ca lelukile. Cimuamue haico catiamẽla kuhembi wa Satana. Nda ka tua lungukile, tu kembiwa. Upostolo Paulu wa tukula uhembi umue Satana a siata oku kuama okuti, ‘olosapo viesanda.’ (Tanga 1 Timoteo 1:3, 4.) Vipi olosapo viaco viesanda, kuenda tu pondola oku vi yuvula ndati? Tu sukila oku kũlĩha atambululo apulilo ava oco ka tu ka yapuisiwi vonjila yi tuala komuenyo ko pui.
10 Elungulo liatiamẽla kolosapo viesanda, olio Paulu a soneha vukanda waye watete a tumisa Timoteo, una wa kala ukulu wekongelo. Eye wo sapuila oco a yelise ekongelo kuenda oku kuatisa vamanji oku amamako lekolelo ku Yehova. (1 Tim. 1:18, 19) Paulu wa tukula ondaka yimue yo Helasi yi lomboloka esapulo liesanda, ulandu woku luvikiya, ale uhembi. Ndomo ca lomboluiwa velivulu Enciclopédia Bíblica Padrão Internacional, ondaka yaco yi tiamisiwila “kovilonguwa (viatavo) vina ka vi li kuata locili.” Paulu citava okuti wa yonguile oku popia catiamẽla kasapulo amue esanda o kosimbu a siata oku sandekiwa latavo. b Olosapo viaco “vi koka lika olonamalala,” vi tuala omanu koku linga apulilo ka a kuete esilivilo, hao a tuala omanu kakonomuiso olivova. Satana wa siata oku kuama olosapo viaco kuenda ovohembi atavo oco a yapuise omanu vana ka va lavulula. Elungulo lia Paulu lieli: Ku ka yevelele olosapo viesanda!
11. Satana wa siata oku kuama ndati etavo liesanda oco a yapuise omanu, kuenda elungulo lipi tu sukila oku kapako?
11 Olosapo vipi viesanda vi pondola oku tu yapuisa nda ka tua lavuluile? Tu pondola oku popia okuti ‘olosapo viesanda,’ vi lomboloka alongiso osi uhembi watavo, lovilongua vi tu tindula “koku yevelela ovina viocili.” (2 Tim. 4:3, 4) Satana una o liluvikiya “ndungelo wocinyi,” wa siata oku kuama etavo liesanda oco a yapuise omanu. (2 Va Kor. 11:14) Atavo Akristão vesanda ndaño va popia hati, va kuãi Kristu, va siata oku sandeka alongiso amue esanda ndeci: elongiso lia Suku Umosi Muvatatu, ifelu viondalu, kuenda elongiso liokuti, omunu o kuete ocilelembia ka ci fi. Ovo va vetiya omanu oku sambiliya oloneke viovipito violuali, ndeci ocipito Conatale, kuenda o Paskoa vina okuti, ovihilahila viaco vi tunda kefendelo liesanda. Poku pokola kelungulo lia Suku liatiamẽla koku litepa lavo kuenda oku ‘yuvula oku lamba kovina via vĩha,’ ka tu ka yapuisiwa lolosapo viesanda.—2 Va Kor. 6:14-17.
12, 13. (a) Ovohembi api Satana a siata oku sandeka, kuenda cipi ocili catiamẽla kovohembi aco? (b) Tu pondola ndati oku yuvula oku yapuisiwa lolosapo viesanda via Satana?
12 Kuli olonjila vikuavo Satana a pondola oku kuama poku tu yapuisa nda ka tua lungukile. Kũlĩhĩsa ovisimĩlo vimue. Omanu vamue va siata oku popia ndoco: Cosi ci kuete esilivilo, ci kale ciwa ale cĩvi. Ove wa kũlĩha eci ca ku sungulukila. Ovisimĩlo evi via siata oku sandekiwa vo Televisãu, vovikanda viasapulo, vo Internet, kuenda kovitalukilo. Ovio vi pengisa ovihandeleko via Suku, haivio vi vetiya oku sepula olonumbi viatiamẽla kovituwa viwa. Pole, ondaka yocili yeyi okuti, tu sukila olonumbi via Suku. (Yer. 10:23) Suku lalimue eteke a ka tetulula ovitangi violuali. Ovisimĩlo vioku tẽlisa lika olonjongole vietaili, vi tuala koku kala omanu “ka va imi apako.” (2 Pet. 1:8) Pole, ocili ceci okuti, eteke lia Yehova li kasi ocipepi, kuenda tu sukila oku kapelako. (Mat. 24:44) Suku ka kuete ocikembe letu. Oku tava kuhembi owu wa Satana, ci tu vetiya oku siapo oku vumba Yehova loku sima okuti ka tu soliwe laye. Pole, ocili ceci okuti Yehova o sole afendeli vaye kuenda wa va kapako calua.—Mat. 10:29-31.
