Duzu A Ɔwɔ Kɛ Ngakula Sukoa A?

“Bɛfa Nyamenle Sunsum a bɛkɛlɛ Nyamenle Edwɛkɛ ne a, na ɔle kpalɛ ɔmaa nɔhalɛ ne ɛhilehilelɛ, sonla nyunlu ɛhwilɛ, folɛdulɛ, yɛɛ menli ɛtetelɛ wɔ ɛbɛla kpalɛ ɛbɔlɛ nu.”—2 TEMƆTE 3:16.

ƆWƆ kɛ bɛkilehile ngakula Nyamenle anwo nɔhalɛ edwɛkɛ. Nienwu a bɛbahola bɛazukoa nɔhalɛ ɛhye a? Wɔ Baebolo ne, ɛzonlenlɛ buluku mɔɔ menli dɔɔnwo bu ye wɔ ewiade la anu.

Baebolo ne le kɛ kɛlata mɔɔ Nyamenle ɛhɛlɛ yɛ. Wɔ zɔhane kɛlata ne anu, Nyamenle ɛla ye subane ali na yeva ɛbɛla kpalɛ ɛbɔlɛ nwo adehilelɛ yemaa ɔ mra, mgbanyinli nee ngakula kɔsɔɔti. Yɛ ngilehilelɛ mɔɔ wɔ Baebolo ne anu nee ɛzukoalɛdeɛ mɔɔ ngakula bɔbɔ bahola azukoa bie la anu ekyi nzonlɛ.

Duzu a Nyamenle kpondɛ kɛ yɛnwu ye wɔ ɔ nwo a?

▪ Mɔɔ Baebolo ne kilehile: “Maa bɛnwu kɛ ɛdawɔ ɛ ngomekye, mɔɔ wɔ duma a le [Gyihova] la a ɛle Anwuma Anwumanli ne mɔɔ sie azɛlɛ ye a.”—Edwɛndolɛ 83:18.

Ɛzukoalɛdeɛ: Nyamenle wɔ ɛkɛ amgba yɛɛ ɔlɛ duma.

▪ Mɔɔ Baebolo ne kilehile: “[Gyihova ze] yɛ adwenle nee mɔɔ yɛkpondɛ la. Saa ɛkɔ ye ɛkɛ ne a, ɔbalie wɔ.”—1 Edwɛkɛsisilɛ 28:9.

Ɛzukoalɛdeɛ: Gyihova Nyamenle dwenle yɛ kɔsɔɔti yɛ nwo, ngakula bɔbɔ boka nwo. (Edwɛndolɛ 10:14; 146:9) Ɔkulo kɛ yɛsukoa ɔ nwo debie.

▪ Mɔɔ Baebolo ne kilehile: “Bɛmmakile . . . arisa biala nyane. Saa bɛkile bɛ nyane na bɛsu bɛfɛlɛ me a, nɔhalɛ, mebadie bɛ ɛzunlɛ.”—Adendulɛ 22:22-24.

Ɛzukoalɛdeɛ: Gyihova tie ngakula bɔbɔ nzɛlɛlɛ. Yɛbahola yɛ nee Nyamenle adendɛ dahuu na yɛala yɛ nzuzulɛ nee yɛ nganeɛdelɛ ali yɛahile ye.

▪ Mɔɔ Baebolo ne kilehile: “Bɛzɔle ye bɛnleanle fane dɔɔnwo, na bɛhanle Yizilayɛ Nwuanzanwuanza Ko ne ɛya.”—Edwɛndolɛ 78:41.

Ɛzukoalɛdeɛ: Yɛ ɛdendɛlɛ nee yɛ nyɛleɛ ka Gyihova yemɔti ɔwɔ kɛ yɛdwenle nwolɛ kolaa na yɛadendɛ anzɛɛ yɛayɛ debie.

 Kɛzi ɔwɔ kɛ yɛ nee menli mɔɔ asolo bɛ la di ɛ?

▪ Mɔɔ Baebolo ne kilehile: “Nyamenle bu menli kɔsɔɔti kɛ bɛsɛ. Awie biala mɔɔ sulo ye na ɔdi boɛ la ɔdie ye ɔto nu.”—Gyima ne 10:34, 35.

Ɛzukoalɛdeɛ: Saa Nyamenle die menli mɔɔ vi maanle biala anu la to nu a, ɛnee ɔwɔ kɛ yɛdayɛ noko yɛdie bɛ yɛto nu ɔnva nwo kɛ asolo bɛ nwo nane anzɛɛ bɛ nyunlu maanle ne la.

