¿Yaykurunkiñachu Diospa samanan punchawman?

“Diospa palabranqa kawsachkanmi hinaspapas atiyniyoqmi” (HEB. 4:12).

1. ¿Imatam rurananchik Diospa samanan punchawman yaykunapaq hinaspa imanasqam sasa kanman?

ÑAWPAQ yachachikuypim qawarqanchik Diospa samanan punchawman yaykunapaq kasukunamanta hinaspa munayninman hina imatapas ruranamanta. Ichaqa sasamá chay rurayqa. Sichu imapas rurasqanchik Jehová Diospaq mana allin kaptinqa, ¿hinallachu rurachwan? Hinalla ruraspaqa manachá qawachichwanchu chaylla kasukuq kasqanchiktaqa (Sant. 3:17). Kay yachachikuypim qawasun imakunapim kasukuq kasqanchikta otaq Diospa munasqanman hina kawsay munasqanchikta qawachinamanta.

2, 3. ¿Imatam rurananchik Jehová Diosta kusichinapaq?

² ¿Sasachakunchikchu Bibliapa nisqankunata kasukunapaq? Bibliam nin Diosqa ‘qori-qollqe’ otaq allin ruray munaq runakunata  huñuy munasqanmanta (Hageo 2:7). Manaraq cheqap yachachikuyta reqsispaqa yaqa llapanchikmi mana allintachu kawsarqanchik. Ichaqa Jehová Diostawan Churinta anchata kuyaspanchikmi imayna kasqanchikta hinaspa rurasqanchikta cambiarqanchik. Yaqachá anchata kallpanchakurqanchik hinaspa mañakurqanchik Diosta kusichinanchikpaq. Chaymantañam bautizakuyta atirqanchik (leey Colosenses 1:9, 10).

³ Ichaqa, ¿manañachu kallpanchakuna? Pantaq kasqanchikraykum hinalla kallpanchakuna. Mana hukmanyaptinchikqa Jehová Diosmi yanapawasun sapa punchaw munasqanta rurananchikpaq.

Niwasqanchikkunata kasukusun

4. ¿Imakunatam Diosqa servichikun yachachiwananchikpaq?

⁴ Imapi pantasqanchikta atipanapaqqa yachananchikmi mayqan kasqanta. ¿Imaynatam Jehová Dios yanapawanchikman? Servichikunmanmi yuyaymanachikuq discursokunata otaq sonqonchikman chayaq yachachikuykunatapas. Chay uyarisqanchikta mana entiendeptinchikqa iñiqmasinchikkunatapas servichikunmanmi yuyarichiwananchikpaq (leey Galatas 6:1).

5. ¿Imanasqam ancianokunaqa iñiqmansinkunata yanapananku hinaspa imakunatam mana ruranachu imatapas niwaptinchik?

⁵ Sasam hukkunapa niwasqanchikta kasukuyqa, ñoqanchik hina pantaq kasqankurayku. Chayna kaptinpas Jehová Diosmi ancianokunata kamachin iñiqmasinkunata ‘llampu sonqollawan’ yanapanankupaq otaq correginankupaq (Gal. 6:1). Nisqankunata kasukuspaqa ‘qori-qollqemantapas’ aswan valorniyoqmi kasun Diospa ñawpaqninpiqa. Paywan rimaspaqa pantaq kasqanchikmantam chaylla reqsikunchik. Ichaqa pantarusqanchikmanta ancianokuna niwaptinchikqa sasachakunchikmi reqsikunapaq. Ichapas niwasqanchikkunamanta hukmanyaruchwan hinaspa mana allinta rimaruchwan nanay simiwan rimasqanmanta otaq imakunatapas nispa mana kasukuchwanchu (2 Rey. 5:11). Sichu rikchayninchikmanta, mana limpio kasqanchikmanta, mana allinkunawan kusikusqanchikmanta hinaspa familianchik imayna kawsasqanmanta niwaptinchikqa yaqapaschá piñakunchikraq hinaspa sientichinchikraq. Ichaqa niwasqanchikkunapi allinta yuyaymanaspaqa allinninchikpaq kasqantam reqsikunchik.

6. ¿Imaynatam Diospa palabranqa ‘piensasqanchikkunatawan munapayasqanchikkunata reqsichin’?

