Naa No No Dzhena Vhuaweloni Ha Mudzimu?
Naa No No Dzhena Vhuaweloni Ha Mudzimu?
“Ipfi ḽa Mudzimu ndi tshithu tshi tshilaho, tshi shumaho.”—VHA-HEB. 4:12.
1. Ndi ifhio iṅwe nḓila ine ra nga dzhena ngayo vhuaweloni ha Mudzimu ṋamusi, fhedzi ndi ngani zwi tshi nga konḓa u ita zwenezwo?
THERONI yo fhiraho ro guda uri ri nga dzhena vhuaweloni ha Mudzimu nga u thetshelesa na u ita zwithu u tendelana na ndivho dzawe. Fhedzi nga zwiṅwe zwifhinga zwi nga kha ḓi konḓa u ita zwenezwo. Musi ri tshi guda uri Yehova ha ṱoḓi ri tshi ita zwiṅwe zwithu zwine ra nga vha ri tshi zwi takalela, zwi nga kha ḓi ri konḓela u mu thetshelesa nga u ṱavhanya. Zwenezwo zwi sumbedza uri ri fanela u ṱahulela u ḓiimisela u “thetshelesa.” (Yak. 3:17) Kha thero yeneyi ri ḓo ṱolisisa masia a si gathi ane a ri ṋea tshibuli tsha u sumbedza arali ro ḓiimisela u thetshelesa tshifhinga tshoṱhe.
2, 3. Ndi vhuḓidini vhufhio vhune ra fanela u bvela phanḓa ri tshi vhu ita u itela u dzula ri tshi takalelwa nga Yehova?
2 Naa ni a ṱavhanya u ṱanganedza ndayo yo thewaho Bivhilini. Maṅwalo a ri vhudza uri zwine Mudzimu a zwi funa ndi u ḓikuvhanganyela “madzanga a dzoṱhe dzitshakha.” (Hag. 2:7) Ndi ngoho uri vhunzhi hashu ro vha ri si madzanga musi ri sa athu guda ngoho. Naho zwo ralo, u funa Mudzimu na Murwa wawe zwo ri ṱuṱuwedza u ita tshanduko khulwane malugana na nḓila ine ra humbula na u ita zwithu ngayo u itela uri ri kone u takadza tshoṱhe Mudzimu. Mafheleloni, musi ro no ita vhuḓidini vhuhulwane ha u shanduka na u rabela nga hazwo, ro lovhedzwa nahone ra ṱanganedzwa nga Yehova.—Vhalani Vha-Kolosa 1:9, 10.
3 Naho ro no lovhedzwa, ri kha ḓi lwisana na u sa fhelela. Nndwa yeneyi i ḓo ḓi bvela phanḓa samusi ri vhathu vha songo fhelelaho. Naho zwo ralo, ri a khwaṱhisedzwa uri arali ra dzula ri tshi lwisana na u sa fhelela ro ḓiimisela tshoṱhe u takadza Yehova Mudzimu, u ḓo fhaṱutshedza vhuḓidini hashu.
Musi Ri Tshi Tea U Ṋewa Ndayo
4. Ndi dzifhio nḓila tharu dzine ra nga wana ngadzo ndayo i bvaho Maṅwaloni?
4 Musi ri sa athu ita tshanduko vhutshiloni hashu, ri fanela u ḓivha uri ndi mini zwine ra fanela u zwi shandula. Nyambo ine ya nga vhewa Holoni ya Muvhuso kana thero i re kha iṅwe ya khandiso dzashu i nga ri thusa u vhona uri hu na hune ra fanela u ita tshanduko hone vhutshiloni. Kha ḽiṅwe sia, arali ra sa pfesesa uri ri fanela u ita dziṅwe tshanduko musi ro thetshelesa nyambo kana ro vhala kha khandiso dzashu, Yehova a nga shumisa Mukriste nga riṋe u ri thusa u vhona uri hu na hune ra fanela u ita hone tshanduko.—Vhalani Vha-Galata 6:1.
5. Ri aravha hani musi ri tshi ṋekedzwa ndayo nga zwiṅwe zwifhinga, nahone ndi ngani vhahulwane vha tshi fanela u bvela phanḓa na vhuḓidini ha u ri thusa?
