Woho wa mbetsha ana awui wa Nzambi—Toho ta wetshelo takɔna tele l’etombelo woleki amɛna?

“Aui ane wamumukudjangela elo, wayali l’utema aye. Kuwakokomiyaki an’aye, kuwatelakewo, lam’udjashiye lu luudu laye, ndu lam’atayakendakenda lu mbuka, lam’etamiye, ndu lam’etoye.”—EUHWELU K’ELEMBE 6:6, 7.

TENA dimɔtshi, ambutshi mbeyaka ndjaoka dia wambɔkɔmɔ dia nkotsha ɔkɛndɛ awɔ wa mbetsha anawɔ. Koko, etena kayangawɔ alako, vɔ mbeyaka mbɔtɔ l’okandokando l’ɔtɛ wa alako wotshikitanyi wakokawɔ mbadia kana mboka. Mbala efula, ewotɔ ndo angɛnyi mongaka suke dia mbasha alako. Ndo nto, abuku, asawo wa lo tojurnalɛ ndo sitɛ ya Ɛtɛrnɛtɛ mbishaka ambutshi alako walɔshana lam’asawɔ.

Lo wedi okina, Bible hasha tsho ambutshi alako wa kɛnɛ kahombawɔ mbetsha anawɔ, koko tɔ mbashaka ndo ɛlɔmbwɛlɔ ka shikaa ka woho wahombawɔ mbaetsha. Oko wadiɛnya avɛsa wa lo Bible wa la diko ango, ambutshi pombaka tshungolaka etena lushi tshɛ dia sawolaka l’anawɔ akambo wendana la Nzambi. Alako anɛi w’oma lo Bible wayela anɛ wambokimanyiya ambutshi nunu dia vɔ mbetsha anawɔ awui wa Nzambi.

1. Nyɛnya ananyu wetshelo wakokawɔ nkondja oma lo diangɔ diakatongama. Ɔpɔstɔlɔ Paulo akafunde ate: “Akambu wa [Nzambi] ndu wulu andi wa pundju la efanelu kandi la [Nzambi] waki komenamaka umaka etungelu k’andja wambenama kakiane. Antu wambumana akambu ako fundu uma lu diango diakandatungi.” (Romo 1:20) Ambutshi kokaka nsala tshɛ dia nkimanyiya anawɔ dia mbɔsa Nzambi oko Onto la mɛtɛ, lo mbaɛnya wetshelo wakokawɔ nkondja oma lo diangɔ diakatongama ndo mbakimanyiya dia vɔ nshihodia waonga waki Nzambi wɛnama oma lo diangɔ sɔ.

Yeso akakambe la yoho ya wetshelo shɔ etena kakandetshaka ambeki ande. Ɛnyɛlɔ, nde akate ate: “Nyendi okone weli fudu ya l’ulungu, yo hayutuneka, hayutunaka, hayutumbaka diango lu apenge, keli Shenyu leli l’ulungu atuyileshaka. Nyu hanyuyileki ushinga a wulu uka?” (Mateu 6:26) Lo divɛsa nɛ, Yeso akatɔtɔmiya woho wele Jehowa la ngandji ndo la kɛtshi. Koko, nde kokomɛ lâsɔ ato. Nde akakimanyiya ambeki ande dia vɔ nkana yimba woho wakɛnɛmɔlɛ Nzambi anande waonga asɔ.

Sɔlɔmɔna nkumekanga ka lomba akatɛkɛta dia lomba la lôtɔ lakasha Nzambi tɔnɔna, ndo nde akakambe la ditongami dia totshitshɛ sɔ dia ntɔtɔmiya wetshelo w’ohomba efula. Nde akafunde ate: “We kanga nende, utshu le tonona, kutendi ditshelu diato, ku we ayuyala la yimba. To kema la uwandji, umendji, kana umbuledi. To tatumbaka mbu ya nde yato lu  nshi y’owo, tatusanganyaka mbu ya nde yato lu nshi ya dinela.” (Tukedi 6:6-8) Ande yoho ya wetshelo ya dimɛna yɛnya ohomba wa ndjadjɛ eyango wakokaso nkotsha ndo nkamba la wolo wakatosha Nzambi dia mbakotsha lee!

Ambutshi kokaka mbokoya yoho ya wetshelo ya dimɛna yakakambe la Yeso nde la Sɔlɔmɔna shɔ, lo nsala awui wayela anɛ: 1) Lo mimbola anawɔ etamba ndo nyama yalekawɔ nanga. 2) Lo mbeka akambo efula wendana la etamba ndo nyama yakɔ. 3) Lo mɛnya wetshelo wakokawɔ nkondja lo dikambo dia Nzambi oma lo diangɔ diakatongama sɔ.

