Kapahingaloan nin Dios—Nakalaog Na daw Kamo Dian?
Kapahingaloan nin Dios—Nakalaog Na daw Kamo Dian?
“An tataramon nin Dios buhay asin mapuersa.”—HEB. 4:12, NW.
1. Ano an sarong paagi na puede kitang makalaog ngonyan sa kapahingaloan nin Dios, alagad taano ta iyan tibaad mas madaling sabihon kisa gibohon?
SA SINUNDAN na artikulo, nanodan niato na puede kitang makalaog sa kapahingaloan nin Dios paagi sa masinunod na pakikipagtabangan para sa mga katuyohan nia. Iyan tibaad mas madaling sabihon kisa gibohon. Halimbawa, tibaad pagrebelde an enot tang reaksion kun maaraman niato na dai inooyonan ni Jehova an sarong bagay na kinawiwilihan niato. Ipinaparisa kaiyan na kaipuhan tang paoswagon an pagigin andam na ‘magkuyog.’ (Sant. 3:17, An Banal na Biblia) Sa artikulong ini, rerepasohon niato an pirang situwasyon na puedeng makabalo sa pagigin andam tang humiro kaoyon kan katuyohan nin Dios—an pagigin makinuyog gikan sa puso.
2, 3. Ano an dapat tang padagos na gibohon tanganing magdanay na kawiliwili sa pagheling ni Jehova?
2 Kumusta daw kamo kun dapit sa pag-ako nin hatol na basado sa Biblia? Sinasabi sa sato kan Kasuratan na kabotan nin Dios na tiponon para sa saiya an kawiliwili o “pinagmamauot [na mga bagay] kan gabos na nacion.” (Hag. 2:7) Iyo, an kadaklan sa sato bako nanggad kawiliwili kan enot tang manodan an katotoohan. Minsan siring, an pagkamoot sa Dios asin sa namomotan na Aki nia nagpahiro sa sato na gumibo nin dakulang pagbabago sa satong paggawe asin ugale tanganing magin lubos na nakakapaogma sa Dios. Sa kahurihurihi, pagkatapos nin dakol na pamibi asin paghihingoa, nag-abot an nakakaogmang aldaw na kita nagpabautismo.—Basahon an Colosas 1:9, 10.
3 Minsan siring, dai natapos sa bautismo an pakikipaglaban niato sa satong pagkabakong perpekto. An pakikipaglaban nagpapadagos asin mapadagos sagkod na kita bakong perpekto. Pero, sinisierto sa sato na kun kita padagos na makikipaglaban asin determinadong magin mas orog na kawiliwili sa pagheling ni Jehova, bebendisyonan nia an satong paghihingoa.
Kun Kaipuhan an Hatol
4. Sa anong tolong paagi puede kitang tawan nin hatol na sono sa Kasuratan?
4 Bago niato ikatanos an satong mga kaluyahan, kaipuhan tang maaraman kun ano iyan. Puede tang maaraman na igwa kita nin seryosong depekto paagi sa sarong nagsisiyasat sa pusong pahayag sa Kingdom Hall o nakakapukaw sa isip na artikulo sa saro sa mga publikasyon niato. Sa ibong na lado, puedeng gamiton ni Jehova an sarong kapwa Kristiano, tanganing itanos an satong kaluyahan, kun dai niato nasabotan an sarong punto sa itinaong pahayag o dai niato personal na ikinaaplikar an nabasa tang hatol.—Basahon an Galacia 6:1.
5. Sambiton an nagkapirang bakong marahay na reaksion na tibaad ikapaheling niato kun kita tinatawan nin hatol, asin ipaliwanag kun taano ta dapat magtiaga an Kristianong mga pastor sa paghihingoang tabangan kita.