5 A zwi leluwi u ṱanganedza ndayo ine ra i ṋewa nga muthu a songo fhelelaho, hu sa londwi uri u i ṋea nga vhuṱali na nga lufuno. Naho zwo ralo, Vha-Galata 6:1, i amba uri Yehova u eletshedza vhahulwane uri vha fanela u ‘vhuyedzedza nga muya wa u vuḓa,’ zwine zwa amba uri vha fanela u ri khakhulula nga vhulenda. Arali ra ṱanganedza ndayo yavho, ri ḓo takalelwa nga Mudzimu. Musi ri tshi rabela, ri anzela u vhudza Mudzimu uri a ro ngo fhelela nahone ri khakha lunzhi. Naho zwo ralo, musi muṅwe muthu a tshi ri vhudza vhukhakhi hashu, ri anzela u ḓiimelela, ra ita u nga a si vhukhakhi vhuhulwane, ra timatima zwiṱuṱuwedzi zwa muthu ane khou ri ṋea ndayo, kana u sa tendelana na nḓila ye ndayo ya ṋewa ngayo. (2 Dzikh. 5:11) Arali zwine ra khou eletshedzwa nga hazwo zwi tshi kwama zwe zwa itwa nga muṅwe muraḓo wa muṱa, nḓila ine ra ambara na u ḓilugisa ngayo, u kuna muvhilini, kana vhuḓimvumvusi vhune ra vhu takalela fhedzi vhune ha sa takadze Yehova—ri nga kha ḓi sinyutshela muthu ane a khou ri eletshedza ra amba zwithu zwe ra vha ri songo tea u zwi amba. Fhedzi arali ra thoma ra dzika, ri anzela u ṱanganedza ndayo ine ra khou ṋewa sa ine ya ḓo ri vhuyedza.
6. Ipfi ḽa Mudzimu ḽi dzumbulula hani “zwiné mbilu ya fhima ya elekanya zwone”?
6 Luṅwalo lwa tshiṱoho tsha ino thero lu ri humbudza uri Ipfi ḽa Mudzimu ḽi a ‘shuma.’ Zwenezwi zwi amba uri Ipfi ḽa Mudzimu, Bivhili, ḽi na maanḓa a shandula vhutshilo ha vhathu. Ipfi ḽa Mudzimu ḽi ri thusa uri ri kone u ita tshanduko dzine dza ṱoḓea musi ro no lovhedzwa, samusi ḽo ri thusa uri ri kone u dzhia vhukando ha u lovhedzwa. Kha luṅwalo lwe Paulo a lu ṅwalela Vhaheberu, o dovha a amba uri Ipfi ḽa Mudzimu ḽi “a phulekanya, ḽa swika huné ḽa fhandakanya mbilu na muya, na mikala na mwongo; ndi muṱalukanyi wa zwiné mbilu ya fhima ya elekanya zwone.” (Vha-Heb. 4:12) Nga maṅwe maipfi, musi ri tshi pfesesa ndivho ya Mudzimu nga ha riṋe, nḓila ine ra aravha ngayo i dzumbulula zwine ra vha zwone mbiluni dzashu. Naa nga zwiṅwe zwifhinga hu na phambano kha zwine ra vha zwone nga nnḓa na zwine ra vha zwone nga ngomu? (Vhalani Mateo 23:27, 28.) Ṱhogomelani nḓila ine na nga aravha ngayo kha zwiimo zwi tevhelaho.
Tshimbidzanani Na Ndangulo Ya Yehova
7, 8. (a) Ndi mini zwe zwa vha zwi tshi nga ita uri vhaṅwe Vhakriste vha Vhayuda vha ṱoḓe u tevhedza maṅwe maitele a Mulayo wa Mushe? (b) Ndi ngani ri tshi nga amba uri vho vha vha tshi khou lwisana na ndivho ya Mudzimu ine ya khou bvela phanḓa?
7 Vhunzhi hashu ri a ḓivha maipfi ane a vha kha Mirero 4:18 ane a ri: “Gondo ḽa vhavhuya ḽi nga tshedza u naka, tshine tsha ḓi tshena tshi tshi ya, ḽa vhuya ḽa tsha.” Zwenezwi zwi amba uri nga u ya ha tshifhinga, ri fanela u khwinisa nḓila ine ra ḓifara ngayo na nḓila ine ra pfesesa ngayo ndivho dza Mudzimu.
