U Nyôr Ken Mmem U Aôndo La Vee?

“Mkaanem ma Aôndo ma uma je, ma tem gbilin ga.”—HEB. 4:12.

1. Se er nan ve se nyôr ken mmem u Aôndo nyiana, man alaghga a taver se u ungwan imo na sha ci u nyi?

 SE HEN ken ngeren u a bee la ser saa se ungwan imo i Aôndo nyian shi se eren tom imôngo vea nongo na ve, se nyôr ken mmem na ye. Aluer se mba ungwan imo i Yehova yô, se lu tesen un ser se soo ser awashima na la a kure. Kpa ashighe agen ka i taver se u ungwan imo i Yehova. U tesen ikyav yô, zum u se va kav ser Yehova soo ér se de ma kwagh u ka a doo se u eren yô, alaghga a taver se u ungwan imo na ave ave. Aluer kwagh er nahan yô, a gba u se hen u “norom ikyaa ga.” (Yak. 3:17) Ken ngeren ne, se lu timen sha mbamlu mbagenev mba ka ve na se ian i tesen ser se kegh iyol u ungwan imo i Yehova hanma shighe cii yô.

2, 3. Kanyi i gbe u se za hemen u eren ve, se er ishima i Yehovaa?

² Ka wea hen ken Bibilo wer gba u ú nyôôso uma wou sha ma gbenda nahan, ka u kegh a kegh iyol u ungwan imo i Yehova kpa? Hen ase sha kwagh ne: Bibilo kaa ér, ior mba Yehova a soo u van a ve ken nongo na la ka “akaainjaa a akuraior cii.” (Hag. 2:7) Kwagh ne tese ér Aôndo tsough ior mba ve doo un ishima la sha ci u ve soo kwagh u vough. Ka mimi, shighe u se hii u henen Bibilo la, se kpishi se lu eren akaa a  vough ga. Kpa sha ci u mdoo u Aôndo kua Wan na ve doo se ishima shi se soo u eren kwagh u doon ve la yô, yange doo se u geman gbenda u se henen kwagh shi se eren kwagh la. Yange se sôn Yehova ken msen ser a̱ wase se, maa se nôngo kpoghuloo sha u den akaa a gba u se de la. Ken masejime yô, i er se batisema shi Yehova lumun se.—Ôr Mbakolose 1:9, 10.

³ Nahan kpa, se mba vough ga. Nahan gba u se za hemen u geman uma wase shi nôngon kpoghuloo ser se er kwagh u vough. Aluer se za hemen u nôngon sha afatyô wase cii ser se er kwagh u doon Yehova yô, una ver iniôngon yase la doo doo.

Shighe U I Gbe u Se Sôr Inja Yase Yô

4. Ka sha igbenda itiar i nyi nahan Yehova a tesen se ér gba u se sôr inja yase?

⁴ Cii man se sôr inja yase yô, a gba u se fa kwagh u i doo u se nyôôso la. Yehova wasen se u eren kwagh ne sha igbenda kposo kposo. A fatyô u lun sha ma kwaghôron u i ne ken Iyou i Tartor shin ngeren u ken umagazin asev, u a pase se ma mhen u kpeegh shin ieren i shami ga i se lu a mi yô. Ashighe agen ka sea ungwa kwaghôron shin sea ôr ma ngeren ken takerada je kpa se kav er i gbe u se gema uma wase ga, nahan Yehova ngu a mgbegha ma anmgbian u nomso shin u kwase ken tiônnongo nan kôôm se sha ishima i legh legh.—Ôr Mbagalatia 6:1.

5. Ka sha igbenda igen i nyi ka se er kwagh shighe u or nan kôôm se laa, man gba u mbatamen mba ken Kristu vea za hemen u nôngon ér vea wase se sha ci u nyi?

