¿Diospa hamakïninchönaku këkanki?

“Dyospa palabranqa kawaqmi i alläpa allim.” (HEB. 4:12, QKW.)

1. ¿Imatataq rurashwan Diospa hamakïninchö kanapaq, y imanirtaq höraqa sasa o aja kanman?

QEPA kaq yachatsikïchömi rikarqantsik Diospa hamakïninman yëkunapaqqa wiyakoq y Diospa munëninmannö imatapis ruranantsikpaq kaqta. Tsënö kaptimpis, manam fäciltsu tsënö rurananqa. Këllaman pensarishun, itsa ima rurëpis alläpa gustamashwan, pero ¿Jehová chikinqanta musyarirqa rasllatsuraq haqirishwan? Tsënö mana rurarqa manachi “wiyacoq” nunatsu kashwan (Sant. 3:17). Kë yachatsikïchömi rikäshun imakunapa pasarpis Dios munanqannö kawëta munanqantsikta rikätsikunapaq kaqta.

2, 3. ¿Imatataq wanantsik Jehoväta kushitsinapaq?

 ² ¿Höraqa sasaku Biblia consejakunqannö ruranantsik? Bibliaqa nimantsik “llapan nacionkunachö allin kaqkunata” o alli rurëkunata kuyaqkunata alläpa väleqtanö rikar Diosnintsik ëllïta o gorïta munanqantam (Ageo 2:7). Rasumpa kaqchöqa, Jehoväta manaraq reqirqa tukï mana allikunata ruraqmi karqantsik. Pero Jehoväta y Tsurin Jesucristuta kuyarmi portakïnintsikchö y pensënintsikchö tukï cambiokunata rurarqantsik. Diospa shonqunta kushitsita munarchi tukïta rurarnin sinchikurqantsik y pëta mañakurnin tsë rurëkunata haqirqantsik. Y tsëpitaqa kushishqam bautizakï hunaqman chärirqantsik (lei Colosenses 1:9, 10).

³ Pero ¿tsëta rurarllaku llapan mana alli rurënintsikta haqirirqantsik? Manam. Hutsasapa kanqantsikyaqqa sinchikïkänantsikllam Diosta kushitsinapaq. Ruranqantsikchö mana qelanärishqaqa, shonqunta kushitsinapaq cada hunaq sinchikunqantsiktam Jehová bendecimunqa.

Consejamashqa wiyakushun

4. ¿Imanötaq Jehová consejamantsik?

⁴ Mana alli këkanqantsikta musyanapaqqa, puntataqa imachöpis pishipanqantsiktam rikänantsik. Tsëta musyanapaq, ¿imanöraq Jehová yanapamashwan? Huk yachatsikïwan o huk shumaq discursowanmi. Pero wiyanqantsikta mana rurashqaqa o mana entiendeshqaqa, cristiano mayintsiktawanmi yarpäratsimantsik (lei Galatas 6:1).

5. ¿Imanirtaq anciänokuna cristiano mayinkunata yanapayanman, y consejamashqa imatataq rurashwantsu?

⁵ Yachëpa y kuyakïpa pï consejamashqapis, hutsata ruraq kaptinmi rasllaqa wiyakuntsiktsu. Pero yarpänantsikmi congregacionchö anciänokunata consejamänapaq Jehová churanqanta, pëkunaqa “Santu Espiritupa munenincho quecaqcuna[tam] shumaq mana penqapashpa” willapäyan (Gal. 6:1). Consejamanqantsikkunata wiyakurqa, Diospa rikënimpaqmi ‘allin kaqkuna’ këkantsik. Jehoväwan parlarqa mana penqakushpam hutsata ruranqantsikta willantsik. Pero huk anciano mana allita rurëkanqantsikpita parlapäramashqaqa manam wiyëtapis munantsiktsu. Itsa parlapäramanqantsikta o sinchipa niramanqantsikta piñakur qallëkushwan o mana kaqpaq churarishwan (2 Rey. 5:11). Hina familiantsik mana alli portakunqanrëkur, mana alli vestikunqanrëkur, mana limpio kayanqanrëkur o kushikuyänampaq rurayanqankuna cristiänokunapaqnö mana kanqanrëkur consejamashqa itsa piñakushwan o consejamaqnintsikta imanöpapis llakitsishwan. Pero tsëpita alleq pensarishqaqa, cuentatam qokurintsik mana allipa contestanqantsikta y kikintsikpaq consejamanqantsikta.