5 Bakong pasil na mag-ako nin hatol hale sa sarong bakong perpektong tawo, gurano man kataktika asin kamamomoton kan pagtao kaiyan. Pero, arog kan sinasabi sa Galacia 6:1, pinagbobotan ni Jehova an mga may espirituwal na kualipikasyon na pagmaigotan na ‘ibangon’ kita, na ginigibo iyan “sa espiritu nin kahoyoan.” Kun iyan aakoon niato, magigin kitang mas kawiliwili pa ngani sa pagheling nin Dios. Siempre, kun namimibi kita, lubos tang inaako na bako kitang perpekto. Minsan siring, kun kita kaolayon nin saro dapit sa espesipikong pagkukulang niato, an tendensia niato iyo na magrason, pagianon an problema, kuestionon an motibo kan nagtatao nin hatol, o dai oyonan an paagi kan pagtao nin hatol. (2 Ha. 5:11) Asin kun an hatol nanonongod sa sarong sensitibong bagay—gawe-gawe nin sarong kapamilya, pagbado asin pagpakarhay sa sadiri, personal na kalinigan, o sarong klase nin aling-alingan na kinawiwilihan niato alagad ikinakaongis ni Jehova—tibaad medyo negatibo an magin reaksion niato, na puedeng ikabigla niato asin ikamondo kan nagtatao nin hatol! Alagad kun kita kalmado na, sa parate inaako niato na tama an hatol.
6. Paano ihinahayag kan tataramon nin Dios an “magña kaisipan asin magña mawot nin puso”?
6 An pinakatemang teksto kan artikulong ini nagpapagirumdom sa sato na “mapuersa” an tataramon nin Dios. Iyo, an tataramon nin Dios may puersa na bagohon an buhay nin mga tawo. Arog kaidtong bago kita magpabautismo, iyan epektibo pa man giraray sa pagtabang sa sato na gumibo nin pagbabago ngonyan na kita bautisado na. Sa surat ni Pablo sa mga Hebreo, sinabi nia na an tataramon nin Dios “nakakalagbas minsan sagkod sa pagbulag kan kalag asin espiritu, kan magña pagsokmolan asin hotok, patin madale sa pagmidbid kan magña kaisipan asin magña mawot nin puso.” (Heb. 4:12) Sa ibang pagtaram, kun malinaw tang nasasabotan an katuyohan nin Dios para sa sato, ihahayag kan satong reaksion kun ano an tunay na pagkatawo niato. May beses daw na magkalaen an pagkatawo niato na naheheling nin iba (an “kalag”) asin kun ano talaga an pagkatawo niato (an “espiritu”)? (Basahon an Mateo 23:27, 28.) Isip-isipa kun ano an magigin reaksion mo sa minasunod na mga situwasyon.
Makisabay sa Organisasyon ni Jehova
7, 8. (a) Ano an tibaad nagmotibar sa nagkapirang Judiong Kristiano na magsunod pa man giraray sa nagkapirang kaugalean sa Ley ni Moises? (b) Paano an paghihingoa ninda nagin kontra sa nagpapadagos na katuyohan ni Jehova?
7 Dakol sa sato an tuom an Talinhaga 4:18: “An dana kan magña banal garo man sana an liuanag kan kaagahon, na nagoorog sagkod na masangkap an aldao.” Nangangahulogan iyan na sa pag-agi nin panahon mapapakarhay an satong paggawe asin pakasabot sa mga katuyohan nin Dios.
8 Arog kan pinag-olayan niato sa sinundan na artikulo, pagkagadan ni Jesus nadepisilan an dakol na Judiong Kristiano na bumutas sa Ley ni Moises. (Gui. 21:20) Minsan ngani ekspertong ikinapaliwanag ni Pablo na an mga Kristiano bako nang sakop kan Ley, dai inako nin nagkapira an saiyang ipinasabong na pangangatanosan. (Col. 2:13-15) Tibaad inisip ninda na kun padagos nindang ootobon an kisiera pira sanang kabtang kan Ley, dai sinda pepersegiron. Ano man an inisip ninda, malinaw na sinabi ni Pablo sa surat nia sa mga Kristianong Hebreo na dai sinda makakalaog sa kapahingaloan nin Dios sagkod na habo nindang gumibo kaoyon kan Saiyang ihinahayag na katuyohan. * (Heb. 4:1, 2, 6; basahon an Hebreo 4:11.) Tanganing makamtan an pag-oyon ni Jehova, kaipuhan nindang akoon an katotoohan na ginigiyahan na nia an saiyang banwaan pasiring sa laen na direksion.
