Ga Be Un Ngak Got ko Toffan, Fa?

“Thin rok Got e ba fos ma ba’ gelngin ni ma maruwel.”​—HEB. 4:12.

1. (a) Mang reb e kanawo’ nrayog ni ngad uned ngak Got riy ko toffan e ngiyal’ ney? (b) Mang fan nib mom ni nga nog mab mo’maw’ ni ngan rin’?

 KAD weliyed ko fa binem e article ni faan gad ra fol rok Jehovah nge ulung rok, ma aram e rayog ni ngad uned ngak ko toffan. Re n’ey e ba mom ni nga nog mab mo’maw’ ni ngan rin’. Bod ni faanra kad nanged ni bay ban’en ni gad baadag ni gad be rin’ ma dabun Jehovah, ma sana som’on e gad ra togopuluw. Faanra aram rogodad, mab t’uf ni ngad filed rogon ni “ngaud folgad.” (Jas. 3:17, NW) Re article ney e gad ra weliy riy boch ban’en ni ma buch nrayog ni nge m’ug riy ko rriyul’ nib mom ni ngad folgad fa danga’.

2, 3. Faanra ngad felfelan’naged Jehovah, ma mang e thingar ud rin’ed?

² Ba mom ngom ni ngam fol ko fonow nu Bible, fa? Be yog e Bible nib m’agan’ Got ngay ni nge kunuy urngin e “machaf” ko pi nam nga lan e ulung rok. (Hag. 2:7) Riyul’ ni yooren i gadad e i rin’ boch ban’en nib kireb u m’on ni nge fil e Bible. Machane, bochan nib t’uf Got nge Fak rodad ma aram fan ni kad thilyeged e ngongol rodad. Mu tomuren e meybil nge athamgil ni ud ted ma aram e ke yog ni ngad  ognaged gadad ngad uned ko taufe.​—Mu beeg e Kolose 1:9, 10.

³ Machane, ku dawor da flontgad. Ere kub t’uf ni ngad thilyeged boch ban’en ko ngongol rodad ma gad athamgil ni ngad rin’ed e tin nib fel’. Ma gad manang ni faan gad ra athamgil ni ngad rin’ed e tin nib m’agan’ Jehovah ngay ma ra tow’athnagdad.

Nap’an Nra T’uf ni Ngan Fonownagdad

4. Mang dalip e kanawo’ nrayog ni ngan fonownagdad riy?

⁴ U m’on ni ngad gelgad ko meewar rodad, mab t’uf ni ngad nanged ko mang e gad ba meewar riy. Ba thilthil e kanawo’ ni ma fonownagdad Jehovah riy. Rayog ni nge fonownagdad u ban’en ni gad ba meewar riy u daken reb e welthin ni kan pi’ u Kingdom Hall, ara reb e article ko pi babyor rodad. Yu ngiyal’ e ra dabi yib angin, ma ma fanay Jehovah reb e walag u lan e ulung ni nge yal’uwegdad.​—Mu beeg e Galatia 6:1.

5. (a) Mang e gad ma rin’ yu ngiyal’ u nap’an ni yibe yal’uwegdad? (b) Mang fan nthingari athamgil e piin piilal ni ngar ayuweged gadad?

⁵ Demtrug feni fel’ e fonow ni ke pi’ be’ ngodad mab mo’maw’ ni nge m’agan’dad ngay ni bochan e gad manang nde flont. Machane rogon ni be yog ko Galatia 6:1, e ke tay Jehovah chilen ngak e piin piilal ni ngar “guyed rogon” ni ngar yal’uweged gadad u “fithik’ e sumunguy.” Ma faan gad ra fol riy, ma aram e gad ra fel’ u wan’ Got. Riyul’ nnap’an ni gad ra meybil mab mom ni nga dogned ngak Jehovah ndawor da flontgad, maku gad ma oloboch. Machane, nap’an nra yog be’ e kireb rodad ngodad, mab mom ni nga dogned fan ni kad rin’ed, ara dogned nde gel e kireb ko n’en ni kad rin’ed, ara dogned ni faen ni ke fonownagdad e dabun dakendad, ara de non ngodad u fithik’ e sumunguy. (2 Ki. 5:11) Sana ra yog ngodad ni bay be’ u lan e tabinaw rodad ni be rin’ ban’en nib kireb, ara ba t’uf ni ngad thilyeged rogon e munmad rodad, ara ba t’uf ni nge beech dowdad, ara ba t’uf ni ngad thilyeged e pi n’en ni gad ma felfelan’ ngay. Pi fonow ney e rayog ni nge k’aring e damumuw ngodad nga dogned boch ban’en nsusun e dab dogned. Rayog ni nge kireban’dad ko re n’ey, maku er rogon faen ni ke fonownagdad. Machane, nap’an nra m’ay e damumuw rodad, mab ga’ ni ma m’agan’dad ko fare fonow.