6. ¿Imanötaq Diospa Palabran rikätsikun ‘yarpeynintsikta y shonquntsikpa muneyninta’?

⁶ Qallanan tïtulochö textoqa ‘Dyospa palabran alläpa alli’ kanqantam yarpätsimantsik. Awmi, manaraq bautizakurnin y bautizakunqantsikchöpis kawënintsikchö tukïta altsanapaqmi yanapamantsik. Hina kë textollachömi Pabluqa kënö nin: “Dyospa palabranqa [...] yeykurin almata i espirituta partirnin[mi], moqukunatapis i uruskunatapis yarpeykunatapis shonqupa muneynintapis rikakärätsinmi” (Heb. 4:12, QKW). Këchö ‘alma’ nishpa parlarqa, hananllapa imanöpis kanqantsikpaqmi parlëkan, y ‘espiritu’ nirqa shonquntsikchö imanöpis kanqantsikpaqmi. ¿Këwanqa imä nïtataq Pablu munëkarqan? Biblia ninqanta y Dios mañamanqantsikta musyarirnin rurënintsikwan wiyakunqantsikta o mana wiyakunqantsikta rikätsikunqantsikpaqmi. Y, ¿imanötaq noqantsikqa këkantsik? ¿Hanampa kanqantsiknöllaku shonquntsikchöpis këkantsik? (Lei Mateo 23:27, 28.) Pensarishun mä imatash rurashwan këkunapa pasarnin.

Jehoväpa markan dirigimanqantsikpa ëwashun

7, 8. a) ¿Imanirtaq wakin cristiänokunaqa Moisespa Leyninllata wiyakïta munëkäyarqan? b) ¿Imanirtaq Jehoväpa munënimpa contranmi rurëkäyarqan nintsik?

⁷ Itsa llapantsikchi Proverbios 4:18 texto ninqantaqa alleq musyantsik, kënömi nin: “Alli ruraqkunapa kawëninqa patsa warämuptin  hora ëwanqanmannö atsikyënömi más y más atsikyan imëkapis rikakanqanyaq”. Këmi rikätsimantsik portakïnintsik y Diospa munënimpita yachakunqantsikkunaqa watakuna pasanqanmannö más alliyanqanta.

⁸ Qepa kaq yachatsikïchömi yachakurqantsik Jesus wanuriptimpis wakin cristiänokunaqa unë Leykunata qatita munayanqanta (Hech. 21:20). Qellqanqan cartakunachömi Pablu shumaq willakurqan tsë Leyta cristiänokuna manana wiyakuyänampaq kaqta, pero wakinqa manam Pabluta cäsoyarqantsu (Col. 2:13-15). ¿Imanir? Itsachi pensayaq tsë Leykunata mana wiyakuyaptinqa judïokuna chikir qatikachäyänampaq kaqta. Hebreukunaman cartakunqanchömi Pablu rikätsikurqan tsë witsan Jehoväpa hamakïninman yëkuyänampaqqa, markanta diriginqanmannö imatapis rurayänampaq kaqta (Heb. 4:1, 2, 6; lei Hebreus 4:11). * Diospa kuyakïninchö këta munarqa, markanta huknöpana dirigïkanqantam wiyakuyänan karqan.

9. ¿Imanötaq rikantsik mäkoq mäkoq Bibliapa yachatsikïninkunata más allina musyayanqanta yachatsikayämuptin?

