Ita tama ona iha Maromak nia hakmatek ka lae?
Ita tama ona iha Maromak nia hakmatek ka lae?
“Maromak nia liafuan moris no book makaʼas.”—EBR 4:12.
1. Oinsá mak ita bele tama iha Maromak nia hakmatek? Tanbasá mak dala ruma susar atu halo ida-neʼe?
IHA lisaun kotuk, ita aprende katak ita bele tama iha Maromak nia hakmatek hodi halo tuir nia no ninia organizasaun. Maibé, dala ruma susar atu halo ida-neʼe. Porezemplu, kuandu ita aprende katak Maromak Jeová hakarak ita atu para halo buat ruma neʼebé ita gosta, karik susar atu halo tuir kedas. Se nuneʼe, ita presiza aprende atu “sai prontu atu halo tuir”. (Ebr 13:21) Iha lisaun neʼe, ita sei koʼalia kona-ba situasaun balu neʼebé fó oportunidade mai ita atu hatudu se ita prontu ka lae atu halo tuir ho laran iha buat hotu.
2, 3. Ita presiza halo saida deʼit atu bele sai buat neʼebé folin-boot iha Maromak Jeová nia oin?
2 Ita prontu ka lae atu halo tuir konsellu husi Bíblia? Bíblia hatete katak Maromak nia hakarak mak atu halibur hamutuk “buat sira neʼebé folin-boot husi nasaun hotu”. (Ageu 2:7) Klaru katak antes ita aprende kona-ba lia-loos, ita barak halo buat neʼebé sala. Maibé, ita-nia domin ba Maromak no ba ninia Oan doben book ita atu troka ita-nia hahalok no toman neʼebé uluk aat hodi bele halo kontente Maromak. Hodi halo orasaun atu husu ajuda no hakaʼas an tebes atu troka ita-nia hahalok, ikusmai ita hetan batizmu.—Lee Koloso 1:9, 10.
3 Tanba ita sala-naʼin, ita presiza nafatin hakaʼas an atu halo mudansa iha ita-nia moris no atu halo buat neʼebé loos. Hodi halo ida-neʼe ita sei sai buat neʼebé folin-boot iha Maromak Jeová nia oin, no nia promete katak nia sei ajuda ita no sei haraik ninia bensaun ba ita.
Kuandu ita presiza konsellu
4. Iha dalan tolu saida mak ita bele hetan konsellu husi Bíblia?
4 Antes ita bele halo mudansa ruma iha ita-nia moris, ita tenke hatene saida mak ita presiza atu troka. Maromak Jeová ajuda ita atu hatene kona-ba neʼe iha dalan oioin, hanesan liuhusi diskursu ida ka informasaun ruma iha ita-nia livru sira. Maibé, se ita la komprende konsellu neʼebé ita rona ka lee, Jeová bele uza ita-nia maluk ida iha kongregasaun atu fó konsellu mai ita.—Lee Galasia 6:1.
5. Baibain, ita sente oinsá kuandu ema fó konsellu mai ita? Esplika toʼok tansá katuas kristaun presiza hakaʼas an nafatin atu ajuda ita.
5 Dala ruma, susar atu simu konsellu husi ema neʼebé sala-naʼin maski nia fó konsellu neʼe ho laran-diʼak. Maibé, iha Galasia 6:1 Maromak Jeová haruka katuas sira atu ‘lori ita ba dalan loos’ hodi korrije ita “ho laran-kmaus”. Se ita simu sira-nia ajuda, ita sei sai folin-boot liu iha Maromak nia oin. Dala barak, kuandu ita halo orasaun ba Jeová, ita prontu atu hatete sai ba nia ita-nia sala. Maibé, kuandu ema seluk hatete mai ita katak ita halo sala, baibain susar mai ita atu simu. Dala ruma, ita fó razaun oioin tansá ita halo ida-neʼe ka hatete katak ita-nia sala ladún aat. Karik ita hatete ba ema neʼebé fó konsellu mai ita katak nia la gosta ita ka dalan neʼebé nia fó konsellu la hatudu laran-diʼak. (2 Reis 5:11) Karik ita hirus se katuas fó konsellu mai ita kona-ba buat ida neʼebé ita lakohi rona, hanesan kona-ba ema ida iha ita-nia família, ka kona-ba moos iha isin, ka ita-nia hatais, ka atividade halimar nian neʼebé ladún diʼak. Tanba susar atu simu konsellu, karik ita hatete buat ruma ba katuas neʼebé halo nia triste. Maibé, ikusmai ita simu konsellu tanba ita rekoñese katak konsellu neʼe diʼak mai ita.
