Eski ou’n antre dan repo Bondye?

“Parol Bondye i vivan e i annan pisans.”​—EBR. 4:12.

1. Nonm en fason nou kapab antre dan repo Bondye ozordi e kwa ki kapab pli fasil pour dir ki fer?

DAN lartik avan, nou ti vwar ki nou kapab antre dan repo Bondye par obeir e viv an armoni avek son plan. I kapab pli fasil pour dir ki fer. Par egzanp, ler nou aprann ki Zeova pa kontan en keksoz ki nou nou kontan, nou kapab ganny tante pour fer sa ki nou oule. Sa i montre ki nou bezwen fer ankor plis progre pour nou pare pour obeir. (Zak 3:17, NW) Dan sa lartik, nou pou revwar enn de laspe kot nou dezir pour adapte avek plan Bondye, andotmo, obeir avek tou nou leker, i kapab ganny teste.

2, 3. Ki zefor nou bezwen kontinyen fer pour reste presye dan lizye Zeova?

² Eski ou vwar li fasil pour aksepte konsey ki sorti dan Labib? Labib i dir nou ki i lavolonte Bondye pour rasanble  pour li menm “bann keksoz presye sorti dan tou nasyon.” (Aga. 2:7) Byensir, laplipar nou pa ti sitan presye ler nou ti fek konn laverite. Kantmenm sa, lanmour pour Bondye ek son Garson byenneme in pous nou pour fer bann sanzman enportan an sa ki konsern nou latitid ek labitid pour nou kapab vreman fer plezir Bondye. Finalman, apre bokou lapriyer ek zefor, sa zour ti arive kot nou ti kapab ofer nou lekor avek Zeova e batize.​—Lir Kolosyen 1:9, 10.

³ Selman, nou lalit avek lenperfeksyon pa ti fini zour nou batenm. Sa lalit in kontinyen e i pou kontinyen osi lontan ki nou enparfe. Par kont, nou kapab asire ki si nou kontinyen lalit e nou determinen pour reste presye dan lizye Bondye, Zeova pou beni nou zefor.

Ler nou ganny konseye

4. Ki sa trwa fason nou kapab resevwar en konsey sorti dan Labib?

⁴ Avan ki nou konmans travay lo nou lenperfeksyon, nou bezwen konnen kwa ki mal dan nou. En diskour byen tousan kot Lasal Rwayonm oubyen en lartik ki fer reflesir dan enn nou bann piblikasyon i kapab fer nou idantifye en gro defo ki nou annan. De lot kote, si nou pa arive konpran nou menm en konsey dan en diskour oubyen dan enn nou bann piblikasyon, Zeova i kapab servi en lot Kretyen pour montre nou kot nou mal.​—Lir Galat 6:1.

5. Nonm enn de move fason nou ti kapab reazir ler nou ganny konseye e eksplike akoz bann ansyen dan kongregasyon i devret kontinyen fer zefor pour ed nou.

⁵ I pa fasil pour aksepte en konsey sorti kot en imen enparfe, menm si i ganny donnen avek lanmour ek ladouser. Selman, parey Galat 6:1 i montre, Zeova i ekspekte bann ki annan kalifikasyon spirityel pour “esey” (NW) fer li “avek en lespri ladouser.” Si nou pare pour aksepte sa konsey, nou pou vin pli presye ankor dan lizye Bondye. I drol ki parler ler nou priye i fasil pour aksepte ki nou enparfe. Par kont, si en dimoun i atir nou latansyon lo enn nou bann defo, nou annan sa tandans pour zistifye nou lekor, dir ki sa problenm pa sitan grav, kestyonn motivasyon sa enn ki’n konsey nou oubyen dir ki sa konsey pa ti ganny donnen dan en bon fason. (2 Rwa. 5:11) Si sa konsey i annan pour fer avek en laspe delika nou lavi personnel, parey aksyon en manm nou fanmir, resanz ek laparans, lizyenn personnel ouswa en serten lanmizman ki nou kontan e ki Zeova pa kontan. Si i le ka, nou ti kapab vwar nou pe refiz sa konsey ki ti pou fer sa enn ki’n konsey nou sagren. Me apre ki nou’n reflesir, laplipar di-t-an nou pou vwar ki sa konsey ti apropriye.