⁹ Kanan witsampis rikarquntsikmi Bibliapa yachatsikïninkunata más clärona yachatsikayämunqanta. Këkunata mana allitanö rikänantsikpa rantinmi, mäkoq mäkoq sirveqman más markäkunapaq o yärakunapaq yanapamantsik. Mäkoq mäkoqpa shutinchömi Jehoväpa Testïgonkunata Pushaqkunaqa yachatsikäyamun. Pëkunam unë watakuna yachatsikayämunqanta más clärona käyirirqa nunakuna ima niyänan kaptimpis raslla willakarayämun. Kë cristiänokunapaqqa más precisan Diospa munënin ichikllapa ichikllapa más clärona rikakanqanmannö rurëmi. Y noqantsikqa, ¿imanötaq rikantsik Bibliapa yachatsikïninkunata más clärona rikäyanqanta yachatsikayämuptin? (Lei Lucas 5:39.)

10, 11. ¿Imatataq yachakuntsik huknöpa Diospita yachatsikuyänampaq unë niyanqampita?

¹⁰ Huk pasakunqanta rikärishun. 1800 watakunapa ushananchö y 1900 watakunapa qallananchömi, parlë yachaq unë Biblia Estudiaqkuna —o Jehoväpa testïgonkuna— alli discursokunata rurarlla yachatsikuna kanqanta creiyaq. Discursokuna rurëtam alläpa gustayaq, y wakinqa tsënö yachatsikuyanqampita alabapäyaptinmi kushikuyaq. Tsënö kaptimpis Diospa munëninqa karqan wayin wayimpis yachatsikuyänanmi, tsëtam Diospa markanqa musyarirqan. Tsëmi tsënö yachatsikuyänampaq niyaptin discursokunawan wakin alli yachatsikoqkunaqa wayin wayin yachatsikïta munayarqantsu. Diospa y Jesuspa munëninta ruraqnömi këkuyaq, pero Jehová imanöpis yachatsikuyänampaq kaqta tantearirqa, shonqunkunachö imanöpis kayanqantam rikätsikuyarqan. Tsënö kayanqampitam Diospa kuyëninchönatsu kayarqan y Jehoväpa markantapis haqiriyarqan (Mat. 10:1-6; Hech. 5:42; 20:20).

¹¹ ¿Imataq pasarqan Diospa munëninmannö ruraqkunataqa? ¿Fäciltsuraq karqan punkun punkun yachatsikuyänan? Manam. Wakinkunapaqqa alläpa sasa o ajam karqan. Tsënö këkaptimpis pëkunaqa wiyakuyarqanmi. Ichikllapa ichikllapam mantsakuyarqannatsu, y tsënö kayanqampitam Jehová bendicerqan. Y qamqa, ¿imatataq rurankiman huknöpana yachatsikunëkipaq niriyäshuptiki? ¿Churapakankimantsuraq niyäshunqëkinö yachatsikunëkipaq?

Kuyashqa kastantsik Jehoväta haqiriptin

12, 13. a) Hutsankunapita mana arrepentikoqkunata, ¿imanirtaq congregacionpita qarquriyänampaq Jehová mandakun? b) ¿Ima pasakuptintaq teytapaq y mamapaq sasa kanman Jehová mandakunqanta wiyakuyänan?

¹² Musyanqantsiknöpis, Jehoväpa kuyëninchöqa kayan cuerponkunachö, pensëninkunachö y Diosta adorayanqanchö limpio kaqkunallam (lei Titu 2:14). Pero këta wiyakïqa sasam kanman. Këllaman yarpärishun, itsa Jehoväta alli sirveq huk familia rikanman hapallanlla  wambran alli kaq yachatsikïta haqirinqanta. Kë jövenqa Jehoväwan y teytankunawan alli këta haqirirmi ‘etsanpa muneninta rurar juc ratu que patsacho gosacurita’ munan, tsënö kaptinmi congregacionpita qarquriyan (Heb. 11:25).

