¿Tsʼoʼok wa a wokol tu kúuchil u jeʼelel Dios?
¿Tsʼoʼok wa a wokol tu kúuchil u jeʼelel Dios?
«U tʼaan Jajal Dioseʼ kuxaʼan yéetel yaan u páajtalil.» (HEB. 4:12)
1. ¿Baʼax kʼaʼabéet k-beetik utiaʼal k-okol tu kúuchil u jeʼelel Dios, yéetel baʼaxten yaan kʼiineʼ ku talamtaltoʼon?
TEʼ XOOK máanikoʼ t-ileʼ utiaʼal k-okol tu kúuchil u jeʼelel Dioseʼ kʼaʼabéet k-uʼuyik u tʼaan yéetel k-chaʼik u nuʼuktikoʼon utiaʼal u béeykuntik baʼax u tukultmaj u beetik. Baʼaleʼ yaan kʼiineʼ maʼ chéen chʼaʼabil u beetaʼaliʼ. Jeʼex wa yaan baʼax jatsʼuts k-ilik k-beetik, baʼaleʼ maʼ uts tu tʼaan Jéeobaeʼ, yaan kʼiineʼ maʼatech k-séeb pʼatik. Baʼaleʼ leloʼ maʼ bey unaj u beetik juntúul máax «toj u tuukul[iʼ]» (Sant. 3:17). Teʼ xookaʼ yaan k-ilik jujunpʼéel baʼaxoʼob jeʼel u yeʼesik wa k-uʼuyik tʼaaneʼ, bey xan utiaʼal k-eʼesik wa k-kʼáat kuxtal jeʼex u nuʼuktik Dioseʼ.
2, 3. ¿Baʼax unaj k-beetik utiaʼal k-lúubul utsil tiʼ Jéeoba?
2 ¿K-ilik wa yaan kʼiineʼ ku talamtal k-beetik le baʼax ku yaʼalik le Bibliaoʼ? Le Bibliaoʼ ku yaʼalikeʼ Dioseʼ u kʼáat «u taas u ayikʼaliloʼob» tuláakal kaaj, lelaʼ u kʼáat u yaʼaleʼ, u kʼáat u muchʼ máakoʼob ku yilik jach koʼoj u tojoloʼob, tumen u yaabiltmoʼob baʼax toj (Ageo 2:7). U jaajileʼ táanil tiʼ k-kʼaj óoltik Jéeobaeʼ, yaʼab tiʼ toʼoneʼ k-beetik baʼaloʼob kʼaastak. Baʼaleʼ t-yaabiltaj Jéeoba yéetel u Hijo, ka t-kʼexaj k-tuukul bey xan baʼaxoʼob k-beetik. Utiaʼal k-lúubul utsil tiʼ Dioseʼ, maʼ xaaneʼ jach yaʼab kʼeexoʼob t-beetaj yéetel t-sen kʼáataj u yáantaj Dios ich payalchiʼ, bey túunoʼ páajchaj k-beetik. Ka tsʼoʼokeʼ okjaʼanajoʼon, maʼ xaaneʼ letiʼe kʼiin maas kiʼimakchaj k-óoloʼ (xokaʼak Colosailoʼob 1:9, 10).
3 Baʼaleʼ ¿tiʼ wa túun náak teʼeloʼ? Maʼatech. Tumen yoʼolal le kʼebanoʼ láayliʼ maʼ chéen chʼaʼabil kun seguer k-meyajtik Diosiʼ. Wa maʼ tu xuʼulul k-tsʼáaik k-óoleʼ, Jéeobaeʼ yaan u yáantkoʼon utiaʼal u béeytal k-beetik baʼax uts tu tʼaan sáamsamal.
Unaj k-kʼamik le tsolnuʼukoʼ
4. ¿Máakalmáak le óoxpʼéel bix u yáantkoʼon Jéeobaoʼ?