6. Oinsá mak Maromak nia liafuan bele hatudu sai “buat neʼebé ema hanoin no hakarak iha nia fuan”?
6 Eskritura ba tema husi lisaun neʼe fó-hanoin ita katak Maromak nia liafuan “book makaʼas”. Sin, Maromak nia liafuan iha forsa duni atu troka ita-nia moris. Hanesan Bíblia ajuda ita atu troka ita-nia moris antes ita hetan batizmu, nuneʼe mós Bíblia ajuda ita atu nafatin hadiʼa ita-nia hahalok depois ita hetan ona batizmu. Iha Paulo nia karta ba ema ebreu, nia mós hatete katak Maromak nia liafuan “bele hatene loloos buat neʼebé ema hanoin no hakarak iha nia fuan”. (Ebr 4:12) Neʼe hatudu katak kuandu ita hatene didiʼak ona saida mak Maromak hakarak ita atu halo, dalan neʼebé ita halo tuir sei hatudu sai ita mak ema oinsá. Dala ruma, hahalok neʼebé ita hatudu sai ba ema hanesan ho ita-nia sentimentu ka hanoin iha laran ka lae? (Lee Mateus 23:27, 28.) Hanoin toʼok kona-ba saida mak Ita sei halo bainhira hasoru situasaun sira tuirmai.
Laʼo hamutuk ho Jeová nia organizasaun
7, 8. (a) Tanbasá mak ema ebreu balu neʼebé kristaun kaer metin nafatin ba parte balu husi Moisés nia Ukun-Fuan? (b) Tanbasá mak hodi halo ida-neʼe sira la halo tuir Maromak nia hakarak?
7 Ita barak karik hatene didiʼak ona liafuan iha Provérbios 4:8, neʼebé hatete: “Ema loos sira-nia dalan mak hanesan loro-matan nia naroman neʼebé kontinua sai nabilan liu toʼo loron fahe-rua.” Ida-neʼe hatudu katak neineik-neineik, ita bele halo diʼak liután ita-nia hahalok no komprende diʼak liután Maromak nia hakarak.
8 Hanesan ita koʼalia tiha ona iha lisaun kotuk, depois Jesus mate, susar ba ema judeu kristaun atu para halo tuir Moisés nia Ukun-Fuan. (Apos 21:20) Maski Paulo esplika ho klaru katak ema kristaun la presiza tan halo tuir Ukun-Fuan neʼe, maibé ema balu lakohi rona ba nia. (Kol 2:13-15) Karik sira hanoin katak se sira kontinua atu halo tuir parte balu husi Ukun-Fuan neʼe, ema sei la fó-terus ba sira. Maski nuneʼe, Paulo hakerek karta ba ema ebreu kristaun no hatete ho klaru katak se sira lakohi halo tuir Maromak nia hakarak, sira la bele tama iha Ninia hakmatek. * (Ebr 4:1, 2, 6; lee Ebreu 4:11.) Atu Jeová simu sira, sira mós tenke simu katak agora Jeová hakarak ninia povu atu adora nia iha dalan seluk.
