Naa Ni Ḓo Thetshelesa Tsevho Dza Yehova Dzi Pfalaho?
Naa Ni Ḓo Thetshelesa Tsevho Dza Yehova Dzi Pfalaho?
“Nḓila ngeino; farani yenei!”—YES. 30:21.
1, 2. Sathane o ḓiimisela u ita mini, nahone Ipfi ḽa Mudzimu ḽi ri thusa nga nḓila-ḓe?
TSHIGA tsha badani tsho sumbaho nḓilani i si yone tshi nga ni xedza na u ni dzhenisa khomboni. Edzani u humbula arali khonani yaṋu ya ni sevha nga ha muthu muvhi we a shandula tshiga tshenetsho nga khole a tshi itela uri vhane vha khou tshimbila badani yeneyo vha dzhene khomboni. Naa no vha ni sa ḓo thetshelesa tsevho yawe?
2 Sathane u fana na muthu onoyo muvhi o ḓiimiselaho u ri xedza. (Ndzumb. 12:9) Ṱhuṱhuwedzo dzoṱhe mmbi dze ra dzi haseledza theroni yo fhiraho ndi dzine dza shumiswa nga Sathane u itela uri ri si thetshelese Yehova nahone ri litshe nḓila i ri isaho vhutshiloni vhu sa fheli. (Mat. 7:13, 14) Zwi takadzaho ndi uri Mudzimu washu wa lufuno u a ri sevha uri ri si fashwe nga zwikwekwe zwa Sathane. Zwino ri ḓo haseledza dziṅwe ṱhuṱhuwedzo tharu dza Sathane. Musi ri tshi vhala Ipfi ḽa Mudzimu ri a ṱhogomela nḓila ine ḽa ḓo ri thusa ngayo uri ri si kheluswe, nahone ri nga zwi dzhia u nga Yehova u vha a tshi khou tshimbila murahu hashu u itela u ri sumbedza nḓila yo teaho, a tshi ri: “Nḓila ngeino; farani yenei!” (Yes. 30:21) U elekanya nga ha tsevho dza Yehova dzi pfalaho zwi ḓo ita uri ri ḓiimisele u dzi thetshelesa.
Ni Songo Tevhela “Vhafunzi Vha U Zwifha”
3, 4. (a) Vhafunzi vha u zwifha vha fana na zwisima zwo xaho nga nḓila-ḓe? (b) Kanzhi vhafunzi vha u zwifha vha bva ngafhi, nahone ndi mini zwine vha ṱoḓa u zwi ita?
3 Edzani u humbula ni tshi khou tshimbila sogani nahone ni na ḓora. Musi ni tshee kule ni vhona tshithu tshine tsha nga tshisima, na mbo ḓi livha khatsho, ni tshi humbula uri ni ḓo wana maḓi a u dzimula ḓora. Naho zwo ralo, musi ni tshi swika na wana uri tshenetsho tshisima tsho xa. Ni mbo ḓi kulea nungo. Vhafunzi vha u zwifha vha fana na zwisima zwo xaho. Muṅwe na muṅwe ane a ya kha vho u itela u wana maḓi a mafhungo-ngoho u ḓo shona vhukuma. Yehova o shumisa muapostola Paulo na Petro u itela u ri sevha nga ha vhafunzi vha u zwifha. (Vhalani Mishumo 20:29, 30; 2 Petro 2:1-3.) Ndi vhafhio vhafunzi vhenevho? Mafhungo o hevhedzwaho a vhaapostola vhenevha vhavhili a ri thusa u ṱalula hune vhafunzi vha u zwifha vha bva hone na nḓila ine vha shuma ngayo.