4 Utiaʼal k-beetik wa baʼax kʼeexileʼ táanil unaj k-ilik baʼax le kʼaʼabéet k-kʼexkoʼ. ¿Bix u yáantkoʼon Jéeoba utiaʼal k-beetik? Jeʼel u meyajtiʼ junpʼéel tsoltʼaan utiaʼal u beetik k-tuukuleʼ wa le baʼax ku yaʼalik junpʼéel revistaoʼ ku kʼuchul t-puksiʼikʼal. Baʼaleʼ wa maʼ t-naʼatik le tsolnuʼuk, wa maʼ t-tsʼáaik ichil k-kuxtaleʼ, jeʼel u meyajtiʼ le sukuʼunoʼob utiaʼal u kʼaʼajsikoʼobtoʼonoʼ (xokaʼak Galaciailoʼob 6:1).
5. ¿Baʼaxten le ancianoʼoboʼ unaj u yáantkoʼob le sukuʼunoʼoboʼ, yéetel baʼax maʼ unaj k-beetik ken tsolaʼaktoʼon u nuʼukiʼ?
5 Maʼ chéen chʼaʼabil k-kʼamik le tsolnuʼuk ku tsʼáaik k-éet máakil, kex jach uts yéetel ku kanáantik bix u yaʼaliktoʼonoʼ, tumen k-ojel láayliʼ kʼebaneʼ. Baʼaleʼ k-ojel Jéeobaeʼ ku yaʼalik tiʼ le ancianoʼoboʼ: «Unaj a wáantkeʼex [le sukuʼunoʼob] utiaʼal ka líikʼi[koʼoboʼ]. Baʼaleʼ unaj a beetkeʼex yéetel kabal óolal», u kʼáat u yaʼaleʼ yéetel yaabilaj (Gal. 6:1). Wa k-kʼamik le baʼax ku yaʼalikoʼoboʼ, Dioseʼ maas yaan u yilkoʼon bey jach yaʼab k-tojoleʼ. U suukaʼanileʼ, ken tʼaanakoʼon yéetel Jéeobaeʼ k-aʼaliktiʼ yaan baʼaxoʼob maʼ maʼalobtak k-beetkiʼ. Baʼaleʼ ken aʼalaʼaktoʼon tumen juntúul anciano yaan baʼax maʼ maʼalob k-beetkeʼ, maʼ chéen chʼaʼabil k-kʼamkiʼ. Maʼ xaaneʼ k-tuklik chéen kʼasaʼan t-éetel, maʼatech u kanáantik baʼax ku yaʼaliktoʼon, k-ilik bey maʼ nojoch le baʼax t-beetoʼ wa k-kaxtik uláakʼ baʼaxoʼob k-aʼale (2 Rey. 5:11). Kux túun wa ku tʼaanoʼob tiʼ baʼax maʼ maʼalob ku beetik juntúul k-láakʼtsil, tiʼ bix unaj k-vestirtikba, wa ku yaʼalikoʼob unaj k-ichkíil wa maʼ maʼalob baʼaxoʼob k-yéeyik utiaʼal k-náaysik k-óoliʼ, maʼ xaaneʼ jeʼel k-tsʼíikil ka tak k-beet u yuʼubikuba jelaʼanil le máax tsoliktoʼon u nuʼukoʼ. Baʼaleʼ ken máanak kʼiin yéetel ken k-jach tukulteʼ, k-ilik maʼalob le baʼax ku yaʼalikoʼob kaʼachoʼ yéetel maʼ unaj k-tsʼíikiliʼ.
6. ¿Bix u chíikbesik u Tʼaan Dios le baʼax k-tuklik yéetel baʼax yaan t-puksiʼikʼaloʼ?
