To te Atua Akaangaroianga​—Kua O Atu Ainei Koe?

“E mea ora oki te tuatua a te Atua, e te ririnui.”​—EBE. 4:12.

1. Eaa tetai mataara ka o atu tatou ki roto i to te Atua akaangaroianga i teia tuatau, eaa ra i ngata ei i te rave i te reira?

I TE atikara mua, kua kite tatou e ka o atu tatou ki roto i to te Atua akaangaroianga me aru rotai tatou i tana au akakoroanga. Ngata ra i te rave i te reira. Ei akaraanga, te kite anga tatou e kare a Iehova e mareka ana i tetai mea ta tatou e rave ra, kua ngata ia tatou i te ariki i te reira. Te akaari maira e ka anoanoia tatou kia “akarongo ngoie.” (Iako. 3:17) I roto i teia atikara, ka uriuri tatou i tetai au turanga te ka oronga mai i te atianga kia akaari me ka akarongo ua rai tatou.

2, 3. Eaa te au tauta anga ta tatou ka rave kia inangaroia tatou e Iehova?

² Te kite anga koe mei te Pipiria e ka anoanoia koe kia taui, papa ainei koe i te ariki i te reira? Kua akakite mai te au Tuatua Tapu i te anoano o te Atua kia akaputuputu mai kiaia uaorai te au mea ‘inangaroia o te au enua katoa ra.’ (Haga. 2:7) Tika rai, maata ia tatou kua rave ana i te tarevake i mua ake ka kite ei tatou i te tuatua mou. Inara, no to tatou inangaro i te Atua e tana Tamaiti  akaperepere i akakeu ei ia tatou kia taui i to tatou au tu e te au peu kia akamareka i te Atua. I te openga, muri ake i te au pure e te tauta anga, kua oronga tatou ia tatou uaorai kia papetitoia ei au Kerititiano.​—E tatau ia Kolosa 1:9, 10.

³ Inara, te ara nei rai tatou noatu kua papetitoia. Ka anoano ua rai tatou kia rave i tetai au taui anga no to tatou tu apa. Kua akapapuia mai kia tatou e ka akameitaki mai a Iehova ia tatou me tauta tatou i te akamareka iaia.

Me Anoanoia te Akoanga

4. Eaa te au mataara e toru ka orongaia mai te akoanga Tuatua Tapu kia tatou?

⁴ Mua ake ka taui ei tatou i to tatou au tu apa, kia kite tatou eaa te reira. Penei ka akaari mai tetai akoanga i te Are Uipaanga Patireia, e tetai atikara a tatou e te rave ra tatou i te tarevake. E me kare tatou i marama e ka anoanoia tatou kia taangaanga i te akoanga, ka taangaanga a Iehova i tetai taeake Kerititiano kia akakite mai i to tatou tarevake.​—E tatau ia Galatia 6:1.

5. Akakite mai i tetai au mataara tau kore ka pau atu tatou i te akoanga, akamarama mai eaa te au tiaki Kerititiano i tauta ei i te tauturu ia tatou.

⁵ Me ako mai tetai tangata apa ia tatou, e ngata i te ariki i te reira noatu te maru e te aroa o te akoanga. Inara, mei ta Galatia 6:1 i akakite mai, kua akaue mai a Iehova i te aronga tau i te pae vaerua kia akatikatika ia tatou na roto i te “ngakau maru.” Me ariu meitaki atu tatou, ka inangaroia mai tatou e te Atua. E tika, me pure tatou, ka ariki tatou e kua apa tatou. Me akakite mai ra tetai tangata i to tatou tarevake, ka viviki tatou i te karanga e kare ta tatou tarevake e kino roa ana, e penei ka karanga tatou e kare te tangata ako e reka mai ana ia tatou e kare aia i tuatua mai ana na roto i te tu maru. (2 Ari. 5:11) Me ka riri tatou me akoia mai​—no te tu o tetai mema pamiri, to tatou kakau e te akamanea, kare tatou e ma ana, e kare a Iehova e mareka ana i ta tatou tarekareka e reka ra​—penei ka tuatua tatou i te mea tau kore, te ka riro ei akamaromaroa ia tatou e te tangata ako! Muri ake ra me maru mai tatou, ka akatika tatou e te tau ua ra te akoanga.