¹³ Teytanwan mamanqa alläpam llakikuyan. Pero pëkunaqa alleqmi musyayan Jehoväta haqireqkunata imanö rikäyänanta, Bibliam kënö nin: “Niyaq Teyta Jesucristuman creyiquicarna, jucwan jucwanraq pununacoqcunawan, qellepaq erayaqcunawan, imajincuna adoraqcunawan, wasa rimacunawan, borrachucunawan y suwacunawan mana juntacuyänequipaqmi. Ama pecunawanqa juntupis micuyëtsu” (1 Cor. 5:11, 13). “Jesucristuman creyiquicarna” nirqa, tsë wayillachö mana täraq kastakunapaqpis parlëkanqantam musyayan. Pero wambranta alläpa kuyarmi ima rurëtapis musyayantsu. Tsëqa itsa kënö tapukuyanman: “Wambrantsikta manana parlaparqa, ¿imanöraq Jehoväman kutinampaq yanapashwan? ¿Manatsuraq ichikllapis parlapärishwan?”. *

14, 15. ¿Imata rurayänampaqtaq teytakuna churapakäyanman wambranta congregacionpita qarquriyaptin?

¹⁴ Tsë teytakunanömi noqantsikpis llakikuntsik. Pëkunaqa manam kikinkuna munartsu tsënöpa pasayan. Teytanta, mamanta y congregacionta llakitsinanta musyëkarnimpis, wambranmi consejëkäyaptin munëninta rurakurnin congregacionpita kikin qarqukashqa. Rasuntachi teytanwan mamanqa alläpa llakikuyan y ima rurëtapis musyayantsu.

¹⁵ Pero teytanwan mamanqa, ¿Jehová mandakunqanta wiyakuyanqatsuraq? Rasunmi, höraqa familiachö imapis pasakuptinqa itsa wambranwan parlariyänan precisanqa. Pero ¿tsënatsuraq mana precisëkaptimpis wambranwan parlakuyanqa? Imatapis rurayänampaq churapakarqa Jehová ninqantam puntaman churayänan. Pëmi congregacionpita qarquyänampaq mandakun markan limpio kananta munar, y hutsa ruraq cuentata qokurirnin Diospa markanman kutinampaq. ¿Imanötaq teytawan mama yanapakuyanman Dios munanqannö rurakänampaq?

16, 17. ¿Imatataq yachatsimantsik Aaronta pasanqan?

¹⁶ Moisespa wawqin Aaronpis tsënöllapam pasarqan Nadab y Abihú tsurinkuna hutsallakuriyaptin. Jehovämi wanuratsirqan pë ninqannö inciensota mana kayayanqampita. ¡Imaraq teytanqa llakïkurqan pëkunata manana imëpis rikänan ni parlapänan kaptin! Pero manam tsëllatsu karqan. Aarontawan wakin tsurinkunataqa Jehová mandarqan Abihüpaqwan Nadabpaq mana llakiyänampaq ni waqayänampaqmi, këtam nirqan: “Manam peqëkikunata paqannita katsiyänëkitsu ni röpëkikunatapis rachiyänëkitsu, mana wanuyänëkipaq y llapan markanwan [Dios] mana piñakunampaq” (Lev. 10:1-6). Këwanqa alli clärom yachakuntsik, Jehovätam familiantsikpitapis más kuyanantsik, tsëqa masran kanman huk kastantsik hutsampita mana arrepentikuptinnäqa.

 ¹⁷ Kanan witsankunaqa, manam hinan höratsu Leyninkunata mana wiyakuyaptin Dios ushakäratsin. Kuyakïnin hatun kaptinmi hutsankunapita arrepentikuyänampaq tiempon qon. Pero huk wambrataqa congregacionpita qarquriyan hutsampita mana arrepentikushqa kaptinmi. Tsënö kaptinqa, ¿imaraq pasakunman teytankuna congregacionpita qarqushqa wambranwan mana precisëkaptin parlayaptinqa? ¿Manatsuraq Jehoväta pruëbaman churaq cuenta këkäyanman?

18, 19. Congregacionpita qarqushqa familianta Jehová ninqannö rikaq cristiänokuna, ¿ima kushikïtaraq chaskiyanman?