6 Le teksto tuʼux jóoʼsaʼan u tuukulil le xookaʼ ku kʼaʼajsiktoʼoneʼ «u tʼaan Jajal Dioseʼ [...] yaan u páajtalil». Ku yáantkoʼon k-kʼex k-kuxtal, desde táanil tiʼ k-okjaʼ bey xan ken tsʼoʼokok. Teʼ teksto xanoʼ Pabloeʼ ku yaʼalikeʼ «u tʼaan Jajal Dioseʼ [...] ku yokol tak tu maas taamil u [wíinklil] yéetel u [tuukul] máak, tak tiʼ le baʼax [maas] taʼakbeʼen tiʼ máakoʼ; yéetel ku jóoʼsik tiʼ sáasil u tuukuloʼob yéetel baʼaxoʼob u kʼáat u beet le puksiʼikʼaloʼ» (Heb. 4:12). Le «wíinklil» ku yaʼalikoʼ táan u tʼaan tiʼ le bix k-ilaʼaloʼ, yéetel le «tuukuloʼ» táan u tʼaan tiʼ le jach bixoʼonoʼ. ¿Baʼax túun tu yóotaj u yaʼal le apostoloʼ? Tu yaʼaleʼ ken k-xok le Biblia yéetel ken k-naʼat le baʼax u kʼáat Dios ka k-beetoʼ, le baʼax k-beetik ken k-uʼuyoʼ ku yeʼesik jach bixoʼon. ¿Baʼax jeʼel u páajtal u yaʼalaʼal tiʼ cada juntúul tiʼ toʼoneʼ? ¿Junpʼéeliliʼ wa bix k-ilaʼal yéetel le jach bixoʼonoʼ? (Xokaʼak Mateo 23:27, 28.) Koʼoneʼex tuklik baʼax jeʼel k-beetik wa ka k-aktáant junpʼéel tiʼ le baʼaxoʼob ken k-ilaʼ.
Xíimbalnakoʼon jeʼex u bin u kaajal Jéeobaeʼ
7, 8. 1) ¿Baʼaxten jujuntúul tiʼ le judíoʼob tsaypachtik kaʼach Jesusoʼ maʼ tu xulaj u beetkoʼob le baʼax ku yaʼalik u Ley Moisesoʼ? 2) ¿Baʼaxten k-aʼalik joʼopʼ u binoʼob tu contra le baʼax u tukultmaj u beetik Jéeobaoʼ?
7 Yaʼab tiʼ toʼoneʼ u yojel baʼax ku yaʼalik Proverbios 4:18: «U beel le [utsoʼoboʼ] bey u sáasilil junpʼéel túumben kʼiineʼ; ku bin u jóokʼol jujunpʼíitil tak ken jóom sáasilchajak yéetel tuláakal u muukʼ». Le tʼaanoʼobaʼ ku yeʼesikeʼ le baʼaxoʼob k-beetik yéetel le bix k-naʼatik le baʼaxoʼob u tukultmaj u beetik Diosoʼ ku bin u maas maʼalobtal jeʼex u bin u máan le kʼiinoʼoboʼ.
8 Teʼ xook máanikoʼ t-ileʼ, le ka tsʼoʼok u kíimil Jesusoʼ, yaʼab tiʼ le judíoʼob tsaypachtik kaʼachoʼ maʼ tu xulaj u beetkoʼob le baʼax ku yaʼalik u Ley Moisesoʼ (Hch. 21:20). Teʼ cartaʼob tu tsʼíibtaj Pablooʼ tu yeʼesajtiʼob maʼ unaj u seguer u beetkoʼob le baʼax ku yaʼalik le Leyoʼ, baʼaleʼ yaan tiʼ letiʼobeʼ maʼ tu xulaj u beetkoʼobiʼ (Col. 2:13-15). ¿Baʼaxten? Maʼ xaaneʼ tumen tu tukloʼobeʼ wa ku beetkoʼob le baʼax ku yaʼalik le Ley, wa kex jujunpʼéel tiʼ le baʼax ku yaʼalikoʼ, maʼ kun pʼekbiloʼob tumen le judíoʼoboʼ. Teʼ carta tu tsʼíibtaj tiʼ le Hebreoboʼ, Pabloeʼ tu yeʼesajtiʼobeʼ utiaʼal ka páajchajak u yookloʼob tu kúuchil u jeʼelel Jéeobaeʼ kʼaʼabéet u seguer u xíimbaloʼob jeʼex u bin u kaajaleʼ (Heb. 4:1, 2, 6; xokaʼak Hebreob 4:11). * Wa u kʼáatoʼob ka kʼaʼamkoʼob tumen Dioseʼ unaj u creerkoʼob letiʼeʼ táan u nuʼuktik u kaajal yéetel junpʼéel baʼal túumben.