4 Musi a tshi ṅwalela vhahulwane vha tshivhidzo tsha Efesa, Paulo o ri: “Na kha inwi vhaṋe hu ḓo vuwa vhanna vhane vha amba pfunzo i sili.” Musi a tshi amba na Vhakriste ngae, Petro o ṅwala uri: “Vhunga na kha inwi hu tshi ḓo vha na vhafunzi vha u zwifha.” Nga zwenezwo, naa vhafunzi vha u zwifha vha bva ngafhi? Vha nga kha ḓi bva ngomu tshivhidzoni. Vhenevho ndi vhagunei. * Vha vha vha tshi khou ṱoḓa mini? A vha fushei nga u ṱutshela ndangulo ye khamusi vha vhuya vha i funa. Paulo o ṱalutshedza uri tshipikwa tshavho ndi ‘u kunga vhafunziwa.’ Vhafunziwa vhane Paulo a khou amba nga havho ndi vha Yesu Kristo. Nṱhani ha u ḓiitela vhafunziwa vhavho, vhagunei vha ṱoḓa u tou tswa vhafunziwa vha Kristo. Vhafunzi vha u zwifha vha fana na “phele dza zwivhanda,” dzine dza ṱoḓa u ḽa nngu. Vhagunei vha ṱoḓa u ita uri miraḓo ya tshivhidzo i si vhe na lutendo na uri i ṱutshele mafhungo-ngoho.—Mat. 7:15; 2 Tim. 2:18.
5. Vhafunzi vha u zwifha vha fhura hani vhathu?
5 Vhafunzi vha u zwifha vha shuma hani? Vha shuma nga nḓila ya vhukwila. Vhagunei vha “ṋengisa vha dzhenisa” pfunzo dza vhushandukwa nga nḓila ya vhukwila u fana na mavemu. Vhagunei vha shumisa “maipfi a xedzisaho.” Vha amba mavhonele avho a mazwifhi nga nḓila ine zwa nga vhonala u nga ndi ngoho, u fana na mavemu ane a shumisa mabammbiri a lwa mulayo a vhufhura ane a nga vhonala u nga ndi a vhukuma. Vha lingedza u ita uri vhathu vhanzhi nga hune zwa konadzea ngaho vha tende pfunzo dza “vhufhura.” Petro o dovha a amba uri vha funesa u “shanda” Maṅwalo. (2 Pet. 2:1, 3, 13; 3:16) Zwi tou vha khagala uri vhagunei a vha ri londi. Arali ra vha tevhela ri ḓo bva nḓilani i isaho vhutshiloni vhu sa fheli.
6. Ndi nyeletshedzo ifhio i re khagala i bvaho Bivhilini malugana na vhafunzi vha u zwifha?
6 Ri nga ḓitsireledza hani kha vhafunzi vha u zwifha? Bivhili i ri vhudza nga ho livhaho zwine ra fanela u zwi ita. (Vhalani Vha-Roma 16:17; 2 Yohane 9-11.) Ipfi ḽa Mudzimu ḽi ri ṱuṱuwedza uri ri “sedze” kana uri ri ṱhogomele vhathu vho raloho. Dziṅwe ṱhalutshedzelo dzi amba uri “ri vha iledze,” ri “ṱutshele kule navho,” na uri ri “shavhele kule navho!” Nyeletshedzo yeneyo i tou pfala zwavhuḓi. Kha ri ri dokotela u ni vhudza uri ni fanela u iledza muthu a re na vhulwadze vhune ha pfukela, vhune ha nga ni vhulaha. Ni ḓo pfesesa uri dokotela u khou amba mini, nahone ni ḓo mu thetshelesa. Vhagunei vha “lwala” muhumbuloni, nahone vha shumisa pfunzo dzavho u itela uri vhaṅwe vhathu vha vhe na mahumbulele a fanaho na avho. (1 Tim. 6:3, 4) Yehova u fana na Dokotela Muhulwane ane a khou ri vhudza uri ri vha iledze. Ri a zwi ḓivha uri zwi amba mini, fhedzi naa ro ḓiimisela u thetshelesa tsevho yawe vhutshiloni hashu hoṱhe?
7, 8. (a) Ndi mini zwine zwa katelwa kha u iledza vhafunzi vha u zwifha? (b) Ndi ngani no ḓiimisela u iledza vhafunzi vha u zwifha?