⁵ Shighe u orumace u yinan er se nahan nan kôôm se sha ma kwagh yô, ka nana ôr kwagh la sha ishima i legh legh je kpa, i taver se u lumun kwagh u nan er la kpishi. Kpa Yehova wa mbatamen kwagh ér ve nôngon u “kôôm” se “sha ishima i legh legh,” inja na yô, ve kôôm se sha dooshima. (Gal. 6:1) Aluer se lumun iwasen ve yô, se hemba lun Yehova “akaainjaa,” se hemba gban un kwagh cii. Ka mimi, ashighe kpishi ka se pase Yehova ken mbamsen asev ser se yina shi se mba tsum acin imôngo. Kpa zum u ortamen nan kaa a vese ér se tsume yô, ashighe agen ka se er kwagh sha gbenda ugen kposo. Ka se ker u nan atôakyaa shin se kaa ser kwagh u se er la vihi joo ga. Adooga se kaa ser or u nan kôôm se la nan soo kwagh wase ga, shin nan lam a vese sha gbenda u kundu kundu ga. (2 Utor 5:11) Gayô se nyoon ishima shighe u ortamen nan ôr se kwagh u se soon ser or a ôr a vese ga yô. U tesen ikyav yô, alaghga vea kaa ér ma or hen tsombor wase nan ngu eren kwagh sha inja ga, shin iyolwuhan yase doo kuma ga. Shin vea kaa a vese ér a gba u se seer lun tsembelee, gayô vea kaa ér Yehova kôr ma iemberyolough i se u eren yô ihyom. Alaghga ishima ia vihi se, nahan se ôr akaa a ma se er ga yô,. Kwagh ne una na ishima ia vihi se a iyol yase shi anmgbian u nan lu nôngon ér nana wase se la kpa ishima ia doo nan ker ga. Kpa shighe una karen, se kera luun ken ishimavihin ga yô, se lumun ser kwagh u ashen nan er la a lu sha ci u mkpeyol wase.

6. Mkaanem ma Aôndo “ka ma kar mbamhen kua mbaawashima” nena?

⁶ Mbaheberu 4:12, u a lu ivur i ngeren ne a har sha mi la kaa a vese ér mkaanem ma Aôndo “ma tem gbilin ga.” Inja na yô Bibilo i i lu Mkaanem ma Aôndo la, ngi a tahav mbu mbua wase ior u geman uuma vev yô. Cii ve i er se batisema yô, yange Bibilo wase se u geman uuma asev. Shi er se er batisema kera ne kpa Bibilo ia fatyô u wasen se u geman uuma asev. Ken washika u Paulu nger hen Mbakristu mba ve lu Mbaheberu la, a kaa ér mkaanem ma Aôndo “ka ma nyôr zan zan ma pav uma a jijingi” shi kaa ér “ka ma kar mbamhen kua mbaawashima kpaa.” (Heb. 4:12) Inja i “uma” u i er kwagh na heen ne yô, ka kwagh u se lu ken won, u ior ka vea kenger se ve ve nenge a mi la. Inja i “jijingi” u i er kwagh na heen ne yô, ka kwagh u se lu kimi, u ior ka vea kenger se kpa ve fatyô u nengen a mi ga la. Sha nahan yô, Paulu lu kaan ér aluer se ôr Bibilo se kav kwagh u Aôndo a soo ér se er la yô, aeren a ase aa tese mbagenev kwagh u se lu kimi la. Ashighe agen kwagh u ior ve nengen ér se mba la ngu a kaha kposo a kwagh u se lu kimi jim jim laa? (Ôr Mateu 23:27, 27.) Hen sha kwagh u aluer u ngu ken mbamlu mba se lu timen sha mi hegen ne ve ú er yô.

 Za Hemen u Vesen Vea Nongo u Yehova Imôngo

7, 8. (a) Er nan ve mbagenev ken Mbakristu mba ve lu Mbaheberu la yange ve soo u zan hemen u dondon akaa agen ken Tindi a Mose laa? (b) Se fatyô u kaan ser yange ve lu hendan a awashima u Yehova la sha ci u nyi?

⁷ Se kpishi se fa mkaanem ma i nger ken Anzaakaa 4:18 la dedoo. Ma kaa ér: “Gbenda u orperapera ngu er iwanger i sha use nahan, ngi seer a seer zan hemen zan zan mkende u iyange sha sha tembe la.” Kwagh ne tese ér shighe ka una karen yô, se hemba fan kwagh u Yehova a soo ér se er la shi se hemba fan u eren ishima na kpaa.

⁸ Se hen ken ngeren u a bee la ser shighe u Yesu kpe kera la kpa, Mbakristu kpishi mba ve lu Mbaheberu la soo u kuran Tindi u Mose la her. (Aer. 21:20) Paulu pase ve wang ér kera gba u Mbakristu vea kura Tindi u Mose ga, kpa mbagenev ken a ve lumun a kwagh u Yehova soo ér ve er la ga. (Kol. 2:13-15) Adooga yange ve hen ér aluer ve za hemen u dondon akaa agen ken Tindi u Mose la yô, mba ve lu ken kwaghaôndo u Mbayuda la vea kera tôv ve a ican ga. Kpa Paulu pase Mbakristu mba ve lu Mbaheberu mbara wang ér aluer ve za hemen u eren kwagh u a hendan a awashima u Aôndo yô, vea nyôr ken mmem u Aôndo ga. * (Heb. 4:1, 2, 6; ôr Mbaheberu 4:11.) Yange gba u vea lumun ér hegen Yehova soo ér ior nav ve civir un sha gbenda ugen kposo ve, Yehova una lumun ve ye.