8 Samusi ro zwi haseledza theroni yo fhiraho, musi Yesu o no fa, Vhakriste vhanzhi vha Vhayuda vho wana zwi tshi konḓa u litsha Mulayo wa Mushe. (Mish. 21:20) Naho Paulo o vha ṱalutshedza nga vhuṱali uri Vhakriste a vha tsheeho nga fhasi ha Mulayo wa Mushe, vhaṅwe vho landula zwe a vha vhudza zwone. (Vha-Kol. 2:13-15) Khamusi vho vha vha tshi humbula uri arali vha tevhedza maṅwe maitele a wonoyo Mulayo, vho vha vha sa ḓo tovholwa. Naho zwo ralo, Paulo o ṅwalela Vhakriste vha Vhaheberu nahone a vha ṱalutshedza uri vha nga si dzhene vhuaweloni ha Mudzimu arali vha bvela phanḓa vha tshi hanedzana na ndivho ya Mudzimu ine ya khou bvela phanḓa. * (Vha-Heb. 4:1, 2, 6; vhalani Vha-Heberu 4:11.) U itela u tondwa nga Yehova, vho vha vha tshi fanela u zwi ṱanganedza uri ho vha hu na iṅwe nḓila ine a khou livhisa ngayo vhathu vhawe.
9. Ri fanela u ḓipfa hani musi mukoma a fulufhedzeaho na wa vhuṱali a tshi ita dziṅwe tshanduko kha nḓila ine ra pfesesa ngayo zwiṅwe zwithu Bivhilini?
9 Musalauno, ho vha na dziṅwe tshanduko malugana na nḓila ine ra pfesesa ngayo dziṅwe pfunzo dza Bivhili. Ri fanela u takalela tshanduko dzenedzi, fhedzi dzi fanela u ri ṋea khwaṱhisedzo ya uri Yehova u khou shumisa tshigwada tsha mukoma a fulufhedzeaho na wa vhuṱali. Nga zwiṅwe zwifhinga, Tshigwada tshi Langaho tshine tsha imela mukoma a fulufhedzeaho na wa vhuṱali tshi a vusulusa nḓila ine ra pfesesa ngayo maṅwe mafhungo-ngoho. Musi vhenevha vhahashu vha tshinnani vha tshi vhona zwo tea uri hu itwe tshanduko, a vha ofhi u khakhulula nḓila ye dziṅwe pfunzo dza vha dzo ṱalutshedzwa ngayo tshifhingani tsho fhiraho kana u ita tshanduko u itela uri maṅwe mafhungo a pfesesee zwavhuḓi. Tsha ndeme vhukuma khavho ndi uri vha tshimbidzane na ndivho ya Mudzimu. Ni ḓipfa hani musi mukoma a fulufhedzeaho na wa vhuṱali a tshi ita dziṅwe tshanduko kha nḓila ine ra pfesesa ngayo zwiṅwe zwithu Bivhilini?—Vhalani Luka 5:39.
10, 11. Vhaṅwe Vhagudi vha Bivhili vho ita mini musi vha tshi pfa uri vha fanela u lingedza dziṅwe nḓila dza u huwelela, nahone ri guda mini kha tsumbo yeneyi?
10 Kha ri haseledze iṅwe tsumbo. Miṅwahani i ṱoḓaho u vha ya ḓana yo fhiraho, vhaṅwe Vhagudi vha Bivhili vhe vha vha vha tshi ṋekedza nyambo dzavhuḓi vhukuma vho vha vha tshi humbula u nga u ṋekedza nyambo ndi yone nḓila yavho ya u huwelela. Vho vha vha tshi funa u amba vhukati ha vhathu vhanzhi. Vhaṅwe vhavho vho vha vha tshi takalela vhukuma u khoḓiwa nga ha nyambo dzine vha dzi ṋekedza. Fhedzi nga murahu zwo ḓo bviselwa khagala uri Yehova u ṱoḓa vhathu vha tshi farakanea kha u ita mishumo yo fhamba-fhambanaho ya u huwelela u katela na wa nnḓu nga nnḓu. Vhaṅwe vha vhenevho vhathu vhe vha vha vhe zwiambi makone vho tou hana vha dadadza vha amba uri vha nga si zwi ite zwenezwo. Vho vha vha tshi vhonala u nga ndi vhathu vhane vha funa Yehova na vhane vha mu thetshelesa. Fhedzi musi hu tshi bviselwa khagala vhuṱanzi ha ndivho ya Yehova malugana na mushumo wa u huwelela, vho sumbedza uri vho vha vhe na zwiṱuṱuwedzi zwi si zwavhuḓi, vhe si vhathu vha muya. Yehova o ḓipfa hani nga ha vhenevho vhathu? Ho ngo vha fhaṱutshedza. Vho mbo ḓi sia ndangulo yawe.—Mat. 10:1-6; Mish. 5:42; 20:20.