7 Ndi mini zwine zwa katelwa kha u iledza vhafunzi vha u zwifha? A ri vha ṱanganedzi mahayani ashu, kana u vha lumelisa. A ri vhali khandiso dzavho, u ṱalela mbekanyamushumo dza thelevishini dzine vha vha khadzo, u vha sedza kha Inthanethe, kana u shela mulenzhe kha nyambedzano dzine vha vha nadzo kha Inthanethe. Ndi ngani ri tshi fanela u ḓiimisela u vha iledza nga ho khwaṱhaho? Ndi nga nṱhani ha u funa hashu Mudzimu wa “mafhungo-ngoho,” ngauralo a ro ngo ḓiimisela u thetshelesa pfunzo dzo shandwaho dzine dza lwisana na Ipfi ḽawe ḽa mafhungo-ngoho. (Ps. 31:5; Yoh. 17:17) Ri dovha ra funa ndangulo ya Yehova, ye ya ri funza mafhungo-ngoho a mangadzaho vhukuma—u katela na dzina ḽa Yehova na zwine ḽa amba zwone, ndivho ya Mudzimu nga ha ḽifhasi, vhuimo ha vhafu, na fulufhelo ḽa mvuwo. Naa ni kha ḓi humbula nḓila ye na ḓipfa ngayo musi ni tshi guda nga ha enea mafhungo-ngoho na maṅwe manzhi? Nga zwenezwo, ni songo tenda vhufhura ha vhafunzi vha u zwifha vhu tshi ita uri ni shandukele ndangulo ye ya ni funza enea mafhungo-ngoho.—Yoh. 6:66-69.
8 Hu sa londwi zwine vhafunzi vha u zwifha vha zwi amba, ri nga si vha tevhele! A ri na tshiitisi tsha u thetshelesa vhathu vhane vha fana na tshisima tsho xaho. Nṱhani hazwo, kha ri ḓiimisele u dzula ri tshi fulufhedzea kha Yehova na ndangulo yawe yo no fhedzaho tshifhinga tshilapfu i tshi ri dzimula ḓora nga maḓi o kunaho na a homolosaho a mafhungo-ngoho a bvaho Ipfini ḽa Mudzimu ḽo hevhedzwaho.—Yes. 55:1-3; Mat. 24:45-47.
Ni Songo Tevhela “Dzingano” Dza Mazwifhi
9, 10. Paulo o ṋea Timotheo tsevho ifhio malugana na “dzingano” dza mazwifhi, nahone o vha a tshi khou humbula nga ha mini? (Sedzani na ṱhaluso i re magumoni a siaṱari.)
9 Nga zwiṅwe zwifhinga zwi nga kha ḓi leluwa u vhona uri tshiga tsha badani tsho shandea nahone tsho sumba fhethu hu si hone. Fhedzi zwi nga kha ḓi itea uri nga zwiṅwe zwifhinga zwi konḓe u zwi vhona. Zwi a fana na nga ṱhuṱhuwedzo mmbi dza Sathane, dziṅwe dzi a vhonala ngeno dziṅwe dzi sa vhonali. Muapostola Paulo o ri sevha nga ha mazwifhi eneo. O amba uri ndi “dzingano” dza mazwifhi. (Vhalani 1 Timotheo 1:3, 4.) Ngano dzenedzi ndi mini, nahone ri nga iledza hani u dzi thetshelesa? Ri ṱoḓa phindulo dza mbudziso dzenedzi u itela uri ri dzule ri nḓilani i isaho vhutshiloni vhu sa fheli.
10 Tsevho ya Paulo malugana na ngano dza mazwifhi i wanala kha vhurifhi hawe ha u thoma he a vhu ṅwalela Timotheo, mulavhelesi wa Mukriste we a vhudzwa uri a ite uri tshivhidzo tshi dzule tsho kuna na uri a thuse vhatendi ngae uri vha dzule vha tshi fulufhedzea. (1 Tim. 1:18, 19) Paulo o shumisa ipfi ḽa Lugerika ḽine ḽa nga amba maloto, kana mazwifhi. U ya nga The International Standard Bible Encyclopaedia, ḽeneḽi ipfi ḽi ambela kha ngano (dza zwa vhurereli) dzine dza sa tshimbidzane na luthihi na mafhungo-ngoho. Khamusi Paulo o vha a tshi khou humbula nga ha mazwifhi a vhurereli ane a ṱuṱuwedzwa nga nganea dza kale-kale dze vhathu vha tou ḓiitela dzone dzine dza ita uri vhaṅwe vhathu vha vhilaele. * Dzenedzo nganea dzo vha dzi tshi ita uri hu vhudziswe mbudziso dzine dza ita uri hu itwe ṱhoḓisiso i sa vhuyedzi nga tshithu. Sathane u shumisa ngano dzenedzi na mazwifhi a vhurereli u itela uri vhathu vha hangwe zwithu zwi re zwa ndeme vhukuma. Nyeletshedzo ya Paulo i tou vha khagala: Ni songo thetshelesa ngano dza mazwifhi!
