Muswelo wa Kufundija Bana Myanda ya Leza—Mufundijijo Muyampe I Wepi?

“Ebiya kadi bino binenwa bino’bi byo nakusoñanya dyalelo dino’di bikekala pa mutyima obe; kadi ukebikomeneja kudi bobe bāna, ne kwibisambijana pa kushikata mobe mu njibo, kadi poenda mwishinda, ne polāla, ne pobūka pene.”—KUPITULUKA 6:6, 7.

BAMBUTWILE babwanya kyaba kimo kulēmenenwa na kiselwa kya kufundija babo bana. Inoko kitatyi kyobakimba madingi, bakokeja kupuakanibwa na myanda mivulevule isambila pa uno mwanda. Babutule ne balunda kebejangapo kala kuleta milangwe yabo. Kadi mabuku, bishinte bya mu majulunale, ne mateba a Entelenete bipanga kyaba kyonso bambutwile madingi epatanya.

Inoko Bible aye, upanga bambutwile madingi akulupilwa a bine bya kufundija bana kadi ne muswelo muyampe wa kwibafundija. Monka mwikilombwela kisonekwa kyotwatelanga, bambutwile bafwaninwe kwilamina’ko kitatyi kya kwisamba na bana myanda ya Leza. Ino ilonda’ko’i i milangwe’tu iná ya mu Bible ikweshe kala bambutwile bavule bafundije bana myanda ya Leza.

1. Wibafundije kupityila ku bupangi. Mutumibwa Polo wāsonekele amba: “Byobya byandi byampikwa kumweka [ngikadilo ya Leza], ku kupanga kwa panopantanda i bimwekelele’tu, padi tō, pa kuyūkanibwa pa bintu bipangibwe, ke bukomo bwandi bwa nyeke, ne bu-Leza bwandi kadi.” (Loma 1:20) Bambutwile bakanengeja shi bakwashe babo bana kumona Leza bu Muntu udi’ko bine na kukokela milangwe yabo pa mingilo ya Leza ya bupangi ne kwibanena bajingulule i ngikadilo’ka ya Leza idi mu kipangwa kampanda.

Yesu wāingidije ano manwa pa kufundija bana bandi ba bwanga. Kimfwa, wānene amba: “Talaipo bidi ne ku byoni bya mūlu, kukusa kebikuse, kwangula nako kebyangula, nansha komeka umbitala, mhm: nanshi Shenu wa mūlu ye wibidisha. Lelo pa bānwe’pa ke pepi?” (Mateo 6:26) Yesu wādi ukomeneja ngikadilo ya Yehova ya buswe ne lusa. Inoko wālongele ne bikwabo. Wālombwele bana bandi ba bwanga balangulukile pa muswelo ulombola Yehova ino ngikadilo ku bana bandi.

Solomone, Mulopwe wa ñeni wālombwele tunangu twa kitetyima twāpele Leza tunyengelele kadi wātelele bino bipangwa pa kufundija bantu ñeni mikatampe. Wāsonekele amba: “Enda ku tunyengelele abe wamulēle, langa miswelo yato wikale wañeni; ato mulopwe mpikila, nansha mutadi, nansha muledi;  tukwatakanya bidībwa byato mu buyó, Ino ke tomeka byakudya byato pa mwangulo.” (Nkindi 6:6-8) Bine, uno i muswelo utendelelwa’po kashā wa kufundija bantu betungile bitungo bilumbuluke ne kwingidija bukomo bwibapele Leza mwanda wa kufikidija’byo!

Bambutwile bakokeja kwiula mufundijijo mufike’po wa Yesu ne wa Solomone na: (1) Kwipangula bana mityi ne banyema bobasenswe. (2) Kwifunda ino mityi ne banyema bene. (3) Kwibafundija kuyuka Leza kupityila ku buno bupangi.

2. Iula muswelo wādi umona Yesu boba bafundija. Mu bantu bonso bāikele’ko, Yesu ye mwine wādi na bintu bya mvubu mpata bya kunena. Wāpityije kitatyi kikatampe na kwipangula bipangujo. Wādi utele mutyima bya binebine ku milangwe ne miimvwanino ya boba baādi ufundija. (Mateo 17:24, 25; Mako 8:27-29) Mo monka, bambutwile nabo badi na bufundiji buvule bwa kamweno ku babo bana. Inoko, pa kufundija senene, bafwaninwe kwiula Yesu ne kukankamika bana balombole kwampikwa moyo byobya byobalanga.

Le bidi namani shi mwana upela nansha ulēma pa kwifunda myanda imo ya mvubu? Tala mwālongele Yesu na batumibwa. Kyaba kimo batumibwa bādi bepotomeja kadi balēma pa kwifunda kwityepeja. Ino Yesu aye wādi wibatūkijija mutyima ne kwibalombola misunsa mivule mvubu ya kwityepeja. (Mako 9:33, 34; Luka 9:46-48; 22:24, 25) Bambutwile beula Yesu bakalēmununa bana na kitūkijetyima ne shi bibwanika, kwibapitulukila misunsa mivule mu bufundiji kufika’nka ne byobemvwanija kamweno kabo. *

3. Fundija na kupāna kimfwa kya kulondela’po. I biyampe bambutwile balonde madingi a mutumibwa Polo ku Bene Kidishitu ba mu Loma. Wēbasonekele amba: “Le penepo kadi, abe ufundijanga mukwenu, ne kwifundija abe mwine mpika? Lelo byōsapwilanga muntu’mba: Kokība; ino abe wibe’ni?”—Loma 2:21.

Ano madingi i a kamweno, mwanda bana bateñwanga mpata na bilonga bambutwile kupita’ko byobanena. Na bubine, bambutwile balonga byonka byobafundija kebakabulwepo kwikala na bana bebateja pobebafundija.

4. Shilula kwibafundija pobakidi banuke. Temote, mwingidi nandi na Polo mu mwingilo wa bu mishonele wādi unenenwa māya ku bantu. (Bilongwa 16:1, 2) Bubinga bumo bidi, i mwanda wāfundijibwe “bisonekwa bikola” tamba “pa bwanuke.” Inandya Temote ne nkambo wandi bādi bamutangila Bisonekwa ne kumukwasha alangulukile pa bubinebine budi mu bisonekwa’bya.—2 Temote 1:5; 3:14, 15.

Kwa Kutana Bukwashi

Batumoni ba Yehova balupulanga mabuku mavule akwasha bambutwile bekale kufundija bana bubinebine butala padi Leza. Amo i malembelwe banuke. Makwabo nao akokeja kukwasha bambutwile ne bana bene bekale kwisambila pamo kwampikwa kafinda. *

Shako, kumeso kwa bambutwile kufundija babo bana myanda ya Leza, i biyampe bayuke bidi bipangujo bimobimo bikomo bibwanya kwipangula bana. Kimfwa, le ubwanya kulondolola namani kino kipangujo: Mwanda waka Leza ulekele’ko masusu? Leza udi na mpango’ka itala ino ntanda? Bafwe badi kwepi? Batumoni ba Yehova bakasangela kukukwasha utane malondololo a bino bipangujo ne a bikwabo amba abe pamo ne kisaka kyobe mumone kufwena kudi Leza.—Yakoba 4:8.

[Kunshi kwa dyani]