11 Zwenezwo a zwi ambi uri zwo vha zwi tshi leluwa kha vhoṱhe vhe vha dzula vha tshi fulufhedzea kha ndangulo vhe vha bvela phanḓa vha tshi huwelela. Vhanzhi vho wana uri u thomani mushumo wonoyo wo vha u tshi konḓa. Fhedzi vho thetshelesa. Nga u ya ha tshifhinga, vho kunda mbilaelo dzavho nahone Yehova a vha fhaṱutshedza zwihulu. Ni ita mini musi mukoma a fulufhedzeaho na wa vhuṱali a tshi ni vhudza uri ni fanela u lingedza dziṅwe nḓila dza u huwelela dzine a ni athu vhuya na dzi lingedza? Naa ni a ḓiimisela u thetshelesa na lingedza yeneyi nḓila ya u huwelela ine ya vhonala i tshi konḓa?
Musi Ane Ra Mu Funa A Tshi Litsha U Shumela Yehova
12, 13. (a) Ndi ngani Yehova a tshi ṱoḓa uri vhaitazwivhi vha sa rembuluwi vha bviswe tshivhidzoni? (b) Vhaṅwe vhabebi vha Vhakriste vha sedzana na mulingo ufhio u konḓaho, nahone ndi mini zwi itaho uri u konḓese?
12 A zwi timatimisi uri roṱhe ri a zwi ḓivha uri u itela u takadza Mudzimu ri fanela u kuna muvhilini, kha vhuḓifari na nga lwa muya. (Vhalani Tito 2:14.) Naho zwo ralo, nga zwiṅwe zwifhinga ri nga kha ḓi konḓelwa vhukuma u thetshelesa ndaela yeneyi. Sa tsumbo, kha ri ri vhaṅwe vhavhingani vha Vhakriste vha fulufhedzeaho vha na ṅwana muthihi fhedzi wa mutukana we a litsha mafhungo-ngoho. U litshiswa nga nṱhani ha u ṱoḓa “u ḓi-phiṋa nga zwivhi” lwa tshifhinganyana nṱhani ha u ṱoḓa u vha na vhushaka na Yehova na vhabebi vhawe vha ofhaho Mudzimu. Nga mulandu wa zwenezwo, u a bviswa tshivhidzoni.—Vha-Heb. 11:25.
13 Vhabebi vha pfa vhuṱungu vhuhulwanesa. Vha a zwi ḓivha uri malugana na mafhungo a muthu o bviswaho tshivhidzoni Bivhili i ri “ni songo tshimbilelana na ane a ri dzina a tshi pfi murathu, a vha e phombwe, kana mudzia-vhuvhuḓu kana mudzia-midzimu i sili, kana mugoḓi, kana munwí, kana muṱanguli, wa u ralo na u ḽa ni songo ḽa naé.” (1 Vha-Kor. 5:11, 13) Zwiṅwe hafhu, vha a zwi ḓivha uri maipfi a re kha ndimana yeneyi ane a ri “na ane a ri” a katela na miraḓo ya muṱa i sa dzuli navho nḓuni nthihi. Fhedzi vha funa ṅwana wavho nga maanḓa! Nga nṱhani ha uri vha a mu funa, vha nga kha ḓi ḓivhudza uri: ‘Ri nga mu thusa hani uri a vhuyelele kha Yehova arali ri sa fhedzi tshifhinga tshinzhi nae? Ri ḓo mu thusa hani uri a vhuyelele kha Yehova arali ri sa ambi nae tshifhinga tshoṱhe?’ *
14, 15. Ndi phetho ifhio ine ya fanela u dzhiiwa nga vhabebi vha re na vhana vho bviswaho tshivhidzoni?
14 Vhenevho vhabebi ri a vha pfela vhuṱungu. Zwi re zwone ndi uri ṅwana wavho o vha tshi nga khetha u litsha matshilele awe a si a Vhukriste, u itela uri a bvele phanḓa a tshi ḓiphina nga u vha na vhushaka havhuḓi na vhabebi vhawe na vhaṅwe vhatendi. Kha ḽiṅwe sia, ho vha hu si na zwine vhabebi vha nga zwi ita. Ndi ngazwo vho kulea nungo.