6. Ki mannyer Parol Bondye i kapab arive “desifre tou dezir ek sekre leker imen”?

⁶ Sa verse dan teks tenm sa lartik i rapel nou ki parol Bondye “i annan pisans.” Wi, parol Bondye i annan pouvwar pour sanz lavi en dimoun. Parey Labib ti ed nou pour sanze avan batenm, i osi kapab ed nou pour fer lezot sanzman apre batenm. Dan son let pour bann Ebre, Pol ti osi ekrir ki parol Bondye i kapab “penetre ziska separasyon lam ek lespri, zwentir ek lanmwel lezo. I arive desifre tou dezir ek sekre leker imen.” (Ebr. 4:12) Andotmo, kan nou klerman konpran plan Bondye pour nou, lafason nou reakte anver konsey i montre sa ki nou vreman ete anndan. Eski parler i annan en diferans ant sa ki nou paret ete (setadir nou “lam”) e sa ki nou vreman ete (setadir nou “lespri”)? (Lir Matye 23:27, 28.) Mazinen ki mannyer ou ti pou reazir dan sa bann sityasyon swivan.

 Kontinyen progrese avek lorganizasyon Zeova

7, 8. (a) Kwa ki ti’n kapab pous serten Kretyen Zwif pour reste atase avek Lalwa Moiz? (b) Akoz zot bann zefor ti’n kapab al kont realizasyon plan Zeova?

⁷ Bokou nou nou konn parker sa verse dan Proverb 4:18: “Santye bann dimoun drwat i parey sa lalimyer briye ki pe vin deplizanpli kler ziska gran lizour.” Sa i vedir ki nou kondwit ek nou konnesans lo plan Zeova pou amelyore avek letan.

⁸ Parey nou ti diskite dan sa lartik avan, apre lanmor Zezi, i ti difisil pour bokou Kretyen Zwif aret swiv Lalwa Moiz. (Akt 21:20) Menm si Pol ti eksplike akoz bann Kretyen ti nepli anba Lalwa, serten ti refiz sa rezonnman sorti kot Bondye. (Kol. 2:13-15) Petet zot ti santi ki si zot ti kontinyen obzerv serten laspe sa Lalwa, zot ti pou evit persekisyon. An tou ka, Pol ti ekrir bann Kretyen Ebre e dir zot fransman ki zot pa ti pou kapab antre dan repo Bondye osi lontan ki zot ti refize adapte avek son plan ki pe ganny akonplir. * (Ebr. 4:1, 2, 6; lir Ebre 4:11.) Pour annan laprouvasyon Zeova, zot ti pou bezwen aksepte ki Bondye ti pe anmenn son pep dan en lot direksyon.

9. Ki latitid nou devret annan ler lafason ki nou konpran Labib i sanze?

⁹ Dan nou letan, i’n annan serten azisteman lo nou konprenezon lo serten lansennyman baze lo Labib. Sa pa devret fatig nou, o kontrer nou devret annan plis konfyans dan lesklav fidel e pridan. Ler serten manm ki reprezant sa lesklav i konpran ki en pwen konsernan laverite i bezwen ganny klarifye ouswa aziste, zot pa per pour fer sa sanzman. Zot pli enterese pour kontinyelman reste azour avek plan Bondye ki pe ganny realize, olye per ki zot pou ganny kritike akoz zot in fer en azisteman lo lafason ki nou konpran laverite. Ki mannyer ou reazir ler lafason ki nou konpran Labib i sanze?​—Lir Lik 5:39.

10, 11. Ki leson nou kapab tire lo lafason ki serten ti reazir ler i ti annan sanzman dan lafason nou prese?

¹⁰ Annou pran en lot legzanp. Ver lafen diznevyenm syek e konmansman ventyenm syek, serten Etidyan Labib ki ti bann bon ansenyan an piblik ti santi ki zot ti pe pli byen akonplir zot devwar pour prese atraver bann diskour byen prepare ki zot ti pe donnen avek en lodyans byen atantif. Zot ti kontan ansenny an piblik e serten ti vreman anvi ganny rekonnet akoz zot ti bann bon ansenyan. Toudmenm, Zeova ti pli tar fer son pep konpran ki zot ti pou bezwen partisip dan lezot form predikasyon, par egzanp kaz an kaz. Serten sa bann bon ansenyan ti direkteman refize esey en nouvo keksoz. An deor, zot ti paret bann zonm spirityel ki vreman devoue avek Senyer. Me ler i ti annan en sanzman dan lafason ki plan Bondye ti pe ganny realize konsernan predikasyon, zot vre pwennvi, lentansyon ek motivasyon ti vin kler. Ki mannyer Zeova ti santi? I pa ti beni zot. Zot ti kit lorganizasyon.​—Mat. 10:1-6; Akt 5:42; 20:20.

