¿Máax unaj u kaʼansik le paalaloʼob yoʼolal Diosoʼ?

«Mix juntúul j-kaanbal tipʼaʼan tiʼ u j-kaʼanbesaj, baʼaleʼ le ken tsʼoʼokok u kaanbaleʼ bíin béeyak jeʼel bix u j-kaʼanbesajoʼ.» (LUCAS 6:40)

YAAN taatatsiloʼobeʼ ku tuklikoʼob maʼ kun béeytal u kaʼansik tiʼ u paalaloʼob baʼaloʼob yaan yil yéetel Diosiʼ tumen maʼ u yojloʼob bix jeʼel u beetkoʼobeʼ. Maʼ xaaneʼ tumen ku tuklikoʼob maʼ kaʼanchajaʼan u xookoʼobiʼ wa maʼ u yojloʼob yaʼab baʼaloʼob tiʼ religioniʼ. Yoʼolal lelaʼ ku chaʼik u kaʼansaʼal u paalal tumen juntúul u láakʼtsil wa juntúul máax yaan u religión.

Baʼaleʼ ¿máax unaj u kaʼansik tiʼ le paalaloʼob u bisoʼob junpʼéel toj kuxtal yéetel tiʼ religionoʼ? Koʼoneʼex ilik baʼax ku yaʼalik le Bibliaoʼ, tsʼoʼoleʼ k-ketik yéetel le baʼax ku yaʼalik uláakʼ máakoʼoboʼ.

U meyaj le taatatsiloʼ

Le baʼax ku kaʼansik le Bibliaoʼ: «Taatatsileʼex, maʼ a beetkeʼex u kʼuuxil a paalaleʼex, baʼaleʼ chʼíijseʼexoʼob tiʼ junpʼéel toj kuxtal yéetel tiʼ u kaʼansajil Yuumtsil» (Efesoiloʼob 6:4).

Le baʼax ku yaʼalaʼaloʼ: ¿Baʼax utsiloʼob ku taasik tiʼ le taatatsil u jach creertik le baʼax ku kaʼansaʼaltiʼ tu religionoʼ? Junpʼéel estudio beetaʼab tu jaʼabil 2009, tu yaʼalaj: «U yantal u religión juntúul taatatsileʼ jeʼel u yáantaj utiaʼal u kaʼansik tubeel u paalaleʼ. Le religionoʼ jeʼel u tsʼáaiktiʼ yaʼab tsolnuʼukoʼob utiaʼal u  bin maʼalobil tiʼ ichil u kuxtaleʼ» (Fathersʼ Religious Involvement and Early Childhood Behavior [Religiosidad paterna y comportamiento infantil]).

Le Bibliaoʼ ku yaʼalikeʼ jach kʼaʼabéet u kaʼansaj le taatatsil ichil u kuxtal le chan paaloʼ (Proverbios 4:1; Colosailoʼob 3:21; Hebreob 12:9). Baʼaleʼ ¿láayliʼ wa bey u yilaʼal teʼ kʼiinoʼobaʼ? Tu jaʼabil 2009 u Universidadil Floridaeʼ tu jóoʼsaj junpʼéel xook ku tʼaan tiʼ bix u yáantaj le kaʼansaj ku tsʼáaik le taatatsil tiʼ u paalaloʼoboʼ. Tu yiloʼob xaneʼ wa le taatatsil kaʼansik u paalaloʼ, letiʼobeʼ maas ku yeʼeskoʼob u yutsil tiʼ u maasil yéetel ku yuʼubikoʼob yaan u biilal u kuxtaloʼob. Le xiʼipalaloʼoboʼ maas ku yuʼubikoʼob tʼaan yéetel le x-chʼúupalaloʼoboʼ maas maʼalob u tuukuloʼob. Bey túunoʼ le nuʼuktaj ku tsʼáaik le Bibliaoʼ láayliʼ jeʼel u yáantik máakeʼ.

Jach kʼaʼabéettiʼob u kaʼansaj le maamatsiloʼ

Le baʼax ku kaʼansik le Bibliaoʼ: «Maʼ xan a kʼex óoltik u kaʼanbesaj a maama» (Proverbios 1:8).

Le baʼax ku yaʼalaʼaloʼ: Tu jaʼabil 2006, junpʼéel libro ku tʼaan tiʼ bix u tuukul le mejen paalaloʼ, tu yaʼaleʼ tsʼoʼok u yilaʼaleʼ, le maamatsiloʼoboʼ ku máanskoʼob maas yaʼab tiempo yéetel u paalaloʼob ke le taatatsiloʼoboʼ. Tu yaʼalaj xaneʼ lelaʼ junpʼéel baʼal ku yúuchul yaʼab tuʼuxoʼob. Yoʼolal lelaʼ, le bix u tuukul, le baʼaxoʼob ku yaʼalik yéetel ku beetik le maamatsiloʼoboʼ, jach ku yantal baʼax u yil yéetel le bix kun líikʼil le chan paaloʼ.

Ken kaʼansaʼak le paalaloʼob tiʼ Dios tumen le maamatsil yéetel le taatatsiloʼ, táan u siʼibil kaʼapʼéel baʼal tiʼob. Yáaxeʼ u páajtalil u biskubaʼob yéetel Dios, le baʼax ken u beet u bin utsil tiʼoboʼ. Yéetel u kaʼapʼéeleʼ, u yilkoʼob bix u paklan áantkuba juntúul íichamtsil yéetel u yatan utiaʼal u beetkoʼob baʼaloʼob jach maʼalobtak (Colosailoʼob 3:18-20). Kex jeʼel u béeytal u yáantaʼal le taatatsiloʼob tumen uláakʼ máakoʼoboʼ, letiʼob unaj u kaʼansik u paalaloʼob tiʼ Dios yéetel tiʼ le baʼaxoʼob ku yaʼalik utiaʼal ka yanak kiʼimak óolal ichil u familiaʼoboʼ.

Baʼaleʼ ¿bix unaj u kaʼansaʼaloʼob? ¿Baʼax jeʼel u meyaj tiʼ le taatatsiloʼoboʼ?