9. Ita sente oinsá kuandu atan laran-metin no matenek fó sai dalan foun atu komprende lia-loos ruma husi Bíblia?
9 Ohin loron, atan laran-metin no matenek halo mudansa balu atu ajuda ita komprende lia-loos ka hanorin husi Bíblia moos liután. Ita sente kontente tanba Maromak Jeová uza sira atu hanorin ita. Kuandu Grupu Administradór neʼebé reprezenta atan neʼe haree katak iha hanorin ruma kona-ba lia-loos neʼebé presiza halo klaru liután ka hadiʼa, sira la dada an atu halo ida-neʼe. Maski atan laran-metin no matenek hatene katak ema balu sei kritika sira tanba halo mudansa ruma, maibé buat neʼebé importante liu ba sira mak halo tuir Maromak nia hakarak. Ita sente oinsá kuandu atan laran-metin no matenek fó sai dalan foun atu komprende lia-loos ruma husi Bíblia? Ita lakohi sai hanesan ema fariseu neʼebé gosta liu hanorin uluk nian neʼebé hanesan tua tuan duké Jesus nia hanorin neʼebé hanesan ho tua foun.—Lee Lucas 5:39.
10, 11. Saida deʼit mak ita bele aprende husi buat neʼebé irmaun-irmán sira halo iha tempu uluk kuandu sira presiza halaʼo serbisu haklaken iha dalan foun?
10 Mai ita koʼalia kona-ba ezemplu ida tan. Maizumenus tinan atus ida liubá, irmaun balu neʼebé hatene hatoʼo diskursu públiku ho kapás, hanoin katak dalan diʼak liu atu halaʼo serbisu haklaken mak hodi hatoʼo diskursu neʼebé sira prepara ho didiʼak. Sira gosta atu koʼalia iha ema barak nia oin hodi ema gaba sira. Maibé lakleur, Maromak Jeová nia povu komprende ho klaru katak Ninia hakarak mak atu sira haklaken iha dalan oioin, inklui mós serbisu haklaken husi uma ba uma. Maibé, irmaun balu neʼebé iha matenek atu hatoʼo diskursu diʼak lakohi halo tuir arranju foun neʼe. Maski irmaun sira-neʼe hatudu husi liʼur katak sira ema neʼebé hadomi no halo tuir Jeová, maibé kuandu Maromak fó sai ninia hakarak kona-ba serbisu haklaken, sira-nia hahalok hatudu sai sira ema oinsá iha laran. Jeová sente oinsá kona-ba sira? Jeová la kontente ho sira. Tan neʼe, nia la fó bensaun ba sira. Ikusmai, sira husik ninia organizasaun.—Mt 10:1-6; Apos 5:42; 20:20.
11 Maski foufoun susar ba irmaun-irmán sira neʼebé laran-metin ba Jeová nia organizasaun atu haklaken uma ba uma, maibé sira halo tuir, no ikusmai sai fasil liu ba sira. Nuneʼe, Jeová fó bensaun barak ba sira. Saida mak Ita halo kuandu atan laran-metin no matenek haruka Ita atu haklaken iha dalan neʼebé Ita seidauk koko? Maski susar ba Ita, Ita prontu ka lae atu koko dalan foun neʼe?
Kuandu ema neʼebé ita hadomi husik Jeová
12, 13. (a) Tanbasá mak Jeová hakarak kongregasaun atu hasai ema neʼebé la hakribi ninia sala? (b) Situasaun saida mak susar ba inan-aman kristaun atu hasoru?
12 Ita hotu hatene katak atu bele halo kontente Maromak, ita tenke halo tuir ninia matadalan husi Bíblia kona-ba sai moos iha isin, iha buat morál, no iha ita-nia adorasaun. (Lee Tito 2:14.) Maibé dala ruma, ita hasoru situasaun balu neʼebé bele halo susar mai ita atu halo tuir Maromak nia hakarak kona-ba neʼe. Porezemplu, hanoin toʼok kona-ba inan-aman kristaun ida. Sira iha oan-mane mesak neʼebé husik tiha lia-loos. Oan neʼe nia hakarak mak atu “haksolok ba tempu uitoan iha sala laran” duké hakarak iha relasaun diʼak ho Jeová no mós ho ninia inan-aman. Nuneʼe, kongregasaun hasai nia.—Ebr 11:25.
