Indlela Esingafundisa Ngayo Abantwana NgoZimu—Ngiziphi Iindlela Eziphumelela Ngcono?

“Amezwi la engikuyala ngawo namhlanje kufuze abe sehliziywenakho; kufuze uwadzimelelise ebantwaneni bakho begodu ukhulume ngawo newuhlezi ngendlinakho nalapho ukhamba endleleni nalapho ulala nalapho uvuka.”—DUTERONOMI 6:6, 7.

ABABELETHI ngesinye isikhathi bangazizwa badiselwa mthwalwabo wokufundisa abantwababo. Nokho, nebafuna isiluleko, bangararaniswa mibono eemnengi abayizwako nabayifundako. Iinhlobo nabangani bangathanda ukuveza iimbonwabo. Begodu iincwadi, iinhloko zabomagazini namahlelo we-Internet anikela ababelethi umlandelande weenluleko ngezinye iinkhathi eziphikisanako.

Ngakelinye ihlangothi, iBhayibhili inikela ababelethi ingasi isiluleko abangasithemba kwaphela kilokho abangakufundisa abantwababo, kodwana godu nesinqophiso samambala sendlela abangabafundisa ngayo. Njengombana amavesi weBhayibhili adzubhulwe ngehla atjengisa, ababelethi kufuze bafumane indlela yokukhuluma nabantwababo ngoZimu qobe langa. Ngenzasi kukhulunywa ngeemphakamiso ezine ezisekelwe eBhayibhilini ezisize iinkulungwana zababelethi ukufundisa abantwababo ngoZimu.

1. Fundisa abantwabakho ngalokho abangakufunda endalweni. Umpostoli uPowula watlola: ‘Ngombana amandla [kaZimu] angapheliko nobuZimu bakhe, kubonakala ngalokho akwenzileko.’ (KwebeRoma 1:20) Ababelethi bangenza okunengi ukusiza abantwababo bona babone uZimu njengoMuntu wamambala ngokukhuluma nabo ngeemsebenzi kaZimu yobukghwari, bese basiza abantwababo bonyana babone iimfanelo zakaZimu indalo le ezivezako.

UJesu wasebenzisa indlela le nekafundisa abafundi bakhe. Isibonelo, wathi: “Qalani iinyoni eziphapha phezulu: Azitjali, zivune zifake ngeenlulwini; kodwana uYihlo osezulwini uyazondla! Nina anikaqakatheki kuneenyoni na?” (Matewu 6:26) La, uJesu wakhanyisa iimfanelo zakaJehova zethando nesirhawu. Kodwana wenza okungaphezu kwalokho. Wasiza abafundi bakhe bona bacabange ngendlela uZimu atjengisa ngayo iimfanelwezo ebantwaneni bakhe.

IKosi ehlakaniphileko uSolomoni yafundisa isifundo ngokuhlakanipha okungokwemvelo uZimu akunikela ubutjhontjhwani, bese wasebenzisa iindalwa ezincancanezi ukugandelela isifundo esiqakathekileko. Watlola wathi, “Iya ebutjhontjhwaneni vila ndina, qala iindlela zabo uhlakaniphe. Namtjhana bunganaye  umnqophisi, isikhulu namtjhana umbusi, bulungisa ukudla kwabo ehlobo; bubuthelela ukudla kwabo ngesikhathi sokuvuna.” (Iziyema 6:6-8) Qala bona sifundo esinamandla kangangani sokufundisa ukuqakatheka kokubeka iimnqopho esebenzako bese sisebenzisa amandla esiwaphiwe nguZimu ukuyifikelela!

Ababelethi bangalingisa indlela kaJesu noSolomoni yokufundisa ephumelelako ngokwenza okulandelako: (1) Buza abantwabakho bona ngiziphi iintjalo neenlwana ezibathabisako. (2) Funda okungeziweko ngeentjalo neenlwanezo. (3) Fundisa abantwabakho ngalokho abangakufunda ngoZimu eendalwenezo.

2. Lingisa indlela uJesu aqala ngayo abantu egade abafundisa. Kibo boke abantu abakhe baphila, uJesu gade anezinto eziqakatheke khulu angazitjho. Nokho, wasebenzisa isikhathi sakhe esinengi abuza iimbuzo. Bekanekareko ekulu emcabangweni nemazizweni walabo egade abafundisa. (Matewu 17:24, 25; Markosi 8:27-29) Ngokufanako, ababelethi baneemfundo ezinengi abangazifundisa abantwababo. Nokho, bona baphumelele, kufuze balingise uJesu bakhuthaze abantwababo bona batjhaphuluke ekuvezeni indlela abazizwa ngayo.

Kuthiwani nengabe abantwana abasabeli kuhle namtjhana babuthaka ekufundeni iimfundo eziqakathekileko? Cabangela indlela uJesu afundisa ngayo abapostoli bakhe. Ngezinye iinkhathi gade baphikisana kabuhlungu begodu babuthaka ukuzwisisa iinzuzo zokuthobeka. Nokho, uJesu waba nesineke begodu ngokuphindaphindiweko wakhuluma ngebanga lokuthobeka. (Markosi 9:33, 34; Luka 9:46-48; 22:24, 25) Ababelethi abalingisa uJesu bazokulungisa abantwababo ngesineke, nekutlhogekako bazokubuyelela iimfundo ezifanako bekube kulapho abantwana bakuzwisisa ngokuzeleko ukuqakatheka kwazo. *

3. Fundisa ngesibonelo. Ababelethi benza kuhle ngokulalela isiluleko umpostoli uPowula asinikela amaKrestu ahlala eRoma. Wawatlolela: ‘Ufundisa abanye kubayini wena ungazifundisi? Utjhumayela bona kungetjiwa wena webelani?’—KwebeRoma 2:21.

Isilulekwesi siqakathekile ngombana abantwana bakarwa ngilokho ababelethi babo abakwenzako kunalokho abakutjhoko. Eqinisweni, ababelethi abenza abakutjhumayelako kanengi abantwana bayakulalela lokho abakufundisako.

4. Thoma ukufundisa umntwana asesemncani. Isithunywa sevangeli ebesikhambisana noPowula, uThimothi, gade adume kuhle endaweni yangekhabo. (IZenzo 16:1, 2) Elinye ibanga bekukobana “kwebuntwaneni” wafundiswa “imitlolo ecwengileko.” Umma kaThimothi nogogwakhe akhenge bamfundele iMitlolo kwaphela, kodwana bamsiza bona acabange ngamaqiniso imitlolo le egade iwamumethe.—2 KuThimothi 1:5; 3:14, 15.

Lapho Ungafumana Khona Isizo

AboFakazi BakaJehova baneencwadi ezimbalwa ngokukhethekileko ezenzelwe ukusiza ababelethi bona bafundise abantwababo iqiniso ngoZimu. Ezinye ngokukhethekileko zitlolelwe abantwana abancani. Ezinye zingasiza abatjha nababelethi babo bakwazi ukukhulumisana ngokutjhaphulukileko. *

Yiqiniso, ngaphambi kobana ababelethi bafundise iqiniso ngoZimu, kufuze bazi iimpendulo zeminye iimbuzo abantwana abangayibuza. Isibonelo, ungayiphendula njani iimbuzo elandelako: Kubayini uZimu avumele ukutlhaga? Uyini umnqopho kaZimu ngephasi? Bakuphi abahlongakeleko? AboFakazi BakaJehova bazokuthabela ukukusiza bona ufunde iimpendulo zeembuzo le neminye bonyana wena nomndenakho nikwazi ukutjhidela kuZimu.—KaJakobosi 4:8.

[Imitlolo yaphasi]