11. Sathane o shumisa hani nga vhuṱali vhurereli ha mazwifhi u itela u fhura vhathu, nahone ri fanela u thetshelesa tsevho ifhio uri ri si kheluswe?
11 Ndi dzifhio dziṅwe ngano dza mazwifhi dzine dza nga ri fhura arali ri sa ṱhogomeli? Ri nga amba uri ngano ndi pfunzo iṅwe na iṅwe ya mazwifhi ine ya ita uri vhathu vha ‘litshe u ṋekedza dzinḓevhe kha mafhungo-ngoho.’ (2 Tim. 4:3, 4) Sathane ane a ḓiita “muruṅwa wa tshedza,” o shumisa vhurereli ha mazwifhi nga vhukwila u itela u xedza vhathu. (2 Vha-Kor. 11:14) Ḽa Vhudzhagane ḽi ḓiita Vhakriste nahone ḽi funza pfunzothendwa dzi ngaho—Vhuraruthihi, mulilo wa hele, na u ri muya wa muthu u bvela phanḓa u tshi tshila musi o no fa—nahone pfunzo dzenedzo ndi ngano dza mazwifhi. Vhathu vhanzhi vha humbula u nga u pembelela Khushumusi na Easter zwi takadza Mudzimu, fhedzi zwithu zwine vhathu vha zwi ita musi vha tshi pembelela holodei dzenedzi, zwi bva kha ngano dza mazwifhi na pfunzo dza vhuhedeni. Ri nga si fhurwe nga ngano dza mazwifhi arali ri tshi thetshelesa tsevho ya Mudzimu ya u sendela kule na vhurereli ha mazwifhi na u sa “kwama dzitshikha.”—2 Vha-Kor. 6:14-17.
12, 13. (a) Ndi afhio mazwifhi e a ṱuṱuwedzwa nga Sathane, nahone ndi ifhio ngoho malugana na mazwifhi eneo? (b) Ri nga iledza hani u xedzwa nga ngano dza mazwifhi dza Sathane?
12 Hu na maṅwe mazwifhi ane a ṱuṱuwedzwa nga Sathane ane a nga ri khelusa arali ri sa ṱhogomeli. Kha ri haseledze dziṅwe tsumbo dza mazwifhi enea. Ni nga ita zwiṅwe na zwiṅwe zwine na funa. Zwi ya nga nḓila ine na ḓipfa ngayo. Mavhonele enea a ṱuṱuwedzwa nga maanḓa kha thelevishini, mimuvi, dzimagazini, dzigurannda na kha Inthanethe. Nga nṱhani ha uri ri pfa enea mazwifhi tshifhinga tshoṱhe, zwi a leluwa uri ri thome u humbula nga nḓila yeneyo na u tevhedza zwilinganyo zwa shango zwa vhuḓifari. Ngoho ndi ya uri ri ṱoḓa vhukuma u livhiswa kha mafhungo a zwa vhuḓifari nahone Mudzimu ndi ene ane a nga kona u ita nga u ralo. (Yer. 10:23) Mudzimu a nga si dzhenelele kha mafhungo a ḽifhasi. Mavhonele eneo a ita uri vhathu vha humbule nga ha ḓuvha ḽa ṋamusi fhedzi. A vha humbuli nga ha vhumatshelo kana u takadza Mudzimu. Ri nga kha ḓi thoma u humbula nga nḓila i fanaho na yavho nahone ra vha ‘vhabva kana vha si na zwiaṋwiwa’ musi ri tshi shumela Mudzimu. (2 Pet. 1:8) Ngoho ndi uri ḓuvha ḽa Yehova ḽi ḓo ḓa hu si kale, nahone ri fanela u dzula ro ḽi lindela. (Mat. 24:44) Mudzimu ha ni londi. Sathane u ṱoḓa ni tshi tenda uri a ro ngo tea u funwa nga Mudzimu. Ngoho ndi uri Mudzimu u funa na u dzhiela nṱha mushumeli wawe muṅwe na muṅwe.—Mat. 10:29-31.