9. ¿Baʼax k-beetik ken kʼeʼexek junpʼéel baʼax yáax kaʼansaʼan tumen le palitsiloʼ?
9 Teʼ kʼiinoʼob xanaʼ tsʼoʼok k-ilik bix u bin u maas naʼataʼal jujunpʼéel baʼax ku kaʼansik le Bibliaoʼ. Toʼoneʼ maʼ unaj k-chiʼichnaktaliʼ, baʼaxeʼ unaj k-maas kʼubik k-óol tiʼ le palitsiloʼ. K-ojel le Cuerpo Gobernante, ku tʼaan tu kʼaabaʼ le palitsiloʼ, tu séebaʼanil ku yutskíintik wa ku jel xakʼaltik wa baʼax kaʼansajil wa ku yilik kʼaʼabéet. Maʼatech u chʼaʼik saajkil tiʼ baʼax kun aʼalbil. Utiaʼal le sukuʼunoʼobaʼ maas kʼaʼanaʼan u xíimbaloʼob jeʼex u bin u béeytal le baʼax u tukultmaj Diosoʼ. ¿Kux túun toʼon? ¿Baʼax k-beetik ken kʼeʼexek jujunpʼéel baʼax tsʼoʼok u yáax kaʼansaʼal? (Xokaʼak Lucas 5:39.)
10, 11. ¿Baʼax k-kanik tiʼ le baʼax tu beetaj jujuntúul sukuʼunoʼob le ka aʼalaʼab unaj u jóokʼloʼob kʼaʼaytajoʼ?
10 Koʼoneʼex ilik uláakʼ junpʼéel baʼax uchaʼan. Tu jóokʼbal le siglo 19 yéetel tu káajbal le siglo 20, ichil le J-xoknáaloʼob tiʼ le Biblia, jeʼex kʼaj óolaʼanil kaʼach u j-jaajkunajoʼob Jéeobaoʼ, yaan máaxoʼob jach maʼalob u máanskoʼob tsoltʼaanoʼob. Ku tuklikoʼob kaʼacheʼ u máanskoʼob maʼalob tsoltʼaanoʼobeʼ letiʼe bix maas maʼalob jeʼel u kʼaʼaytajoʼoboʼ. Jach jatsʼuts u yilik u tʼaanoʼob tu táan yaʼabkach máak, yéetel yaan tiʼ letiʼobeʼ uts tu tʼaan u yaʼalaʼal tumen u maasil jach maʼalob bix u máanskoʼob le tsoltʼaanoʼoboʼ. Baʼaleʼ naʼataʼab tumen u kaajal Dios unaj u jóokʼloʼob kʼaʼaytaj joonaj joonajil. Ka úuch lelaʼ, yaan tiʼ le máaxoʼob jach maʼalob u máansik u tsoltʼaanoʼoboʼ maʼ tu yóotoʼob u beetoʼobiʼ. Ku yilaʼal bey jach u tsʼaamaj u yóol u meyajtoʼob Yuumtsil kaʼacheʼ, baʼaleʼ le ka eʼesaʼabtiʼob baʼax u kʼáat Jéeoba ka u beetoʼobeʼ chíikpaj jach baʼax yaan tu puksiʼikʼaloʼob. Yoʼolal le baʼax tu beetoʼoboʼ xuʼul u kʼaʼamloʼob tumen Dios yéetel tu xúumpʼattoʼob u kaajal (Mat. 10:1-6; Hch. 5:42; 20:20).