⁶ Qallariyllapi textom yuyarichiwanchik ‘Diospa palabran [. . .] atiyniyoq’ kasqanmanta. Yanapawanchikmi vidanchikpi cambianapaq, manam bautizakunallapaqchu yanapawanchikqa aswanmi bautizakusqanchik qepatapas. Hina chay textollapim Pablo nirqa: “Diospa palabranqa [. . .] runamanpas yaykun almankamaraqmi hinaspa espiritunkamaraqmi. Tullunpa piezankunatawan chilinankunata kuchuq hinaraqmi hinaspapas piensasqankunatawan munapayasqankunata reqsichiqmi”, nispa (Heb. 4:12). ‘Alma’ nispanqa rimachkanmi hawanchikpi imayna kasqanchikmanta, ‘espirituñataqmi’ qawachin ukunchikpi imayna kasqanchikmanta. ¿Imatam Pablo niyta munachkarqa? Bibliata estudiaspa hinaspa ñoqanchikmanta Dios ima munasqanta entiendespa imayna chaskisqanchikmi qawachin imayna kasqanchikta. ¿Imatam nichwan sapakamamanta? ¿Hawanchikpi imayna kasqanchik tupanchu ukunchikpi imayna kasqanchikwan? (Leey Mateo 23:27, 28.) Piensasun imakunatam rurachwan qatiqnin yachachikuykunapi.

Diospa llaqtanwan kuska risun

7, 8. a) ¿Imanasqam wakin judio cristianokuna hinalla Moisespa chaskisqan Kamachikuykunapi hapipakurqaku? b) ¿Imanasqam ninchik Diospa munayninman hina mana rurasqankuta?

⁷ Yaqa llapanchikmi allintapuni reqsinchik Proverbios 4:18 kayna nisqanta: “Allin ruraqkunapa vidanqa chayraq achikyamuchkaq  hinam. Inti qespiramuspan aswan-aswan punchawyaruq hinam”. Kay nisqanqa qawachinmi imayna kasqanchik hinaspa Diospa munayninmanta entiendesqanchik tiempopa risqanman hina aswan allin kasqanta.

⁸ Ñawpaq yachachikuypim qawarqanchik, Jesuspa wañukusqan qepata achka qatiqninkuna Moisespa chaskisqan Kamachikuypi hapipakusqankutaraq (Hech. 21:20). Qellqasqankunapim Pabloqa sutillata qawachirqa chay Kamachikuykunata cristianokuna manaña kasukunankumanta, ichaqa wakinkum hinalla kasukuchkarqaku (Col. 2:13-15). ¿Imanasqa? Yaqapaschá piensarqaku Kamachikuykunapa wakillantapas kasukuspanku judiokunawan mana qatikachasqa kanankumanta. Hebreo cristianokunaman qellqasqanpim sutillata qawachirqa Diospa munayninpa contranpi hinalla kaptinkuqa, Diospa samanan punchawman mana yaykunankumanta (Heb. 4:1, 2, 6; leey Hebreos 4:11). * Diospa chaskisqan kayta munaspankuqa reqsikunankum karqa Diospa munasqanman hinaña yupaychanankumanta.

9. ¿Imaynatam qawananchik Bibliapa mayqan yachachikuynintapas confianza sirviente allichaptin?

⁹ Kunanpas qawanchikmi Bibliapa yachachisqankuna aswan allinta entiedekusqanmanta. Hukmanyananchikmantaqa kay entiendesqanchikkunam astawan yanapawanchik confianza sirvientepi hapipakunapaq. Diospa Llaqtanpi Punta Apaqkunaqa, ima yachachikuytapas astawan entiendekunanpaq kaptinqa manam iskayrayankuchu allichanankupaqqa. Reqsikunkutaqmi pantasqankutapas. Kay iñiqmasinchikkunaqa imamantapas astawanmi munanku Diospa munaynin aswan entiendekunanta. ¿Imatam ñoqanchikmanta nichwan? ¿Imaynatam qawanchik Bibliapa mayqan yachachikuyninpas allichakuptin? (Leey Lucas 5:39.)

10, 11. Ñawpaqpi predicasqankuman hina manaña predicanankupaq kamachisqankumanta, ¿imatam yachanchik?

¹⁰ Kunanñataq kaymanta qawasun. Yaqa pachak wata qepatam wakin Biblia estudiaqkuna otaq Testigokuna piensarqaku sumaq discursokunata qospanku predicasqankuta. Munaqkum achka runakunapa kasqanpi rimayta, wakinkuqa kusisqaraqmi tarikurqaku alabasqa kasqankumanta. Ichaqa Diospa llaqtanpi kaqkunam entienderqaku wasi-wasin predicaypas Diospa munaynin kasqanta. Chay pasakuptinmi allin discurso qoqkunaqa mana munarqakuchu. Diosman sonqo hinaspa munaynin ruraq kasqankuwanmi reqsichikurqaku, ichaqa Diospa munaynin ima kasqanmanta qawachiptinkum sutilla qawakurqa imayna runa kasqankuta. Imayna kasqankuraykum Diospa manaña chaskisqan karqaku hinaspa Diospa llaqtantapas saqerurqaku (Mat. 10:1-6; Hech. 5:42; 20:20).

