Reikémapa nde Ñandejára opytuʼuhápe?

‘Ñandejára ñeʼẽ oikove ha ipuʼaka.’ (HEB. 4:12, ÑÑB)

1. Mbaʼépa jajapovaʼerã jaike hag̃ua Ñandejára opytuʼuhápe, ha mbaʼérepa ijetuʼu jepi upéva?

JAHECHA haguéicha pe ótro artíkulope, jaike hag̃ua Ñandejára opytuʼuhápe ñaneñeʼẽrenduvaʼerã chupe ha jajapo hembipota. Péro sapyʼánte ijetuʼu upéva. Pór ehémplo, mbaʼépa jajapóne jahechakuaáramo ñandegustaha peteĩ mbaʼe Jehová ndoguerohorýiva? Ñañemohatãtapa upévape nañakambiaséigui? Jajapóramo upéicha ndajahechaukamoʼãi ‘ñaneñeʼẽrenduseha’ (Sant. 3:17). Ko artíkulope ñahesaʼỹijóta mbaʼéicha javépa ikatu jahechauka ñaneñeʼẽrenduha Jehovápe opa mbaʼépe ha jajaposeha hembipota.

2, 3. Mbaʼépa jajapovaʼerã ñaime porã hag̃ua Jehová renondépe?

² Hasýpa sapyʼánte ñandéve jajapo umi konsého oñemeʼẽva Ñandejára Ñeʼẽgui? La Biblia heʼi Ñandejára ombyatyseha ‘umi mbaʼe iporãva opa tetãgui’. Umíva hína umi tapicha Ñandejára oguerohorýva ohayhúgui tekojoja (Ageo 2:7, NM). Jaʼe porãsérõ g̃uarã, ñañepyrũ mboyve jastudia la Biblia jajapovaʼekue heta mbaʼe ivaíva. Péro upéi jaikuaa Jehová ha Jesucrístope, ha jahayhu  rupi chupekuéra tuicha ñakambia. Oiméne heta ñañemboʼe ha ñañehaʼãraʼe Ñandejára ñandeguerohory hag̃ua, ha upéi katu javyʼaiterei ikatúma haguére jajevautisa (elee Colosenses 1:9, 10).

³ Jaʼekuaápa upéicharõ natekotevẽveimaha ñañehaʼã jajevautisa rire? Nahániri. Ñande ñaneimperfékto ha ñañehaʼã meme vaʼerã. Péro jaikuaa porã jajapóramo ikatúva guive, Jehová ñanepytyvõtaha akóinte ñaime porã hag̃ua henondépe.

Ñahendúkena umi konsého

4. Mbaʼe mbaʼérepa ojevale Jehová oñemoñeʼẽ hag̃ua ñandéve?

⁴ Ikatu hag̃uáicha ñambohovái umi mbaʼe ijetuʼuvéva ñandéve, jaikuaa raẽ vaʼerã mbaʼépepa ñanekangy. Mbaʼéichapa Jehová ñanepytyvõ upearã? Ojevalekuaa peteĩ diskúrso ikatúvare ñanemomýi jajepyʼamongeta hag̃ua ỹrõ peteĩ artíkulo opokóvare ñanderehe. Péro ndajahechakuaáirõ pe konsého térã ndajajapóiramo, Jehová ikatu avei oiporu ermanokuérape oñemoñeʼẽ hag̃ua ñandéve (elee Gálatas 6:1).