9. Doo u a lu se ken ishima nena shighe u wanakiriki u jighjigh man u fan kwagh a gem gbenda u se kav ma kwagh ken Bibilo laa?

⁹ Nyian ne, ashighe agen wanakiriki u jighjigh man u fan kwagh ka a wase se u kaven ma ityesen i ken Bibilo sha gbenda u ú kaha a mhen u se vande lun a mi kera yô. Doo u a saan se iyol a mbamgem mban. Ve tese ér Yehova ngu tesen se mimi sha ikyev i wanakiriki u jighjigh man u fan kwagh. Ashighe agen Mbahemenev mba Shin Tine, mba ve til sha ityough ki wanakiriki u jighjigh man u fan kwagh la, ka ve hide ve nenge sha gbenda u se kav mimi sha akaa agen la. Anmgbianev mban ka vea nenge ér ka hange hange u geman akaa agen yô, mba cie u kôôm gbenda u yange ve vande pasen atesen agen ken ijime la, shin pasen a sha er a seer wanger ga. Ve fa ér ior mbagenev vea ôr akaa sha wanakiriki u jighjigh man u fan kwagh dang, kpa ka kwagh u a hembe gban ve kwagh la ga. Kwagh u a hembe gban ve kwagh yô, mba eren kwagh u a zough sha awashima u Aôndo yô. Ka i lu u nena shighe u wanakiriki u jighjigh man u fan kwagh a gem gbenda u se kav ma kwagh ken Bibilo laa?—Ôr Luka 5:39.

10, 11. Mbahenen Bibilo mbagenev yange ve er nena shighe u i pase ve ér ve kar igbenda i he i pasen kwagh la, man ikyav ne tese se nyi?

¹⁰ De se time sha ikyav igen. Kuma er anyom deri môm nahan ken ijime, Mbahenen Bibilo mbagenev mba yange ve naan akaaôron a ken igbar tsembelee yô, hen ér ka gbenda u hemban doon u vea pase loho u dedoo je la. Yange i doo ve u lamen sha ishigh ki ikpelaior. Mbagenev yange ior a wuese ve sha ci u akaaôron ve la nahan i doo ve kpishi je. Kpa shighe kar yô, ior mba Yehova va seer kaven ér Yehova soo ér ve er kwagh i hemba di u nan akaaôron a ken igbar la. Yange soo ér ve pasen kwagh sha uya uya man sha igbenda igen kpaa. Mbagenev mba ve fa u nan akaaôron tsema tsema la lu nurun ityô. Akaaôron a ve yange na mbagenev hen ér Yehova doo ve ishima shi mba ongo imo na, kpa kwagh u ve er sha ikyaa ne la tese ér kwagh ve lu nahala ga. Se fa er ieren ve ne yange i doo Yehova ga yô. Ve undu nongo na.—Mat. 10:1-6; Aer. 5:42; 20:20.

¹¹ Mbahenen Bibilo mba ve shi her mbara kpa yange taver ve mbagenev kpishi u pasen kwagh sha uya uya, hemban je yô sha hiihii la. Kpa ve ungwa imo i Yehova, ve dondo nongo u Yehova sha mimi. Shighe kar yô, hemba lun ve zange u pasen kwagh sha uya uya. Yehova yange na ve iveren na mgbeghaa. Ka u er nena shighe u wanakiriki u jighjigh man u fan kwagh a kaa ér u̱ kar ma gbenda u pasen kwagh u ú lu a vande pasen kwagh a mi ga laa? Shighe u i lu inja er gbenda ne taver je kpa, ka u ungwa imo na kpa?

 Shighe u Or u Doon Se Ishima Nan Undu Yehova Yô

12, 13. (a) Er nan ve Yehova a kaa a vese ér se ‘dugh iferor’ la ken a vese kera? (b) Ka mlu u nyi nahan alaghga una taver mbamaren mba ve lu Mbakristu laa?