13 Tu sukila oku lunguka oco ka tu ka yapuisiwe lovisimĩlo viomanu voluali lulo lua Satana. Ivaluka okuti, Satana eye ohembi ya velapo. Poku pokola kelungulo kuenda kolonumbi Viondaka ya Suku, tu ka yuvula oku kembiwa “lolosapo via sovuiwa ño lovoloño esanda” a Satana.—2 Pet. 1:16.
Ku ka “Kuame Satana”
14. Elungulo lipi Paulu a ecele kovimbumba amalẽhe, kuenda momo lie vosi yetu tu sukilila oku kapako olondaka viaco?
14 Sokolola ndeci okuti, ondimbukiso yimue yo vetapalo ya popia hati: “Onjila Eyi ya Loña ku Satana.” Helie pokati ketu nda wa kuama ondimbukiso yaco? Paulu o tu sapuila olonjila vialua vi pondola oku ‘yapuisila ku Satana’ Akristão vocili. (Tanga 1 Timoteo 5:11-15.) Olondaka via Paulu ndaño via loña ‘kovimbumba viamalẽhe,’ pole, olonumbi viaco vi tiamisiwila kokuetu vosi. Akãi vaco Akristão kocita catete, ka va kuatele ovisimĩlo viokuti va kuãi Satana, pole, ovilinga viavo via lekisa uvangi waco. Tu yuvula ndati oku kuama Satana lonjila yimue okuti ka tu ci limbuka? Tu konomuisi elungulo lia Paulu liatiamẽla koku vangula olombonde.
15. Cipi ocimãho ca Satana, kuenda Paulu wa situlula ndati atutu a Satana?
15 Ocimãho ca Satana, oku nyõla ekolelo lietu oco tu liwekepo oku kunda olondaka viwa. (Esit. 12:17) Omo liaco, o seteka oku tu vetiya oku litumbika kovina vi pesela otembo ale oku nena olonepele pokati ketu. Kũlĩhĩsa ndomo Paulu a situlula atutu a Satana. ‘Usiãi, loku ñuala ñuala.’ Kotembo yilo omo liuloño wa livokiya, ca leluka oku pesela otembo yetu leyi ya vakuetu poku litumisa asapulo ka a kuete esilivilo. ‘Olombonde.’ Olombonde, vi nena alundi a koka uyaki. (Olosap. 26:20) Omunu wosi ukualombonde, ci kale okuti wa ci kũlĩha ale sio, o kuãi ongangu ya Satana Eliapu. c ‘Osiata.’ Etu ka tu kuete omoko yoku litenga vovikele viomuenyo wa vakuetu. Ovituwa evi vi tu tateka oku tiamisila utima kupange wa velapo tua tambula ku Suku woku kunda Usoma. Nda tua liwekapo oku linga upange wa Yehova, tu fetika oku kuama Satana. Vosi yetu, tu sukila oku nõla oku tu yongola oku tiamẽla.—Mat. 12:30.
16. Elungulo lipi li tu kuatisa oku yuvula oku ‘yapukila ku Satana’?
16 Oku yevelela alungulo Embimbiliya, ci tu kuatisa oku yuvula oku “yapukila ku Satana.” Kũlĩhĩsa alungulo amue a Paulu. “Lingi vakuambili yupange wa Ñala.” (1 Va Kor. 15:58) Oku pitisa kovaso upange Wusoma ci tu teyuila kohele yoku pesila otembo kovina ka vi kuete esilivilo. (Mat. 6:33) Oku popia “olondaka vi kuatisa.” (Va Efe. 4:29) Ku ka yevelele olombonde pamue oku vi sandeka. d Kuata ocituwa coku kolela vamanji kuenda oku va sumbila. Nda tua ci linga tu ka popia lika olondaka vi kuatisa loku yuvula evi vi sumuisa. Oku “kala lovimuenyo vie yuka umbombe.” (1 Tes. 4:11) Kapako vakuene loku va sumbila, kuenda oku yuvula ovituwa vi lekisa oku va sepula. Ivaluka okuti ka tu kuete omoko yoku kisika vakuetu oku kuama ovisimĩlo vietu kovina va sukila oku linõlela ovo muẽle.—Va Gal. 6:5.