6. Akapeea te tuatua a te Atua te akaari mai anga i te “manako e te vananga o te ngakau”?

⁶ Te akamaara maira te tumu manako o te irava i roto i teia atikara kia tatou e e “ririnui” te tuatua a te Atua. Ae, e ririnui te tuatua a te Atua i te taui i te oraanga. Meitaki tikai te reira i te tauturu ia tatou kia taui i mua ake e i muri ake i te papetitoanga. I roto i tana reta ki to Epera, kua tata katoa a Paulo e ka rauka i te tuatua a te Atua i te ‘akara matariki i te manako e te vananga o te ngakau.’ (Ebe. 4:12) No reira me marama tatou i to te Atua akakoroanga no tatou, ka akaari mai ta tatou ariu atu anga ki te reira i to tatou tu tikai. E tuke ainei tetai i rotopu i ta tetai ke ka kite mai, e i to tatou tu tikai? (E tatau ia Mataio 23:27, 28.) Akamanako ana eaa taau ka rave i roto i te au turanga ka aru mai.

Aru Ua Rai i ta Iehova Akaaerenga

7, 8. (a) Eaa tei akakeu i tetai au Kerititiano ngati Iuda kia aru i tetai au tuanga o te Ture a Mose? (e) Eaa ra i kino ei ta ratou patoi anga i to Iehova akakoroanga puapinga?

⁷ Kua mou ngakau i te maata anga ia tatou te irava i roto ia Maseli 4:18 e: “Ko te arataa oki o te aronga tuatua-tika ra, e tau ïa ki te mārama kakā ra, ko tei tupu ua kakā anga e tae ua atu ki te avatea tikai ra.” Koia oki, ka meitaki mai to tatou tu e to tatou marama i te akakoroanga o te Atua.

⁸ Mei ta tatou i uriuri ana i te atikara i mua ana, kua ngata i tetai au ngati Iuda Kerititiano i te akaruke i te Ture a Mose muri ake te mate anga a Iesu. (Anga. 21:20) Noatu e kua akamarama meitaki a Paulo e  kare te au Kerititiano e anoano akaouia kia aru i te Ture a Mose, kua patoi tetai pae i tona manako akauruia. (Kolo. 2:13-15) Penei kua manako ratou e, me akono ratou i tetai tuanga o te Ture, kare ratou e takinokinoia. Noatu rai, kua tata a Paulo ki te au Kerititiano Epera ma te akakite meitaki atu e kare ratou e o atu ki roto i to te Atua akaangaroianga me kare ratou e aru rotai i Tona akakoroanga e akatupuia ra. * (Ebe. 4:1, 2, 6; e tatau ia Ebera 4:11.) E mareka mai ei a Iehova, kia ariki ratou e te arataki ra aia i tona iti tangata na tetai mataara ke.

9. Eaa to tatou tu me akatikatikaia ta tatou i marama no te au mea o te Tuatua Tapu?

⁹ I teia tuatau, kua akamarama meitakiia mai tetai au apiianga Pipiria. Kia mataora tatou i teia; e kia irinaki maata atu i te pupu tavini akono meitaki e te pakari. Me kite te au komono o te “tavini” e ka anoanoia kia akatakaia me kore kia akatikatikaia to tatou maramaanga no runga i tetai au apiianga tuatua mou, kare ratou e emiemi i te akatikatika mai i te reira. E puapinga atu ki te pupu tavini i te aru i to te Atua akakoroanga kia akatupuia, i to te paruru anga ia ratou mei te au akaapaanga no runga i tetai au akatikatika anga. Eaa toou manako me raveia tetai akatikatika anga ki ta tatou maramaanga i te au Tuatua Tapu?—E tatau ia Luka 5:39.

10, 11. Eaa ta tatou i kite mai mei te tu o tetai au taeake, te akakiteia mai anga te au ravenga ou no te tutu anga i te tuatua meitaki?

¹⁰ Akara tatou i tetai akaraanga akaou. Mei tetai anere mataiti i topa, kua manako tetai Aronga Apii Pipiria, tukatau tikai i te tuatua ki te katoatoa, e ko te ravenga meitaki atu i te rave i te tutu anga, ko te oronga anga i te au akoanga. E reka ana ratou i te tuatua ki mua i te katoatoa e kia akameitakiia mai e te aronga e akarongo maira. Inara, kua akatakaia i muri mai e te inangaro ra a Iehova i tona iti tangata kia rave i tetai atu au tutu anga e te tutu aere anga mei tetai are ki tetai. Kare tetai au vaa tuatua tukatau i inangaro ana i te rave i te reira. Me akara koe ia ratou, e au tangata maroiroi i te tavini i te Atu. Inara, te akapapuia mai anga te akakoroanga o te Atua no te angaanga tutu anga, kua akaari tikaiia mai to ratou au manako, inangaro e te akakoroanga. Eaa to Iehova manako no runga ia ratou? Kare aia i akameitaki mai ia ratou. E kua akaruke ratou i te akaaerenga.​—Mata. 10:1-6; Anga. 5:42; 20:20.