13 Inan-aman neʼe triste tebetebes! Kona-ba hasai ema husi kongregasaun, sira hatene katak Bíblia hatete: “Keta laʼo hamutuk ho ema naran deʼit neʼebé bolu an maun-alin wainhira nia laran-aat, karak-teen, adora lulik, konta ema nia vida, lanu-teen ka naʼok-teen; keta han hamutuk ho ema hanesan neʼe.” (1 Kor 5:11, 13) Inan-aman neʼe mós hatene katak liafuan “ema naran deʼit” inklui família neʼebé la hela hamutuk ho sira iha sira-nia uma. Maibé, tanba sira hadomi tebes sira-nia oan, karik sira hanoin: ‘Ami presiza atu koʼalia ba ami-nia oan beibeik. Oinsá mak ami bele ajuda nia atu fila fali ba Jeová se ami labele koʼalia ho nia?’ *
14, 15. Desizaun saida mak inan-aman tenke halo kuandu kongregasaun hasai sira-nia oan?
14 Ita mós sente triste kuandu ita haree inan-aman neʼebé terus hanesan neʼe. Tuir loloos, sira-nia oan bele hili atu troka ninia hahalok, maibé nia hili atu la moris tuir morál kristaun nian. Nia hakarak mak atu nafatin halo buat neʼebé sala duké hamutuk ho ninia inan-aman no maluk kristaun iha kongregasaun. Maski inan-aman hakarak ajuda nia, maibé sira la bele halo buat ida kona-ba sira-nia oan nia desizaun neʼe. Tan neʼe mak sira sente terus tebes!
15 Maibé agora, inan-aman neʼe sei halo desizaun saida? Sira sei halo tuir Jeová nia matadalan ka lae? Ka sira sei buka razaun oioin atu koʼalia beibeik ho sira-nia oan? Atubele halo desizaun loos kona-ba neʼe, sira tenke hanoin kona-ba saida mak Jeová hakarak sira atu halo. Jeová nia hakarak mak atu halo moos nafatin ninia organizasaun, no mós atu book ema neʼebé halo sala atu troka ninia hahalok no fila fali ba kongregasaun. Oinsá mak inan-aman kristaun bele hatudu katak sira-nia hakarak hanesan ho Jeová nian?
16, 17. Ita aprende saida husi Aarão nia ezemplu?
16 Moisés nia maun, Aarão, mós hasoru situasaun susar kona-ba ninia oan naʼin-rua. Hanoin toʼok oinsá nia sente kuandu Maromak Jeová hatún ahi hodi oho ninia oan Nadab no Abiú tanba sira hasaʼe sakrifísiu hodi kontra Ninia ukun-fuan. Tan neʼe, Aarão labele hamutuk tan ona ho ninia oan naʼin-rua neʼe. Liután neʼe, Jeová hatete ba Aarão no ninia oan-mane sira seluk neʼebé laran-metin atu halo buat seluk neʼebé mós susar ba sira, hodi dehan: “Labele husik imi-nia fuuk sabraut, no imi labele lees imi-nia faru [tanba triste], atu imi la bele mate no atu [Jeová] la bele hirus ho povu tomak.” (Lev 10:1-6) Ida-neʼe hatudu ho klaru katak ita-nia domin ba Jeová tenkesér boot liu fali ita-nia domin ba família sira neʼebé la laran-metin.
17 Ohin loron, Jeová la oho kedas ema neʼebé kontra ninia ukun-fuan sira. Tanba Jeová nia domin, nia fó oportunidade ba sira atu arrepende sira-nia sala. Maibé, Jeová sei sente oinsá se inan-aman ida la halo tuir Ninia ukun-fuan hodi fó razaun oioin atu koʼalia nafatin ho sira-nia oan neʼebé kongregasaun hasai ona?
18, 19. Bensaun saida deʼit mak membru iha família laran bele hetan se sira nafatin laran-metin ba Jeová?
18 Ema barak neʼebé uluk kongregasaun hasai hatete katak tanba sira-nia kolega no família kontinua nafatin atu hatudu laran-metin ba Maromak Jeová no la koʼalia ba sira, ida-neʼe ajuda sira atu hakarak fila fali ba kongregasaun. Porezemplu, feto ida fó-hatene ba katuas sira katak buat ida neʼebé halo nia troka ninia moris mak ninia maun nia hahalok. Ninia maun hatudu laran-metin nafatin ba Jeová no halo tuir Jeová nia ukun-fuan kona-ba arranju atu hasai ema husi kongregasaun. Ida-neʼe book feto neʼe atu hakarak fila fali ba kongregasaun.