6. Uw rogon ni ma pufthinnag e thin rok Got e “n’en ni yima yim’ ni bochan nge tin ni yima lemnag”?

⁶ Fare thin nu Bible ni bay u tabolngin e re article ney e be puguran ngodad ni thin rok Got e “ba’ gelngin ni ma maruwel.” Arrogon, thin rok Got e bay gelngin ni nge thilyeg rarogon be’. Ke ayuwegdad kad thilyeged boch ban’en u rarogodad u m’on ngu tomuren ni kad uned ko taufe. U lan e babyor ni yoloy Paul ngak piyu Hebrew e ki yog riy ni thin rok Got e “ma yan nge yan i taw nga fithik’ i lanin’dad ko n’en ni gadad be lemnag, nge fithik’ e ulul nge yil, ma ma pufthinnag e n’en ni yima yim’ ni bochan nge tin ni yima lemnag.” (Heb. 4:12) Ere, nap’an nra tamilang u wan’dad e tin nib m’agan’ Got ngay ni ngad rin’ed, ma ngongol rodad e ra dag ko mang e bay u gum’ircha’dad. Bay ban’en nib thil u rarogodad ni ma m’ug ko ngongol rodad nge rarogodad ndabiyog ni ngan guy, fa? (Mu beeg e Matthew 23:27, 28.) Mu lemnag ko mang e ga ra rin’ ko pi n’en ni baaray.

Mu Fol ko Pi N’en ni Be Thil ko Ulung rok Jehovah

7, 8. (a) Mang fan ni immoy boch e Kristiano ni Jew ni yad baadag ni ngar folgad u boch ban’en ko fare motochiyel rok Moses? (b) Mang fan nrayog ni nga dogned ni yad be togopuluw ko tin nib m’agan’ Got ngay?

⁷ Boor i gadad e ke mit ngak fare thin ni bay ko Proverbs 4:18, BT ni gaar: “Fare pa’ i kanawo’ ni ma yan e girdi’ nib mat’aw u daken e bod e yal’ ni nge m’ug, ni be ga’ raen i yan nge mada’ ko ngiyal’ ni kari rran.” Re n’ey e be yip’ fan nra i n’uw nap’an ma be mon’og e tamilangan’ rodad ko tin nib m’agan’ Got ngay ni ngad rin’ed.

 ⁸ Kad filed ko fa binem article nu tomuren ni yim’ Jesus ma immoy boch e Kristiano ni Jew nib mo’maw’ ni ngar digeyed fare motochiyel rok Moses. (Acts 21:20) Yugu aram rogon ni yog Paul ni piin Kristiano e dakur moyed u tan e re motochiyel nem, ma boch i yad e dabun ni nge fol riy. (Kol. 2:13-15) Sana ur lemnaged ni faan yad ra fol u boch ban’en ko re motochiyel nem ma dab ni gafgownagrad. Machane, ba tamilang e n’en ni yog Paul ni faanra ngaur togopuluwgad ko tin nib m’agan’ Got ngay, ma aram e dabiyog ni ngar uned ngak ko toffan. a (Heb. 4:1, 2, 6; mu beeg e Hebrews 4:11.) Ere, faanra ngar fel’gad u wan’ Jehovah ma thingar ra nanged ni baadag Jehovah ni ngar pigpiggad ngak u yugu reb e kanawo’ nib thil.