¹¹ E ngata katoa no te toenga tei vai tiratiratu ki te akaaerenga kia tutu aere. Te akamataanga, manganui tei kite mai i te tu ngata tikai o te angaanga. Inara, kua rave rai ratou i te reira. Kare i roa ana, kare ratou e mataku akaou ana e kua akameitaki maata mai a Iehova ia ratou. Eaa taau ka rave me patiia koe kia piri atu ki roto i tetai atu au tutu anga kare koe i matau? Ka akarongo ainei koe noatu te ngata?

Me Akaruke Tetai e Akaperepere Ana Tatou, ia Iehova

12, 13. (a) Eaa to Iehova akakoroanga kia akaateaia te aronga kare i tataraara? (e) Eaa tetai au timataanga ta tetai nga metua Kerititiano i na roto, e eaa ra te timataanga i ngata ei?

¹² Papu e ka ariki tatou pouroa i te kaveinga e kia ma tatou i te pae kopapa, pae manako e te pae vaerua ei akamareka i te Atua. (E tatau ia Tito 2:14.) Inara, te vai ra tetai au atianga ka timata pakariia to tatou tu tiratiratu ki to te Atua akakoroanga. Ei akaraanga, penei kua akaruke te tamaiti okotai a tetai tokorua Kerititiano meitaki i te tuatua mou. No te inangaro “i te navenave poto ua o te tuatua kino ra,” kare i te pirianga kia Iehova e tona nga metua  akono Atua, kua akaateaia taua tamaiti mapu ra.​—Ebe. 11:25.

¹³ Kua tumatetenga tikai te nga metua! Kua marama raua e te karanga ra te Pipiria no runga i te akaatea anga e, ‘auraka e kapiti atu i te tangata e karangaia e taeake kia riro ei tangata kanga, e te noinoi apinga, e te akamori idolo, e te akakino, e te kona kava, e te aru; auraka katoa e kai atu i te manga i reira.’ (1 Kori. 5:11, 13) Kua marama katoa raua e ko te tuatua no runga i tetai ua atu “tangata” i roto i teia irava, te kapiti maira i te au mema pamiri kare e noo ana i te kainga. Inara e inangaro tikai to raua i ta raua tamaiti! No to raua inangaro maata i te tamaiti, ka akamanako raua e: ‘Akapeea taua e tauturu ei i ta taua tamaiti kia oki mai kia Iehova me kare rava taua e piri atu kiaia? Kare ainei e ka tauturu maata atu taua iaia me piri putuputu taua kiaia?’ *

14, 15. Eaa te iki anga tikai ta te au metua ka rave me kua akaateaia ta ratou tamariki?

¹⁴ Te tangi nei tatou i taua nga metua e mamae ra. Kare e ravenga, kua iki ta raua tamaiti i te oraanga tau kore, kare i inangaro i te pirianga mataora ki tona nga metua e tona au taeake irinaki. Kare e rauka i te nga metua i te akaaere i tana i iki. No reira rai raua i mamae tikai ei!

¹⁵ Eaa ra ta te nga metua akaperepere ka rave? Ka akarongo ainei raua ki ta Iehova akauenga taka meitaki? Me kore ka manako raua e ka kapiti putuputu raua ki te tamaiti tei akaateaia e ka karanga e e “mea tau te reira no te pamiri pitiniti”? Me rave raua i ta raua ikianga, kia akamaara raua i to Iehova manako no runga i ta raua e rave ra. To Iehova akakoroanga, kia akono i te akaaerenga kia ma e kia akakeu i te aronga rave i te tarevake kia rako tangata mai. Akapeea te au metua Kerititiano me turuturu i te reira akakoroanga?

16, 17. Eaa ta tatou ka kite mai na te akamanako oonu anga i to Aarona akaraanga?

¹⁶ Kua o atu te tuakana o Mose ko Aarona ki te reira turanga, no tana nga tamariki tamaroa. Akamanako ana i tona manako ngakau te oronga anga tana nga tamariki tamaroa, ko Nadaba e Abihu i te ai noa kare i tika ia Iehova e kua tamate atu Aia ia raua. Kare e rauka akaou i tetai pirianga o taua nga tamariki ra ki to raua metua. Te vai atura rai tetai manamanata. Kua ikuiku a Iehova kia Aarona e tana au tamariki tamaroa akarongo mou e auraka e tuku ua i to ratou rouru kia pukaka e ‘auraka e aeae i to ratou kakau i te mii; ka mate aea ratou, e ka rokoia katoaia te au tangata ravarai nei e te riri o Iehova.’ (Levi. 10:1-6) Te taka ua ra te akakiteanga.  Kia ketaketa atu to tatou inangaro no Iehova i to tatou au mema pamiri akarongo kore.