19 Ida-neʼe hatudu katak ita tenke halo saida? Katak ita tenke halo tuir Jeová iha situasaun hotu-hotu iha ita-nia moris. Tanba ita ema sala-naʼin, dala ruma susar mai ita atu halo tuir Jeová. Maibé, ita tenke fiar metin katak buat neʼebé Jeová hakarak ita atu halo sempre lori buat diʼak mai ita.
“Maromak nia liafuan moris”
20. Ita bele komprende Ebreu 4:12 iha dalan rua saida? (Haree nota-rodapé.)
20 Ebreu 4:12 hatete katak “Maromak nia liafuan moris”. Kuandu Paulo hakerek ida-neʼe, nia la koʼalia kona-ba Bíblia. * Paulo nia liafuan iha versíkulu sira antes no depois eskritura neʼe hatudu katak nia koʼalia kona-ba buat neʼebé Maromak promete. Paulo hatete katak buat neʼebé Maromak promete sempre sai loos. Maromak Jeová hatudu ida-neʼe liuhusi profeta Isaías, hodi dehan: “Haʼu-nia liafuan . . . sei la fila fali ba haʼu la ho rezultadu, maibé . . . sei hetan susesu duni tuir buat neʼebé haʼu hatete tiha ona.” (Isa 55:11) Tan neʼe, se Maromak seidauk kumpre buat neʼebé nia promete tuir tempu neʼebé ita hakarak, ita presiza hatudu pasiénsia. Ita bele fiar katak Jeová serbisu nafatin atubele kumpre ninia hakarak hotu.—Joao 5:17.
21. Oinsá mak Ebreu 4:12 bele ajuda sira neʼebé ferik-katuas ona atu serbí nafatin Maromak Jeová?
21 Ema barak neʼebé parte husi “ema-lubun boot” serbí Maromak Jeová ba tinan barak ona. (Apok 7:9) Sira barak hanoin katak mundu foun sei mai antes sira sai ferik-katuas. Maski nuneʼe, sira la husik ida-neʼe halo sira sente laran-tun. (Sal 92:14) Sira hatene katak Maromak nia liafuan moris no katak nia sei kumpre buat hotu neʼebé nia promete. Tanba Maromak nia hakarak importante tebes ba nia, ita halo nia kontente kuandu ita hatudu katak ninia hakarak mós importante mai ita. Maski durante Jeová nia loron hitu ka hakmatek, nia deskansa, maibé nia hatene katak la iha buat ida neʼebé sei hapara nia atu kumpre ninia hakarak no katak ninia povu sei kontinua atu halo tuir ninia hakarak neʼe. Maibé, oinsá ho Ita? Ita rasik tama ona iha Maromak nia hakmatek ka lae?
[Nota–rodapé]
^ par. 8 Ulun-naʼin barak husi ema judeu halo tuir hotu Moisés nia Ukun-Fuan, maibé kuandu Jesus mai nuʼudar Mesias, sira lakohi simu nia. Nuneʼe, sira la halo tuir Maromak nia hakarak.
^ par. 20 Ohin loron, Maromak koʼalia mai ita liuhusi ninia Liafuan, Bíblia. Bíblia iha forsa atu troka ita-nia moris. Tan neʼe, Paulo nia liafuan neʼebé hakerek iha Ebreu 4:12 mós kona-ba Bíblia.
Hanoin-hetan lisaun importante
• Saida deʼit mak ita presiza halo atu tama iha Maromak nia hakmatek?
• Kuandu ita komprende ona saida mak Maromak hakarak ita atu halo, oinsá mak ita bele halo nia kontente?
• Situasaun saida deʼit mak bele halo susar mai ita atu halo tuir Jeová nia hakarak? Maibé, tanbasá mak importante atu ita halo tuir nia?
• Ita bele komprende Ebreu 4:12 iha dalan rua saida?
[Pergunta Estudu nian]
[Dezeñu iha pájina 31]
Inan-aman neʼe triste tebetebes!