11 ¿Baʼax úuch yéetel le máaxoʼob chúukpaj u yóoloʼoboʼ? ¿Chéen chʼaʼabil wa úuchik u yilik u jóokʼloʼob kʼaʼaytaj joonaj joonajil? Maʼatech. Yaʼabeʼ jach talam úuchik u yilik u káajal u beetik. U jelaʼanileʼ letiʼobeʼ tu yuʼuboʼob tʼaan. Jujunpʼíitileʼ xuʼul u sajaktaloʼob yéetel beetaʼab u bin utsil tiʼob tumen Jéeoba. ¿Kux túun teech? ¿Baʼax ka beetik ken aʼalaʼaktech unaj a kʼaʼaytaj junpʼéel bix maʼ suukaʼan a beetkiʼ? ¿Ka wóotik wa a beete?
Ken pʼaʼatak Jéeoba tumen juntúul máax k-yaabiltmaj
12, 13. 1) ¿Baʼaxten ku yaʼalik Jéeoba ka jóoʼsaʼak teʼ múuchʼulil le máaxoʼob ku kʼebantaloʼob yéetel maʼatech u arrepentiroʼoboʼ? 2) ¿Baʼax jeʼel u talamtal u yilik le taatatsiloʼoboʼ?
12 Jeʼex k-ojlileʼ, Jéeobaeʼ ku kʼamik chéen le máaxoʼob ku yilik u yantaltiʼob junpʼéel toj kuxtaloʼ (xokaʼak Tito 2:14). Baʼaleʼ lelaʼ jeʼel u beetik k-muʼyajtik yaʼab talamiloʼobeʼ. Tuukulnakoʼon tiʼ juntúul sukuʼun yéetel u yatan ku xuʼulul u meyajtaʼal Dios tumen u juntúuliliʼ hijoʼob. U hijoʼobeʼ ku xuʼulul u biskuba yéetel Jéeoba bey xan yéetel u taataʼob, ku chʼaʼtuklik «u kiʼimakkúuns[ik] u yóol tu yoʼolal tsʼeʼetsʼek kʼiinoʼob tiʼ u kiʼimak óolaloʼob le kʼebanoʼ», bey túunoʼ ku jóoʼsaʼal teʼ múuchʼuliloʼ (Heb. 11:25).
13 U taataʼobeʼ jach ku yaatal u yóoloʼob. U jaajileʼ letiʼobeʼ u yojloʼob baʼax ku yaʼalik le Biblia yoʼolal lelaʼ: «Maʼ u yantal mix baʼal a wileʼex yéetel le máax ku yaʼalikuba sukuʼun, ku tsʼoʼokoleʼ j-núup kʼeban, wa j-tsʼíibol taakʼin, wa ku [adorartik] beetbil [diosoʼob], wa ku yaʼalik baʼal, wa ku káaltal, wa ku yookol. Maʼ unaj mix a jaanleʼex yéetel le máax beyoʼ» (1 Cor. 5:11, 13). Ku naʼatkoʼobeʼ le tʼaan «le máax» ku yaʼalik le tekstooʼ táakaʼan xan u láakʼtsiloʼob kex maʼ kajaʼanoʼob ichil u yotochoʼobiʼ. Baʼaleʼ maʼ u yojloʼob baʼax unaj u beetkoʼobiʼ, tumen u yaabiltmoʼob u hijoʼob. Le oʼolal maʼ xaaneʼ ku tuklikoʼob: «Wa ku jach xuʼulul k-bisikba tu yéeteleʼ, ¿bix jeʼel k-áantik u kaʼa natsʼuba yiknal Jéeobaeʼ? ¿Maʼ wa maas maʼalob maʼ u jach xuʼulul k-bisikba tu yéeteliʼ?». *
14, 15. ¿Baʼax ku talamtal u chʼaʼtuklik u beetik u taataʼob le máax ku jóoʼsaʼal teʼ múuchʼuliloʼ?
