Ngo ma Lutino Myero Gupwony i Kom Lubanga?

“Ginacoya ducu ma yam gicoyo, gicoyo pi teko pa Cwiny pa Lubanga. Konyo me pwony, me juko dano, me tiro kit pa dano, me nyebo dano wek gulub kit ma atir.”​—2 TEMCEO 3:16.

MITTE ni myero kipwony lutino ki lok ada i kom Lubanga. Gin gitwero pwonyo ada meno kikwene? Ki i Baibul, buk mo ma pud dong kiworo adada i lobo.

Baibul tye calo waraga mua ki bot Lubanga. I waraga meno, Lubanga onyuto kite dok omiyo tira bot lutinone ducu kit ma myero gukwo kwede, kadi bed pud gitino nyo gidito. Nen kong pwony mogo ma gitye i Baibul ki dong gin ma lutino bene gipwonyo ki i iye.

Lubanga mito ni wange gin ango i kome?

◼ Gin ma Baibul pwonyo: “Wek gunge ni, in keni aye ma nyingi Rwot [Jehovah], in aye Ngat Mamalo Twal ma loyo wi lobo-ni ducu.”​—Jabuli 83:18.

Pwony: Lubanga tye ada dok en tye ki nyinge.

◼ Gin ma Baibul pwonyo: “Rwot [Jehovah] ngiyo cwiny dano ducu, dok ngeyo gin ma cwiny dano yubo ducu ki tamme ducu. Ka ce iyenyo en, ci in ibinongo kome.”​—1 Tekwaro 28:9.

Pwony: Lubanga Jehovah paro pi wan ducu, kadi wa lutino matino. (Jabuli 10:14; 146:9) En mito ni wapwony lok i kome.

◼ Gin ma Baibul pwonyo: “Pe wuket gingi kom . . . latin kic mo. Ka iketo gingi komgi, ce gukok bota, ci abiwinyo kokogi ada.”​—Nia 22:22-24.

Pwony: Jehovah winyo kadi wa lega pa lutino matino. Waromo lok bot Lubanga kare ki kare kun watito kit ma wawinyo kwede i cwinywa ki dong tam ma watye kwede i kome.

◼ Gin ma Baibul pwonyo: “Gubedo ka temo Lubanga teretere, gumiyo kiniga omako Ngat Maleng pa Icrael.”​—Jabuli 78:41.

Pwony: Lokwa kacel ki gin ma watimo twero cwero nyo yomo cwiny Jehovah, pi meno omyero kong watamu matut ma peya wawaco lok nyo watimo gin mo.

 Omyero water jo mukene nining?

◼ Gin ma Baibul pwonyo: “Lubanga pe poko kin dano, ento en jolo dano ma i rok ducu ma gilworo en ki ma gitiyo gin ma tye atir.”​—Tic pa Lukwena 10:34, 35.

Pwony: Ka Lubanga ye dano ma gia ki i tekwaro mapat pat, ci wan myero pe wapok jo mukene pienni rangi del komgi nyo kit ma wanggi nen kwede pat ki megwa.

◼ Gin ma Baibul pwonyo: “Wubed ma wuyubbe kare ducu pi dok i lok ma dano bipenyowu kwede i kom gen ma wutye kwede; ento wudok iye ki mwolo dok ki woro.”​—1 Petero 3:15.

Pwony: Ka watye ka nyamo lok me Baibul, omyero watit tamwa ki tekcwiny ento labongo gero. Omyero bene wawor jo ma niyegi pat ki megwa.

Omyero water jo me odiwa nining?

◼ Gin ma Baibul pwonyo: “Wun litino, wuwiny lunyodowu i lok ducu, pien meno aye yomo cwiny Rwot.”​—Jo Kolocai 3:20.

Pwony: Ka lutino gibedo luwiny, man nyuto ni giwinyo lunyodogi dok gimito yomo cwiny Lubanga.

◼ Gin ma Baibul pwonyo: “Wudi cwinywu kekenwu, ngat acel acel odi cwinye i kom lawote, kun wutimo kica ki luwotwu i kinwu kekenwu pi balwu. Ka ngat mo i kinwu tye ki lok mo i kom lawote, timo kica pi bal myero obed tye macalo Rwot bene ceng otimowu kica.”​—Jo Kolocai 3:13.

Pwony: Jo mukene, ma bene tye iye jo me odiwa-ni, gicwero cwinywa cawa ducu. Ento ka wamito ni Lubanga otimiwa kica, ci myero wapwony kit me timo kica bot jo mukene.​—Matayo 6:14, 15.

 Pingo omyero wabed jo ma genne dok lukica?

◼ Gin ma Baibul pwonyo: “Wuwek goba obedi; dano acel acel myero olok lok ada bot dano lawote.”​—Jo Epeco 4:25.

Pwony: Ka waloko lok ada, ci walubo lanen pa Lubanga dok man yomo cwinye. Ka loko lok goba odoko kitwa, ci wadoko calo lamone pa Lubanga, Catan Larac-ci, ma tye “won goba.”​—Jon 8:44; Tito 1:2.

◼ Gin ma Baibul pwonyo: “Kit gin ducu ma wumito ni dano gutim botwu, wun bene wutim botgi kit meno.”​—Matayo 7:12.

Pwony: Omyero wapar pi kit ma jo me odiwa ki kabedowa giwinyo dok gitamo kwede ma lubbe ki pekogi. Jo mukene gibiterowa i yo me kica ka wanyuto ni ‘waparo pi luwotwa.’​—1 Petero 3:8; Luka 6:38.

Kit ma labol magi ginyuto kwede, pwony ma tye i Baibul romo konyo lutino me bedo ki pwoc, woro, ki dong jo ma paro pi dano ka gudongo. Ento anga ma myero omi pwony magi bot lutino?