9. Mang e ngad rin’ed ni faanra bay boch ban’en ni kan thilyeg u boch e machib rodad?

⁹ Ngiyal’ ney e bayi n’en me ayuwegdad fare tapigpig nib yul’yul’ mab gonop ni ngad nanged fan reb e machib u Bible nib thil rogon ni ud lemnaged kafram. Re n’ey e dabi magawonnag lanin’dad, ya susun ni nge gelnag e pagan’ rodad ko fare tapigpig nib yul’yul’ mab gonop. Nap’an nra guy e piin owchen e re “tapigpig” nem nib t’uf ni ngan tamilangnag ara ngan yal’uweg boch ban’en ko machib rodad, ma darur taleged ndab ni thilyeg. Re ulung i tapigpig nem e kab ga’ fan u wan’rad ni ngar rin’ed e tin nib m’agan’ Got ngay ko bin ni ngar yororiyed yad ko gathibthib nra un tay ngorad ni bochan boch ban’en ni kar thilyeged. Mang e ga ma rin’ u nap’an ni kan thilyeg boch ban’en ko machib rodad?​—Mu beeg e Luke 5:39.

10, 11. (a) Mang e rin’ boch e tapigpig rok Jehovah kafram u nap’an nra nanged nsusun e ngar thilyeged boch kanawoen e machib ni yad be tay? (b) Mang e gad ra fil ko re n’ey?

¹⁰ Ngkud weliyed ban’en ni ke buch. Sogonap’an raay e duw ni ke yan, ma immoy boch e tapigpig rok Jehovah ni yad ma pi’ e welthin ni fan ko yoor nrib manigil nra lemnaged ni pi welthin nem e aram e bin th’abi fel’ e kanawo’ nrayog ni ngar machibgad riy. Pi girdi’ nem e yad baadag ni yad ma pi’ e welthin u fithik’ e yoor, maku boch i yad e ri baadag ni ma pining e girdi’ e sorok ngak ko welthin ni ma pi’. Machane, faani munmun me tamilang u wan’ e pi tapigpig rok Jehovah ni ku baadag Jehovah ni ngkur machibgad u boch e kanawo’, nib muun e machib u mit e tabinaw ngay. Boch i yad nib salap ko welthin e dabun e re n’em. Bochan nib fel’ e welthin ni ur pied, min lemnag nib t’uf Jehovah rorad ma yad ma fol rok, machane ngongol rorad e m’ug riy ni gathi aram rogon. Gad manang nde m’agan’ Jehovah ko n’en ni kar rin’ed, ma aram mar chuwgad ko ulung rok.​—Matt. 10:1-6; Acts 5:42; 20:20.

¹¹ Boor e tapigpig rok Jehovah ni i mo’maw’ ngorad ni ngar machibgad u mit e tabinaw ko som’on. Yugu aram rogon ma kar folgad ma kar pared ni yad ba yul’yul’ ko ulung rok Jehovah. Ma faani munmun me mom ngorad ni ngaur machibgad u mit e tabinaw. Mang e ga ma rin’ u nap’an nra yog fare tapigpig nib yul’yul’ ni ngan machib u reb e kanawo’ ndawor nrin’ bayay? Ga ma fol riy ni yugu aram rogon nib mo’maw’ ngom, fa?

Nap’an Nra Digey Be’ nib T’uf Rodad Jehovah

12, 13. (a) Mang fan nib m’agan’ Jehovah ngay ni ngan tharbog be’ nde kalngan’? (b) Mang boch e skeng ni ma mada’nag e gallabthir ni Kristiano, ma mang fan nib mo’maw’?

¹² Dariy e maruwar riy nib mich u wan’dad ni faanra ngad fel’gad u wan’ Jehovah ma thingar da folgad ko motochiyel rok ni be yog ni ngad pared ni gad ba beech u gubin ban’en. (Mu beeg e Titus 2:14.) Machane, bay boch ban’en nra taw ngay mab mo’maw’ ni ngad folgad ko re motochiyel ney. Bod ni susun e ke digey e bitir rok l’agruw e Kristiano e tin riyul’ ni bochan e ke adag e “felfelan’ nib ngoch nap’an” ko bin ni nge par nib fel’ e tha’ u thilrow Jehovah nge thilrad e gallabthir rok. Ere kan tharbog ko ulung.​—Heb. 11:25.