14 Toʼoneʼ ku yaatal k-óol xan ken k-il bix u muʼyaj le taatatsiloʼoboʼ. Tumen maʼ yoʼolal baʼax tu beetoʼob ku muʼyajoʼobiʼ. Baʼaxeʼ letiʼe paal maʼ tu yóotaj u yuʼub tʼaanoʼ, tu chʼaʼtuklaj u seguer u beetik baʼax kʼaas, kex u yojel yaan u xuʼulul u biskuba yéetel u taataʼob bey xan yéetel le sukuʼunoʼob teʼ múuchʼuliloʼ. Le oʼolal ku naʼataʼal baʼaxten jach ku yaatal u yóol le taatatsiloʼoboʼ.
15 Baʼaleʼ letiʼobeʼ yaan junpʼéel baʼax unaj u chʼaʼtuklikoʼob: ¿yaan wa u beetkoʼob le baʼax ku yaʼalik Jéeobaoʼ? U jaajileʼ yaan kʼiineʼ ku kʼaʼabéettal u muchʼkubaʼob yéetel u hijoʼob utiaʼal u tsikbaltikoʼob wa baʼax jach kʼaʼanaʼan ichil le familiaoʼ. Baʼaleʼ ¿yaan wa u muchʼkubaʼob mantatsʼ kex maʼ kʼaʼabéetiʼ? Táanil tiʼ u chʼaʼtuklikoʼob baʼax ken u beetoʼobeʼ, maʼ unaj u tuʼubultiʼob baʼax ku yaʼalik Jéeobaiʼ. Letiʼeʼ ku yaʼalik ka jóoʼsaʼak le máax ku kʼebantal teʼ múuchʼulil utiaʼal u pʼáatal limpioil u kaajal, yéetel wa ku béeytaleʼ, ka u kʼex u tuukul le máax ku kʼebantaloʼ. ¿Bix jeʼel u yáantaj le taatatsiloʼob utiaʼal ka béeyak u beetaʼal lelaʼ?
16, 17. ¿Baʼax k-kanik tiʼ le baʼax úuch tiʼ Aaronoʼ?
16 Aarón, u sukuʼun Moiseseʼ, jach muʼyajnaj le ka kíim Nadab yéetel Abihú, u paalaloʼob. Letiʼobeʼ beetaʼab u kíimloʼob tumen Jéeoba, tumen maʼ maʼalob bix úuchik u kʼubkoʼob incienso tu táaniʼ. Maʼ xaaneʼ jach yaachaj tu yóol u taataʼob, tumen maʼ ken u kaʼa iloʼob, maʼ kun kaʼa tʼaan tu yéeteloʼob mix kun kaʼa yantal tu yéeteloʼob. Baʼaleʼ maʼ chéen letiʼe tu muʼyajtoʼ. Aarón yéetel u maasil u paalaloʼobeʼ aʼalaʼabtiʼob tumen Dios maʼ u yaatal u yóoloʼob jeʼex suukaʼanil u beetaʼal kaʼachoʼ: «Maʼ chóoj wachʼik u tsoʼotsel a pooleʼex, mix a jatik a nookʼeʼex tu yoʼolal u chíikulal okʼom kíimil, maʼ xan ka kíimkeʼex, ka u láal u pʼuʼujul Yuumtsil tu yóokʼol le kaajaʼ» (Lev. 10:1-6). Le baʼax úuchaʼ ku kaʼansiktoʼoneʼ, maas unaj k-yaabiltik Jéeoba, ke juntúul k-láakʼtsilil, maases wa maʼ tu arrepentir.