13 Ri fanela u ṱhogomela uri ri si vhe na mahumbulele a fanaho na a vhathu vha shango ḽa Sathane. Naho zwo ralo, nga zwiṅwe zwifhinga mahumbulele eneo a nga kha ḓi vhonala a tshi nga ndi a ngoho. Ni songo hangwa uri Sathane u tou vha ḽigwena ḽa vhufhura. Ri fanela u thetshelesa nyeletshedzo i bvaho Ipfini ḽa Mudzimu, nahone musi ri tshi ita nga u ralo ri ḓo kona u iledza u xedzwa nga “dzingano” dza mazwifhi dza Sathane.—2 Pet. 1:16.
Ni Songo “Tevhela Sathane”
14. Ndi ifhio tsevho ye Paulo a i ṋea vhafumakadzi vha tshilikadzi vha re vhaswa, nahone ndi ngani roṱhe ri tshi fanela u thetshelesa tsevho yeneyo?
14 Kha ri ri ni vhona tshiga tsha badani tshine tsha ri: “Nḓila Ngei Ya U Tevhela Sathane.” A hu na Mukriste we a vha a tshi nga tevhela tshiga tsho raloho. Naho zwo ralo, Paulo o sevha nga ha nḓila dzo fhamba-fhambanaho dzine Vhakriste vho ḓiṋekedzaho vha nga kha ḓi thoma ngadzo u “tevhela Sathane.” (Vhalani 1 Timotheo 5:11-15.) Paulo o vha a tshi khou amba nga ha vhafumakadzi vha tshilikadzi “vha re vhaswa,” fhedzi maitele a re henefha a shuma kha riṋe roṱhe. Vhenevho vhafumakadzi vha Vhakriste vha ḓanani ḽa u thoma ḽa miṅwaha a vho ngo humbula uri vha khou tevhela Sathane, fhedzi zwiito zwavho zwo sumbedza uri vha khou mu tevhela. Ri nga iledza hani u tevhela Sathane ri sa zwi ḓivhi? Zwino ri ḓo ṱolisisa tsevho dza Paulo malugana na u sola vhaṅwe.
15. Sathane o ḓiimisela u ita mini, nahone Paulo o ri mini musi a tshi ṱalusa maano a Sathane?
15 Sathane ha ṱoḓi ri tshi amba nga ha zwine ra zwi tenda. U ṱoḓa ri tshi litsha u huwelela mafhungo maḓifha. (Ndzumb. 12:17) U itela u swikelela zwenezwo, u lingedza u ita uri ri tovhole zwithu zwine zwa ri fhedzela tshifhinga na zwine zwa ita uri hu vhe na dziphambano vhukati hashu. Ṱhogomelani nḓila ye Paulo a ṱalusa ngayo maano a Sathane. “Vha guda u tshimbila-tshimbila dzinḓuni vhá si na mushumo.” Musalauno hune ha vha na thekinolodzhi yo bvelaho phanḓa vhukuma, zwi a leluwa u fhedza tshifhinga tshashu na tsha vhaṅwe, sa tsumbo, nga u rumela na u fhirisela phanḓa milaedza ya e-mail dzi si na mushumo. Paulo o dovha a amba uri vhenevho vhafumakadzi ndi vha u ita “zwitshele.” Vhathu vhane vha ita zwitshele vha nga amba zwithu zwi si zwavhuḓi nga vhaṅwe. U sola vhaṅwe nga nḓila yo raloho zwo khakhea ngauri zwi nga ita uri ri phaḓaladze mazwifhi nga havho. Mazwifhi o raloho a anzela u ita uri vhathu vha lwe. (Mir. 26:20) Hu sa londwi uri vha a zwi ḓivha kana a vha zwi ḓivhi, vhane vha sola vhaṅwe vha vha vha tshi khou edzisa Sathane Diabolo. * “Na u shuma zwi sí na hazwo” kana u dzhenelela kha mafhungo a vhathu. A ro ngo tea u vhudza vhaṅwe uri vha fanela u tshila hani. Zwithu zwenezwi zwoṱhe zwi nga ri thithisa uri ri si kone u ita mushumo we ra ṋewa nga Mudzimu wa u huwelela nga ha Muvhuso. Arali ra litsha u tikedza mushumo wa Yehova, ri vha ri tshi khou tevhela Sathane. Ri fanela u khetha sia ḽine ra ṱoḓa u vha khaḽo.—Mat. 12:30.