¹² Se cii se lumun ser u̱ se er ishima i Yehova yô, saa se kura tindi u a kaa ér se lu wang sha hanma gbenda la. (Ôr Titu 2:14.) Kpa akaa agen nga a aa na a taver se u kuran tindi ne yô. U tesen ikyav yô, hen ase sha kwagh ne: Orkristu ugen vea kwase na mba civir Yehova sha mimi, mba a wan u nomso môm tseegh maa a undu mimi. Wan la hemba soon “mdoom ma isholibo ma ma lu sha anyangem kpeghee la” a ikyaryan na a Yehova kua mbamaren nav la. Ieren na la na yô, ka u una kera fatyô u lun ken tiônnongo ga. Nahan i dugh un ken tiônnongo sha, kera ngu imôngo vea ior mba Aôndo ga.—Heb. 11:25.

¹³ Vihi mbamaren mbara je kondo! Ve fa kwagh u Bibilo i kaa la, ér: ‘De zough nen a ma or u i yer nan er anmgbian kpa nan gem nan lu or u idya shin or u hua shin or u civir akombo shin or u ityuhwan shin or u hunden msôrom shin or u numun gbenda ga; imbaor la yô, kwaghyan tsô kpaa de ye a nan imôngo ga.’ Shi i̱ kaa ér “Dugh nen iferor la ken a ven kera.” (1 Kor. 5:11, 13) Ve fa er ishember i “ma or” la i we ior mba hen tsombor ve mba ve lu hen ya môm a ve ga la kpa ker yô. Nahan kpa er wan ve ne a doo ve ishima kpishi yô, alaghga vea hen ér: “Se lam a wan wase er se fetyô cii. Aluer se lam a na ga yô, se fatyô u wasen un u hiden hen Yehova ga.” *

14, 15. Kanyi i gbe u mbamaren vea umbur shighe u ve lu tsuan ér vea lam a wan ve u i dugh nan ken tiônnongo kera laa?

¹⁴ Vihi se kpishi er Mbamaren mbara ve nyer ken ishimavihin nahan. Wan ve la yange lu a ian i den kwagh u lu eren la. Kpa hemba doon un u eren kwagh u shami ga, a u lun vea mbamaren nav man tiônnongo la. Mbamaren mbara yange ve soo u wasen wan ve, kpa ve lu a tahav sha kwagh u tsua u eren la ga. Se kav er hii ve ishima vihi ve yum yô.

¹⁵ Anmgbian wase u nomso man u kwase la vea er nena? Vea dondo tindi u Yehova a we se wang laa? Ka mimi, ashighe agen a gba keng u vea lam a wan ve sha ikyaa i hange hange i hen tsombor ve. Nahan kpa, vea tôô ér ve mba a atôakyaa kpishi a vea lamen a wan ve yôô? Zum u ve lu tsuan kwagh u vea er sha ikyaa ne yô, gba kpee u vea umbur kwagh u Yehova a soo ér ve er la. Gba u vea umbur ér Yehova soo ér ior nav ve lu wang. Kape i lu ve yange wa tindi ér “dugh nen iferor la” ken tiônnongo kera je la. Shi a soo ér or u nan er isholibo la nana gema inja i nan, nana hide ken tiônnongo. Mbamaren vea tese ér ve soo kwagh u Yehova kpa a soo la nena?

16, 17. Kanyi se hen sha ikyav i Aron laa?

¹⁶ Aron, anmgbian u Mose yange nyôr ken mlu u taver kpishi sha ci u kwagh u ônov nav mba nomso uhar er yô. Ônov nav, Nadabi man Abihu, yange ve na nagh sha gbenda u Yehova lumun a mi ga yô. Nahan Yehova tindi usu sha  va hia ve ve kpe. Nenge er yange Aron una lu ken ishimavihin kpishi sha ci u kwagh ne yô. Kera lu a Aron una lam a ônov nav sha won ga, sha ci u ve kpe. Kpa kwagh ugen lu u yange na ve hagher Aron kua tsombor na yum yô. Mose yange kaa a Aron kua ônov nav mbagenev mbara ér Yehova soo ér ve tese ér kwagh la vihi ve ga. Mose kaa ér: “De lu nen ityough meghaa ga, man de anden nen akondo a en kpaa ga, sha er né kpe ga, man A̱ de yugh ior cii kpaa ga yô.” (Lev. 10:1-6) Se hen kwagh sha kwagh ne wang. Gba u Yehova una hemba doon se ishima a mba hen tsombor wase mba ve kera til sha mimi ga la.