17 Bejlaʼeʼ Dioseʼ maʼatech u jáan beetik u kíimil le máaxoʼob beetik baʼax kʼaasoʼ. Yoʼolal u nojoch yaabilajeʼ ku tsʼáaik u páajtalil u arrepentir máak. Le oʼolal wa ku jóoʼsaʼal juntúul hijotsil teʼ múuchʼuliloʼ, ku beetaʼal tumen maʼ arrepentirnajiʼ. Le oʼolaleʼ, ¿baʼax jeʼel u yúuchul wa ku seguer u tʼaʼanal tumen u taataʼob kex maʼ kʼaʼabéetiʼ? Jéeobaeʼ jeʼel u yilik bey táan u túuntaʼal u yóoleʼ.
18, 19. ¿Baʼax utsiloʼob jeʼel u kʼamik le sukuʼunoʼob ku chúukpajal u yóoloʼob u beetoʼob baʼax ku yaʼalik Jéeoba ken jóoʼsaʼak juntúul u láakʼtsiloʼob teʼ múuchʼuliloʼ?
18 Yaʼab tiʼ le máaxoʼob jóoʼsaʼaboʼob kaʼach teʼ múuchʼulil yéetel kaʼa kʼaʼamoʼob ichiloʼ, ku yaʼalikoʼobeʼ, le baʼax áantoʼob u kʼex u tuukuloʼoboʼ letiʼe bix úuchik u chúukpajal u yóol u láakʼtsiloʼob yéetel u amigoʼob u beetoʼob baʼax ku yaʼalik Jéeobaoʼ. Junpʼéel carta túuxtaʼab tumen le ancianoʼob utiaʼal u kaʼa kʼaʼamal juntúul x-chʼúupal teʼ múuchʼuliloʼ, ku yaʼalikeʼ le baʼax áantoʼ letiʼe «úuchik u chúukpajal u yóol u sukuʼun u beet le baʼax ku yaʼalik Jéeoba ken jóoʼsaʼak máak teʼ múuchʼuliloʼ». Letiʼeʼ tu yaʼaleʼ úuchik u yilik «bix u beetaʼal le baʼax ku yaʼalik le Biblia tumen u sukuʼunoʼ le áant suut».
19 Jeʼex tsʼoʼok k-ilik teʼ xookaʼ maʼ unaj k-beetik chéen baʼax ku tsʼíiboltik k-puksiʼikʼaliʼ. Kex ka talamchajak k-beetik le baʼax ku yaʼalik le Bibliaoʼ unaj k-beetik, tumen le bix maas maʼalob jeʼel k-aktáantik le talamiloʼoboʼ letiʼe bix u kaʼansiktoʼon Jéeobaoʼ.
«U tʼaan Jajal Dioseʼ kuxaʼan»
20. ¿Tiʼ baʼax ku tʼaan Hebreob 4:12? (Ilaʼak le tsolajil xanoʼ.)
20 Le ka tu yaʼalaj Pablo teʼ Hebreob 4:12 «u tʼaan Jajal Dioseʼ kuxaʼan», maʼ táan u tʼaan kaʼach tiʼ le Bibliaoʼ. Le baʼax ku yaʼalik táanil yéetel tu tsʼoʼokbaloʼ ku yeʼesikeʼ táan u tʼaan kaʼach tiʼ tuláakal le baʼaxoʼob u yaʼalmaj Dios u beetkoʼ. * Ku yeʼesikeʼ le baʼaxoʼob ku yaʼalik Diosoʼ maʼ chéen ku yaʼalikiʼ, baʼaxeʼ ku béeykuntkoʼob. Lelaʼ letiʼe baʼax ku yaʼalik xan Jéeoba le ka tu yaʼalaj: «Le tʼaan ku jóokʼol tin chiʼoʼ, maʼ bíin kaʼa suunak tin wiknal wa maʼ u beet u meyajiʼ, [...] bíin xan u tsʼoʼokbes baʼax kin waʼalik» (Isa. 55:11). Le oʼolal maʼ unaj k-chiʼichnaktal wa k-ilik bey tsʼoʼok u xáantal maʼ béeychajak le baʼaxoʼob k-páaʼtikoʼ. Jéeobaeʼ «tak bejlaʼa táan u meyaj[eʼ]» yéetel yaan u seguer u beetik tak ken u láaj béeykunt le baʼax u tukultmaj u beetkoʼ (Juan 5:17).
