I Bika Bifwaninwe Kwifunda Bana?

“Bisonekwa byonsololo bisonekeja Leza shi bika, shi bika, byo bimwenwamo pa kufundija, ne kukwasha, ne kudingila madingi, ne kulombola ñeni ya umboloke.”—2 TEMOTE 3:16.

BANA bafwaninwe kufundijibwa bubinebine butala padi Leza. Le bakafunda’bo kwepi? I mu Bible, dibuku dya myanda ya Leza dilēmekelwe pi na pi.

Bible udi pamo bwa mukanda utamba kudi Leza. Leza witusokwelwanga ngikadilo yandi mu uno mukanda ne kulombola mufwaninwe kwikadila bana, batame ne banuke. Tala’tu bidi bufundiji bumobumo budi mu Bible ne myanda ikokeja kwifunda nansha ke banuke bene.

 Monka mulombwela bino bimfwa, byobya byotwifunda mu Bible bikokeja kukwasha bana bekale bantu bayukile kufwija’ko, ba bulēme, ne ba lusa. Ino le i ani ukafundija bana bino byonso?

I bika bitusakila Leza tuyuke padi?

◼ Bifundija Bible: “Abe enka, wa dijina dya bu-Yehova, wi Mwinemukatakatamwine panopantanda ponsololo.”—Mitōto 83:18.

Byotwefunda: Leza ke bukomopo’tu bwampikwa kwikala’ko, ino i muntu udi’ko binebine kadi udi ne dijina dyandi dyandi.

◼ Bifundija Bible: “Yehova usaatanga mityima yonso, wivwanija milangwe yonsololo ya mifwatakanyo; shi umukimba, ukatanwa kōdi, monka shi umwele, nankyo ukakwelanga nyeke ne nyeke.”—1 Bilongwa 28:9.

Byotwefunda: Yehova witutele batwe bonso mutyima, kubadila’mo ne bana bene. (Mitōto 10:14; 146:9) Usakanga twifunde kumuyuka.

◼ Bifundija Bible: “Kemukisusula . . . mwananshie. Shi wibasusula, shi pa kika shi pa kika, ino bangabije ami, kwivwana nkevwana kwabija kwabo.”—Divilu 22:22-24.

Byotwefunda: Yehova wimvwananga ne milombelo ya banuke. Tukokeja kwisamba na Leza ne kumulombola milangwe yetu ne motwiivwanina.

◼ Bifundija Bible: “Kadi bālamukile dikwabo ke bamutompa Leza, ne kusomba Mwine Mupandulwemo wa Isalela.”—Mitōto 78:41.

Byotwefunda: Byotunena ne byotulonga bibwanya kusangaja nansha kufityija Yehova ku mutyima, nanshi tufwaninwe bidi kulanga kumeso kwa kunena nansha kulonga kintu.

Le tukamona namani boba beshile na batwe?

◼ Bifundija Bible: “Leza kalemekangapo bantu’mba: Yeu ye yeu, mhm. Nanshi mu mizo yonso enka umutyina, ulonga bilumbuluke nabya ye waitabijibwa kudi aye.”—Bilongwa 10:34, 35.

Byotwefunda: Shi Leza ketabijijangapo muntu na kutala kwatambile, netu nanshi ketufwaninwepo kufutulula muntu amba mwanda’po lukoba nansha mumwekelo wandi i mwishile na wetu.

◼ Bifundija Bible: “[Ikalai] na kampeja bukidi ka kutentulwila bantu bonso bemwipangula monka mwikadile kukulupila ko mudi nako munda, napo ne kikōkeji ne moyo ponka.”—1 Petelo 3:15.

Byotwefunda: Shi twisambila pa myanda ya Leza, tufwaninwe kulombola mimweno yetu na kikulupiji ino kwampikwa luma. Tufwaninwe kadi kulēmeka ne boba badi na nkulupilo mishile na yetu.

I muswelo’ka otufwaninwe kumona babutule betu?

◼ Bifundija Bible: “Bānwe bāna nenu, mwikale kukōkela bakwimubutula umbintu byonso, ke-kintu kino’ki kyo kyakumutōkeja Mfumwetu ku mutyima.”—Kolose 3:20.

Byotwefunda: Bana bakōkela balombolanga amba basenswe bambutwile babo kadi amba basakanga kusangaja Leza.

◼ Bifundija Bible: “Kadi ne kwifudila bānwe bene na bene, ne kwilekela bitupu bānwe bene, shi umo wapi mambo ku mukwabo; monka mwemulekele aye Mfumwetu ne bānwe nenu mulongele monka.”—Kolose 3:13.

Byotwefunda: Bantu bangi, kubadila’mo ne babutule betu bakekala betulubila kyaba kimo. Ino shi tusaka Leza etulekele, tufwaninwe kwifunda kulekela bakwabo.—Mateo 6:14, 15.

Mwanda waka twikale ba binebine ne kanye?

◼ Bifundija Bible: “Muleke bubela, mwisambe byabinebine wa ku mukwabo, wa ku mukwabo.”—Efisesa 4:25.

Byotwefunda: Shi twisambe bubinebine, nabya tubaiula Leza ne kumusangaja. Ino shi tutamije kibidiji kya kubepa, tubaiula Dyabola, walwana na Leza, kadi “shandya ne bubela bwine.”—Yoano 8:44; Tetusa 1:2.

◼ Bifundija Bible: “Byonso byo musaka’mba bantu bemulongele, nenu mwibalongele’byo’nka nabya!”—Mateo 7:12, Myanda Miyampe ku Bonso.

Byotwefunda: Tufwaninwe kubanga mwiivwanino, milangwe ne bisakibwa bya babutule betu ne bya bakwabo. Shi twikale na “kanye” ku bakwetu, nabo bakalongela monka.—1 Petelo 3:8; Luka 6:38.