▪ Mɔɔ Baebolo ne kilehile: “Emomu, bɛde Kelaese anwo kɛ Awulae wɔ bɛ ahonle nu, na bɛziezie bɛ nwo mekɛ biala kɛ bɛbabua awie biala mɔɔ ɔbabiza anyelazo mɔɔ wɔ bɛ nu anwo edwɛkɛ la, noko bɛyɛ ye wɔ bɛlɛvo nee ɛbulɛ adenle zo.”—1 Pita 3:15, NW.

Ɛzukoalɛdeɛ: Saa yɛlɛka ɛzonlenlɛ nwo edwɛkɛ a, ɔwɔ kɛ yɛkola yɛkilehile yɛ diedi ne anu kpalɛ, noko ɔwɔ kɛ yɛyɛ ye wɔ atiakunlukɛnlɛma nu. Eza ɔwɔ kɛ yɛbu menli mɔɔ yɛ nee bɛ ɛnlɛ diedi ko la.

Kɛzi ɔwɔ kɛ yɛ nee abusua ne anu amra tɛnla ɛ?

▪ Mɔɔ Baebolo ne kilehile: “Ngakula, bɛdie bɛ awovolɛma edwɛkɛ wɔ debie biala anu, ɔboalekɛ yemɔ a Nyamenle anye die nwolɛ a.”—Kɔlɔsaema 3:20.

Ɛzukoalɛdeɛ: Ngakula mɔɔ bɛyɛ tieyɛ la maa ɔda ali kɛ bɛkulo bɛ awovolɛ noko eza bɛkpondɛ kɛ bɛyɛ mɔɔ Nyamenle kulo la.

▪ Mɔɔ Baebolo ne kilehile: “Bɛsosɔ bɛ nwo ngoko ngoko, na saa bie lɛ ɔ gɔnwo anwo ɛya a ɔva ɔhyɛ ye. Bɛva ɛtane bɛhyɛ, kɛmɔ Awulae ɛva bɛ nwo edwɛkɛ ɛhyɛ bɛ la.”—Kɔlɔsaema 3:13.

Ɛzukoalɛdeɛ: Ɔdwu mekɛ ne bie a, awie mɔ mɔɔ yɛ abusua ne anu amra boka nwo la bahola aye yɛ rɛle ado yɛ sa nu. Noko saa yɛkpondɛ kɛ Nyamenle fa yɛ ɛtane kyɛ yɛ a, ɛnee ɔwɔ kɛ yɛdayɛ noko yɛfa bɛ ɛtane yɛkyɛ bɛ.—Mateyu 6:14, 15.

 Nɔhalɛlilɛ nee atiakunlukɛnlɛmayɛlɛ

▪ Mɔɔ Baebolo ne kilehile: “Bɛmmabɔ adalɛ bieko; awie biala ɛha nɔhalɛ ɛhile ɔ gɔnwo, ɔboalekɛ yɛ muala yɛle menli ko.”—Ɛfɛsɛsema 4:25.

Ɛzukoalɛdeɛ: Saa yɛka nɔhalɛ a, ɛnee yɛlɛsukoa Nyamenle na yɛmaa ɔ nye die. Saa yɛmaa adalɛbɔlɛ yɛ yɛ subane a, yɛbayɛ kɛ Nyamenle kpɔvolɛ Abɔnsam, mɔɔ ɔle “adalɛ kɔsɔɔti bɛ ze” la.—Dwɔn 8:44; Taetɛse 1:2.

▪ Mɔɔ Baebolo ne kilehile: “Mɔɔ bɛkpondɛ kɛ menli yɛ maa bɛ la, bɛdabɛ noko bɛyɛ zɔhane ala bɛmaa bɛ.”—Mateyu 7:12.

Ɛzukoalɛdeɛ: Ɔwɔ kɛ yɛsuzu yɛ mbusua nee bɛdabɛ mɔɔ bɛde yɛ kpalɛ ne azo la nganeɛdelɛ, nzuzulɛ nee bɛ ngyianlɛ nwo. Saa yɛkile kɛ yɛte yɛ “gɔnwo mɔ nyane bo” a, ɔbamaa bɛ nee yɛ ali ye wɔ adenle kɛnlɛma zo.—1 Pita 3:8; Luku 6:38.

Kɛmɔ neazo ɛhye mɔ kile la, ɛzukoalɛdeɛ mɔɔ wɔ Baebolo ne anu la bahola aboa ngakula yeamaa bɛarayɛ mgbanyinli mɔɔ kile anyezɔlɛ, bu debie, na bɛse anwunvɔne. Noko nwane a ɔwɔ kilehile ngakula ɛzukoalɛdeɛ ɛhye a?