15 Fhedzi, vhabebi vhenevho vha re na lufuno vha ḓo ita mini? Naa vha ḓo thetshelesa vhulivhisi ha Yehova vhu pfalaho? Kana vha ḓo lingedza u fhedza tshifhinga tshinzhi na ṅwana wavho o bviswaho tshivhidzoni, nahone vha vhuyafhedza nga u amba uri vha fhedza tshifhinga tshinzhi nae nga nṱhani ha mafhungo a ndeme ane a kwama muṱa? Musi vha tshi ita phetho, a vho ngo fanela u hangwa nḓila ine Mudzimu a ḓipfa ngayo nga ha zwine vha khou zwi ita. Ndivho yawe ndi uri ndangulo yawe i dzule yo kuna, nahone arali zwi tshi konadzea zwi ḓo ṱuṱuwedza muitazwivhi uri a shandule nḓila dzawe. Vhabebi vha Vhakriste vha nga sumbedza hani uri vha tikedza ndivho yeneyo ya Yehova?
16, 17. Ri guda mini kha tsumbo ya Aroni?
16 Aroni mukomana wa Mushe o sedzana na vhuimo vhu konḓaho malugana na vharwa vhawe vhavhili. Edzani u humbula uri u fanela u vha o ḓipfa hani musi vharwa vhawe Nadaba na Abihu vha tshi ṋekedza Yehova zwiṱhavhelo zwi songo tea, nahone ha ḓa mulilo u bvaho ha Yehova wa vha vhulaha. Zwi tou pfala uri zwenezwo zwo ita uri vhenevho vharwa vha si tsha vha na vhushaka na vhabebi vhavho. Fhedzi hu dovha ha vha na zwiṅwe zwine zwa katelwa. Yehova o laedza Aroni na vharwa vhawe vhe vha fulufhedzea a ri: “Ni songo litsha u thakha dziṱhóho dzaṋu, na zwiambaro zwaṋu ni songo zwi kherukanya, uri ni sa ḓo fa, Yehova a vho ḓo sinyutshela tshivhidzo tshoṱhe.” (Lev. 10:1-6) Ri guda uri ri fanela u funa Yehova u fhira miraḓo yashu ya muṱa i sa fulufhedzei khae.
17 Ṋamusi, Yehova ha vhulahi vhane vha pfuka milayo yawe nga tshenetsho tshifhinga. U vha sumbedza lufuno na u vha ṋea tshibuli tsha uri vha rembuluwe kha mishumo yavho mivhi. Yehova u ḓo ḓipfa hani arali vhabebi vha muitazwivhi a sa rembuluwi vha tshi dzulela u mu linga nga u fhedza tshifhinga tshinzhi na ṅwana wavho o bviswaho tshivhidzoni?
18, 19. Miraḓo ya muṱa i ḓo ḓiphina nga phaṱhutshedzo dzifhio arali ya thetshelesa mulayo wa Mudzimu malugana na vho bviswaho tshivhidzoni?
18 Vhanzhi vhe vha vhuya vha bviswa tshivhidzoni vha a tenda uri u fulufhedzea ha vhabebi vhavho na khonani dzavho kha Yehova ndi zwone zwe zwa vha thusa uri vha vhuyelele tshivhidzoni. Sa tsumbo, muṅwe wahashu wa tshisadzini a re muswa o vhudza vhahulwane uri tshiṅwe tshithu tshe tsha mu thusa u shandula vhutshilo hawe “ndi nḓila ye khaladzi awe a thetshelesa ngayo ndugiselelo ya u bviswa tshivhidzoni.” O ri: “U nambatela hawe nga ho khwaṱhaho kha maitele a Maṅwalo zwo nthusa uri ndi ṱoḓe u vhuyedzedzwa tshivhidzoni.”
19 Ndi mini zwine ra fanela u zwi ita? Ri fanela u thetshelesa Yehova kha masia oṱhe a vhutshilo hashu. Samusi ri songo fhelela, nga zwiṅwe zwifhinga ri nga kha ḓi konḓelwa u ita zwenezwi. Fhedzi ri fanela u tenda nga ho khwaṱhaho uri zwine Mudzimu a ri vhudza zwone ndi zwone zwa khwine-khwine.