¹¹ ¿Ichaqa imatam nichwan kasukuqkunamanta? ¿Sasachu karqa wasin-wasin predicayqa? Sasamá karqa. Qallariypiqa achkam sasachakurqaku. Ichaqa kasukuqmi karqaku. Pisi-pisimantam manaña manchakurqakuñachu hinaptinmi Jehová Dios achkanpi yanapaykurqa. ¿Imatam qamqa ruranki ñawpaqpi predicasqaykiman hina manaña predicanaykipaq nisuptiki? ¿Kallpanchakunkichu kasukunaykipaq?

Huk kaqnin ayllunchik Diosta saqeptin

12, 13. a) ¿Imanasqataq Jehová Diosqa kamachin huchankunamanta mana wanakuqkunata qarqonankupaq? b) ¿Ima sasachakuypim wakin tayta-mamakunaqa tarikunmanku?

¹² Yachasqanchikman hinaqa cuerponkupi, kawsasqankupi hinaspa iñiyninkupi chuya kaqkunallatam Jehová Diosqa chaskin (leey Tito 2:14). Ichapas chayna kanapaq niwasqanchikta kasukuyqa sasa kanman. Piensarisun kaypi, casarasqa iñiqmasinchikkunapa sapallan churinmi Jehová Diosmanta karunchakun. Churinqa manam chaninchanchu  Jehová Dioswan amistadninta chaymi ‘hucha vidapi kananpaq’ akllan hinaspa congregacionmanta qarqochikun (Heb. 11:25).

¹³ Tayta-mamanqa llumpay llakisqam tarikunku. Paykunaqa yachankum Bibliapa kayna kamachisqanta: “Nirqaykichikqa ‘wawqem kani’ otaq ‘panim kani’ nispa huchapakuqkunawan, qollqella kuyaqkunawan, taytacha-mamacha adoraqkunawan, cuento qepikunawan, sinkakuqkunawan hinaspa suwakunawan mana hukllawanakunaykichikpaqmi. Chaykunawanqa amam kuskapas mikunkichikchu” (1 Cor. 5:11, 13). Kaypiqa “huchapakuqkunawan” nispanqa rimachkanmi wasinchikpi mana yachaq familianchikmantapas. Chay casarasqa iñiqmasinchikkunaqa churinta llumpayta kuyasqankuraykum ichapas kaynata ninmanku: “Paywanqa anchatam rimananchik. Paywan mana rimaspanchikqa, manam Diosman kutinanpaqqa yanapachwanchu”, nispa. *

14, 15. ¿Imatam tanteananku qarqochikuqpa tayta-mamanqa?

¹⁴ Entiendenchikmi chay tayta-mamakunapa llakikuynintaqa. Paykunaqa manam munaspankuchu chaynapi tarikunku. Churinmi mana wanakusqanrayku hinalla mana allinkunapi purirqa, payqa yacharqamá chayna rurasqanwan tayta-mamanpa chaynataq iñiqmasinkunapa amistadninta yanqacharunanmanta. Tayta-mamanpa llakisqa kasqankuqa manam hukmanyanapaqchu.

¹⁵ Ichaqa paykunapas tanteanankum sichu Jehová Diospa kamachisqanta kasukunqakuchu icha manachu. Wakinpiqa familiapi ima sasachakuy kaptillanmi qarqochikuqwan huñunakunanku. Ichaqa, ¿chayraykuchu yanqapas-yanqa huñunakunmanku? Chaykunamanta tanteaspankuqa manam qonqanankuchu Jehová Dios ima piensasqanta. Payqa huchallikuqta qarqonankupaqmi kamachin, llaqtan chuya kananpaq hinaspa huchallikuq wanakunanpaqpas. ¿Imaynatam tayta-mamakuna chaypaq yanapakunmanku?

16, 17. ¿Imatam yachachwan Aaronmanta?

¹⁶ Moisespa wawqen Aaronmi chayna sasachakuypi tarikurqa Nadab hinaspa Abiu churinkunawan. Jehová Diosmi paykunata wañurachirqa inciensota mana paypa kamachisqanman hina kañaptinku. ¡Maynatachá llakikurqa churinkunawan manaña haykapipas rimananmanta yachaspanqa! Manam chayllachu karqa. Aaron hinaspa wakin churinkunam Diospa kayna kamachikuyninta chaskirqaku: “Amam mana ñaqchasqaqa kankichikchu, amataqmi pachaykichiktapas llikipankichikchu lutokusqaykichikta qawachikunaykichikpaqqa, chaynata ruraspaqa wañuruwaqchikmi, Tayta Diospa piñakuyninqa chayarunmantaqmi llapa huñunasqa runakunamanpas”, nispa (Lev. 10:1-6). Kay pasakusqanmantam kayta yachanchik:  Jehová Diosta kuyasqanchikmi puntapi kanan familianchikmantaqa, aswanraq huchankumanta mana wanakuptinkuqa.