5. Mbaʼérepa umi ansiáno oipytyvõvaʼerã ermanokuérape, ha mbaʼépa ndajajapoivaʼerã oñemoñeʼẽ jave ñandéve?

⁵ Sapyʼánte nañahenduséi ñande rapichápe oñemoñeʼẽ jave ñandéve, ojapóramo jepe pyʼaporãme ha hekopete. Mbaʼérepa? Jaikuaágui iñimperfektoha avei ñandéicha. Upéicharõ jepe, ñanemanduʼavaʼerã Jehová voi omandaha umi ansiánope: ‘Peipytyvõ [ermanokuérape] oiko porã jey hag̃ua ha pejapo upéva pyʼaporã reheve’, térã mborayhúpe (Gál. 6:1, BNP). Ñahendúramo haʼekuéra heʼíva, oikóta ñandehegui peteĩ ‘mbaʼe iporãva’ Ñandejárape g̃uarã, haʼe ñandeguerohorýta. Añetehápe ñañemboʼe jave ndahasýi jaʼe Jehovápe jajavyha, péro hasy jepi jahechakuaa hag̃ua upéva peteĩ ansiáno heʼíramo ñandéve. Ikatu voi jaʼe: “Mbaʼérepa oimevaʼerã heʼi chéve upéicha”. “Heʼi vai guasu chéve.” “Vyroreieterei ningo pe ajapóva.” Térã, “haʼéko ni ndoikuaái mbaʼépa che ahasaʼaína” (2 Rey. 5:11). Ha oñemoñeʼẽ jave ñandéve ñande rogayguáre, ñañemonde lájare, ñanepotĩve hag̃ua térã umi vyʼarã Jehová ndoguerohorýivare, ikatu voi ñandepochy ha ñamoñeñandu vai pe ermánope. Péro ñapensa porã rire jahechakuaa jajapo vai hague ha ñaikotevẽha upe konsého.

6. Mbaʼéichapa Ñandejára ñeʼẽ ohechauka ‘ñane pensamiénto ha ñande pyʼapy rembipota’?

⁶ Pe téysto omopyendáva ko artíkulo heʼi: ‘Ñandejára ñeʼẽ [...] ipuʼaka’. Upéva heʼise ikatuha ñanepytyvõ ñakambia hag̃ua heta mbaʼépe, tahaʼe jajevautisa mboyve térã upe rire jepe. Upe versíkulope Pablo heʼi avei: ‘Ñandejára ñeʼẽ [...] oike ánga ha espíritu paʼũ meve, ombojaʼo peve kangue joajuha ha karaku, ombojovake avei ñane pensamiénto ha ñande pyʼapy rembipota’ (Heb. 4:12). Koʼápe ‘ánga’ heʼise pe ñande rapichakuéra ohecháva ñanderehe, ha ‘espíritu’ katu heʼise mbaʼeichaguápa ñande térã umi mbaʼe oĩva ñande pyʼapýpe. Mbaʼépa ontendekase ñandéve Pablo? Ñahesaʼỹijo jave la Biblia jahechakuaa mbaʼépa Jehová ohaʼarõ ñandehegui, upéi umi mbaʼe jajapóva jaikuaa rire koʼã mbaʼe ohechauka mbaʼeichaguápa ñande. Ñapensami, ojekuaápa ñane rembiapóre mbaʼépa oĩ ñande pyʼapýpe? (Elee Mateo 23:27, 28.) Jahechamína mbaʼépa jajapóne koʼã situasiónpe.

Jaikókena Jehová organisasión heʼiháicha

7, 8. a) Mbaʼérepa oĩvaʼekue kristiáno hudío oñemohatãva pe Léi yma guarépe? b) Mbaʼérepa jaʼekuaa oñemoĩha hikuái Ñandejára rembipotáre?

⁷ Heta oĩ oikuaa porãva mbaʼépa heʼi Proverbios 4:18: “Ipotĩva rape koʼẽtĩcha hesakã, ha hesakãve ohóvo omimbipa peve”.  Ko téysto ohechauka hesakãveha ohóvo Ñandejára rembipota ha tekotevẽha jepi ñakambia heta mbaʼe ñande rekovépe ha ñambopyahu umi mbaʼe jaikuaáva.

⁸ Pe artíkulo ohasavaʼekuépe jahechákuri Jesús omano rire, heta hemimboʼe hudío okumpliseha gueteri pe Léi oñemeʼẽvaʼekue Moiséspe (Hech. 21:20). Umi kuatiañeʼẽ Pablo ohaivaʼekuépe ohechauka porã kristianokuéra natekotevẽveimaha ojapo upe Léi heʼíva, péro heta oĩ nopenaivaʼekue hese (Col. 2:13-15). Mbaʼérepa? Oiméne opensáraʼe okumplíramo pe Léi, umi ambue hudío noñemoĩmoʼãiha hesekuéra. Pablo ohaírõ guare Hebreos, omyesakã porã tekotevẽtereiha ojejapo Jehová rembipota iñorganisasiónpe ojejerureháicha upe tiémpope, upéicharõ añoite ikatúta ojeike Ñandejára opytuʼuhápe (Heb. 4:1, 2, 6; elee Hebreos 4:11). * Oĩ porãséramo hikuái Ñandejára ndive, ohechakuaavaʼerã Jehová oisãmbyhymaha hembiguaikuérape peteĩ tape pyahúre.