 ¹³ Rib gel e kireban’ ni ke tay e gallabthir rok! Yow manang ni be yog e Bible ni “dab un chag ngak be’ ni be yog ni ir reb i walagey ni girdien Kristus machane be ngongliy e ngongol ko darngal, ara ba chogow, ara ma ta’ fan ma ma meybil ngak e liyos ni ma meybil boch e girdi’ ngay, ara ma t’ar e thin nga daken e girdi’, ara be’ nib tamuun rrum, ara ma th’ab e motochiyel. Mus ni ngan par nga but’ ngan un ngak e mit i girdi’ nem ko abich ma dab ni rin’.” (1 Kor. 5:11, 13) Maku yow manang ni fare bugithin ni “be’” ni bay ko re thin nu Bible ney e kub muun ngay chon e tabinaw ndakurur pared u tabinaw. Machane, bochan nrib t’uf fakrow rorow, ma rayog ni ngar lemnagew e re thin ni baaray: ‘Uw rogon mug ayuwegew fakmow nge sul ngak Jehovah ni faanra dab kug nonow ngak? Gathi rayog ni nggu ayuwegew ni faanra ug nonow ngak?’ b   

14, 15. Mang e thingari dugliy e gallabthir rok be’ ni kan tharbog?

¹⁴ Ra kireban’dad ni gad ra guy e gal labthir nem ni be kireban’row. Bin riyul’ riy e rayog ni nge thilyeg e bitir rorow e ngongol rok, machane de rin’. Ya ke mel’eg e tin nib kireb ban’en ma ke digey e gallabthir rok nge ulung. Yugu aram rogon ni yow baadag ni ngar ayuwegew fakrow, machane dariy ban’en nrayog ni ngar rin’ew. Ere gad manang fan ni kari gafgow lanin’row!

¹⁵ Ere mang e yow ra rin’? Gur, yow ra fol ko n’en ni ke yog Jehovah? Riyul’ ni bay ba ngiyal’ nra taw ngay mab t’uf ni ngar nonad e bitir rorow ni bochan ban’en ko tabinaw nib ga’ fan ni ngan weliy. Machane, gur yow ra lemnag ni boor fan ni ngar nonow ko bitir rorow, fa? U m’on ni ngar dugliyew e n’en ni ngar rin’ew, ma thingar dab ra pagew talin e n’en ni baadag Jehovah ni ngar rin’ew. Ba m’agan’ ngay ni nge par e ulung rok nib beech, maku baadag ni nge thilyeg faen ni ke denen e ngongol rok me sul ko ulung. Ere uw rogon ni nge dag e piin gallabthir ni Kristiano ni ku aram e n’en ni yad baadag?

16, 17. Mang e gad ra fil ni faan gad ra fal’eg i lemnag e n’en ni buch rok Aron?

¹⁶ Aron ni walagen Moses e mada’nag reb e skeng nib mo’maw’ ni bochan e n’en ni rin’ l’agruw e pumoon ni fak ni Nadab nge Abihu fithingrow. Gal pumoon ney e ra piew e maligach ngak Jehovah u reb e kanawo’ nde m’agan’ ngay, ma aram me pag e nifiy u tharmiy nge li’row. Am lemnag gelngin e kireban’ ni tay Aron, ya dabkiyog ni nge non ngorow. Machane, ku bay ban’en ni yog Jehovah ni kub gel e mo’maw’ riy. I gaar Jehovah ngak Aron nge pi fak ni yad ba yul’yul’: “Dab mu ted lolugmed ndab kum ruwayed ara mu guchthuyed e mad romed ni gimed be dag ni be taganan’med. Ya gimed ra rin’, ma gimed ra yim’, ma ra damumuw Somol ngak yu Israel ni ga’ngin.” (Lev. 10:1-6, BT) Ba tamilang e re n’ey. Thingari gel e t’ufeg rodad ngak Jehovah ko t’ufeg rodad ngak chon e tabinaw rodad nde t’uf Jehovah rorad.

¹⁷ Ngiyal’ ney e dakir li’ Jehovah e girdi’ ni yad ma th’ab e motochiyel rok. Ya ma dag e t’ufeg ngorad maku ma bing e kanawo’ ngorad ni ngar kalgadngan’rad ko kireb rorad. Machane,  ra uw rogon laniyan’ Jehovah ni faanra dabi fol e gallabthir ni Kristiano ko motochiyel rok, mu ur towaygad nga boch ban’en ya nge yog ni ur nonad pi fakrad ni kan tharbograd ko ulung?

18, 19. Mang tow’ath e ra yog ngak chon e tabinaw ni faan yad ra fol ko fonow rok Jehovah u murung’agen e piin ni kan tharbograd?