¹⁷ Teia tuatau kare a Iehova e akaatea viviki ana i te aronga tei aati i tana au ture. E oronga aroa ana aia i tetai atianga no ratou kia tataraara mei ta ratou au angaanga tarevake. Eaa ra to Iehova manako, me akarongo kore te nga metua i tana akauenga na te piri atu anga ki tei kore i tataraara?

18, 19. Eaa te au akameitakianga ka rauka i te au mema pamiri e aru ra i ta Iehova au ikuikuanga no runga i te aronga tei akaateaia?

¹⁸ Maata tei akaateia ana kua akakite mai e kua oki mai ratou no te tu tiratiratu o to ratou au oa e te au mema pamiri kia Iehova. No te akaokiia mai anga o tetai tuaine mapu, kua tata te aronga pakari e kua tama aia i tona oraanga, “no tei akangateitei tona tungane i te akanoonooanga no te akaatea anga.” Kua tuatua aia e “no tona aru tiratiratu anga i te au kaveinga Tuatua Tapu i tauturu ei iaia kia oki mai.”

¹⁹ Eaa ta tatou ka rave? E patoi pakari tatou i te inangaro o to tatou ngakau apa kia kore e patoi i te akoanga Tuatua Tapu. Kia irinaki papu tatou e e meitaki atu ta Iehova ravenga i te akatikatika i to tatou au manamanata.

“E Mea Ora Oki te Tuatua a te Atua”

20. Na teea nga mataara e rua ka rauka i te taangaanga ia Ebera 4:12? (Akara i te tataanga i raro ake.)

²⁰ Te tata anga a Paulo e “e mea ora oki te tuatua a te Atua,” kare aia e taiku tikai ra ki te Tuatua tataia a te Atua ko te Pipiria. * Te akaari maira te aerenga tuatua e te taiku ra aia ki te taputou a te tuatua a te Atua. Te tuatua ra a Paulo e e akatupu ua ana te Atua i tana i taputou mai. Kua akatinamou a Iehova i teia na roto i te peroveta ko Isaia e: ‘Kare taku tuatua e oki puapinga kore ua mai kiaku nei, ka manuia oki ra te mea i akaue atu ei au ra.’ (Isa. 55:11) No reira kia akakoromaki tatou me kare te au mea e tupu ana ki ta tatou e inangaro ra. “Te angaanga ua nei rai” a Iehova kia tupu meitaki tikai tona akakoroanga.​—Ioa. 5:17.

21. Akapeea a Ebera 4:12 te akamaroiroi anga i te au mema akarongo mou pakarikari o te “aronga maata rava”?

²¹ Kua tavini ana te au mema pakarikari akarongo mou o te “aronga maata rava” ia Iehova no tetai raungauru mataiti. (Apo. 7:9) Kare rava te manganui i manako ana e ka pakari ratou i roto i teia akatereanga. Noatu ra, te angaanga maroiroi nei rai ratou na Iehova. (Sala. 92:14) Kua kite ratou e kare te tuatua taputou a te Atua i te mea puapinga kore​—e mea ora ia, e ka akatupu a Iehova i te reira. I te mea e e mea akaperepere na te Atua tona akakoroanga, te rekareka ra aia me manako puapinga tatou i te reira. Teia tuatau o te ra itu, kua akangaroi ana a Iehova, te manako papuanga e ka akatupuia tona akakoroanga, e ka turuturu tona iti tangata i te reira. Akapeea ra koe? Kua o atu ainei koe ki roto i to te Atua akaangaroianga?

[Au Tataanga Rikiriki i Raro]

Maara Ainei ia Koe?

• Eaa te ka anoanoia kia o atu tatou ki roto i to te Atua akaangaroianga i teia tuatau?

• Eaa te pirianga i to te Atua akakoroanga e to tatou inangaro kia ariki i te akoanga Tuatua Tapu?

• Eaa te au ngai ka ngata i te akarongo ki te au akauenga Tuatua Tapu, eaa ra i puapinga ai kia aru tatou?

• Na teea nga mataara ka rauka i te taangaanga ia Ebera 4:12?

[Au Uianga Apii]

[Tutu i te kapi 31]

Tumatetenga te nga metua!