9. Mbaʼépa jajapo tembiguái jeroviaha omyesakãramo ambue hendáicha peteĩ mbaʼe oĩva la Bíbliape?

⁹ Ñane tiémpope jahecha avei oñemyesakãveha ohóvo heta mbaʼe omboʼéva la Biblia. Koʼã mbaʼe ñanembovyʼa ha koʼýte jajerovia pe tembiguái jeroviaha ha iñarandúvare. Cuerpo Gobernante, oñeʼẽva ko tembiguái rérape, ohecha oĩ porãpa umi mbaʼe jagueroviáva ha okorrehi tekotevẽramo. Haʼekuéra ndokyhyjéi oñeñeʼẽ vaírõ g̃uarã hesekuéra ojapo haguére upéva. Koʼã ermánope g̃uarã iñimportanteve omyesakã porã mbaʼéichapa oñekumpli ohóvo Ñandejára rembipota. Ha ñande, mbaʼépa jaʼe oñemyesakãramo koʼág̃a ambue hendáicha peteĩ mbaʼe oĩva la Bíbliape? (Elee Lucas 5:39.)

10, 11. Mbaʼépa oiko Jehová organisasión heʼírõ guare ojepredika hag̃ua ambue hendáicha, ha mbaʼépa ñanemboʼe upéva?

¹⁰ Jahechamína koʼág̃a ambue situasión. Opakuévo síglo 19 ha oñepyrũvo síglo 20, oĩvaʼekue Estudiante de la Biblia oñeʼẽkuaaitereíva, ha oimoʼã opredika porãveha ojapóvo diskúrso. Oñeʼẽseterei voi hikuái umi hénte atýpe ha koʼýte ovyʼa oĩramo omongeleʼéva chupekuéra. Péro upe rire Ñandejára organisasión ohechakuaa Jehová oipotaha avei ojepredika ogahárupi. Upérõ heta ermáno ikatupyrýva ojapo hag̃ua diskúrso, oñemohatã ha ndopredikaséi upéicha. Haʼekuéra haʼete vaʼekue ojerovia mbarete ha oñemeʼẽmbaitéva Jehová servísiope, péro ojeʼévo chupekuéra mbaʼéichapa Jehová oipota ojepredika, ohechauka mbaʼépa añetehápe oreko ipyʼapýpe. Ndosegiséigui Jehová heʼíva opyta vai hikuái henondépe ha oñemomombyry iñorganisasióngui (Mat. 10:1-6; Hech. 5:42; 20:20).

¹¹ Péro mbaʼépa ojapo umi iñeʼẽrendúva? Ndahasýipa chupekuéra opredika hag̃ua ogahárupi? Ñepyrũrã ijetuʼueterei, péro oñehaʼã ojapo hikuái Jehová organisasión heʼíva. Mbeguekatúpe ipyʼaguasuvéma ha Jehová tuichaiterei ovendesi chupekuéra. Ha nde, mbaʼépa rejapo Jehová organisasión heʼi jave japredika hag̃ua ambue hendáicha? Reñehaʼãpa rejapo péicha?

Peteĩ jahayhúva ohejáramo Jehovápe

12, 13. a) Mbaʼérepa Jehová oipota oñemosẽ kongregasióngui umi hembiapo vai ha noñembyasýivape? b) Mbaʼépa ijetuʼueterei sapyʼánte tuvakuérape?

¹² Jaikuaaháicha Jehová oguerohory umi ipotĩvape opa mbaʼépe ha peichaguápe añoite oheja oĩ iñorganisasiónpe (elee Tito 2:14). Sapyʼánte ikatu ijetuʼu ñandéve jajapo haʼe heʼihaichaite. Ñapensamína peteĩ ehémplore: peteĩ sy ha túva oservi porãva Jehovápe ohecha mbaʼéichapa ifamília peteĩmi  oho tape vaíre. Pe mitãrusu omboyke Ñandejára ha ituvakuérape oikosevégui pekádo “omeʼẽva vyʼa sapyʼaitegua” poguýpe, upéicha rupi oñemosẽ kongregasióngui (Heb. 11:25, JMP).