¹⁷ Nyian ne, Yehova woo mba ve per atindi a na la ave ave ga. Ka a tese ve dooshima shi a na ve ian i den ieren ve i bo la. Kpa mbamaren ka vea per tindi u Yehova, vea henen ér ve mba a atôakyaa kpishi a vea lamen a wan ve u i dugh nan ken tiônnongo kera nahan, i lu Yehova nena?

18, 19. Aluer mba hen tsombor tile sha mimi hen Yehova her yô, ka averen a nyi vea zua a mini?

¹⁸ Ior kpishi kaa ér yange ve hide ken tiônnongo sha ci u ahuraior a ve man tsombor ve lu jighjigh hen Yehova her shi de u lamen a ve. U tese ikyav yô, gumkwase ugen yange kaa a mbatamen ér kwagh môm u yange na ve un gema uma na yô, lu gbenda u anmgbian na u nomso eren kwagh la. Shighe u i dugh un kera la, anmgbian na u nomso la di gema lu jighjigh hen Yehova, lu kuran atindi a na. Kwagh ne na yô, un soo u hiden ken tiônnongo.

¹⁹ Nahan kanyi i gbe u se ere? Gba u se ungwan imo i Yehova sha hanma kwagh u se eren ken uma wase cii. Er se yen yô, ashighe agen a taver se u eren kwagh ne. Nahan kpa, gba u se na jighjigh ser kwagh u Yehova a kaa ér se er cii, ka kwagh u hemban doon sha ci wase je la.

“Mkaanem ma Aôndo Ma Uma Je”

20. Ka sha igbenda ihiar i nyi se fatyô u kaven kwagh u i er ken Mbaheberu 4:12 laa? (Nenge ngeren u shin kpe la.)

²⁰ Shighe u Paulu nger ér “Mkaanem ma Aôndo ma uma” la, lu kwagh u Bibilo lu ôron ga. * (Heb. 4:12) Avur agen a ken ityough kira tese ér lu ôron kwagh u uityendezwa mba Aôndo. Paulu lu ôron ér uityendezwa mba Aôndo mba gbe inya ga. Yehova yange ôr kwagh u kwaghôron na kaa ér: “Una hide her a Mo gbilin ga.” Shi a kaa ér: “Ikyôr ia lagh un sha kwagh u M tindi un u eren yô.” (Yes. 55:11) Nahan aluer Aôndo kure uityendezwa nav sha shighe u se soo la ga yô, a gba u se wa shima. Se fa tsô ser Yehova “ngu eren tom her” sha u kuren awashima na vough.—Yoh. 5:17.

21. Kwagh u i nger ken Mbaheberu 4:12 la una wase mbabeenyol vea za hemen u civir Yehova nena?

²¹ Ior kpishi ken “zegeikpelaior” la civir Yehova anyom kpishi hegen. (Mpa. 7:9) Ve ver ishima ér vea tsa ken botar ne gbem vea kar been iyol ker ga. Kpa mba eren tom ken mcivir u Yehova her sha afatyô ve cii. (Ps. 92:14) Ve fa ér “mkaanem ma Aôndo ma uma” shi uityendezwa mba Yehova vea kure sha mi keng. Ve fa ér ngu eren tom sha u kuren awashima na sha ci u tar ne man uumace kpaa. Er awashima u Aôndo a lu un a inja yô, ka i saan un iyol zum u se tese ser se kpa awashima na ngu se a inja yô. Kwagh môm kpa una yange Yehova u kuren awashima sha iyange i mmem i sha utaankaruhar ne ga. Shi a fa wener nongoior na ua za hemen u eren kwagh u a zough sha awashima na yô. We di ye? Ú nyôr ken mmem u Aôndo vee?

[Ngeren mba shin kpe]

Ú Umbur Kpa?

• Kanyi i gbe u se er ve se nyôr ken mmem u Aôndo nyiana?

• Awashima u Aôndo la gba zua vea mkegh u se keghen iyol u ngohol kwaghwan u ken Ruamabera la nena?

• Ka ken mbamlu mba nyi nahan alaghga a taver se u dondon kwaghwan u Ruamabera, kpa ka hange hange u se eren nahan sha ci u nyi?

• Ka sha igbenda ihiar i nyi nahan se fatyô u kaven kwagh u i er ken Mbaheberu 4:12 laa?

[Mbampin mba ngeren u henen]

[Foto u sha peeji 31]

Ishima vihi mbamaren mbara pev!