¹⁸ Congregacionpita qarqushqa kayanqampita atskaq kutimoqkunam willakuyan Jehová ninqanta wiyakurnin kastankuna y amïgonkunapis mana parlapäyanqan kutiyänampaq yanapayanqanta. Congregacionman huk shipash kutinampaq anciänokuna qellqarmi willakuyarqan “mayor kaq turin, congregacionpita qarqushqakunata imanö rikänapaq kaqta Jehová mandakunqanta wiyakunqan” kutinampaq yanapanqanta. Tsë shipashmi nirqan Biblia ninqanta turin wiyakunqan congregacionman kutinampaq yanapanqanta.

¹⁹ Kë yachatsikïchö rikanqantsiknömi, shonquntsik llakikunqanrëkurllaqa imatapis rurashwantsu. Biblia ninqan sasa o aja wiyakunan kaptimpis, Jehová ninqantam ruranantsik, porque pëllam musyan ima problëmapis imanö altsakänampaq kaqta.

“Dyospa palabranqa kawaqmi”

20. ¿Ima ishkë yachatsikïtataq Hebreus 4:12 textochö tarintsik? (Ichisaq letrawan qellqashqata rikärï.)

²⁰ Pablu Hebreus 4:12 textochö “Dyospa palabranqa kawaqmi” nirqa, manam kikin Bibliapaqtsu parlëkan. Wakin versïculokunam rikätsimantsik Dios awnikunqankunapaq parlëkanqanta. * Këchöqa rikätsikïta munëkarqan ninqankuna imëpis cumplikanqantam y lluta parlëkunalla mana kanqantam. Hina tsëllapaqmi Jehová parlëkarqan këta nirnin: “Noqa parlanqäqa ninqänöllam rurakanqa. Mana rurakarqa, manam noqaman kutimunqatsu, [...] llapan ninqäkunapis allim yarqunqa” (Isa. 55:11). Tsëmi pensanqantsiknö imapis raslla mana rurakaptinqa, yarpachakurllaqa kakushwantsu. Jehoväqa ‘kananyaqmi uryëkan’ y tsënöllam trabajëkanqa llapan munënin chipyë rurakanqanyaq (Juan 5:17, QKW).

21. ¿Imanötaq Hebreus 4:12 yanapan “mana yupetapis puedipaq” awkin kaq y chakwan kaq cristiänokunata?

²¹ “Mana yupetapis puedipaq” nunakunam atska chunka watakunana Jehoväta serviyan (Apo. 7:9). Atskaqmi chakwanyëman o awkinyëmanqa chëta pensayarqantsu, pero tsënö karpis Jehovätaqa manam haqiriyashqatsu (Sal. 92:14). ¿Imanir? Porque musyayanmi ‘Dyospa palabran kawaq’ kanqanta, y Jehová awnikunqankunata cumplinampaq trabajëkanqanta. Pëpaqqa munënin rurakänanqa alläpam precisan, y noqantsikpaqpis alläpa precisanqanta musyarmi kushikun. Qanchis hunaqchö kawanqantsikchöqa, Jehoväqa hamëkashqam llapan munënin cumplikänanta shuyarar y markampis pë munanqannö kawananta shuyarar. Rikanqantsiknömi, Jehoväpa hamakïnin hunaqmanqa llapantsik yëkïta puëdentsik. ¿Qamqa tsë hamakïninchönaku këkanki?

[Päginapa ura kuchunchö willakïkuna]

Yachakunqantsikta yarpärishun

• ¿Imatataq rurashwan Diospa hamakïninchö kanapaq?

• Diosnintsik noqantsikpita imata shuyaranqanta musyarqa, ¿imataraq Biblia consejakunqanwan rurashwan?

• ¿Imakunata pasartaq Diosllapaq kanqantsikta rikätsikuntsik, y imanirtaq precisan wiyakoq kanantsik?

• ¿Ima ishkë yachatsikïtataq Hebreus 4:12 textochö tarintsik?

[Yachakunapaq kaqpa tapukïninkuna]

[31 kaq päginachö dibüju]

Teytankunaqa alläpam llakikuyan