¹¹ I pa vedir ki i ti fasil pour tou bann ki ti reste fidel avek lorganizasyon pour al prese kaz an kaz. Bokou ti vwar li difisil, sirtou o konmansman. Me zot ti obeir. Avek letan, zot ti kapab sirmont zot lafreyer e Zeova ti beni zot en kantite. Ki mannyer ou ou reazir ler ou ganny demande pour partisip dan en lot form predikasyon ki paret difisil pour ou? Eski ou pare pour esey en nouvo keksoz?

Ler en dimoun ki nou kontan i kit Zeova

12, 13. (a) Ki bi Zeova ler i permet ki en peser ki pa repantir i ganny ekskli dan kongregasyon? (b) Ki tes serten paran Kretyen i fer fas avek e kwa ki fer sa tes difisil?

¹² San dout, nou pou dakor avek sa prensip ki nou bezwen reste prop fizikman,  moralman e spirityelman pour ki nou fer plezir Bondye. (Lir Tit 2:14.) Petet i annan sityasyon kot nou fidelite i vreman ganny teste dan sa laspe. Par egzanp, meton sel garson en koup Kretyen egzanpler i kit laverite. Lefet ki i prefer “zouir pese pandan en pti pe letan” dan plas annan en relasyon personnel avek Zeova ek son paran, sa zenn onm i ganny ekskli dan kongregasyon.​—Ebr. 11:25.

¹³ Son paran i dezespere! Zot konnen ki Labib i dir lo en dimoun ki ganny ekskli. Nou “pa devre asosye [nou] avek personn ki annan non frer, si i annan en lavi imoral, ki anvye, ki en ladorater zidol, ki kalomni son prosen, ki en soular ou en voler; pa ni menm manz avek en tel dimoun.” (1 Kor. 5:11, 13, nou ki’n met an italik.) Zot osi realize ki sa mo “personn” dan sa verse i enkli manm nou prop fanmir ki pa pe viv avek nou. Me zot telman kontan zot garson. Sa lanmour ki zot annan pour zot garson i kapab fer zot dir: ‘Ki mannyer nou kapab ed nou zanfan retourn kot Zeova si nou evite asosye net avek li? Pa nou pou kapab fer plis pour li si nou annan kontak avek li?’ *

14, 15. Ki paran i devret mazinen ler zot deside si zot pou koz avek zot zanfan ekskli?

¹⁴ Nou sagren ler nou mazin sa ki sa bann paran pe pas atraver. Apre tou, zot garson ti annan en swa, e i’n swazir pour pa viv en lavi Kretyen plito ki kontinyen benefisye avek sa relasyon pros avek son paran ek lezot Kretyen. De lot kote, sa paran pa’n kapab fer nanryen pour fer li sanz son desizyon. I toutafe normal ki zot santi zot dezespere!

¹⁵ Me ki sa paran Kretyen pou fer? Eski zot pou obeir gidans kler Zeova? I vre ki enn fwa dan rar i kapab neseser pour zot koz avek zot garson ki’n ganny ekskli, me eski zot pou mazinen ki zot bezwen koz avek li tanzantan e fer krwar sa bann lasosyasyon i vreman neseser? Kan zot fer sa desizyon, zot pa devret oubliye ki mannyer Zeova i santi lo sa ki zot pe fer. Zeova i oule ki son lorganizasyon i reste prop, e si i posib ankouraz sa peser pour retourn dan laverite. Ki mannyer bann paran Kretyen i kapab ede?

16, 17. Ki nou kapab aprann ler nou medit lo legzanp Aaron?