2. Nyokoya dionga diaki la Yeso otsha le anto wakandetshaka. L’atei w’anto tshɛ wakasɛnɛ, Yeso aki l’akambo woleki ohomba wa mbuta. Koko, nde aketsha wenya ande efula paka lo mboka ambola. Nde akayashaka efula lo tokanyi ndo lo nsaki y’anto wakandetshaka. (Mateu 17:24, 25; Mako 8:27-29) Woho akɔ wâmɛ mbele, ambutshi wekɔ la wetshelo w’ohomba efula wahombawɔ mbetsha anawɔ. Ndo dia nkondja etombelo w’ɛlɔlɔ, vɔ pombaka mbokoya Yeso ndo nkeketsha anawɔ dia mbatɛ kɛnɛ kele l’etema awɔ aha la mboka wɔma.

Ko kayotota naka ana wambɔkɛnɛmɔla dionga dia kɔlɔ kana hawodje yimba lo wetshelo w’ohomba wawaetshawɔ? Tɔsɛdingole woho waketshaka Yeso apɔstɔlɔ ande. Tena dimɔtshi, vɔ wakawane wolo ndo vɔ komonga suke dia nkondja wahɔ oma l’ɛlɔlɔ waya lo monga l’okitshakitsha. Koko, Yeso akatetemala monga la solo dia lotutsha ndo akawaetsha mbala la mbala ohomba wa monga l’okitshakitsha. (Mako 9:33, 34; Luka 9:46-48; 22:24, 25) Ambutshi wokoya Yeso mingolaka anawɔ la lotutsha tshɛ ndo naka ekɔ ohomba vɔ mboholaka wetshelo akɔ wâmɛ mbala la mbala edja ndo anawɔ wamboshihodia ohomba wa wetshelo akɔ dimɛna. *

3. Nyetsha oma l’ɛnyɛlɔ kanyu. Ayonga dui dia lomba dia ambutshi nkamba la dako diakasha ɔpɔstɔlɔ Paulo Akristo waki la Rɔma. Nde akâfundɛ ate: “Ndu we latetshaka akina, okoko wa na wahayayaetsha weme? We latetshaka untu wati: Tuvaki, ku weme mvuaka?”—Romo 2:21.

Dako sɔ diekɔ ohomba efula nɛ di’ana sɛngiyamaka efula oma lo kɛnɛ kasala ambutshi awɔ oleki kɛnɛ katawɔ. Lo mɛtɛ, ambutshi wasɛna lo yoho yɔtɔnɛ l’ɛtɛkɛta awɔ kimanyiyaka anawɔ dia vɔ mpokamɛ kɛnɛ kawaetshawɔ.

4. Nyotate mbetsha ananyu oma ko tɔkɛndakɛnda tawɔ. Timɔtɛ laki misiɔnɛrɛ w’osekande la ɔpɔstɔlɔ Paulo aki la lokumu la dimɛna efula le anto wa lo ngelo kande. (Etsha 16:1, 2) Ɔkɔkɔ ɔmɔtshi aki nɛ dia “umaka dikenda” nde aketshama “afundelu w’ekila.” Nyango Timɔtɛ nde la tshɛnde kombâdiɛka tsho Afundelo koko wakôkimanyiya dia nde nkana yimba l’akambo wa mɛtɛ wa lo efundelo ɛsɔ.—2 Timote 1:5; 3:14, 15.

Lɛnɛ akokanyu nkondja ekimanyiyelo

Ɛmɛnyi wa Jehowa wambotondja ekanda efula wakalɔngɔswama dia nkimanyiya ambutshi lo yoho ya lânde dia vɔ mbetsha anawɔ akambo wa mɛtɛ wendana la Nzambi. Ekanda ɛmɔtshi wakalɔngɔswama djekoleko dia nkimanyiya ana. Ekanda ekina kokaka nkimanyiya ambutshi ndo ana weke l’ɛnɔnyi dikumi l’ɛmɔtshi dia vɔ sawolaka dimɛna lam’asawɔ. *

Lo mɛtɛ, la ntondo k’ambutshi mbetsha anawɔ akambo wendana la Nzambi, vɔ pombaka mbeya ekadimwelo wa ambola amɔtshi wa wolo wakoka anawɔ mboka. Ɛnyɛlɔ, ngande wakokanyu nkadimola ambola wayela anɛ: Lande na katshika Nzambi asui? Asangoya Nzambi lo dikambo dia nkɛtɛ? Lende ele wanɛ wavɔ? Ɛmɛnyi wa Jehowa wayɔngɛnangɛna dia kokimanyiya woho wa wɛ nkondja ekadimwelo wa ambola asɔ ndo wa ambola akina wakokayɛ ndjaoka dia wɛ la ase nkumbo kayɛ ndjasukanya la Nzambi.—Jakoba 4:8.

[Nɔte ya l’ɛse ka dikatshi]