¹⁸ Boor e girdi’ ni kar sulod ko ulung ni ka rogned ni n’en ni ke ayuwegrad ni ngar sulod ko ulung e bochan ni ke par e pi fager rorad nge chon e tabinaw rorad ni yad ba yul’yul’ ngak Jehovah, ma da ur nonad ngorad u nap’an ni kan tharbograd. Rogon ni yog reb e ppin ngak e piilal e, reb e ban’en ni ke ayuweg ni nge sul ko ulung e bochan ni “ke fol walagen ni pumoon ko yaram ni fan ngak e piin ni kan tharbograd.” I yog ni bochan ni guy nib “yul’yul’ ko fonow nu Bible, ma aram me adag ni nge sul.”

¹⁹ Ere mang e ba t’uf ni ngad rin’ed? Ba t’uf ni ngad folgad rok Jehovah u gubin ban’en. Yu ngiyal’ e ba mo’maw’ ni bochan e dawor da flontgad. Machane, thingar da nanged ni gubin ban’en ni ma yog Jehovah ni ngad rin’ed e ra fel’ rogodad riy.

“Thin rok Got e Ba Fos”

20. Mang l’agruw e kanawo’ nrayog ni ngad nanged fan fare thin ni bay ko Hebrews 4:12 riy? (Mu guy e footnote.)

²⁰ Nap’an ni yoloy Paul ni “thin rok Got e ba fos,” ma gathi be weliy murung’agen e Bible, ya tin ni ka bay e verse u lan e re guruy ney e ba tamilang riy ni be weliy murung’agen e pi n’en ni ke micheg Got. c Be yog Paul u roy ni gubin ban’en ni ma micheg Got e ma riyul’, ma ireray e n’en ni yog Jehovah u daken Isaiah ni profet ni gaar: “Aram rogon e thin ni ma yib u l’ugunag, ndabiyog ni nge dabi rin’ e tin ni ke m’ay i lemnag rog; ya ra rin’ urngin ban’en ni kug l’og ni nge rin’.” (Isa. 55:11) Ere thingar da gum’an’naged gadad ni faanra de lebguy Got e tin ni ke micheg ko ngiyal’ ni gad be lemnag, ya ba mudugil u wan’dad ni ka “be maruwel” Jehovah ni nge lebguy e tin nib m’agan’ ngay.​—John 5:17.

21. Uw rogon nra ayuweg e Hebrews 4:12 e piin pilibthir ni ngar ululgad ko pigpig ngak Jehovah ni yad ba yul’yul’?

²¹ Boor ko fapi girdi’ ni “pire’ ni pire’” ara fare ulung nib ga’ ni ke yoor e duw ni kar pigpiggad ngak Jehovah. (Rev. 7:9) Dar lemnaged ni yad ra pilibthir ma dawori yib e tomur. Yugu aram rogon ma dawori mulan’rad. (Ps. 92:14) Yad manang ni thin rok Got e ba fos, ma pi n’en ni ke micheg e ra riyul’, ma be maruwel Jehovah ni nge lebguy e pi n’em. Gad manang nib ga’ fan u wan’ Got e tin nib m’agan’ ngay, ere ri ma felfelan’ ni faanra i m’ug ni kub ga’ fan u wan’dad. Dariy ban’en nra taleg Jehovah ndab ki lebguy e tin nib m’agan’ ngay. Ma manang ni be un e girdi’ rok ngak ko toffan, ma yad ra ulul i rin’ e tin nib m’agan’ ngay. Me gur, ga be un ngak Got ko toffan, fa?

[Footnotes]

Ka Ga Manang?

• Faanra ngad uned ngak Got ko toffan, ma mang e ba t’uf ni ngad rin’ed?

• Nap’an nra tamilang u wan’dad e n’en nib m’agan’ Got ngay ni ngad rin’ed, ma uw rogon ni nge m’ug nriyul’ ni gad baadag ni ngad rin’ed e tin nib m’agan’ ngay?

• Mang boch ban’en nra mo’maw’nag ngodad ni ngad folgad ko fonow nu Bible, machane mang nib ga’ fan ni ngaud folgad?

• Mang l’agruw e kanawo’ nrayog ni ngad nanged fan fare thin ni bay ko Hebrews 4:12 riy?

[Study Questions]

[Picture on page 31]

Kari kireban’ e gal labthir ney!