16. Ndi nyeletshedzo ifhio ine ya nga ri thusa uri ri iledze u “tevhela Sathane”?
16 U thetshelesa nyeletshedzo ya Bivhili zwi ḓo ri thusa uri ri si ‘shanduke, ra vho tevhela Sathane.’ Ṱhogomelani iṅwe nyeletshedzo ya Paulo ya vhuṱali. “Ni simese u shuma mushumo wa Mudzimu.” (1 Vha-Kor. 15:58) Musi ri tshi dzula ro farakanea tshumeloni ya Yehova, ri nga si vhe na tshifhinga tsha u tovhola zwithu zwi si zwa ndeme, zwine zwa ri fhedzela tshifhinga na zwine zwa nga vha na khombo kha riṋe. (Mat. 6:33) Ambani “ḽi re ḽivhuya ḽa u fhaṱisa.” (Vha-Ef. 4:29) Ḓiimiseleni u sa sola vhaṅwe na u sa thetshelesa vhane vha ita nga u ralo, nahone ni songo zwi pfukisela phanḓa. * Ṱahulelani u fulufhela na u ṱhonifha vhahaṋu vha tshinnani na vha tshisadzini. Arali ni tshi ita nga u ralo, ni ḓo dzula ni tshi amba zwithu zwavhuḓi nga havho. Paulo o dovha a ri vhudza zwine ra fanela u ḓiimisela u zwi ita, o ri: Ni vhe “vha ḓi-shumelaho,” zwine zwa amba u sa dzhenelela kha mafhungo a vhaṅwe. (1 Vha-Thes. 4:11) Ivhani na dzangalelo kha vhaṅwe vhathu, fhedzi ni zwi ite nga nḓila ine ya sumbedza uri ni a vha ṱhonifha. Ni fanela u humbula uri hu nga vha hu na mafhungo a muthu nga eṱhe ane vha sa ṱoḓe u amba nga hao, kana ane vha sa ṱoḓe vhaṅwe vha tshi a ḓivha. Nahone ni fanela u humbula uri a ro ngo fanela u kombetshedza mavhonele ashu kha vhaṅwe malugana na mafhungo ane vha fanela u ḓiitela phetho khao.—Vha-Gal. 6:5.
17. (a) Ndi ngani Yehova a tshi ri sevha nga ha zwine ri si fanele u zwi tevhela? (b) No ḓiimisela u ita mini malugana na nḓila ine Yehova a ṱoḓa ri tshi fara yone?
17 Ri livhuha vhukuma Yehova nge a ri vhudza zwine ri si fanele u zwi tevhela. A ro ngo fanela u hangwa uri tsevho dzoṱhe dze ra dzi haseledza kha thero yeneyi na yo fhiraho dzo vha hone nga nṱhani ha lufuno lwawe luhulwane. Ha ṱoḓi ri tshi fhurwa nga Sathane nahone ra pfa vhuṱungu. Nḓila ine Yehova a ṱoḓa ri tshi i tevhela i a konḓa, fhedzi ndi yone i yoṱhe ine ya ḓo ri isa vhutshiloni vhu sa fheli. (Mat. 7:14) Ri fanela u dzula ro ḓiimisela u thetshelesa zwine Yehova a ri vhudza zwone musi a tshi ri: “Nḓila ngeino; farani yenei!”—Yes. 30:21.