17. (a) Momo lie Yehova a tu ĩhila elungulo liovina tu sukila oku yuvula? (b) Yipi onjongole yove yatiamẽla konjila Yehova a tu yonguila oku kuama?
17 Tua sanjuka calua omo okuti, Yehova o tu sapuila ovina tu sukila oku yuvula. Tu ivaluki okuti, alungulo a Yehova tua lilongisa vocipama cilo kuenda vocipama ca pita, a eciwa omo liocisola a tu kuetele. Eye ka yongola okuti tu kembiwa la Satana loku tala ohali. Onjila Yehova a yongola okuti omo tu endela citava okuti ya tĩla kokuetu, pole oyo lika yi tuala komuenyo ko pui. (Mat. 7:14) Omo liaco, tu nõlipo oku pokola kondaka Yaye eci a tu sapuila hati: “Eyi oyo onjila, endelimo.”—Isa. 30:21.
[Atosi pombuelo yamẽla]
a Ondaka “unanguluke,” yi lomboloka oku siapo efendelo liocili, oku yapuka, usuanji, kuenda oku tinduka.
b Elivulu lia Tobias lina ka lia taviwile oku kongeliwa Vembimbiliya li kola, okuti lia sonehiwa kocita catatu O.Y.K. hailio lia kala koloneke via Paulu, mu sangiwa ovihilahila vialua lovilongua viatiamẽla kalumbu via lekisiwa ndu okuti viocili.—Tala velivulu, Estudo Perspicaz das Escrituras, volume 1 kemẽla 153.
c Kelimi li Helasi ondaka di·aʹbo·los, okuti “eliapu,” yi lomboloka “ukualundi.” Eyi oyo onduko yikuavo ya eciwa ku Satana omindiki yatete.—Yoa. 8:44; Esit. 12:9, 10.
d Tala vokakasia losapi hati, “Oku Sandola Ovonya Vofela.”
Lipi Etambululo Liove?
Ndamupi o pondola oku kapako alungulo a lekisiwa vovisonehua evi?
[Apulilo Elilongiso]
[Okakasia Lelitalatu kemẽla 19]
Oku Waya Ovonya Vofela
Olusapo lumue luosimbu lua va Yudea, lu situlula ciwa ovitangi vi tunda koku sandeka olombonde. Ndaño lu popiwa volonepa vialua, pole, etosi lia velapo volusapo luaco lieli:
Ulume umue wa enda vimbo locimãho coku sandeka olombonde viatiamẽla kulume umue ukualondunge. Noke ulume ukualombonde wa limbuka elinga liaye lĩvi kuenje wa enda kulume waco oku pinga ongecelo, loku likuminya oku linga cosi ci sukiliwa oco o wecele. Pole, ulume ukualondunge wo sapuila hati: Kuende, ka kuate o petu ye yuka ovonya. Noke yi tongolola loku waya ovonya aco vofela. Ndaño okuti ukualombonde ka kuatele elomboloko lieci vo tuma oku linga, wa enda kuenje wa linga ndeci vo handeleka.
Eci a tiuka, wa pula hati: “Kaliye nda eceliwa?”
Ulume ukualondunge wa kumbulula hati: “Kaliye, kuende, kongolole ovonya aco.”
Eye wa kumbulula hati: “Ndi ci linga ndati? Ofela ya a sandola.”
“Ndeci ca tĩla oku ongolola ovonya a sandoka lofela, haico ca tĩla oku pengulula ondaka yĩvi wa popia.”
Ulandu owu wocili. Olondaka vĩvi via popiwa ka ci tẽliwa oku vi tiula, kuenda lomue o tẽla oku imũla ũvi wiyililako. Omo liaco, osimbu ka tua sandekele olombonde, tu sukila oku ivaluka ondaka yatiamẽla koku waya ovonya vofela.
[Elitalatu kemẽla 16]
Vamue va siata oku laleka ndati volonjo viavo omanu vana va siapo efendelo liocili?