21. ¿Bix u líiʼsaʼal u yóol le máaxoʼob tsʼoʼok u yantal u jaʼabiloʼob yanoʼob ichil le «yaʼabkach máakoʼob» tumen le baʼax ku yaʼalik Hebreob 4:12?
21 Yaan tiʼ le máaxoʼob yanoʼob ichil le «yaʼabkach máakoʼob[oʼ]» úuch joʼopʼok u meyajtikoʼob Jéeoba (Apo. 7:9). Yaʼabeʼ maʼ tu tukloʼob wa yaan u chʼíijloʼobiʼ, kex beyoʼ maʼatech u lúubul u yóoloʼob yoʼolal leloʼ (Sal. 92:14). ¿Baʼaxten? Tumen u yojloʼobeʼ «u tʼaan Jajal Dioseʼ kuxaʼan», yéetel Jéeobaeʼ láayliʼ táan u meyaj utiaʼal u béeykuntik baʼax u tukultmaj u beetkeʼ. Letiʼeʼ jach kʼaʼanaʼan u yilik le baʼax u tukultmaj u beetkoʼ, yéetel ku kiʼimaktal u yóol u yilik bey xan k-ilik toʼonoʼ. Ichil le siete kʼiin kuxlikoʼonaʼ Jéeobaeʼ táan u jeʼelel, tumen u yojel yaan u béeytal le baʼax u tukultmoʼ yéetel le máaxoʼob meyajtikoʼ yaan u seguer u kuxtaloʼob jeʼex u kʼáatoʼ. Jeʼex tsʼoʼok k-ilkoʼ, tuláakloʼon jeʼel u páajtal k-okol tu kúuchil u jeʼelel Dioseʼ. ¿Tsʼoʼok wa a wokol techiʼ?
[Tsolajiloʼob]
^ xóot’ol 8 Kex u nuuktakil le judíoʼob jach ku yilik u beetkoʼob le baʼax ku yaʼalik u Ley Moisesoʼ, ka kʼuch le Mesíasoʼ maʼ tu kʼaj óoltoʼobiʼ. Tumen maʼ tu yóotaj u yiloʼob bix u bin u béeykuntik Dios baʼax u tukultmaj u beetkiʼ.
^ xóot’ol 13 Jeʼel u páajtal a wilik u maasil teʼ libro «Pʼáateneʼex tiʼ u yaakunaj Jajal Dios», táan juʼun 207 tak 209.
^ xóot’ol 20 Teʼ kʼiinoʼobaʼ Dioseʼ ku tʼankoʼon yéetel le baʼax ku yaʼalik le Bibliaoʼ, lelaʼ ku péekskoʼon k-kʼex baʼaxoʼob k-beetik. Le oʼolal le baʼax tu yaʼalaj Pablo teʼ Hebreob 4:12 láayliʼ táan u tʼaan tiʼ le Bibliaoʼ.
Koʼoneʼex kʼaʼajsik le baʼaxoʼob t-iloʼ
• ¿Baʼax unaj k-beetik utiaʼal k-okol tu kúuchil u jeʼelel Dios?
• ¿Baʼax unaj k-beetik wa tsʼoʼok k-naʼatik le baʼax ku yaʼalik le Biblia ka k-beetoʼ?
• ¿Baʼax oʼolal ku talamtal k-beetik baʼax ku yaʼalik Dios, yéetel baʼaxten jach kʼaʼabéet k-beetik baʼax ku yaʼalik?
• ¿Tiʼ baʼax ku tʼaan Hebreob 4:12?
[U kʼáatchiʼiloʼob le xookoʼ]
[U tsolajil le oochel teʼ táan juʼun 31]
Le taatatsiloʼoboʼ jach ku yaatal u yóoloʼob
