Bana ba Swanetše go Ithuta Eng?

“Lengwalo ka moka le buduletšwe ke Modimo gomme le hola ka go ruta, go kgala, go phošolla le go laya ka toko.”—2 TIMOTHEO 3:16.

BANA ba swanetše go rutwa therešo ka Modimo. Therešo yeo ba ka e hwetša kae? Ba ka e hwetša ka pukung e hlompšhago ka gohle lefaseng, e lego Beibele.

Beibele e bjalo ka lengwalo le le tšwago go Modimo. Lengwalong leo, Modimo o utolla semelo sa gagwe le go nea bana ba gagwe ka moka, ba bagolo le ba banyenyane, tlhahlo ya boitshwaro. Ela hloko tše dingwe tša dithuto tšeo di huperwego ke Beibele tšeo gaešita le bana ba ka ithutago tšona.

Modimo o nyaka gore re tsebe eng ka yena?

▪ Seo Beibele e se rutago: “Wena yoo leina la gago e lego Jehofa, ke wena o nnoši o lego Yo Godimodimo godimo ga lefase ka moka.”—Psalme 83:18.

Thuto: Modimo ke Motho wa kgonthe yo a nago le leina le le mo hlaolago.

▪ Seo Beibele e se rutago: “Jehofa o lekola dipelo ka moka, le gona o lemoga ditshekamelo ka moka tša menagano. Ge e ba o ka mo tsoma, yena o tla dira gore o mo hwetše.”—1 Dikoronika 28:9.

Thuto: Jehofa Modimo o na le taba le rena ka moka, go akaretša le bana ba banyenyane. (Psalme 10:14; 146:9) O nyaka gore re ithute ka yena.

▪ Seo Beibele e se rutago: ‘Le se ke la hlakiša tšhiwana le ge e le efe. Ge e ba le ka e hlakiša, gona ge e ka ntelela, ruri ke tla kwa sello sa yona.’—Ekisodo 22:22-24.

Thuto: Jehofa o theetša gaešita le dithapelo tša bana ba banyenyane. Re ka bolela le Modimo ka mehla gomme ra mmotša dikgopolo gotee le maikwelo a rena a ka garegare.

▪ Seo Beibele e se rutago: “Ba be ba leka Modimo gantši le gantši, ba kweša yena Mokgethwa wa Isiraele bohloko.”—Psalme 78:41.

Thuto: Dipolelo le ditiro tša rena di kgoma maikwelo a Jehofa, ka gona re swanetše go nagana pele re bolela goba re dira dilo.

 Re swanetše go swara bjang bao ba sa swanego le rena?

▪ Seo Beibele e se rutago: “Modimo ga a bebe sefahlego, eupša setšhabeng se sengwe le se sengwe motho yo a mmoifago gomme a dira se se lokilego o a amogelega go yena.”—Ditiro 10:34, 35.

Thuto: Ge e ba Modimo a amogela batho ba ditlogo ka moka, ga se ra swanela go kgetholla ba bangwe feela ka gobane mmala wa bona wa letlalo goba ponagalo ya difahlego tša bona di sa swane le tša rena.

▪ Seo Beibele e se rutago: “Ka mehla le [lokele] go ikemela pele ga yo mongwe le yo mongwe yo a nyakago lebaka la kholofelo e lego go lena, eupša le dira bjalo ka moya o boleta le ka tlhompho e tseneletšego.”—1 Petro 3:15.

Thuto: Ge re ahlaahla ditaba tša bodumedi, re swanetše go hlalosa dipono tša rena ka kgodišego eupša re dira bjalo ka botho. Gape re swanetše go hlompha bao ditumelo tša bona tša bodumedi di sa swanego le tša rena.

Re swanetše go swara ditho tša malapa bjang?

▪ Seo Beibele e se rutago: “Lena bana, kwang batswadi ba lena dilong tšohle gobane se se kgahliša kudu Moreneng.”—Bakolose 3:20.

Thuto: Bana ba kwago ga ba hlatsele feela gore ba rata batswadi ba bona eupša ba hlatsela le gore ba nyaka go kgahla Modimo.

▪ Seo Beibele e se rutago: “Tšwelang pele le kgotlelelana gomme le lebalelana ka bolokologi le ge e ba motho a na le lebaka la go ba le pelaelo ka yo mongwe. Go etša ge Jehofa a le lebaletše ka bolokologi, le lena le dire bjalo.”—Bakolose 3:13.

Thuto: Batho ba bangwe, go akaretša le ditho tša malapa a bo rena, ba tla re nyamiša ka dinako tše dingwe. Eupša ge e ba re nyaka gore Modimo a re lebalele, re swanetše go ithuta go lebalela ba bangwe.—Mateo 6:14, 15.

 Ke ka baka la’ng re swanetše go bolela therešo le go ba botho?

▪ Seo Beibele e se rutago: ‘Le lahle maaka, gomme yo mongwe le yo mongwe wa lena a bolele therešo le moagišani wa gagwe.’—Baefeso 4:25.

Thuto: Ge re bolela therešo, re ekiša Modimo e bile re a mo thabiša. Ge re eba le mokgwa wa go bolela maaka, re swana le lenaba la Modimo, e lego Diabolo, yena “tatago maaka.”—Johane 8:44; Tito 1:2.

▪ Seo Beibele e se rutago: “Swara ba bangwe kamoo o nyakago gore ba go sware ka gona.”—Mateo 7:12, “Contemporary English Version.”

Thuto: Re swanetše go naganela maikwelo, dikgopolo le dinyakwa tša ditho tša malapa a gabo rena gotee le ba bangwe ba moo re dulago gona. Ge re bontšha ‘kwelobohloko,’ ba bangwe ba ka šušumeletšega go re swara ka botho.—1 Petro 3:8; Luka 6:38.

Bjalo ka ge mehlala ye e bontšha, dithuto tšeo di huperwego ke Beibele di ka thuša bana go ba ba nago le tebogo, tlhompho gotee le go ba batho ba bagolo ba nago le kwelobohloko. Eupša ke mang yo a swanetšego go ruta bana dithuto tše?