¹³ Ituvakuéra ningo opyta vaieterei anga, péro oikuaa porã hikuái mbaʼépa heʼi la Biblia koʼã mbaʼére: ‘Ani pejeheʼa oimeraẽ heʼívare ñane pehẽngueha ha ojeity tekovaípe, itaryrýi, omombaʼe taʼanga, oñeʼẽ rei hapicháre, ikaʼu térã imonda. Umichagua ndive ani voi ni pekaru’ (1 Cor. 5:11, 13). Haʼekuéra oikuaa porã la Biblia heʼi jave ‘oimeraẽva’ heʼiseha avei ifamília ndoikóiva hendivekuéra hógape. Péro upéva ijetuʼu chupekuéra ohayhueterei rupi ifamíliape ha ikatu voi heʼi: “Mbaʼéicha piko roipytyvõta chupe oñemoag̃ui jey hag̃ua Jehováre ni noroñeʼẽiramo hendive? Naiporãvemoʼãi piko roñeʼẽ mimíramo chupe?”. *

14, 15. Mbaʼépa odesidivaʼerã tuvakuéra ifamília oñemosẽramo kongregasióngui?

¹⁴ Ñande ñambyasyeterei umi túva ohasávape koʼã mbaʼe. Jaikuaa ningo ndahaʼeiha oipotágui oikóva hesekuéra péicha. Pe mitãrusu ikatúkuri ohendu ojeʼéva chupe, péro odesidi oho tape vaíre oikuaáramo jepe upéva omomombyrytaha chupe ituvakuéra ha kongregasióngui. Ndareíriko péicha jave sy ha túva oñeñandu vai ha ndaikatúi ojapo mbaʼeve.

¹⁵ Péro haʼekuéra odesidivaʼerã iñeʼẽrendútapa Jehovápe ha ojapo oñehaʼarõva chuguikuéra. Sapyʼánte tekotevẽta oñeʼẽ ifamília ndive, péro péva ndeʼiséi ikatuha oñemongeta hendive oimeraẽ mbaʼére ha oimeha órante. Odesidi jave hikuái mbaʼépa ojapóta, nomboykeivaʼerã Jehová heʼíva. Haʼe oipota oñemosẽ kongregasióngui umi hembiapo vai ha noñembyasýivape. Mbaʼérepa? Ipotĩ hag̃ua iñorganisasión ha ikatúramo pe ojavyvaʼekue ohechakuaa hag̃ua iporãvetaha oñemoag̃ui jey hese. Mbaʼépa tuvakuéra ojapovaʼerã oiko hag̃ua upéva?

16, 17. Mbaʼépa ñanemboʼe Aarón ohasavaʼekue?

¹⁶ Aarón ohasavaʼekue upeichagua situasión. Mokõi itaʼýra, Nadab ha Abihú oikuaveʼẽ insiénso hendapeʼỹ, upévare Jehová okastiga chupekuéra ha omano. Oiméne hasyete itúvape oikuaávo arakaʼeve ndaikatumoʼãveimaha oñeʼẽ ni oĩ hendivekuéra. Hiʼarive Jehová heʼi Aarón ha umi ótro itaʼýrape ani hag̃ua ohechauka ombyasyha pe oikóva: “Ani peiko akãchara térã pemondoro pende ao pehechauka hag̃ua peñembyasyha, cháke pemanóne ha Ñandejára ipochýne opa Israelgua ndive” (Lev. 10:1-6). Mbaʼépa ñanemboʼe ko mbaʼe oikovaʼekue? Jahechaukavaʼerã jahayhuveha Jehovápe oimeraẽvagui, tahaʼe  jepe ñane hénte, koʼýte hembiapo vai ha noñembyasýiramo, ndovaléi ñamotenonde chupekuéra.

¹⁷ Koʼág̃a rupi Ñandejára ndokastigavéima upepete voi umi naiñeʼẽrendúivape yma ojapo haguéicha. Oporohayhúgui, omeʼẽ tiémpo pe hembiapo vaívape ikatu hag̃uáicha ohechauka oñembyasyha. Upéicharõ ne família oñemosẽramo kongregasióngui ohechauka noñembyasýi hague. Mbaʼéichapa oñeñandúne Jehová ohechávo tuvakuéra naiñeʼẽrenduiha chupe ha ojeheʼa meme ifamília oñemosẽvaʼekuére?