9. Ano an maninigong magin saboot niato kun may pagliliwat sa satong pakasabot dapit sa sarong punto sa Kasuratan?
9 Sa presenteng mga panahon, nagkaigwa nin pagliliwat sa pakasabot niato sa nagkapirang katokdoan sa Biblia. Ini dai dapat makapaluya sa satong boot; dapat na makapakosog iyan sa kompiansa niato sa grupong maimbod asin mapagmansay na oripon. Kun marisa kan mga representante kan “oripon” na kaipuhan linawon o itanos an pakasabot niato dapit sa sarong punto nin katotoohan, dai sinda nag-aalangan na gibohon an pagliliwat. Mas interesado an grupong oripon na makikooperar sa ihinahayag na katuyohan nin Dios kisa makalikay sa pagkritika huli sa liniwat na pakasabot. Ano an reaksion mo kun may itinataong pagliliwat sa satong pakasabot sa Kasuratan?—Basahon an Lucas 5:39.
10, 11. Ano an manonodan niato sa reaksion nin nagkapira kan mag-introdusir nin bagong mga paagi nin paghuhulit kan maogmang bareta?
10 Pag-olayan niato an saro pang halimbawa. Sa paghinanapos kan ika-19 siglo asin kapinonan kan ika-20 siglo, naniniwala an nagkapirang Estudyante sa Biblia, na matibayon magpahayag sa publiko, na maootob ninda sa pinakamarahay na paagi an sugo na maghulit kun matao sinda nin inandam na marhay na mga pahayag sa mapagpahalagang mga tawo. Gustong-gusto nindang magpahayag sa publiko, asin an nagkapira sa sainda naoogmang marhay sa labi-labing paghanga kan mga nagdadangog sa sainda. Minsan siring, kan huri nagin malinaw na gusto ni Jehova na magin sibot an banwaan nia sa manlaenlaen na paagi nin paghuhulit, kaiba an pagharongharong. An nagkapirang matibay magpahayag sa publiko habo nanggad na magprobar nin ano man na bagong paagi. Kun hehelingon, sinda garo baga espirituwal na mga tawo, na may lubos na debosyon sa Kagurangnan. Minsan siring, kan nagin malinaw an ebidensia kan katuyohan nin Dios dapit sa paghuhulit, nahayag kun ano talaga an saindang kaisipan, intension, asin motibo. Ano an nagin pagmate ni Jehova sa sainda? Dai nia sinda inoyonan. Binayaan ninda an organisasyon.—Mat. 10:1-6; Gui. 5:42; 20:20.
11 Dai man nangangahulogan na nagin pasil para sa gabos, na nagdanay na maimbod sa organisasyon, na maghulit sa publiko. Dakol an nadepisilan sa gibohon na iyan, lalo na kan primero. Alagad nagsunod sinda. Pag-abot nin panahon, napangganahan ninda an kadepisilan na iyan, asin abunda sindang binendisyonan ni Jehova. Ano an reaksion mo kun ika inaagda na makikabtang sa sarong paagi nin paghuhulit na sa presente bakong kombenyente para sa saimo? Andam ka daw na magprobar nin bagong paagi?
Kun Magbaya ki Jehova an Sarong Mahal Niato sa Buhay
12, 13. (a) Ano an katuyohan ni Jehova sa pagtitiwalag sa habong magsolsol na mga nagkasala? (b) Sa anong pagbalo napapaatubang an nagkapirang Kristianong magurang, asin taano ta puedeng magin depisilon an pagbalong iyan?
12 Mayong duda na kita gabos minaoyon sa prinsipyo na tanganing mapaogma an Dios dapat kitang magin malinig sa pisikal, moral, asin espirituwal. (Basahon an Tito 2:14.) Pero, tibaad may mga pagkakataon na nababalo nanggad an satong kaimbodan sa aspektong ini kan katuyohan nin Dios. Halimbawa, ipamugtak na an solong aking lalaki nin sarong arogan na Kristianong mag-agom nagbaya sa katotoohan. Huling mas ginusto kan hoben an “kaogmahan nin kasalan sa kadikit na panahon” kisa sa personal na relasyon ki Jehova asin sa saiyang diosnon na mga magurang, sia natiwalag.—Heb. 11:25.
