¿Imaynatam yachachina? Yachachinapaq allin yanapakuykuna

“Kay kamachisqay palabrakunaqa sonqoykipim kanqa. Churikikunamanmi sapa kutilla yachachinki wasipi kaspa, ñanpi purispa, puñuq yaykuspa chaynataq hatarispaykipas” (DEUTERONOMIO 6:6, 7).

YAQAPASCHÁ tayta-mamakunaqa llumpay sasachasqa tarikunku warmankunaman yachachinanku kaptin. Astawanraqmi iskayrayachinman achka consejokuna kasqanrayku. Ayllukunapas, amistadkunapas consejanmankum; chaynataq librokunapi, revistakunapi hinaspa Internetpipas kanmi achka consejokuna, chay consejokunaqa wakinpiqa manam tupanchu.

Bibliam ichaqa consejan warmakunaman imamanta chaynataq imaynata yachachinapaqpas. Qallariypi textopa nisqanman hinam tayta-mamaqa tanteananku warmankuman sapa punchaw yachachinankupaq. Kay yachachikuypim qawasunchik Bibliapa tawa yanapakuyninkunamanta, chayqa waranqantin tayta-mamakunatam yanaparqa.

1. Unanchasqa kaqkunawan yachachiy. Apostol Pablom qellqarqa: “Wiñaypaq kawsaq kaspanmi [Diosqa] llumpay atiyniyoq. Chayna kasqantam tukuy unanchasqankunawan reqsichikun kay pachapa qallarisqanmantapuni. Chaynapimá sutillata reqsinchik mana rikuyta atichkaspapas”, nispa (Romanos 1:20). Tayta-mamaqa warmankutam yanapanmanku Diosta reqsinankupaq, unanchasqanta kuska qawaspanku hinaspa Dios imayna kasqanpi yuyaymananankupaq kallpanchaspankupas.

Jesuspas chaynatam discipulonkunaman yachachirqa. Nirqam: “Qawariychik alton pawaq urpikunata. Paykunaqa manam tarpunkuchu nitaq cosechankuchu, manataqmi taqemanpas imatapas huñunkuchu. Ichaqa hanaq pachapi kaq Taytanchikmi mikuchin. ¡Qamkunaqa urpikunamantapas aswan valeqmi kankichik!”, nispa (Mateo 6:26). Chaywanmi discipulonkunaman qawachirqa Jehová Diospa kuyakuynintawan llakipayakuyninta, hinaspa imaynam churinkunawan kasqantapas.

Rey Salomonmi kaynata yachachirqa. “Yaw qella runa, yachayniyoq kanaykipaqyá sisita qawamuy. Yaw qella runa, yuyayniyoq kanaykipaqyá imaynam kawsasqanta qawamuy. Sisipaqa jefenpas manam kanchu. Sisipaqa capatazninpas manam kanchu. Sisitaqa manam pipas kamachinchu. Chaywanpas  payqa rutuy tiempopim mikuyninta segurakun. Chaywanpas cosecha tiempopim mikunanta huñukun”, nispa (Proverbios 6:6-8). Chaywanmi yachachirqa allin ruraypi piensayta hinaspa chayta haypanapaq kallpanchakuytapas.

¿Imaynatam qamkunapas qatipakuwaqchik Jesustawan Salomonta warmaykichikkunata yachachiypi? 1) Warmaykichikta tapuychik ima plantakuna hinaspa ima animalkuna gustasqanmanta. 2) Chaykuna imayna kasqanmanta allinta yachaychik, hinaspa 3) Diosmanta imayna yachachisqanmanta rimaychik.

2. Jesusta qatipakuychik uyariqninkunaman imayna rimapayasqanta. Manam pi runapas willakurqachu Jesuspa willakusqanman hinaqa. Ichaqa tiempontam servichikurqa uyariqninkunata tapunanpaq, yachaytam munarqa imam piensasqankumanta hinaspa imayna sientekusqankumantapas (Mateo 17:24, 25; Marcos 8:27-29). Chaynallataqmi tayta-mamakunapas warmankuman yachachinanku, ichaqa allinta yachachinankupaqmi Jesusta qatipakunanku mana penqakuspa rimanankupaq kallpanchaspanku.

¿Warmakuna mana kasukuptinqa otaq wakin yachachikuykunawan sasachakuptinqa? Qawariychik apostolninkunaman Jesus imayna yachachisqanta. Wakinpiqa kikinkupuram atipanakuqku, manataqmi entiendeqkuchu imanasqa humilde kanankutapas. Jesusmi ichaqa pacienciawan achka kutita kallpancharqa mana hatunchakuq kanankupaq (Marcos 9:33, 34; Lucas 9:46-48; 22:24, 25). Jesusta qatipakuq tayta-mamaqa warmankunatam pacienciawan corrigen, sasachakuptinkuqa achka kutitam entiendenankukama yachachinku.

3. Yachachiychik imayna kawsasqaykichikwan. Tayta-mamaqa apostol Pablopa qellqasqanpim reparananku: “Wakinkunata yachachichkaspaykiqa ¿imanasqamá manaqa kasukunkichu yachachisqaykitaqa? Amam suwakunkichu nichkaspaykiqa amachiki suwakuwaqchu” (Romanos 2:21).

Kaypi yuyaymanayqa allinmi, warmakunaqa tayta-mamankupa nisqankumantaqa rurasqankutam qatipakunku. Imayna kawsasqankuwan yachachiptinkuqa warmakunaqa kasukunqakum.

4. Taksachanmanta yachachiychik. Apostol Pablopa puriqmasin Timoteomantam reqsiqninkuna allinta rimaqku (Hechos 16:1, 2). Paymanqa, ‘warma kasqanmantaraqmi [Diospa] yachachikuyninkunata yachachirqaku’. Mamanwan abuelanqa manam leeyllachu leepurqaku, yanaparqakum Diospa yachachikuyninkunata entiendenanpaq (2 Timoteo 1:5; 3:14, 15).

Maypitaq yanapakuy tarikun

Jehová Diospa testigonkunam rurarqaku achka qellqakunata warmakunaman Diosmanta cheqapta yachachinapaq. Wakinmi kachkan taksa warmakunapaq, wakinñataq mozo-sipasyaq warmakuna tayta-mamanwan imayna rimanankupaq. *

Diosmanta warmakunaman yachachinapaqqa allintam yachana sasa kutichina tapukuyninkunamanta. ¿Imaynatataq kutichiwaq kaynata tapusuptiki? ¿Imanasqataq ñakariyta Dios saqen? ¿Imatataq kay Pachawan ruranqa? ¿Maypitaq wañusqakuna kachkan? Jehová Diospa testigonkunam kay tapukuykunamanta hinaspa huk tapukuykunamantapas allinta kutichisunkiman, chaynapi familiantin Diosman anchuykunaykichikpaq (Santiago 4:8).

[Willakuy]