[Ṱhaluso dzi re magumoni a siaṱari]
^ phar. 4 U vha “mugunei” ndi u shandukela vhurabeli ha ngoho, u vhu ṱanutshela, na u vhu ṱutshela kana u vhu litsha.
^ phar. 10 Sa tsumbo, bugu ya Tobit (Tobias), ine vhaṅwe vhathu vha humbula uri ndi tshipiḓa tsha Bivhili, ndi tsumbo ya dziṅwe dza ngano dze dza vha dzi hone misini ya Paulo. Yo ṅwalwa hu ṱoḓaho u vha ḓanani ḽa vhuraru ḽa miṅwaha B.C.E. Bugu yeneyi yo ḓala ngano dza mazwifhi na manditi. I amba nga ha zwithu zwi sa itei fhedzi ya ri ndi zwa vhukuma.—Sedzani Insight on the Scriptures, Volumu 1, siaṱari 122.
^ phar. 15 Ipfi ḽa Lugerika ḽine ḽa ri “diabolo” ndi di·aʹbo·los, zwine zwa amba uri “mudzia-tshisolo.” Ipfi ḽeneḽi ḽi shumiselwa Sathane, ene mudzia-tshisolo muhulwane.—Yoh. 8:44; Ndzumb. 12:9, 10.
^ phar. 16 Sedzani bogisi ḽine ḽa ri: “U Hasekanya Mathenga Muyani.”
Ni Ḓo Fhindula Hani?
Ri nga shumisa hani nyeletshedzo dzi re kha maṅwalo a tevhelaho?
[Mbudziso dza Pfunzo]
[Bogisi/Zwifanyiso kha siatari 19]
U Hasekanya Mathenga Muyani
Ḽeneḽi ḽiambele ḽa Tshiyuda ḽa kale ḽi sumbedza zwavhuḓi mvelelo dzi si dzavhuḓi dza u sola vhaṅwe. Ḽo ambiwa nga nḓila dzo fhamba-fhambanaho, fhedzi ḽo nweledzwa nga nḓila i tevhelaho.
Muṅwe munna o tshimbila na ḓorobo yoṱhe a tshi khou sola munna wa vhuṱali wa ḓoroboni yeneyo. Nga murahu, onoyo mudzia-tshisolo a zwi ṱhogomela uri o vha o khakha nahone a ya kha munna wa vhuṱali u itela u humbela pfarelo na u mu vhudza uri o vha a tshi ḓo ita tshiṅwe na tshiṅwe u itela u pfumedzana nae. Munna wa vhuṱali o vha e na khumbelo nthihi fhedzi: Mudzia-tshisolo o vha a tshi fanela u ya a dzhia musiamelo u re na mathenga, a u phula nahone a hasekanya mathenga eneo muyani. Naho o mangadzwa nga khumbelo yeneyo, mudzia-tshisolo o ita zwe a vhudzwa zwone nahone a vhuyelela kha uḽa munna wa vhuṱali.
O vhudzisa a ri: “Naa zwino ndo farelwa?”
Munna wa vhuṱali o fhindula a ri: “Thomani ni ye u doba mathenga oṱhe e na a hasa.”
Munna a ri: “Fhedzi ndi ḓo zwi itisa hani zwenezwo, mathenga oṱhe o vhudzulwa nga muya.”
Zwi a konḓa u lugisa zwithu zwi si zwavhuḓi zwe ra zwi amba samusi zwi tshi konḓa u dovha wa doba mathenga e a vhudzulwa nga muya.
Ngudo i tou vha khagala. Ri nga si kone u humisa zwe ra zwi amba nahone a zwi konadzei u dovha wa fhelisa vhuṱungu he wa vhu pfisa muṅwe muthu nga nṱhani ha maipfi au. Musi ni sa athu phaḓaladza zwitshele, zwi ḓo vha vhuṱali u thoma na humbula uri u ita nga u ralo zwi a fana na u hasekanya mathenga muyani.
[Tshifanyiso kha siaṱari 16]
Vhaṅwe vha ramba hani vhagunei mahayani avho?