¹⁷ Kay tiempopiqa Diosqa manañam kamachikuyninkunata mana kasukuqkunataqa chayllaqa wañuchinñachu. Ancha kuyakuyninpim tiempota qon wanakunankupaq. Pi churi-wawapas congregacionmantam qarqochikun mana wanakusqanrayku. Hinaptinqa, ¿imataq pasanman tayta-mamankuna yanqapuni hukllawakuptinkuqa? ¿Manachu, mana kasukusqankuta qawachichkanmanku?

18, 19. ¿Ima kusikuytam cristianokuna chaskinmanku qarqochikuqkunamanta Bibliapa nisqanta kasukuspankuqa?

¹⁸ Congregacionmanta qarqosqa kaspanku kutimuq achka iñiqmasinchikkunam nirqaku familianku hinaspa amistadninku Diospa nisqanta kasukusqanku kutimunankupaq yanapasqanmanta. Huk sipasmi congregacionman kutimunanpaq ima yanapasqanmanta ancianokunaman nirqa: “Qarqochikuqkunawan imayna kanamanta Diospa nisqanta turiy kasukusqanmi yanapawarqa”, nispa.

¹⁹ Hinaptinqa, ¿imatam rurananchik? Tukuy imapim Jehová Diosta kasukunanchik. Pantaq kasqanchikraykum wakinpiqa sasa kanman. Ichaqa segurom kananchik Jehová Diospa niwasqanchikqa haykapipas allinninchikpaq kasqanta.

“Diospa palabranqa kawsachkanmi”

20. ¿Ima iskay yachachikuytam Hebreos 4:12 nisqanmanta horqochwan? (Willakuyta qaway.)

²⁰ Pabloqa Hebreos 4:12 nisqanpim nirqa: “Diospa palabranqa kawsachkanmi” nispa, chaynata nispanqa manamá Bibliamantachu rimachkarqa. Chay capitulopa wakin nisqanmi qawachin Diospa lliw promesankunamanta rimasqanta. * Pabloqa nichkarqam Diospa promesankuna haykapipas cumplikusqanmanta. Jehová Diosmi palabranmanta nirqa: “Chaynam rimasqaykunapas, manam yanqachu kanqa, aswanqa munasqaytam ruranqa. Kachasqayman hinam ruramunqa”, nispa (Isa. 55:11). Hinaptinqa manam hukmanyanachu munasqanchikman hina imapas chaylla mana cumplikuptinqa. Jehová Diosqa hinallam kunankama llamkachkan, chaytaqa ruranqa munaynin cumplikunankamam (Juan 5:17).

21. ¿Imaynatam Hebreos 4:12 nisqam kallpanchan chunkantin watakunaña Diosta serviqkunata?

²¹ Kay Pachapi kawsanankupaq suyakuyniyoqkunamantam wakinkuqa chunkantin watakunaña Diosta servichkanku (Apo. 7:9). Achkam mana suyarqakuchu machu-payayaytaqa, ichaqa manam chayraykuchu hukmanyarurqaku (Sal. 92:14). ¿Imanasqa? Yachankum ‘Diospa palabran kawsasqanta’ hinaspa promesankuna cumplikunanpaq Jehová Dios hinalla llamkasqanmantapas. Payqa munachkanmi munaynin rurakunanta hinaspa kusikunmi chay rurakunanta munasqanchikmantapas. Kawsasqanchik qanchis punchawpiqa Jehová Diosqa samachkarqam munaynin rurakunanmantawan llaqtan munasqanman hina kawsanankumanta mana iskayrayaspan. Yachamusqanchikman hinaqa llapallanchikmi Diospa samanan punchawman yaykuchwan. ¿Qamqa yaykurunkuñachu?

[Willakuykuna]

Kaykunamanta yuyarisun

• ¿Imatam rurananchik Diospa samanan punchawman yaykunapaq?

• Ñoqanchikmanta Dios ima munasqanta Bibliapi entiendespaqa, ¿imaynatam qawachichwan Diosta kusichiy munasqanchikta?

• ¿Haykapim sasa kanman Diospa nisqankunata kasukuyqa hinaspa imanasqam ancha allinpuni kasukuyqa?

• ¿Ima iskay yachachikuytam Hebreos 4:12 nisqanmanta horqochwan?

[Kay yachachikuypa tapukuyninkuna]

[31 kaq paginapi dibujo]

Tayta-mamakunam llumpay llakisqa tarikunku