18, 19. Mbaʼépa ikatu ohupyty kristianokuéra otratárõ Jehová heʼiháicha umi oñemosẽvape kongregasióngui?

¹⁸ Heta kristiáno oñemosẽvaʼekue kongregasióngui heʼi ou jey hague ihénte ha iñamigokuéra noñeʼẽiete rupi chupekuéra. Pór ehémplo peteĩ mitãkuña omombeʼu ansianokuérape ‘iñermáno orrespeta hague la Biblia heʼíva umi oñemosẽvare kongregasióngui’, ha upéva oipytyvõ hague chupe okambia hag̃ua. Haʼe ‘ohechakuaa iñermáno iñeʼẽrenduha Jehovápe ha upéva omokyreʼỹ chupe ou jey hag̃ua Jehová organisasiónpe’.

¹⁹ Ko artíkulope jahecha ndovaleiha jaheja ipuʼaka ñanderehe umi mbaʼe ñañandúva. Sapyʼánte ijetuʼúramo jepe jajapo la Biblia heʼíva, ñaneñeʼẽrenduvaʼerã katuete jaikuaágui Jehová heʼíva iporãveha ñandéve ñambohovái hag̃ua opa mbaʼe.

‘Ñandejára ñeʼẽ oikove’

20. Mbaʼéichapa ikatu ñantende Hebreos 4:12? (Ehecha avei pe nóta.)

²⁰ Pablo heʼírõ guare Hebreos 4:12-pe ‘Ñandejára ñeʼẽ oikove’, noñeʼẽivaʼekue la Bíbliare. Jaleepáramo pe kapítulo 4 jahecháta oñeʼẽ hague Jehová promesakuérare. * Upérõ Pablo ohechaukase Ñandejára heʼíva oñekumpliha katuete. Jehová voi heʼivaʼekue: “Péichata pe ñeʼẽ osẽva che jurúgui, ndojevymoʼãi cherendápe ojapoʼỹre che rembipota ha oikopa che haʼevaʼekue” (Isa. 55:11). Upéicharõ, ndajajepyʼapyivaʼerã oiméramo noñekumplipyaʼéi umi mbaʼe ñahaʼarõva. Jehová ningo “koʼág̃a peve ombaʼapohína” ha ohóta hese okumplipa peve hembipota (Juan 5:17, ÑÑB).

21. Mbaʼéichapa Hebreos 4:12 omokyreʼỹ umi ermáno ijedávape, oĩva pe ‘aty guasúpe’?

²¹ Heta ermáno oĩva pe “aty guasu” apytépe áñorema oservi Jehovápe (Rev. 7:9, ÑÑB). Oĩ umi noimoʼãiva ituja térã ig̃uaig̃ui jepéta hague, upéicharõ jepe ndohejái upéva omokangy chupekuéra (Sal. 92:14). Mbaʼérepa? Oikuaágui ‘Ñandejára ñeʼẽ oikoveha’. Jehová ningo ombaʼapohína oñekumpli hag̃ua opa mbaʼe oprometevaʼekue. Chupe g̃uarã tuichaiterei mbaʼe hembipota ha ovyʼa oikuaávo ñandéve g̃uarã upeichaha avei. Ko ára sietehápe Jehová opytuʼuhína okumplipaite hag̃ua hembipota ha oikuaa porã hembiguaikuéra oikotaha haʼe oipotaháicha. Jahecháma haguéicha opavave ikatuhína jaike Ñandejára opytuʼuhápe. Reikémapa nde upépe?

[Nóta]

Ñanemanduʼa hag̃ua

• Mbaʼépa jajapovaʼerã jaike hag̃ua Ñandejára opytuʼuhápe?

• Mbaʼéichapa jahechauka jajaposeha Ñandejára Ñeʼẽ heʼíva?

• Mbaʼépepa ikatu ijetuʼu ñandéve jajapo Ñandejára heʼíva, ha mbaʼérepa tekotevẽ ñaneñeʼẽrendu?

• Mbaʼéichapa ikatu ñantende Hebreos 4:12?

[Porandu ñahesaʼỹijóva]

[Nóta oĩva taʼanga ndive páhina 31]

Tuvakuéra oñeñandu vaieterei