“Ipfi ḽa Mudzimu Ndi Tshithu Tshi Tshilaho”
20. Ndi dzifhio nḓila mbili dzine ra nga pfesesa ngadzo Vha-Heberu 4:12? (Sedzani ṱhaluso i re magumoni a siaṱari.)
20 Musi Paulo a tshi ṅwala uri “ipfi ḽa Mudzimu ndi tshithu tshi tshilaho,” o vha a sa khou ambela nga ho livhaho kha Ipfi ḽa Mudzimu, Bivhili. * Vhubvo ha mafhungo vhu sumbedza uri o vha a tshi khou amba nga ha mafulufhedziso a Mudzimu. Paulo o vha a tshi khou amba uri mafulufhedziso a Mudzimu a a ḓadzea tshifhinga tshoṱhe. Yehova o khwaṱhisedza zwenezwi kha zwe a zwi amba a tshi shumisa muporofita Yesaya we a ri: “Ipfi ḽanga . . . a ḽi nga vhuyi fhedzi ngeno hanga; tshaḽo . . . ḽi ḓo vuledza zwe nda ḽi rumela zwone.” (Yes. 55:11) Nga zwenezwo, a ro ngo fanela u fhela mbilu musi Mudzimu a sa ḓadzisi mafulufhedziso awe nga tshifhinga tshine riṋe ra ṱoḓa a tshi zwi ita ngatsho. Yehova “u kha ḓi shuma” u itela u khunyeledza ndivho yawe.—Yoh. 5:17.
21. Vha-Heberu 4:12 i nga thusa hani miraḓo ya vha “gogo ḽihulu” vha re vhalala uri vha bvele phanḓa vha tshi shumela Yehova?
21 Vhathu vhanzhi vha “gogo ḽihulu,” vho no fhedza miṅwaha minzhi zwino vha tshi khou shumela Yehova. (Ndzumb. 7:9) Vhanzhi vho vha vha sa humbuli uri vha ḓo vhuya vha kalaha na u kegulela kha ḽino shango ḽivhi. Naho zwo ralo, vha kha ḓi ita zwoṱhe zwine vha nga kona tshumeloni ya Yehova. (Ps. 92:14) Vha a zwi ḓivha uri “ipfi ḽa Mudzimu ndi tshithu tshi tshilaho,” na uri mafulufhedziso oṱhe a Yehova a ḓo ḓadzea, na uri Yehova u kha ḓi shuma u itela u ḓadzisa ndivho yawe nga ha ḽifhasi na nga vhathu. Samusi ndivho ya Mudzimu i ya ndeme khae, ri takadza mbilu yawe musi ri tshi sumbedza uri ndivho yawe ndi ya ndeme na kha riṋe. Tshifhingani tshenetshi tsha ḓuvha ḽa vhusumbe, Yehova u kha ḓi vha o awela, nahone a ri timatimi na luthihi uri u ḓo ḓadzisa ndivho yawe. Nahone u a zwi ḓivha uri sa tshigwada, vhathu vhawe vha ḓo bvela phanḓa vha tshi ita zwithu u tendelana na ndivho yawe. Inwi ni ḓo ita mini? Naa no no dzhena vhuaweloni ha Mudzimu?
[Ṱhaluso dzi re magumoni a siaṱari]
^ phar. 8 Vharangaphanḓa vhanzhi vha Vhayuda vho vha vha tshi tevhedza maṅwe maitele a Mulayo wa Mushe, fhedzi musi Yesu a tshi ḓa kha ḽifhasi a vho ngo tenda uri ndi ene Messia. Vho vha vha tshi khou lwisana na ndivho ya Mudzimu ine ya khou bvela phanḓa.
^ phar. 20 Ṋamusi, Mudzimu u shumisa Bivhili musi a tshi amba na riṋe. Bivhili i na maanḓa a u shandula vhutshilo hashu. Nga zwenezwo, zwine ra zwi vhala kha Vha-Heberu 4:12 zwo tea musi hu tshi ambiwa nga Bivhili.
Naa Ni A Zwi Humbula?
• Ndi mini zwine zwa ṱoḓea u itela u dzhena vhuaweloni ha Mudzimu ṋamusi?
• Ndivho ya Mudzimu i tshimbidzana hani na nḓila ine ra ḓiimisela ngayo u thetshelesa ndayo i bvaho Maṅwaloni?
• Ndi nga fhasi ha zwiimo zwifhio hune u thetshelesa vhulivhisi ha Maṅwalo zwa nga konḓa, fhedzi ndi ngani zwi zwa ndeme u thetshelesa?
• Vha-Heberu 4:12 i nga pfeseswa nga nḓila dzifhio mbili?
[Mbudziso dza Pfunzo]
[Tshifanyiso kha siaṱari 31]
Vhabebi vha pfa vhuṱungu vhuhulwanesa!