¹⁶ Aaron, frer Moiz ti bezwen fer fas avek en sityasyon difisil konsernan son de garson. Zis mazinen ki mannyer i ti’n bezwen santi li ler son de garson Nadab ek Abiou ti ofer en sakrifis ki Zeova pa ti aksepte e I ti touy zot. Byensir, ler zot ti mor, zot ti nepli kapab asosye avek zot paran. Me toudmenm, Zeova ti donn lezot lenstriksyon  avek Aaron ek son bann garson fidel: “Zot pa devret kit zot seve an dezord, e zot pa devret desir zot lenz [akoz dey], pour ki zot pa mor e ki [Zeova] pa ankoler avek sa lasanble an antye.” (Lev. 10:1-6) Mesaz i kler. Nou lanmour pour Zeova i devret pli for ki nou lanmour pour sa manm enfidel nou fanmir.

¹⁷ I vre, ozordi Zeova pa direkteman egzekit sa bann ki kas son lalwa. Avek lanmour, i donn zot loportinite pour repantir zot pese. Me ki mannyer Zeova ti pou santi si paran en dimoun ki’n ganny ekskli dan kongregasyon ti kontinyen asosye avek li, menm si i pa neseser?

18, 19. Ki benediksyon bann manm fanmir ki swiv gidans Zeova konsernan bann dimoun ki’n ganny ekskli dan kongregasyon i gannyen?

¹⁸ Bokou ki’n ganny ekskli dan lepase in rekonnet ki latitid ferm zot fanmir ek zanmi in ed zot pour retourn dan kongregasyon. Konsernan en zenn madanm ki ti anvi retourn dan kongregasyon, bann ansyen ti ekrir ki en rezon akoz i ti aranz son lavi ti akoz son frer ti respekte sa desizyon ler i ti ganny ekskli. I ti dir ki “fidelite son frer anver bann prensip Labib ti ed li e donn li sa lanvi pour li retournen.”

¹⁹ Ki konklizyon nou devret tire? Vi ki nou annan sa tandans pour rezet bann konsey sorti dan Labib, nou devret lalit avek sa move latitid. Nou devret san poursan konvenki ki lafason ki Zeova i adres sa problenm i pli meyer.

“Parol Bondye i vivan”

20. Nonm de fason ki Ebre 4:12 i kapab ganny aplike. (Vwar not anba lo paz.)

²⁰ Ler Pol ti ekrir ki “Parol Bondye i vivan,” i pa ti pe refer spesifikman avek Labib. * Konteks i montre ki i ti pe refer avek bann promes ki Bondye i fer. Pwen ki Pol ti oule fer resorti se ki Bondye pa fer en promes ki i bliye apre. Zeova ti fer sa kler atraver profet Izai: “Mon parol . . . pa pou retourn kot mwan san rezilta, me i pou . . . sirman annan sikse pour sa rezon ki mon’n anvoy li.” (Iza. 55:11) Alor, i napa rezon pour nou enpasyan kan keksoz pa mars osi vit ki nou ti a voudre. Zeova i “touzour travay” pour ki son plan i ganny akonplir avek sikse.​—Zan 5:17.

21. Ki mannyer Ebre 4:12 i kapab vin en sours lankourazman pour bann frer ek ser aze ki fidel parmi “gran lafoul”?

²¹ Bann serviter aze ki fidel parmi sa “gran lafoul” in servi Zeova pour plizyer lannen. (Rev. 7:9) Bokou pa ti krwar si zot ti pou vin vye dan sa lemonn. Toudmenm, zot pa’n dekouraze. (Ps. 92:14) Zot konpran ki promes Bondye pa en keksoz anler anler, son parol i vivan e Zeova pe travay pour realiz son promes. Vi ki pour Zeova, son plan i vreman enportan, i kontan ler i vwar nou pran li aker. Pandan sa setyenm zour oubyen repo Bondye, Zeova i annan konfyans ki son plan pou ganny akonplir e ki an zeneral son pep pou azir an armoni avek son plan. Me ou, eski ou pou antre dan repo Bondye?

[Not anba lo paz]

Eski ou’n byen konpran?

• Ki nou devret fer pour nou antre dan repo Bondye ozordi?

• Ler nou konpran plan Bondye, ki mannyer nou pou montre ki nou pare pour aksepte konsey sorti dan Labib?

• Dan ki laspe nou lavi, obeir bann gidans sorti dan Labib i kapab difisil, me akoz i enportan ki nou obeir?

• Ki sa de fason ki nou kapab aplik Ebre 4:12?

[Kestyon]

[Portre lo paz 31]

Son paran i dezespere!