13 Iyan makologon nanggad para sa mga magurang! Kun dapit sa pagtitiwalag, siempre aram ninda na an Biblia nagsasabi “na dai makiiba kun an saro na inaapod na tugang maguin parasambay, o maaraon, o parasamba sa ladawan, o paramuda, o paraburat, o maagao; sa kaibahan nin siring dai kamo minsan makikakan.” (1 Cor. 5:11, 13) Nasasabotan man ninda na an terminong “saro” sa bersikulong ini nanonongod pati sa mga kapamilya na dai nakaistar sa saindang harong. Alagad namomotan nindang marhay an saindang aki! Huli kaiyan, tibaad mangatanosan sinda: ‘Paano mi matatabangan an samong aki na magbalik ki Jehova kun lilimitaran mi nanggad an pakikiiba sa saiya? Bako daw na mas matatabangan mi sia kun may regular kaming komunikasyon sa saiya?’ *
14, 15. Ano an depisil na desisyon na dapat gibohon nin mga magurang na may tiwalag na mga aki?
14 Namomondo kita para sa mga magurang na iyan. Total, an aki ninda an nagdesisyon na ipadagos an bakong sa Kristianong pamumuhay imbes na an haraning relasyon sa saiyang mga magurang asin ibang kapagtubod. Sa ibong na lado, mayong magigibo sa bagay na iyan an mga magurang. Bakong makangangalas na nangluyang gayo an boot ninda!
15 Alagad, ano an gigibohon kan mahal niato na mga magurang na iyan? Masunod daw sinda sa malinaw na instruksion ni Jehova? O mangangatanosan daw sinda na puede sindang regular na makiiba sa tiwalag nindang aki asin ibilang iyan na “importanteng bagay na pampamilya”? Sa pagdesisyon ninda, dai ninda dapat lingawan kun ano an pagmate ni Jehova sa saindang ginigibo. An katuyohan nia iyo na papagdanayon na malinig an organisasyon asin, kun posible, madagka an mga nagkasala na makapag-isip-isip. Paano puedeng suportaran kan Kristianong mga magurang an katuyohan na iyan?
16, 17. Ano an manonodan niato paagi sa paghorophorop sa halimbawa ni Aaron?
16 An tugang ni Moises na si Aaron napaatubang sa masakit na situwasyon dapit sa duwa sa mga aki niang lalaki. Isip-isipa an siertong namatean nia kan an mga aki niang si Nadab asin Abihu gadanon ni Jehova huli sa pagdolot ninda sa Saiya nin bawal na kalayo. Siempre, huli kaiyan sinda dai na makakaibaiba kan saindang mga magurang. Alagad bako sana iyan. Ininstruksionan ni Jehova si Aaron asin an saiyang maimbod na mga aking lalaki: “Dai nindo pagpabayaan na dai masukray an saindong buhok asin dai nindo paggision an saindong mga gubing sa pagpahiling na kamo nagmomondo. Kun gibohon nindo iyan, magagadan kamo asin maaanggot an KAGURANGNAN sa bilog na banwaan.” (Lev. 10:1-6; An Marahay na Bareta Biblia) Malinaw an mensahe. Dapat na orog an pagkamoot niato ki Jehova kisa sa bakong maimbod na mga kapamilya niato.
17 Ngonyan, dai tolos-tolos ginagadan ni Jehova an mga nagbabalga sa saiyang mga ley. Sia mamomoton na nagtatao sa sainda nin oportunidad na magsolsol huli sa saindang maraot na mga gibo. Pero, ano an mamamatean ni Jehova kun an mga magurang nin dai nagsosolsol na nagkasala padagos Siang binabalo paagi sa dai man kaipuhan na pakikiibaiba sa saindang tiwalag na aki?
18, 19. Anong mga bendisyon an makakamtan kan mga kapamilyang nagsusunod sa mga instruksion ni Jehova mapadapit sa mga tiwalag?
18 Prangkang inadmitir nin dakol na dating tiwalag na natabangan sindang makapag-isip-isip huli sa marigon na paninindogan kan mga katood asin kapamilya ninda. Sa pagrekomendar na ibalik an sarong hoben na babae, an mga magurang sa kongregasyon nagsurat na an “saro sa dahelan [na binago nia an saiyang pamumuhay] iyo an paggalang kan saiyang tugang na lalaki sa areglo nin pagtitiwalag.” Sinabi nia na “an maimbod na pagsunod kaini sa sono sa Kasuratan na mga instruksion nakatabang sa saiya na mawoton na makabalik.”
19 Ano an dapat tang magin kongklusyon dapit digdi? Kaipuhan tang labanan an tendensia kan bakong perpektong puso niato na magkontra sa hatol na sono sa Kasuratan. Kita dapat na magin lubos na kombensido na pirmeng pinakamarahay an paagi nin Dios sa pag-asikaso sa satong mga problema.
“An Tataramon nin Dios Buhay”
20. Sa anong duwang paagi puedeng iaplikar an Hebreo 4:12? (Helingon an nota sa ibaba.)
20 Kan isurat ni Pablo na “an tataramon nin Dios buhay,” dai nia espesipikong pinanonongdan an nasusurat na Tataramon nin Dios, an Biblia. * Ipinapaheling kan konteksto na an pinanonongdan nia iyo an panugang sinabi nin Dios. An punto ni Pablo iyo na pirmeng inootob nin Dios an saiyang panuga. Pinatunayan ini ni Jehova paagi ki propeta Isaias: “An [sakong] tataramon . . . dai mabalik sakuya na mayo nin laog, ata gñani . . . mapapakarahay sia sa sakuyang sinobolan sa saiya.” (Isa. 55:11) Huli kaini, dai kita dapat mawaran nin pasensia kun dai tolos nangyayari an mga bagay-bagay segun sa gusto niato. Si Jehova padagos na ‘naggigibo’ tanganing mapangganang otobon an saiyang katuyohan.—Juan 5:17.
21. Paano an Hebreo 4:12 puedeng makaparigon sa boot kan maimbod asin may edad nang mga miembro kan “dakulang kadaklan”?
21 Dakol na dekada nang naglilingkod ki Jehova an maimbod asin may edad nang mga miembro kan “dakulang kadaklan.” (Kap. 7:9) Dakol an dai noarin man nag-asa na sinda magurang sa sistemang ini nin mga bagay. Sa ibong kaiyan, dai sinda pinangluluyahan nin boot. (Sal. 92:14) Aram ninda na an panugang sinabi nin Dios bakong gadan na isyu—iyan buhay, asin si Jehova naggigibo tanganing otobon iyan. Huling mahalagang marhay sa Dios an katuyohan nia, napapagayagaya niato sia kun iyan an pinapagdadanay tang pangenot sa satong isip. Durante kan ikapitong aldaw na ini, si Jehova nagpapahingalo, na nakakasierto nanggad na maootob an saiyang katuyohan asin na iyan susuportaran kan banwaan nia bilang grupo. Kumusta ka man? Ika daw personal nang nakalaog sa kapahingaloan nin Dios?
[Mga Nota sa Ibaba]
^ par. 8 Dakol na Judiong lider an estriktong nagsunod sa Ley ni Moises, alagad pag-abot kan Mesiyas, sia dai ninda minidbid. Sinda dai nakisabay sa nagpapadagos na katuyohan nin Dios.
^ par. 20 Ngonyan, an Dios nakikipag-olay sa sato paagi sa saiyang nasusurat na Tataramon, na may puersa na bagohon an satong buhay. Huli kaini, angay man na iaplikar sa bilog na Biblia an mga tataramon ni Pablo sa Hebreo 4:12.
Dai Paglingawan an Katuyohan
• Ano an kaipuhan tangani kitang makalaog ngonyan sa kapahingaloan nin Dios?
• Ano an koneksion kan katuyohan nin Dios asin kan pagigin andam niato na mag-ako nin hatol na sono sa Kasuratan?
• Sa anong mga situwasyon tibaad magin depisil na magsunod sa instruksion na sono sa Kasuratan, alagad taano ta mahalagang marhay na kita magsunod?
• Sa anong duwang paagi puedeng iaplikar an Hebreo 4:12?
[Mga Hapot Para sa Pag-adal]
[Ritrato sa pahina 31]
Iyan makologon nanggad para sa mga magurang!
